O Le Paso o le Toefuataiga
E alala le tusitala i Iuta, ISA.
O le a le uiga o le upu Toefuataiga?
“Aua ua Ou faaee i luga o oe ki ma le mana o le perisitua, lea ua Ou toefuatai ai mea uma” (MF&F 132:45).
I le foi atu i le fale mai le lotu, na manatua ai e Ana le fasi pepa laitiiti na tuuina atu e lona faiaoga ia te ia. “Tina, mate mai la! Ou te tuuina atu se lauga i le Peraimeri i le aso Sa a sau.”
“Tai manaia,” na fai mai ai Tina. “I le a?”
“Ou te lauga e uiga i le Toefuataiga. Ae ou te le mautinoa po o le a lena mea. ”
“O le Toefuataiga o lona uiga ua toe aumaia e le Atua, pe toefuatai, mea uma e finagalo o Ia ia maua e Lana Ekalesia,” le tala lea a Tina. “Na ala mai i le Perofeta o Iosefa Samita, ona Ia toe aumaia malumalu, le perisitua, papatisoga, ma le meaalofa o le Agaga Paia. A aunoa ma le Toefuataiga, tatou te le maua le Ekalesia!”
Na lue atu le ulu o Ana. “Ou te matea o lena mea e sao. Ae ou te manatu e le mafai ona ou faamatalaina e pei ona e faia.”
“Ei, e i ai sou manatu,” na fai mai ai Tina a o la taunuu atu i le fale. “Sau ta o.”
Na mulimuli atu Ana ia Tina i le potu malolo. Na amata ona la faia se paso anapo, ma o vaega sa taatitia pea i luga o se tamai laulau.
“Mafaufau i le talalelei e pei o se paso ua uma ona fai.” Sa avae i luga e tina se vaega. “E tele vaega o le ata sa i le lalolagi i taimi eseese. Ae ina ua maliu Iesu ma Aposetolo, na tele upumoni o le talalelei na leiloloa pe na suia. O na vaega o le upumoni na manaomia e toe aumaia.”
“O lea la, o le a le mea na tupu?” Sa fetuunai e Anna nisi o vaega o loo salalau.
“I le tele o tausaga mulimuli ane na valaauina e le Atua se tama talavou faifaatoaga e toe aumaia vaega uma ma tuu i latou faatasi e pei lava o le taimi a o i ai Iesu i le lalolagi. O ai la e te manatu o le tama lena?”
“Iosefa Samita!” Le tala a Anna, ao ataata. “Ou te manatu ua amata ona ou malamalama.” Sa la talanoa atili e uiga ia Iosefa Samita ma Tina ma vaega eseese o le talalelei na toe aumaia e le Atua e ala mai ia te ia.
O le vaega na totoe o le vaiaso, na tusi e Ana ma faataitai lana lauga. Sa ia tatalo i le Tama Faalelagi ina ia mafai ona ia lototele ma faasoa atu lana savali i le Peraimeri.
I le Aso Sa, ina ua oo i le taimi o le lauga a Anna, sa ia tu i luga, manava loloa, ma uu i luga se paso i luga o se laupapa ina ia mafai ona iloa e tagata uma. O vaega uma sa tuufaatasia i le paso.
“I aso la ua leva, o le tele o vaega taua o le talalelei sa i ai i le lalolagi. Ina ua maliu Iesu ma Ana Aposetolo, o nisi o vaega na leiloloa.” Na aveese e Ana ni vaega mai le paso ma tuu i lalo. “Ona valaaulia lea e le Tama Faalelagi ma Iesu Iosefa Samita o se perofeta e toe aumai vaega o loo misi o le talalelei. E taua lenei mea o le Toefuataiga.” Sa ia piki i luga se vaega o le paso e faaali atu i le Peraimeri. I le pito i tua sa i ai upu “Mana o le Perisitua.”
Ona faaali atu lea e Ana isi vaega na totoe o le paso. Sa ia faitauina le pito i tua o vaega taitasi a o lei tuuina atu i lona tulaga i le paso. “O se perofeta soifua … Aposetolo e toasefululua … galuega faalemalumalu mo aiga e faavavau … papatisoga i le faatofuina … faaeega o lima mo le meaalofa o le Agaga Paia.”
Na uu i luga e Anna le paso ua maea. “O lenei ua tatou maua vaega uma o le talalelei. O lona uiga e mafai ona tatou vaai i le ata tele o le auala e mafai ai ona tatou maua le fiafia ma toe nonofo ma le Tama Faalelagi i se aso. Ou te faafetai i leToefuataiga. I le suafa o Iesu Keriso, amene.”