Savali a Faiaoga Asiasi
O Uiga Paia o Iesu Keriso: E Agaalofa ma Agalelei
Ia suesue ma le agaga tatalo lenei savali ma saili ia iloa mea e faasoa atu. O le a mafai faapefea e le malamalama i uiga paia o le Faaola ona faateleina lou faatuatua ia te Ia ma faamanuiaina ai i latou o loo e tausia e ala i le faiaoga asiasi? Mo nisi faamatalaga, alu i le reliefsociety.lds.org.
Faatuatua, Aiga, Toomaga
Afafine o Iairo, saunia e Wilson Ong
“I tusitusiga paia, o le tigaalofa o lona uiga moni lava o le ‘mafatia faatasi.’ O le isi uiga o le faaali atu o le alofatīgā, alofaootia, ma le alofa mutimutivale i se isi.”1
“E tele faataitaiga na tuuina mai e Iesu ia i tatou e faatatau i le agaalofa,” na saunoa ai Peresitene Thomas S. Monson. “O le tagata pipili i le taelega i Petesa; o le fafine ua molia i le mulilua; o le fafine i le vaieli o Iakopo; o le afafine o Iairo; o Lasalo, le tuagane o Maria ma Mareta—o i latou taitoatasi na faapei uma lava o lē na manua i le ala i Ieriko. Sa taufai moomia uma e i latou taitoatasi le fesoasoani.
“I le pipili i Petesa, na fetalai atu i ai Iesu, ‘Ina tu ia i luga, ave ia lou moega, ma ia e savali.’ I le fafine agasala na aumai ai le fautuaga, “Alu ia oe, aua e te toe agasala.’ Ina ia fesoasoani ia te ia o le na sau e utu vai, na Ia saunia se vaipuna “e puna i luga i le ola e faavavau.’ I le afafine na oti o Iairo na oo mai i ai le poloaiga, “Funa e, ou te fai atu ia te oe, ia e tulai.’ Ia Lasalo i le tuugamau, ‘Ina sau ia i fafo.’
“Sa faaalia e le aunoa e le Faaola le le faatapulaaina o le agaalofa. … Ia tatou tatala atu le faitotoa o o tatou loto, ina ia mafai e Ia—o le faataitaiga soifua o le agaalofa moni—ona ulufale mai i ai.”2
Mau Faaopoopo
Salamo 145:8; Sakaria 7:9; 1 Peteru 3:8; Mosaea 15:1, 9; 3 Nifae 17:5–7
Mai Tusitusiga Paia
“Sa ma tootutuli ai ma lo’u toalua i autafa o la ma tama teine e 17 tausaga le matua ma aioi atu mo lona ola,” le saunoaga a Linda S. Reeves, le fesoasoani lua i le au peresitene aoao o Le Aualofa. “O le tali o le leai, ae . … na ma iloaina … e … lagonaina [e le Faaola] le tigaalofa mo i tatou i o tatou faanoanoaga ma tiga.”3
O se tasi o tala ou te fiafia lava i ai mai le soifuaga o le Faaola o le tala ia Lasalo. Ua ta’u mai i le tusi paia e faapea “ua alofa lava Iesu ia Mareta, … o lona uso o [Maria], ma [lo la tuagane] o Lasalo.’”4 Ina ua mai Lasalo, na auina atu le savali ia Iesu, ae e taunuu mai o Ia ua maliu Lasalo. Na tamoe atu Maria ia Iesu, faapau i Ona vae, ma tagi. Ina ua silafia e Iesu ia Maria ua tagi, “ona tiga tele lea o lona finagalo, ma … ua tagi” (Ioane 11:33, 35).
“O la tatou matafaioi lea. E tatau ona tatou lagonaina ma vaai i ai mo i tatou lava ma fesoasoani ai i fanau uma a le Tama Faalelagi ina ia latou lagonaina ma vaai ma iloa na tauaveina e lo tatou Faaola i Ona lava luga e le gata i a tatou agasala uma, ae e faapena foi i o tatou tiga ma o tatou mafatiaga ina ia mafai ai ona Ia silafia mea tatou te lagonaina ma le ala e faamafanafanaina ai i tatou.”5