O Le Fai Atu o Fesili Sa‘o i le Ala Sa‘o
E alala le tusitala i Kalefonia, ISA.
Aoaoina o le auala e saunia ai mo le, fatuina, fesili atu, ma tali i fesili e mafai ona faia se eseesega tele i le auala e aoao mai ai ma aoao atu ai le talalelei.
Ata na saunia e Digitalstorm/iStock/Thinkstock
O loo i ai le tele o mea e mafai ona alu i totonu o le fausiaina o se lesona maoae po o se talanoaga maoae o le aiga. O gaoioiga, suesuega filemu, ma le galulue faatasi ma vaega o ni nai meafaigaluega a faiaoga o le talalelei—pe o i latou o i ai ni valaauga aloaia, faiaoga volenitia o le seminare po o le inisitituti, po o matua—atonu e faaaogaina e faaleleia ai a latou aoaoga.
Ae e aofia ai tomai e manaomia e lua pe tolu e tatau ona maua e faiaoga uma o le tomai lea e faaaoga lelei ai fesili: e fatu ai i latou, e fai atu ai, ma e uunaia ai tali anoa. Na saunoa mai Peresitene Henry B. Eyring, le Fesoasoani Muamua i le Au Peresitene Sili, “O le fai atu, ma le taliina o fesili o le totonugalemu lea o aoaoga uma lava ma le aoao atu uma lava.”1 Ina ia avea ma se faiaoga mataalia, e matuai taua tele le mauaina o lenei tomai. O ni fautuaga nei e lima mo le faia o lena lava mea.
Saili Tali e Sili Ona Aoga
O le nofo ai i se vasega i le avea ai ma se tagata aoao ma faalogologo i se fesili maoae e faamanatu mai ai ia i tatou le mana o le aoao atu e silisili ona lelei. Ae o le auala e fatufatu ai ma fai atu ai fesili aoga ua le mautonu lea ma e foliga taufaafefe i le tele o faiaoga. O le mea e lelei ai, o se tomai e mafai ona aoaoina e soo se faiaoga.
A o e fatuina ni fesili, taumafai e fuafua po o a ituaiga tali o le a maua mai i le fesili. O nisi fesili e saili ai se ituaiga faapitoa o tali—se tali e fetaui tonu lava i le fesili na fai. O na fesili e fetaui lelei i se vasega o le matematika (“O le a le eria o lenei sikuea?”) po o se vasega o le saienisi (“O le a le fua e puna ai le vai?”) aua e na o le tasi le tali ua maua ma faamaonia. E aoga foi i le suesueina o le talalelei o se auala e faatulaga ai mea moni e amata ai se talanoaga ae laitiiti se aoga e faaosofia ai se talanoaga i le vasega. I se tulaga lautele, e ui i lea, o na ituaiga o fesili e faaaoga soo ona e faigofie ona saunia.
Tatou te fai atu fesili e pei o, “O le a le mea na tatou suesue i ai i le taimi ua tuanai?” po o le “Tau mai ia te au le igoa o le …” O nei fesili e masani ona tupu ai le le tali mai o i latou o loo e aoaoina. Latou te manatu latou te iloa le tali ae e le o mautinoa ma ua fefefe e taumafai se mate. E masani ona faamatala lenei filemu e le faiaoga o se faailoga o le faigata tele o le fesili, ae o le mea moni o le fesili ua maoti tele e maua mai ai se mea e sili atu ona anoa mai tagata o loo aoaoina nai lo o se tali vave.
Ina ia mafai ona faaosofia le talanoaga i le potuaoga, o se fesili e sili atu ona aoga o se fesili e valaaulia ai le eseese o tali magafagafa. Pe a e fai atu lenei ituaiga o fesili, e mafai ona e iloa ai mea o loo mafaufau i ai i latou o loo e fesili i ai e uiga i le mataupu po o mea o loo latou felafolafoai ai i le taimi o la outou talanoaga. Mo se faataitaiga, Moronae mataupu 1 o loo i ai ni fuaiupu se fa, o fuaiupu taitasi ua tumu ini lagona loloto. O le a le mea e tupu pe a e faitauina uma fuaiupu e fa ma i latou o loo e aoaoina ma fesili atu, “O fea o na fuaiupu na mafua ai ona e maua ni lagona e sili ona loloto i lou loto?” Tuu atu ia i latou se minute e amata ai ona talanoa. Talu ai e te le o fesili mo se tali patino, toeitiiti lava o mea uma lava latou te fai atu e aoga. Na ou faaaogaina lena lava mataupu i le fesili tonu lava lena ma maua ai ni tali ofoofogia na faatupuina ai ni talanoaga loloto.
