Tali mai Taitai o le Ekalesia
Pe Faapefea ona Iloa le Uiga Moni o le Kerisimasi
Saunia e Peresitene Dieter F. Uchtdorf
Fesoasoani Lua i le Au Peresitene Sili
Mai le Faigalotu o le Kerisimasi a le Au Peresitene Sili 2010.
Pe a tatou saunia mo le Kerisimasi e ala i le mafaufau loloto i lona uiga moni, ua tatou saunia e maua le Keriso ma Lana savali. Se‘i ou fautuaina atu ni mea se tolu e mafai ona e manao e suesue, mafaufau loloto, ma faaaoga i lenei vaitau o sauniuniga.
Muamua, ia olioli i le soifua mai o lo tatou Faaola. Ua tatou faamanatuina le soifua mai o le Alo o le Atua, le Foafoa, lo tatou Mesia. Tatou te olioli o le Tupu o tupu na afio mai i le lalolagi, na soifua mai i se faatanoa vao, ma na soifua i se olaga atoatoa. Ina ua soifua mai Iesu, sa matua tele naua le olioli i le lagi na le mafai ona taofiofia (tagai i le Luka 2:8–14).
Lona lua, mafaufau loloto i Lana faatosinaga i o tatou olaga i aso nei. O le Kerisimasi o se taimi mo le manatuaina o le Alo o le Atua ma le faafouina o lo tatou naunautaiga e tauave i o tatou luga Lona suafa. O se taimi e toe iloilo o tatou olaga ma iloilo o tatou mafaufauga, lagona, ma amioga. Tau ina ia avea lenei taimi o se taimi e manatua ai, o le loto faafetai, ma o se taimi o le faamagaloga. Ia avea ma se taimi e mafaufau loloto ai i le Togiola a Iesu Keriso ma lona uiga mo i tatou taitoatasi patino lava. Ia avea faapitoa lava o se taimi o le toe faafouina ma le toe tautinoga e ola i le afioga a le Atua ma ia usiusitai i Ana poloaiga. E ala i le faia o lenei mea, tatou te faamamaluina o Ia e sili atu nai lo le mea tatou te mafaia i moli, meaalofa, po o pati.
Lona tolu, ia vaavaai pea mo Lona afio mai. E ui lava o le vaitau o le Kerisimasi e masani lava o se taimi mo le toe tepa i tua ma le faamanatuina o le soifua mai o lo tatou Alii, e foliga mai ia te au e tatau foi ona avea o se taimi o le vaavaai atu i le lumanai. Sei o tatou vaavaai atu i luma. Sei o tatou saunia mo lena aso faamanuiaina pe a toe afio mai o Ia. Sei o tatou atamamai e pei o na tagata anamua o e na vaavaai atu mo Lona afio mai.
Ou te tatalo i lenei vaitau ma o taimi uma, o le a tatou vaai i le mama aiai o le tala o le soifua mai o le Faaola ma lagonaina le agaga faafetai faamaoni mo Lona soifuaga, aoaoga, ma le taulaga faaola mo i tatou. Tau ina ia mafai e lenei loto faafetai ona uunaia i tatou e faafouina lo tatou naunautaiga e mulimuli ia te Ia. Tau ina ia mafai ai foi ona taitai atu ai i tatou e faalatalata atili atu i o tatou aiga, la tatou ekalesia, ma o tatou uso a tagata. Ma tau ina ia tatou tulimatai pea i lena aso faamanuiaina pe a toe savalia e le Keriso toetu le lalolagi o lo tatou Alii, lo tatou Tupu, ma lo tatou Faaola faamanuiaina.