O se Molimau o le Faaola o Iesu Keriso
Saunia e Peresitene Boyd K. Packer(1924–2015)
Peresitene o le Korama a Aposetolo e Toasefululua
I le taimi o lona 54 tausaga o se Pulega Aoao ma le lona 45 tausaga o se Aposetolo, o se molimau faapitoa “o le suafa o Keriso i le lalolagi atoa” (MF&F 107:23), na tuuina mai ai e Peresitene Packer lena molimau ma le lotomaualalo. A o lei maliu o ia i le aso 3 Iulai, 2015, na talosagaina e Peresitene Packer le faasoaina atu o nei tusiga mai i lana auaunaga i le Liahona. I le agaga o le vaitau o le Kerisimasi, latou te faamamafa atu ai lona molimau ma le alofa mo le Faaola o Iesu Keriso.
Faamatalaga mai le Christ and the Young Child, saunia e Carl Heinrich Bloch
Ou te alofa i le Alii
“Ou te fiafia i le Kerisimasi. O loo i ai se agaga i le taimi o le Kerisimasi. Sa oo ifo i luga o le lalolagi—e le na o tagata o le Ekalesia ae i le lalolagi atoa—o se molimau ma se mau o Iesu o le Keriso. … I le avea ai ma se auauna a le Alii, o se tasi o le Toasefululua, ou te iloa o Iesu o le Keriso. …
“Ou te alofa i le Alii. Ou te fiafia i Lana galuega. Ou te alofa i Le Ekalesia a Iesu Keriso o le Au Paia o Aso e Gata Ai ma molimau atu ia te Ia o lo tatou Matai ma o la tatou Uo.”1
O A’u o se Molimau ia te Ia
“E i ai nisi o mea e paia tele ma e faigata ona talanoaina. …
“Ua le ona o le lilo ae ona o le paia tele; e le tatau ona talanoaina, ae ina ia taulotoina ma ia puipuia i se tulaga e sili ona loloto ma faaaloalo.
“Ua ou malamalama nei i le uiga o le faamatalaga a le perofeta o Alema:
“‘… Ua tuuina mai i le toatele ia latou iloa mealilo a le Atua; e ui i lea ua tuuina i latou i lalo o se poloaiga saolele ia latou lē faaali atu ia mea e tau lava e tusa ai ma le vaega o lana afioga na te tuuina mai i le fanauga a tagata e tusa ma le gauai ma le filiga latou te tuu atu ia te ia.
“‘Ma o lea, o ia o lē e faamaaa lona loto, o ia lava lea na te maua le vaega itiiti o le afioga; ae o ia o lē e lē faamaaaina lona loto, o ia lea e tuuina mai i ai le vaega tele o le afioga, seia oo ina tuuina mai ia te ia, ia ona iloa mealilo a le Atua, seia oo ina ia iloaina atoatoa’ (Alema 12:9–10). …
“O lenei, ua tatou tau fai mafaufau faatasi lava pe aisea ua tatau ai ona valaauina se tasi e pei o au nei i le tofiga paia o le aposetolo. O loo i ai le tele o tulaga manaomia e le o mafai ona ou maua. O loo ou matuai mafaufau lava ina ia auauna atu e tusa ma le mea o loo manaomia. E pei lava ona sa ou mafaufau i ai, sa na o le tasi lava le mea na ou iloa, o le pogai lea, ona o loo ia te au lena molimau.