O ituaiga o fesili na e valaaulia ai mafaufau ma lagona e ese mai fesili e manaomia ai le manatua pe na o se faamatalaga o mea moni. O loo i ai se taimi ma se nofoaga mo le manatuaina, ae e mafai ona fai atu e le faiaoga le tele o mea e tatau ona manatua, e pei o, “Manatua le taimi mulimuli na tatou talanoa ai e uiga i le Moronae 1 ma le ala na maua ai i fuaiupu taitasi ni lesona mamana … .” I le na o le fai atu o lena mea, o le a faatupu ai manatu, ma o tagata o loo aoaoina o le a sili atu ona feosofi mai ma faaauau le talanoaga. Ae ui i lea, afai ou te fai atu, “O le a le mea na tatou talanoa i ai i le taimi mulimuli?” O le a masani lava ona ou feiloai ma le filemu ma faailo e le iloa le tali.
Fai Atu le Fesili Lona Lua
Ata © iStock/Thinkstock
O se fesili masani e faaaoga e faiaoga o le talalelei o ni suiga o lenei mea: “E faapefea la ona taua le faatuatua i lou olaga?” I le taimi muamua e foliga mai o se fesili taua, ae afai e te mafaufau i ai, e na o le tasi lava le tali: “E taua tele.” E moni, o le faatuatua (ma soo se isi mataupu faavae) e taua tele, ae o lena ituaiga o fesili e masani lava e leai se taunuuga pe a nao ia lava aua e tatau pea ona e fai atu le fesili tulitatao, o se mea e pei o le: “Aisea e taua tele ai?” po o le “E mafai ona e tuuina mai ia i tatou se faataitaiga o se taimi na taua ai i lou olaga?” O na fesili e mafai ona amata ai se talanoaga i le vasega, o lea e tatau ona fai sao atu ae faamisi le fesili muamua. O le fai atu o le fesili lona lua o le a faasaoina le taimi ma faatumauina ai le faaleleia atili o le talanoaga.
Tusi Au Fesili Muamua
E matuai aoga lava le faia o mea e lua a o e saunia lau lesona. Muamua, tusi le fesili i se pepa. Aua le na o le mafaufau i ai; tusi i lalo. Filifili ma le faaeteete upu ma faitau i ai mo ni nai taimi ina ia mautinoa ua fai atu e le fesili le mea e te manao e fesili atu ai i se auala manino.
Lona lua, fesili ia te oe lava, o le a le mea o le a fai e i latou o loo ou aoaoina pe a ou fai atua lena fesili? Na i ai taimi sa ou manatu ai na i ai sau fesili lelei lava ua tusia, ona ou faia lea leotele, ma a o ou vaai faalemafaufau i la‘u vasega, sa ou iloa ai o le a leai se taunuuga lelei. E mafai ona lelei le fesili mo se isi vasega, ae mo la‘u lava vasega faapitoa sa ou iloa o le a le manuia, o lea sa ou toe amata ai. Ou te iloa afai e i ai ni au fesili se lua pe tolu ua matuai lelei-ona mafaufauina ma lelei ona tusitusia i lau fuafuaga o le lesona, e mafai ona ou amataina ni talanoaga. O le a masani lava ona mulimuli mai ai isi fesili, ae e tatau ona ou mamanuina lelei ni vaega amata.
E aoga foi lenei auala i le aiga. E foliga mai e tele ni a tatou talanoaga o le talalelei e tupu fua mai i lo‘u aiga pe a sologa lelei fesili ma tali, ae na i ai taimi pe a i ai se mea e sili atu ona ogaoga ma tuusao e manaomia ona fai atu i se tamaitiiti faapitoa. I na tulaga sa ou aoaoina afai ou te saunia ai ni fesili faapitoa, ma aoaoina le tuuina atu, ma galue i ata o taunuuga e ono i ai, na sili atu ona lelei mea uma. O na fesili e lei tusia i luga o pepa; na tusia i lo‘u loto, ma e mafai ona ou faaaogaina pe a manaomia.
