O Se Lesona mai i Lo’u Tama

Saunia e Elder David A. Bednar

O Le Korama a Aposetolo e Toasefululua

Sa ou aoaoina se lesona maoae mai lo‘u tama e uiga i le pule ma le mana o le perisitua.

Sa ou ola ae i se aiga sa i ai se tina faatuatua ma se tama ofoofogia. O lou tama sa le o se tagata o la tatou Ekalesia ae e sau pea i sauniga a le Ekalesia faatasi ma lo matou aiga. Sa ia faiaoga i le au sofipolo a la matou uarota ma fesoasoani i gaoioiga a le Sikauti.

Ao ou laitiiti sa ou fesili i lou tama i le tele o taimi i vaiaso taitasi po o afea e papatiso ai o ia. Sa tali mai lo‘u tama i taimi uma, “Tavita, o le a ou auai i le Ekalesia pe a ou iloa o le mea sa’o lea e fai.”

I se tasi Aso Sa sa ou fesili ai i lo‘u tama po o afea e papatiso ai o ia. Na ona ia ataata lava ma fesili mai ia te au. “Tavita, o la outou ekalesia o loo aoao mai o le perisitua sa aveesea mai le lalolagi i aso anamua ma ua toefuatai mai e ala mai i avefeau faalelagi. Afai ua i ai i la outou ekalesia le perisitua toefuataiina o le Atua, aisea ua toatele naua ai alii i la outou ekalesia e leai se eseesega i le faia o o latou tiute o le perisitua nai lo alii i la‘u ekalesia?”

Sa matuai nimo i lo’u mafaufau. Sa leai sau tali mo lou tama.

Sa ou iloaina o alii o loo umia le perisitua e tatau ona ese o latou aga nai lo isi alii. O e umia le perisitua e tatau ona e le gata ina maua le pule o le perisitua ae tatau foi ona faamaoni ma agavaa e faaaoga le mana o le Atua.

Sa ou filifili ou te le manao lava e avea ma se faataitaiga leaga i lo‘u tama. Sa na o lou manao lava ia avea ma se tama lelei. E manaomia e le Alii i tatou uma o ē umia le perisitua ina ia faamamalu, amiomama, ma tama lelei i taimi uma ma i nofoaga uma.

I ni nai tausaga mulimuli ane, sa papatisoina ai lo‘u tamā. Sa ou maua le avanoa e faaee ai i ona luga le Perisitua Arona ma le Perisitua Mekisateko. O se tasi o aafiaga maoae i lou olaga o le vaai lea i lou tama ua maua le pule ma le mana o le perisitua.