Sa Lei Tuua Na o Au

Robert Hoffman, Uosigitone, ISA

Ao nofonofo i totonu o se lua na faatatope le eliina mo le puipuiga, sa ou tilotilo atu agai i le oneone i le itu i matu—agai i Iraki. O le aso 24 o Tesema i le taimi o le Osofaiga a Iraq, ma sa tofia au i le tiute o le leoleo e amata atu i le vaeluaga o le po.

Sa na o au le Au Paia o Aso e Gata Ai i lau vaegaau, o lea sa sili atu ai le tuuatoatasi o au i aso fiafia. Na matou i ai i le toafa o Saudi Arabia talu mai Aokuso, ma o lenei ua oo mai le Kerisimasi ma se po malulu, ma fetu e faamalamalama ai. Sa momoe le tolauapiga, ma sa i ai ni nai ou itula faatasi ma faaputuga oneone lanu moana-efuefu ma o‘u mafaufauga.

Sa ou mafaufau i lou toalua ma le atalii i Georgia, ISA, ma lou misia tele o faafiafiaga i le aiga—o le laau, o meaalofa, o se taumafataga moni o le Kerisimasi. Ona ou amata lea ona mafaufau loloto i le tala o le Kerisimasi.

Sa ou mafaufau e uiga i le po na fanau mai ai Keriso. Sa ou mafaufau pe na faapefea le pogisa pe na i ai se masina e lafo ifo lona pupula i le laufanua ma pe na o se malamalama o le fetu. Talu ai sa leai se moli eletise i Lona soifua mai, masalo o le po sa pei lava o le po lenei ua ou molimauina. O le a leai ni faafiafiaga—na o le pogisa, ma le po filemu.

Ona oso faafuasei mai lea o se manatu matagofie ia te au. Ua tau mai e le Tusi Paia na o mai Makoi mai Sasae, sa taitaiina mai e se fetu na faaali mai i le lagi i le po. A o ou tilotilo atu i le lagi pogisa, sa ou iloaina ai sa ou i ai i le itu i sasae o Peteleema ma o se tasi o nofoaga autu o le malamalama i le taimi lena o Baghdad. Atonu na o mai Makoi mai se nofoaga e le mamao mai le mea sa ou i ai? O le a le fetu na susulu? Pe o i ai pea i le lagi? Pe mafai ona ou vaai i ai?

Sa ou tilotilo atu agai i le lagi ma le ofo i foafoaga a le Atua ma lagonaina se mafanafana na sau mai i totonu. Sa le afaina pe afai sa ou i ai i le nofoaga lava lea e tasi po o le fetu lava lea e tasi sa i le lagi. O le mea e taua o le faapea sa ou mauaina lea lava malamalama e tasi e pei o Makoi i se pepe meamea na fanau i Peteleema ma o le Tupu o tupu.

Sa le tuua na o au i lena Kerisimasi; nai lo lena, sa ou faatasia ma i latou uma o e o loo saili ia te Ia, pe o i latou o ni Makoi, perofeta, po o ni fitafita ua tuuatoatasi i se pu i le toafa. O le po lena na faamalosia ai lau molimau i le soifua mai o le Faaola, ma o le taeao na sosoo ai na i ai lava le Agaga Paia ia te au.

Nai lo le avea ai ma se faanoanoa o le Kerisimasi o le tausaga lena, na avea ma se tasi o au Kerisimasi aupito sili ona taua.