Aua le Fefe i le Leai o se Tali
Ata © iStock/Thinkstock
Afai na e fatuina se fesili e matuai lelei moni lava, se tasi e afua ai ona mafaufau ma faatagaina ai ni avanoa mo ni tali se tele, ona aua lea le ofo pe afai e manaomia e tagata ni nai sekone e sue ai ni a latou tali. E mafai ona i ai se filemu, ae aua le faateia. Fesili Laualuga—ia e manaomia ai ni tali faapitoa (faataitaiga, “E fia Mataupu Faavae o le Faatuatua o i ai?”)—e vave ona tali mai. Fesili loloto—ia e manaomia ai tali—e masani ona manaomia le taimi e mafaufau ai tagata aoao. I lenei tulaga, o le filemu o lau uo. Ia tuu atu ina ia tupu, ma pe a amata ona o i latou o loo e aoaoina e tali atu ai, o le a e fiafia le ofo i mea latou te fauina.
Fai atu Fesili e uiga i Tusitusiga Paia
Afai e te manao moni lava e faalautele lou tomai e fatufatu ai ma fai fesili mataalia, e tatau ona e aoao e fai atu fesili lelei e uiga i tusitusiga paia i lou taimi e suesue ma sauniuni ai.
O se tasi auala o le faitauina o tusitusiga paia o le faia lea mo le uunaiga faaletagata lava ia. Tatou te faitau i mataupu ma fuaiupu e olioli ai i le matagofie o loo i ai i totonu, ma ia faagaeetia ai i mataupu faavae ma le upumoni. O se auala e ese, e sili atu ona aoga mo matua po o faiaoga i le sauniaina o lesona, o le faitau i tusitusiga paia ma sailia tusitusiga paia i fesili. Ou te faia lenei mea e faaosofia ai ni manatu a o ou taumafai e filifili le auala sili e fesoasoani ai ia i latou o loo ou aoaoina ia malamalama i tusitusiga paia. O se faataitaiga lenei: Mataupu Faavae ma Feagaiga 18:10 o loo i ai se fuaitau lea ua lauiloa ma e siitia o tatou agaga, “Ia manatua ua tele lava le taua o agaga i le silafaga a le Atua.” Ou te fiafia i lena mataupu faavae, ae afai pau lava le taua ia te au o le musuia ai, ona le aoga lea i se vasega.
Ae faapefea pe a ou mafaufau loloto i lenei fesili a o ou suesue ma saunia: “O le a la le taua o se agaga? Ou te iloa e ese le taua, ae pe mafai ona tatou tuu i ai se tulaga faatauaina?” I se tasi po i le aiga o le afiafi sa fai mai ai e se tasi o o‘u afafine lena lava fesili, ma na faaosofia ai le tele o talanoaga. O le mea lenei na matou faaiu i ai: O le taua o se agaga o le tau lea o le a totogi e se tasi mo ia, ma o le a le tau na totogi e lo tatou Tama mo o tatou agaga? Na ia totogia i le toto o Lona Alo atoatoa. O le mea lena ua taua tele ai agaga taitasi e le mafai ona faamatalaina. E le mafai ona matou taunuu atu i lena faaiuga e aunoa ma le fesili tuusao atu i le tusiga lava ia.
E mafai ona faigofie ona faaaoga lena talanoaga i le laulau ai i isi nofoaga o le aoao atu. Afai e te manao e fai atu ni fesili e sili atu ona lelei i e o loo e aoaoina, fai atu fesili moni e uiga i tusitusiga paia a o e faitau ma suesue ma saunia. Ia tumu i le fiailoa, ma aua le fefe i le sailiili loloto. O tusitusiga paia e mafai ona tumau pea le moni e tusa lava pe faateleina le suesueina. O le faateleina o lou lelei o le faia o fesili e uiga i tusitusiga paia a o e suesue, o lou lelei foi lena i le faia o na fesili lelei ia i latou o loo e aoaoina.
Faaauau Pea Ona Atiina Ae Lou Tomai o le Aoao Atu
O loo i ai se faiga masani o le vaai i ni faiaoga maoae ma mafaufau na latou fananau mai lava faapena. Latou te foliga mai o loo i ai se meaalofa o le a faigata mo le tele o tagata ona maua. Ioe, o le tomai e aoao atu o se tasi o meaalofa o le Agaga (tagai i le Moronae 10:9–10), o lea la o nisi o tomai ua e vaaia atonu o se meaalofa mai le lagi—ae o se meaalofa e tatala ia i latou uma o e saili atu i ai. O le mea lea o mea e fai e faiaoga maoae o loo avanoa foi ia te oe e ala i le suesue ma le faataitai. O le aoao e fai atu ni fesili aoga o se matuai tomai lava. A o e saili ma le agaga tatalo le tomai e faia ai lena mea, o le a e iloa ai e taua tele le fatuina o fesili ia e faaosofia ai i latou o loo e aoaoina e mafaufau, ma o le a faateleina ai lou tomai e faia lena lava mea e tasi.