O Le Tala i le Soifua Mai o Iesu

I aso la ua leva, o se tamaitai e igoa ia Maria ma se alii e igoa ia Iosefa na fuafua e faaipoipo. O Maria ma Iosefa o ni tagata lelei o e na faia le mea e finagalo le Atua ia la faia.

I se tasi aso na sau ai se agelu ia Maria ma ta‘u atu ia te ia o le a ia maua se pepe! Na tau atu e le agelu e tatau ona ia faaigoa le pepe ia Iesu. O le pepe o le a avea ma le Alo o le Atua, o le Faaola.

O Maria ma Iosefa sa tatau ona malaga atu i se nuu e taua o Peteleema e totogi ai lafoga.

Sa matuai tumu le taulaga. O lea na nonofo ai Maria ma Iosefa i le po i se nofoaga e tuu ai manu. O lena po na fanau ai le pepe o Iesu!

Na faaali mai se fetu fou i le lagi.

O leoleo mamoe sa tausia mamoe i fanua lata ane. Na o mai agelu ma ta‘u atu i leoleo mamoe ua fanau mai le Faaola. Sa o atu leoleo mamoe e saili ma ifo i le pepe o Iesu.

I se nuu mamao, na vaaia ai e Makoi le fetu fou. Sa latou iloa o se faailoga ua fanau mai le Faaola. Sa latou mulimuli i le fetu seia oo ina latou maua Iesu. Na latou tuuina atu ia te Ia ni meaalofa ma ifo atu ia te Ia.

Ina ua o ese Makoi, na asiasi atu se agelu ia Iosefa. Sa tau atu e le agelu o loo manao se tupu leaga e faatiga ia Iesu. Na tau atu e le agelu e tatau ona o ese lo latou aiga i Aikupito ina ia saogalemu.

Sa nonofo Iosefa, Maria ma Iesu i Aikupito seia oo ina saogalemu e toe foi atu ai i Isaraelu. Na tupu ae Iesu i se nuu e taua o Nasareta. Sa ia aoao e fesoasoani, agalelei, ma le usiusitai. Sa ia aoaoina mea uma e tatau ona ia aoaoina ia avea ai ma lo tatou Faaola. Sa ia mulimuli pea i le fuafuaga a le Atua mo ia.

I le Kerisimasi, tatou te faamanatuina ai le fanau mai o Iesu Keriso. Faasino atu i ata o nei tagata, o e na avea o se vaega o le tala i le Fanau mai o Iesu.

E mafai ona tatou faapei o Maria ma Iosefa e ala i le faia o mea ua finagalo le Atua ia i tatou e fai.

E mafai ona tatou faapei o leoleo mamoe ma Makoi e ala i le mulimuli ia Iesu Keriso.

E mafai ona tatou faapei o agelu i le tauina atu i isi le tala moni o le Kerisimasi.

Ma e mafai ona tatou faapei o Iesu e ala i le mulimuli i Lana faataitaiga!