O Leo o Le Au Paia o Aso e Gata Ai

Tamoe i le Malumalu

Antonella Trevisan, Udine, Italia

Ata na tusia e Stan Fellows

Ia Tesema o le 1999 sa matou sauni mo la matou malaga faaletausaga o le Kerisimasi i le Malumalu o Bern Suitiselani. O le malaga, o se tu faapitoa sa ma amataina ae e lei leva ona ma faaipoipo, o se tasi o auala matou te faamanatuina ai le soifua mai o le Faaola.

Matou te nonofo e tusa ma le valu itula i le taavale mai le malumalu, ma o le leaga o le tau na muamua atu i la matou malaga ese atu. O laau ua tase‘i i luga, o se matagi matuitui, ma auala ua aisā o le a matautia ai le malaga.

Sa ou lagonaina le le mautinoa ma na lei malamalama pe aisea na matou fetaiai ai ma le tele o faafitauli ae na matou iloa e finagalo le Alii ia matou o atu i le malumalu. Pe o le a Ia le tatalaina lo matou ala?

O lo‘u toalua, o Antonio, na ma tootutuli i le tatalo ma le ma fanau ma fai atu i lo tatou Tama Faalelagi, sei vagana ai ua Ia tau mai se mea e ese ia i matou, o le a matou agai atu mo Bern i le aso e sosoo ai.

“Afai e le mafai moni lava ona uia le auala,” na fai mai ai Antonio ina ua uma le matou tatalo, “o le a tatou toe foi mai.”

Sa ou lagonaina sa sao la matou faaiuga, ae sa ou fefe pea. O le taeao na sosoo ai, i le faatumulia i le le mautonu, sa ou manao e toe tatalo. Na fai mai Antonio ua uma ona matou mauaina la matou tali, ae na ia tootuli mai i ou tafatafa ma le alofa ma le onosai.

Ina ua matou tuua, faatoa tauvavala mai le vaveao ma o ao pogisa sa i ai i o matou luga. A o matou tietie atu, sa mafai ona ou iloa atu sina vaega itiiti o le lagi lanumoana i tafatafa o mauga. Sa faavava mai se ave vaivai o le la i ao.

Na faamalosia lo‘u faatuatua femoumouai e lena ilaila mai o le la susulu. O se vavega lava, na oso ae le la ma na agai ai i luga le vevela o le ea. Sa leai se puao, leai se aisa, leai se matagi—ae na o se aso manino, ma tulagaese le mafanafana o le taumalulu. Sa faatumulia ou mata i loimata. Sa foliga mai sa taliina e le Tama Faalelagi a matou tatalo.

Ina ua matou taunuu i Bern, sa amata ona toulu malosi le kiona ma faaauau ai pea ona toulu le kiona i le taimi atoa na matou nonofo ai. A o matou agai atu i le malumalu a o lei tafa ata o le taeao na sosoo ai, na liua le afa i se afā aisa. Mo se minute sa ou fefe, ma sa amata ona ou tamoe i le auala savali e tau atu i le malumalu.

Ona oo mai lea o se manatu i lo‘u mafaufau: “O le ala lenei e tatau ona i ai. E ee mai le lalolagi ia i tatou i faafitauli, ae e tatau ona tatou taufetuli i le filemu o le Alii o loo maua i Lona maota.”

Sa matou maua se taimi fiafia i le malumalu i lena vaitau o le Kerisimasi, ae na matou popole i la matou malaga atu i le fale. Sa faaauau pea le toulu o le kiona, ma o le ma atalii laitiiti na maualuga lona fiva. I le aso o lo matou malaga ese atu, e ui i lea, na taofi faavavega le kiona, ma na tea le fiva o le ma tama tama ina ua uma ona ia maua se faamanuiaga faaleperisitua.

A o lagolagoina i matou e le filemu o le malumalu, sa oo mai se fuaiupu o le Tusi Paia i lou mafaufau: “E i ai ea se mea e faigata ia Ieova?” (Kenese 18:14). I le agaga faafetai, na ou iloa ai e leai, e le faigata.