“Ou te tau atu ia te outou ua ou iloa o Iesu o le Keriso. Ua ou iloa o loo soifua o Ia. Sa fanau o Ia i le vaeluaga o taimi. Sa aoaoina Lana talalelei, sa faaosoosoina, ma sa faasatauroina. Sa toetu o Ia i le aso lona tolu. O ia o le faapolopolo o le toetutu. Ua ia te Ia se tino o aano ma ivi. Ou te molimau atu ai e tusa ma lenei tulaga. Ua avea au ma se molimau ia te Ia.”2
Sa Ia Taliaina le Sala
FAAMATALAGA MAI LE E LE O LOU LOTO, A O LOU FINAGALO, SAUNIA E Harry Anderson
“Ao lumanai le Faasatauroga ma tua atu, e toatele tamalii na tuuina atu ma le naunau o latou soifua i faatinoga lē manatu faapito o le lotonuu. Peitai e leai lava se tasi na feagai ma mea sa onosaia e Keriso. Sa i Ona luga le avega o agasala a tagata uma, o tausalaga uma o tagata. Ma totoe ai i se tulaga le mautinoa, le Togiola. E ala i Lona naunautai, sa mafai ai e le alofa mutimutivale ma le faamasinoga tonu ona toe faaleleia, lagolagoina tulafono faavavau, ma faataunuu ai le puluvagaina lea semanu e le mafai ona togiolaina le tagata pe ana leai.
“O Lana filifiliga na talia ai le sala e avea ma sui o tagata uma, mo le aofaiga atoa o amioleaga uma ma mea pi’opi’o; o le faasaua, ola le mama, o le faapi’opi’o, ma le talapepelo; o tuinanau; o fasioti tagata ma le faataugā ma le matautia—o mea uma na i ai po o mea uma o le a tulai mai i lenei fogaeleele. I lona filifilia ai, sa Ia fetaiai ai ma le malosi matautia o lē ua le gata i le tino pe oo foi i ai tiga faaletino. O Ketesemane Lena!
“Pe na faapefea ona faataunuu le Togiola, tatou te le iloa. E leai se tagata ola na matamata a o Liliuese le amioleaga ma lafi i le maasiasi i luma o le Malamalama o lena tagata e mama atoatoa. E le mafai e le amioleaga uma ona tape lena Malamalama. Ina ua maea ona fai le mea na fai, ua uma ai foi ona totogi le sala. Ua le taulau le aia a le oti ma seoli ia i latou uma o e ua salamo. Ua iu ina saoloto tagata. Ona mafai lea e tagata uma e ola ona filifili e mulimuli i lena Malamalama ma togiolaina ai.
“O lenei taulaga e le i’u, ‘e faaolaina tagata uma lava i [lenei] Togiola a Keriso, pe a tausia poloaiga ma sauniga o le Talalelei’ (Mataupu Faavae o le Faatuatua 1:3).”3
O Le Faiaoga Sili
“I le gasologa o au taumafaiga e aoao atu Lana talalelei, ua ou oo ina iloa ai o Ia, o Iesu Keriso, le Alo o le Atua, e Toatasi Na Fanaua e le Tama. Ou te tu ma le migao i Ona luma ma le loloto o le manatu i mea na Ia aoaoina, ma le loloto o le manatu i le ala na Ia aoao ai. E le mafai e soo se tasi o i tatou ona naunau e aoao atu e pei ona Ia aoao atu. E le mafai e soo se tasi o i tatou ona naunau ina ia faapei o Ia. O Ia e le na o se faiaoga; o Ia o le faiaoga sili.”4
O Upumoni E Sili Atu Ona Taua Le Iloaina
“I le avea ai ma tagata soifua atonu e le mafai ma e moni lava e le mafai ona tatou malamalama atoatoa pe na faapefea ona faataunuu e le Faaola Lana taulaga togiola. Ae mo le taimi nei e le taua tele le pe faapefea e pei o le aisea o Lona mafatiaga. Aisea na Ia faia ai mo oe, mo au, mo tagata ola uma? Sa ia faia ona o le alofa i le Atua le Tama ma tagata uma. ‘E le sili lava le alofa o se tasi i lenei alofa ia tuuina atu e se tasi lona ola e sui a’i ana uo’ (Ioane 15:13).
