Na Latou Iloaina Iosefa
O le a le ituaiga tagata na i ai Iosefa Samita, le Perofeta o le Toefuataiga? E mafai ona tatou aoao atili e uiga ia te ia e ala i le faitauina o mea na tau mai e i latou o e na feiloai ia te ia ma i latou na silafia lelei o ia.
O Tagata e Le O Ni Mamona Na Feiloai Ma Iosefa
Ata na tusia e Brooke Smart
Sa faagaeetia le tele o tagata e le o ni Mamona na feiloai ma Iosefa. Mo se faataitaiga, o Josiah Quincy, o le na faauu mai Harvard ma o le na vave ona avea ma pulenuu o Boston, na asiasi atu ia Iosefa Samita i Navu. Sa ia fai mai o Iosefa o se “aafiaga e tatau ona faamatalaina,” se tagata na fanau mai e taitai, “o loo i ai se foliga faaletaitai … lea sa foliga mai e faigofie le usitai i ai.” Sa ia fai mai o tusi lesona o le lumanai e mafai ona faasino ia Iosefa Samita o le puna “o uunaiga mamana i taunuuga o ona tagatanuu.”1
O Tagata Fou Liliu Mai na Feiloai ma Ia
O tagata liliu mai na feiloai ma Iosefa mo le taimi muamua na faamatalaina foi ma le faamemelo. E lima aso talu ona taunuu i Navu mai Egelani, na tusi atu ai William Clayton i lona aiga: “O le po anapo na toatele i matou [na] faatasi ma Uso Iosefa, na olioli o matou loto e faalogologo ia te ia o talanoa e uiga i mea o le Malo, o ia o se tagata agaalofa ma e faauo e pei lava o soo se tasi o i tatou. Matou te lagonaina le alofa tele ia te ia ma o le a faapena foi outou.”2
O Mary Alice Cannon Lambert, sa 14 tausaga ina ua ia taunuu i Navu, na fai mai, “Na i ai ni nai alii taitai iina e faafeiloaia le vaega o le au paia na o mai [i le vaa]. Na i ai le Perofeta o Iosefa Samita faatasi ma na uso. Na ou iloaina o ia i le taimi lava na vaai ai o’u mata ia te ia, ma i le taimi lava lena na maua ai la’u molimau o ia lava o se Perofeta a le Atua.”3
Tagata Na Silafia Lelei o Ia
John M. Bernhisel, o se tagata muamua o le Ekalesia, o se fomai. Sa ia mautotogi i le fale o le au Samita mo ni nai masina. Na ia saunoa ai o Iosefa Samita na i ai ni “mana malolosi tau i le mafaufau,” ma le malosi tele, “ma se atamai loloto o le natura faaletagata,” “faamasinoga, e silasila mamao,” ma se “fiafia i le faamasinoga tonu,” “O ia o se tagata e agalelei ma loto fesoasoani, lima foai ma agaalofa, e faauogofie ma mata fiafia, ma o loo ia te ia se mafaufau e manatunatu loloto ma magafagafa lona uiga. O ia o se tagata e faamaoni, tautala sa’o, e le fefe ma tutoatasi, ma e aunoa o ia mai le [faafoliga pepelo] o se ituaiga o tagata e le mafai ona maua.”4
O Howard Coray, o se tasi o failautusi a Iosefa, sa faagaeetia i le tomai o le Perofeta e feiloai ai ma ituaiga uma o tagata—o fomai, loia, ositaulaga, ma isi—o e na o mai e “tuuina atu ni fesili faigata.” Sa ia tusia o Iosefa “sa naunau i taimi uma e fai mea na manaomia mai ia te ia. … Sa ou faafetai moni lava, i le vaaia o ia i taimi uma lava e lagolelei, e oo lava i le faatasi ai ma le tagata e sili ona lelei i le faasaienitisi, ma le saunia [vave, saunia] o ona uiga faaalia o le a ia taliina ai a latou fesili.”5
O Daniel D. McArthur, o le na mulimuli ane taitaia se kamupani a taavale tosolima i le Vanu o Sate Leki, na faapea mai, “O la’u molimau o ia lava o se Perofeta moni a le Atua soifua; ma o le tele lava o taimi na ou faalogo ai i ana tautalaga ma vaai ai i ana gaoioiga o le tele foi lea o le faatalitonuina o au na ia vaai moni lava i le Atua le Tama ma Lona Alo o Iesu Keriso.”6
Perofeta na Iloaina o Ia
Na saunoa mai Peresitene Ioane Teila, lea na avea ma Peresitene lona tolu o le Ekalesia, “Afai e te fesili ia Iosefa poo le a le ituaiga tagata e i ai Atamu o le a ia ta’u atu ia te oe i le taimi lava lena na te faamatalaina atu lona fuaitino ma ona foliga ma mea uma e uiga ia te ia. Atonu e mafai ona e fesili ia te ia po o a ituaiga tagata e i ai Peteru, Iakopo ma Ioane, semanu e mafai foi ona ia tauina atu ia te oe. Aisea? Aua na ia vaai ia te i latou.”7
O le tei o le Perofeta, o Iosefa F. Samita, le Peresitene lona ono o le Ekalesia. Sa ia tusia, o Iosefa Samita “Na faatumulia o ia i le natura faaletagata sili ona tamalii ma mama, lea na masani ona faailoa mai i faafiafiaga mama—i le taalo polo, i le tauivi ma ona uso … ma faafiafiaina ia lava; … na tumu o ia i le olioli; na tumu o ia i le fiafia; na tumu o ia i le alofa, ma isi uiga tamalii uma ia e faia e tagata maoae ma le lelei, ma i le taimi lava e tasi e faigofie ma mama; … na ia te ia le mana, e ala i le alofa tunoa o le Atua, e malamalama ai foi i fuafuaga uma a le Silisili Ese. O uiga na o le Perofeta o Iosefa Samita.”8