Fesili & Tali
“Ou te lagona lou le agavaa e avea ma se peresitene o le vasega o Tamaitai Talavou. E mafai faapefea ona avea a’u ma se taitai e sili atu ona lelei?”
Afai e te lagona le le atoatoa pe a e mauaina se valaauga, o loo e i ai i se au lelei. O Ieremia, Enoka, ma Iosefa Samita na talavou uma lava ma na lagona uma lava le le agavaa ina ua latou maua o latou valaauga faaperofeta, ae na faaaogaina pea i latou e le Alii e faalautele ai Lona malo. E pei lava ona faaaogaina e le Alii perofeta anamua e faataunuu ai mea tetele, a o e tatalo ma faalagolago ia te Ia, e mafai ona Ia faaaogaina oe.
Atonu o le mea sili e mafai ona e faia mo tagata o lau vasega o le avea ma a latou uo. Aoao o latou igoa. E mafai ona e tatalo mo i latou i aso taitasi ma atonu e mafai foi ona e anapogi mo i latou pe afai o loo latou tauivi. Mafaufau e fesili atu e uiga i o latou olaga i fafo atu o le ekalesia, ma ataata ma faatalofa atu ia te i latou pe a e vaai ia te i latou, ma nonofo faatasi ma i latou i le lotu po o le aoga. Ia mataala ma vaavaai solo mo i latou o e atonu e manaomia se alofa faaopoopo ma le lagolago.
Ma aua le fefe e fesili atu mo se fesoasoani. O le a le tuulafoaiina lava oe e le Tama Faalelagi—ua Ia tuuina atu ia te oe ni fesoasoani ma faufautua matutua. O le a latou fesoasoani ia te oe, ma e faapena foi o Ia.
E pei ona saunoa mai Peresitene Gordon B. Hinckley (1910–2008): “Tootuli i ou tulivae ma ole atu mo faamanuiaga a le Alii; ona e tulai lea ma fai le mea ua poloaiina ai oe. Ona tuu atu lea o le mataupu i aao o le Alii. O le a e iloa ai ua e faataunuuina se mea e sili atu ma lona tau” (“Mo Tina ma Tamaitai o le Ekalesia,” Liahona, Nov. 2003, 114).
Ia Avea o se Uo
I le avea ai o se peresitene o le vasega, sa ou matua lagonaina foi lo‘u le agavaa. Ae e taua le taumafai ia maua e tamaitai talavou le lagona o le alofaina ma le faaaofia ai. Avea ma se uo e lagolago ma faalogo i ou fesoasoani pe a faia faaiuga. Fai se faataitaiga amiotonu ma taumafai e ola i tulaga faatauaina o Tamaitai Talavou, ae aua e te faamoemoeina oe lava ina ia atoatoa. Pau le mea o loo faamoemoe le Tama Faalelagi e mo oe ia faataitai. Afai e te valaau atu ia te Ia, o le a Ia tuu atu ia te oe le malosi ma le taitaiga e te manaomia.
Rebecca N., 16 tausaga, New Hampshire, ISA
Auauna Atu ma le Lotomalie
Sa ou lagonaina le mea lava lea e tasi, ona sa avea au ma peresitene o le vasega a le Maea Meite. O loo mafai pea ona ou manatua le lagona sa i ai a o ou ulu atu i le ofisa o le epikopo mo le faatalanoaga. Sa mafai ona ou teena, ae sa ou iloaina e le o se tofiga mai lo‘u epikopo—o se valaauga mai le Atua. O le a fesoasoani le Tama Faalelagi ia i tatou e faataunuu o tatou valaauga pe afai tatou te naunau e tuuina atu i tatou lava ia te Ia ma ia lotomaualalo.
Nicole P., 16 tausaga, Filipaina
Alofa Ia I Latou E Te Aoaoina
Ina ia avea ma se taitai e sili atu, e tatau ona e alofa moni ia i latou e te auauna atu i ai. Lafoai soo se lagona le fiafia ma o le faamagalo atu o le a manaomia. E mafai ona e tatalo e iloa lo latou taua e pei o le Atua. Tatalo ina ia lagonaina le alofa ua ia te Ia mo oe faapea foi tagata o lau vasega. Ou te iloa mai aafiaga e mafai ona fesoasoani le alualu i Luma o le Tagata Lava Ia ia te oe e atiina ae ai uiga auau mama ma tulaga faatauaina e manaomia e faataunuu ai lou valaauga. O le a tuu atu e le Atua ia te oe le mana e te manaomia pe afai e te fesili atu mo lena fesoasoani.
Mary B., 16 tausaga, Uosigitone, ISA
Amata i le Mea o Loo e I Ai Nei
E mafai ona e avea ma se taitai sili atu ona lelei e ala i le faaaogaina o uiga auau mama e te manao ia maua. Tatalo mo le Agaga e faatasi ma oe pe a e faia faaiuga. Tatalo ina ia gauai atu i manaoga o tamaitai talavou. E tele mea e mafai ona e faia e avea ai ma se taitai e sili atu ona lelei, ae sa ou iloaina o le laasaga muamua lava i taimi uma o le talitonu e te mafaia.
Savanna P., 15 tausaga, Texas, ISA
Auai i le Malumalu
Ina ua faatoa valaaulia au o se peresitene o le korama a tiakono, sa ou le mautinoa pe faapefea ona faateleina lou faaleagaga. Sa amata ona ou faia le talafaasolopito o aiga, e masani lava i aso Sa taitasi. Sa ou alu i le malumalu i taeao uma o aso Toonai. O la‘u sini o le ave o igoa o alii mo papatisoga ma faamauga i le tele o taimi ou te mafaia ai. Ina ua uma ona ou alu i le malumalu i vaiaso taitasi, sa ou lagona le sili laitiiti atu o le faaleagaga, ma o le auala lena na sili atu ai ona lelei lau fesoasoani i la‘u korama.
Josh B., 13 tausaga, Iuta, ISA
Faatino le Musumusuga
Afai ua tuuina atu e le Alii se valaauga ia te oe, ona o loo i ai se galuega e mafai ona e faia. E tatau ona tatou ole atu i le Atua, e pei ona fai mai Iakopo 1:5. E ala i le mana o le Agaga Paia, o le a faaali ia i tatou le mea e tatau ona tatou faia (tagai i le 2 Nifae 32:5). Faatasi ai ma Lana fesoasoani, e mafai ona tatou “iloa ai le moni o mea uma” (Moronae 10:5). Ona tatau lea ona tatou mulimuli i le musumusuga ua tatou maua. E i ai sau tautinoga loloto faapea talu ai ona o le Alii e taitaia i tatou, e mafai e i tatou uma ona faalautele o tatou valaauga.
Lucy D., 17 tausaga, Falani
Fuafua ni Gaoioiga Faagaeetia
Fai soo fonotaga ma lau au peresitene ma fuafua ni gaoioiga faagaeetia e fetaui ma manaoga ma mea e fiafia i ai teine. Afai ua le auai se tamaitai talavou i lau vasega, ia tau atu ia te ia na e misia lava ia. O se tasi o mau na fesoasoani ia te au o Mosaea 18:9.
Karen P., 16 tausaga, Mekisiko