“I Ketesemane na tuua ai e Keriso Ana Aposetolo ia tatalo. Po o le a lava le mea na tupu iina, e lava lo tatou malosi e iloa ai! Ae ua tatou iloa lava ua uma ona Ia faia le Togiola. Sa naunau o Ia Na te tauaveina i Ona lava luga ia mea sese, ma agasala, ma tausalaga, o masalosaloga ma atuatuvalega a le lalolagi uma. Na mafatia o Ia mo i tatou ina ia tatou le mafatia. E toatele tagata sa mafatia i puapuaga ma ua oti i se oti e matautia le tiga. Ae o Ona mafatiaga e sili mamao atu i lo latou uma. …
“Na ese lava Ona mafatiaga mai isi mafatiaga uma na muamua pe talu mai foi ona Ia tauaveina i Ona lava luga o faasalaga uma ua tuuina i le tagata. Vaai faalemafaufau i lena mea! E leai sana aitalafu e totogi. E leai sana mea sese na fai. Peitai, o le tauaofaiga uma o le tausalaga, o le faanoanoa ma le faavauvau, o tiga ma le faamaasiasia, o mafatiaga uma faalemafaufau, lagona, ma faaletino i le tagata—Na Ia oo i nei mea uma. E na o le Toatasi lava i le talatusia uma o talafaasolopito o le tagata, e matuai aunoa ma se agasala, e agavaa e tali atu mo agasala ma solitulafono a tagata ola uma, ma onosaia le tiga e o faatasi ai mo le totogiina.
“Na Ia ofoina atu Lona soifua ma fetalai, “Ona o Aʼu o lē ua aveina i oʼu luga agasala a le lalolagi’ (Mosaea 26:23). Na faasatauroina o Ia; Na maliu o Ia. Sa le mafai ona latou aveeseina Lona soifua mai ia te Ia. Na finagalo malie lava o Ia e maliu. …
“Afai na e tautevateva pe na e se i se taimi, afai ua e lagona ua faatagataotauaina oe e le fili, e mafai ona e agai i luma ma le faatuatua aua nei e toe fealualua’i solo i le lalolagi. O loo i ai i latou ua saunia e toe taialaina oe i le filemu ma le saogalemu. O le alofa tunoa o le Atua, e pei ona folafolaina mai i tusitusiga paia, e oo mai ‘ pe a uma mea uma e mafai ona tatou i faia’ (2 Nifae 25:23). O le mafaia o lenei mea, ia te au, o le upu moni e sili ona aoga le iloaina.
“Ou te folafola atu e mafai ona oo mai le taeao pupula o le faamagaloga. Ona toe oo mai ai lea ‘o le filemu mai le Atua, o loo silisili lava i mea uma e manatu i ai’ (Filipi 4:7) i lou olaga, o se mea e pei o se la oso, ma oe ma Ia ‘e le toe manatua a [outou] agasala’ (Ieremia 31:34). O le a faapefea ona e iloa? O le a e iloa lava! (Tagai Mosaea 4:1–3.)”5
O La‘u Molimau
“Mai tausaga uma ua ou ola ai ma aoao atu ma auauna atu, ma mai le faitau miliona o maila ua ou faimalaga ai i le salafa o le lalolagi, ma i aafiaga uma ua ou maua, e i ai se upumoni maoae ou te fia faasoa atu. O lau molimau lea i le Faaola o Iesu Keriso.
“Na tusia e Iosefa Samita ma Sini Rikitone lenei mea ina ua mavae se aafiaga paia:
“‘Ma o lenei, ina ua mavae le tele o molimau ua tuuina mai e uiga ia te ia, o le molimau mulimuli lenei, i molimau uma, ma te tuu atu e uiga ia te ia: O loo soifua o ia!
“‘Aua sa ma vaai ia te ia’ (MF&F 76:22–23).
“Oa laua upu o au upu ia.”6
“O se faamanuiaga mo au i lou olaga atoa le mafai ona ou tuuina atu la’u molimau faapitoa o Iesu o le Keriso, le Alo o le Atua. Ou te molimau atu i le lotomaualalo uma, ae ma le mautinoa atoatoa, o Ia o le Alo e Toatasi Na Fanaua e le Tama. O Lana Ekalesia Lenei; o loo Ia pulefaamalumalu ai ma taitaia lenei galuega. O Ia o lo tatou Faaola. Ou te iloa o loo soifua o Ia, ma ou te iloa o Ia. Ou te molimau atu ai i nei mea i le suafa o Iesu Keriso, amene.”7