O Lau Vavega o le Kerisimasi

Joan Burton Stott, Kalefonia, ISA

I le taimi o le tautoulu o le 1968, na talosaga mai lo matou epikopo i ou matua pe mafai ona la tautino atu se tupe mo le fausiaina o le Malumalu o Provo Iuta. E leo toe faia e uarota lena mea i le taimi nei, ae sa masani ai i lena taimi. Na tautino atu e lo‘u tama le I.S. $1,000. E mafai ona foliga mai e le o se tupe tele, ae sa tele ia i matou. Sa faigaluega lo‘u tama i ni galuega se lua e fesoasoani e lagolago ai se atalii i le kolisi, se atalii i le misiona, ma le fanau e toalima i le fale.

Ina ua faanonofo i matou e lo‘u tama i lalo mo se aufono a le aiga ma ta’u mai ia i matou na ia tautino atu le $1,000 agai i le malumalu, ou te manatua lou mafaufau, “E mafai lava ona e tautino atu se $1 miliona aua o aofaiga uma e lua e le mafai ona ausia.” Sa le mafai ona ou talitonu sa ia tautino atu se aofaiga tele faapea, ma ua itiiti ifo ma le fa masina matou te faaputuputu ai le tupe.

Na matou filifilia ni auala se fa e fesoasoani ai ia maua le tupe: o le a matou taofia le tuuina atu o meaalofa i lena Kerisimasi ma foai atu le tupe sa tatau ona faaaluina i meaalofa; o matou ma ou uso o le a foai atu a matou tupe mai le tausitama; o lou tuagane laitiiti o le a faia ni galuega eseese e maua ai se tupe; ma o le a matou o o se aiga i se faatoaga o le lotoifale, e piki apu i aso taitasi mo ni nai vaiaso, ma foai atu le tupe maua.

Na matou afifiina faameaalofa se pusaseevae o le a tuu ai a matou tupe teu, sa faaopoopo atu i ai se ata o le malumalu ma se ata o Iesu Keriso, ma tuu le pusa i luga o se tama‘i laulau. Na faatupulaia le fiafia ao faateleina a matou foai. Na suia la matou taulai atu mai meaalofa sa matou mananao i ai i la matou meaalofa mo le Faaola. Ou te matuai talisapaia le meaalofa na Ia tuuina mai i fanau a le Atua—Lona soifua—na ou manao e toe faafoi atu se mea ia te Ia.

O le pikiina o apu na iloa mulimuli ane o se auala sili ona faigata ma le faamalieina e maua ai se tupe. Sa matuai faavaivai tagata, ae sa faamalosia i matou ma tauia a o matou faaaluina le taimi faatasi o se aiga. Sa amata ona matou “fili faatasi o [matou] loto i le lotogatasi ma le alofa o le tasi i le isi” (Mosaea 18:21).

A o latalata mai le Kerisimasi, ou te autilo i totonu o le pusa o le foai, ae sa masani lava ona le faamalieina au. E ui lava i a matou taumafaiga, sa matou mamao ese mai la matou sini.

Sa ou lagona le fiafia, e ui i lea, e uiga i la matou filifiliga ina ia lafoai meaalofa. Sa ou iloaina o a matou osigataulaga sa laiti, ae sa ou faatuatua o le a fiafia le Faaola.

I se tasi aso sa fofogaina mai e lo‘u tama ua matou ausia la matou sini, ma ua ia foaiina atu le tupe. Ou te le‘i iloaina lava pe na faapefea ona matou vave maua le isi vaega.

O le faataunuuina o le tautinoga a Tama i lena Kerisimasi o se vavega lava. Ae mo au, o le vavega moni e faapea e ala i le tuuina atu nai lo le taliaina, sa ou latalata atili atu ai i le Faaola. Na sili atu lena mea nai lo soo se meaalofa o le Kerisimasi na mafai ona ou maua. I le fitu tausaga mulimuli ane na toe faafoi mai ai le meaalofa ia te au a o ou tootuli ai i le fata faitaulaga i le Malumalu o Provo ina ia faamauina mo le olaga nei ma le faavavau atoa i lou toalua.