Alualu i Luma o le Tagata Lava Ia i le Gafa o Lou Aiga
E alala le tusitala i Manaus, Pasila.
E na o maua ma lou tuagane tagata o lo’u aiga i le Ekalesia—ia o le mea lena sa ou manatu i ai a o lei amataina lau galuega o talafaasolopito o aiga.
Sa ou tolopoina lava i taimi uma le faia o la‘u gafa. Ae o lo‘u naunau e auauna atu i se misiona na taitai atu ai au e faatutu ni sini e fesoasoani e saunia au lava ia e avea ma se faifeautalai e sili atu ona lelei. Faatasi ai ma le fesoasoani a se epikopo musuia, sa ou filifili loa e amata ona galue i le Alualu i Luma o le Tagata Lava Ia. Ina ia mafai ona ausia ni sini ma galuega faatino o galuega lelei, sa manaomia ona ou aafia i gafa. O lea na ou amata galue ai.
Ou te iloa na taialaina au e le Agaga, aua o se tasi po o le Aso Sa, ina ua faatoa tolu itula o galue, sa tupu se mea ofoofogia.
O le taimi lava na ou amata ai, sa ou manatuaina o le tama o le tama o lou tama matua sa avea ma kovana o le setete o Amasona, Pasila. O lea sa ou taina ai lona suafa i totonu o se masini o le sailiga i le initoneti, ma i lou tei, sa ou maua ai se itulau o le Wikipedia e uiga i le tama o le tama o lou tama matua ma le tina o le tama o lo‘u tama matua! Sa vave ona ou iloaina ai taleni ma meaalofa a i laua o loo ia te au, ma sa amata ona faatupuina lagona fiafia i totonu ia te au. Ae sa i ai pea le tele o isi mea ina ia iloaina.
I le vaavaai ai i ala o fesootaiga i le itulau, sa ou matauina ai se tasi ua fai mai “family tree.” Sa ou kiliki i ai, ma sa ou maua ai le tele o lala o lo‘u aiga ou te lei iloaina sa i ai. Ae o le mea sa sili ona ou tosina i ai o le igoa o le tuafafine o lou tama matua, o Rosalina Meireles, lea na nofo moni lava i Iuta.
Sa ou tei lava. Sa ou manatu na o maua ma lou tuagane ni tagata o le Ekalesia. Mata o i ai moni lava nisi tagata o le Ekalesia i lo‘u aiga? Ina ua ou kiliki i luga o lona igoa, sa ou vaaia se sootaga i se itulau o le Facebook, lea sa ou faafesootaia ai o ia. I totonu o aso e lua sa ou maua ai se savali mai ia te ia, ma faamaonia mai ai matou te aiga ma o ia foi o se tagata o le Ekalesia.
Sa ou lagonaina le matua faafetai lava i le Tama Faalelagi mo le faatagaina o au ou te lagonaina lea olioli tele sa ou lagonaina i lena taimi.
Sa faaauau pea ona ou saili mo o‘u tuaa ua maliliu, ma sa faamanuiaina au e le Tama Faalelagi i le tele o igoa o le aiga e mafai ona ou ave i le malumalu. Ae sa Ia fesoasoani foi ou te maua ai tagata o loo soifua o le aiga o e o loo faamaoni i le talalelei toefuataiina a Iesu Keriso. Ma ou te nofo aitalafu ai i le Alualu i Luma o le Tagata Lava Ia, le galuega o talafaasolopito o aiga, ma lo‘u naunau e auauna atu i se misiona.