Seia Tatou Toe Feiloai
O Le Kerisimasi Moni
Mai le “O Le Kerisimasi Moni,” Liahona, Tes. 2005, 12–15.
O le Kerisimasi moni lava e oo mai ia i latou o e taliaina Keriso i o latou olaga.
I le tusi puupuu a Paulo i Kalatia, sa ia faaalia ai le popole tele i lo latou le talitonu aliali ma lo latou faagaloina o ana aoaoga e uiga ia Keriso. Na ia tusi atu ia te i latou: “Ae lelei le maelega i le mea lelei e le aunoa, aua nei gata ina o ia te outou o au. Lau fanau e, ou te toe aoao ai i ou faatiga seia tino Keriso i totonu ia te outou” (Kalatia 4:18–19). I se isi faaupuga, na faaalia e Paulo o ia o loo puapuaga i le tiga ma le popole seia “tino” Keriso i totonu o i latou. O le tasi lea ala o le faapea “ia Keriso,” e pei ona faaaogaina soo e Paulo lena faaupuga i ana tusitusiga.
E mafai ona avea Keriso o se vaega o olaga o tagata, ma pe a tupu moni lava lea tulaga, o se tagata ua “ia Keriso”—ua “tino” Keriso i totonu ia te ia. O lenei mea ua muai faamoemoe ia tatou tauaveina Keriso i o tatou loto ma avea o Ia ma faatosinaga sili i o tatou olaga. O Ia ua le na o se upumoni lautele po o se mea moni i le talafaasolopito, ae o le Faaola o tagata i soo se mea ma taimi uma lava. Pe a tatou taumafai e avea e faapei o Keriso, o le a “tino” o Ia i totonu o i tatou; Afai tatou te tatalaina le faitotoa, o le a Ia ulufale mai; afai tatou te sailia Lana fautuaga, o le a Ia fautuaina i tatou. Mo Keriso ina ia “tino” i totonu o i tatou, e tatau ona tatou maua ai se talitonuga ia te Ia ma Lana Togiola. O sea ituaiga talitonuga ia Keriso ma le tausia o Ana poloaiga e le o ni avega mamafa i o tatou luga. O nei mea, ua saoloto ai tagata. O lenei Alii o le filemu o loo faatalitali e tuu mai le filemu i le mafaufau, lea e mafai ona tatou uai uma atu ai i lena filemu.
O le Kerisimasi moni lava e oo mai i le tagata lea na te avea Keriso i totonu o lona olaga o se mana gaoioi, ola ma le faatupulaia.
I ona manatunatuga i le vaitau o le Kerisimasi, sa tusia ai e James Wallingford laina nei:
O le kerisimasi e le o se aso po o se vaitau, ae o se tulaga o le loto ma le mafaufau.
Afai tatou te alolofa i o tatou tuaoi e pei o i tatou lava;
afai tatou te matitiva i la le agaga i lo tatou mauoa ae tatou te mauoa i le alofa tunoa i lo tatou mativa;
afai e le saili e ia ana lava mea, ae onosai ma agalelei;
afai e fesili mai so tatou uso mo se areto ae tatou tuuina atu i tatou lava nai lo lena; afai e gafoa aso taitasi i avanoa ae faaiuina i mea ua ausia, e tusa lava po o le a le laitiiti—
ona avea ai lea o aso uma ma aso o Keriso ma o le Kerisimasi e latalata mai lava pea.
(I le Charles L. Wallis, lom., Words of Life [1966], 33) …
Afai e te manao e maua le agaga moni o le Kerisimasi ma tofo i lona suamalie, sei ou tuuina atu lenei fautuaga ia te oe. I le taimi o le pisi o aso fiafia o lenei vaitau o le Kerisimasi, ia saili se taimi e liliu atu ai lou loto i le Atua. Atonu i itula filemu, ma i se nofoaga filemu, ma i ou tulivae—na o oe pe faatasi ma e pele—e avatu le faafetai ona o mea lelei ua oo mai ia te oe, ma fesili atu mo Lona Agaga ia mafai ona mafuta ia te oe a o e taumafai ma le naunautai e auauna atu ia te Ia ma tausi Ana poloaiga. O le a Ia taitai oe i Lona aao ma o le a tausia Ana folafolaga.