Tatou te TALANOA ia Keriso
O se Meaalofa o le Ola ma le Alofa
E alala le tusitala i Iuta, ISA.
Sa faaalia ia i matou e le meaalofa a lo‘u tina le uiga moni o le Kerisimasi.
Ata na tusia e John Luke; ata na pueina e Maridav/iStock/Thinkstock
O le tuagane o lou Tina o Ed sa i ai pea lava se alofa susulu o le olaga. Ae paga lea, sa i ai foi ia te ia se pea o fatugao e le atoatoa. Mo ni nai tausaga, sa tolopo e Ed le le aoga o fatugao e ala i le faamamaina o le toto. O togafitiga sa tiga ma e fai soo. O togafitiga taitasi na tigaina tele ai o ia seia oo i le isi togafitiga e sosoo ai, ma e oo atu i le tautoulu o le 1995, sa foliga mai o ia ua pei lava o se atigi o lona tagata fiafia sa i ai muamua.
Na iu ina tau atu e le fomai ia Ed afai na te le maua vave mai se fatugao fou o le a le toe umi lona ola. E ui e na o le tasi se fatugao e mafai ona ola ai, e lei manao Ed e fesili atu i soo se tasi ina ia foai mai se tasi o o latou fatugao ona o le tulaga lamatia e ono tulai mai i soo se taotoga. Peitai sa leai se filifiliga. Na sueina nisi o uo mamae ma tagata o aiga ia iloa ai pe tutusa o latou fatugao. E na o le tasi le tagata na tutusa atoatoa: le tuafafine o Ed, o Dottie—lo‘u tina.
I le aso 7 o Tesema, o le toatele o uo ma aiga o Ed na aufaatasi i le anapogi ma tatalo mo ia ma Dottie. O fomai tipitipi na faia le taotoga o uso e masaga. E sili atu ona manaia, o se tasi o i laua na foai atu se fatugao mo le isi. Sa uunaia Ed ma lo‘u tina ina ua iloaina e faapea i taotoga taitasi, o nei fomai e toalua la te faia mea uma la te mafaia ona la ifo lea o o la ulu ma tuu le taunuuga i aao o le Alii.
I le aso o le taotoga, na aveese ai e le fomai e toatasi se tasi o fatugao o lou tina. A o ia toe suiina o ia, na faapipii ma le faaeteete e lona uso le fatugao na foai mai i totonu o le manava o Ed.
Na faamanuiaina le taotoga, ae tatau ona faatalitali pe taliaina e le tino o Ed le fatugao fou. Sa taofia polotini i lona tino ina ia faaleleia atili ai ona avanoa, o lea sa tatau ai ona faaesea Ed i le vaavaaia ma le faaeteete ina ia puipuia o ia mai ni siama. E tusa lava pe tea o ia i tua, e tatau ona tumau pea le faaesea mai tagata uma sei vagana ai lona aiga patino. I le Po o le Kerisimasi, e ui i lea, na maua e Ed se faatagaga faapitoa e auai i le faamanatuina faaletausaga o le Po o le Kerisimasi a o‘u matua matutua.
Ao faia se ufimata, sa savali mai Ed i le faitotoa, ma agai sa‘o atu ia Dottie, ma afifi o ia i se opo maoae. A o la feopoai e le tasi le isi, e le‘i toe i ai se mata na matutu i le fale. Na mafai ona lagona e tagata uma le alofa lea na susulu mai ia i laua. Na mafatia se tuafafine ina ia mafai ona tuuina atu i lona tuagane le meaalofa o le ola. O se meaalofa o le alofa, o se meaalofa o le taulaga, o se meaalofa e le mafai ona ia saunia mo ia lava.
A o ou vaai atu ia te i laua, ma loimata ua maligi ifo i lalo i ou foliga, na manino ia te au: e mafai ona avea lenei mea e faapei o le feiloai atu i le Faaola faafesagai. Sa ia faia se mea mo i tatou lea e le mafai ona tatou faia mo i tatou lava. Ua na o Ia, e paia, sa mafai ona ia onosaia se osigataulaga sa matuai maoae naua ua mafai ai ona faamalieina le tulafono o le faamasinoga tonu. Ma ua na o Ia, e atoatoa, sa agavaa e togiola mo agasala a tagata uma ina ia mafai ai ona tuuina atu le tulafono o le alofa mutimutivale ia i latou uma o e talia o Ia o lo latou Faaola.
A o ou mafaufau loloto i nei manatu, sa ou toe tautino ia te au lava ia e faia mea uma ou te mafaia e faaali atu ai lo‘u agaga faafetai mo le Faaola ma Lana taulaga. O le a ou taumafai e ola ai i lo‘u olaga i le avea ai ma se soo ina ia i ai se aso ou te agavaa ai e ulu atu i Lona afioaga, opo mai o Ia, ma faafetai patino atu ia te Ia mo le alofa tele mo au na mafai ai ona faia sea ituaiga o osigataulaga.