O Le Alii Fou
Sa na o au le ositaulaga e toaga mai i la‘u uarota fou. E faapefea ona ou aumaia isi ositaulaga i le lotu?
Ata na tusia e Greg Newbold
Ina ua siitia ese lo‘u aiga i ni nai masina ae faatoa atoa lo’u 18, sa ou mauaina au lava i se uarota fou ma ua feagai ma se luitau. I totonu o le lua vaiaso talu lou taunuu mai, na toetoe lava o ositaulaga uma ua avea ma toeaiina. Na valaauina foi au e avea ma fesoasoani muamua i le korama a ositaulaga.
I le tuuina mai ia te au o lenei valaauga, na faamalamalama mai e le epikopo sa i ai le toatele o ositaulaga i le tauvalaauga, ae e toetoe lava a leai se tasi e sau. Sa i ai ia i matou le tele o galuega e faia e uunaia ai tagata e auai mai.
“E na o le valaaulia lava o tagata e o mai,” o lana tala lea.
E na o le tasi le isi ositaulaga e sau i le lotu, o se alii e igoa ia Ryan, lea na auai mai i ni nai taimi i masina taitasi. Sa ou filifili e alu e tuitui i faitotoa o o matou tagata o le korama ua le toaaga mai ma valaaulia i latou i a matou gaoioiga. Sa ou popole, ma fefe nei latou le fiafia mai ia te au mo le valaauliaina o i latou i le lotu. Sa ou manatu latou te le‘i o mai ona ua latou le fiafia i le ekalesia. Ae sa ou manatu foi o se faataitaiga lelei mo la‘u misiona o loo loma e taumafai e valaaulia, o lea sa ou u ai o’u nifo ma amata ona valaau i isi ositaulaga po o le alu foi i o latou fale. Sa ou valaauliaina i latou i faeasaite, i gaoioiga, i le lotu.
O le mea na faateia ai a‘u ona o nisi na tali moni mai lava ma o mai. Na iu lava ina i ai sa matou vaega o ositaulaga e toafa o e na amata ona o mai i se tulaga fai soo. E le faapea ona sa latou le fiafia i le ekalesia—sa na ona latou faatalitali mo se valaaulia e o mai ai. Sa popole foi e uiga i se tulaga fou—o le auai i le lotu—e pei foi o au.
O nisi o gaoioiga sa sili atu ona faamanuiaina nai lo isi. O tagata uma na auai mai mo le volipolo, ae sa ou tauivi e aumai tagata e auai i isi gaoioiga.
O le konafesi a le autalavou o lena tausaga sa faapitoa lava le tauia a o ou vaavaai atu i nisi o nei alii talavou o tutu i luga ma fai a latou molimau. Sa ou lagonaina na ou faia se eseesega i o latou olaga.
O se tasi o eseesega na ou vaaia o Ryan sa auai i le lotu i vaiaso taitasi ma sa avea i maua ma se uo lelei.
Na ma maua uma ma Ryan le Perisitua Mekisateko pe tusa ma le ono masina talu ona ou siitia mai. Sa ou filifili e faatali seia maea la‘u misiona e auai i le kolisi ina ia mafai ona ou faigaluega e sefe mo la’u misiona. Ua uma ona maua se matata a Ryan, ma sa tonu ia te ia e le alu foi i le kolisi . A manava galuega e masani lava ona ma tafafao faatasi.
O se tasi taimi, na ma feala ai toeitiiti lava o le po atoa e taumafai ina ia uma le tusi a Alema a o faitauina e Ryan le Tusi a Mamona mo le taimi muamua. Sa faigata ae sa faatupu ai le malosi faaleagaga. Sa maoae foi le vaai i suiga na faia e Ryan i lona olaga. Sa ia lafoaia mausa tuai, na fatuina ni maua e sili atu ona lelei, ma na suia nisi o ana uo ina ia mafai ona faatasi ai ma tagata na tutusa ma ona tulaga faatonuina.
Sa ou tulimatai atu i luma i la‘u misiona talu mai lava ona amata ona ou alu i le lotu i ni nai tausaga ua mavae. Sa le mautinoa e Ryan pe o le a ia alu. A o ma tafafao, ma te talanoaina ai la‘u misiona ma lo’u fiafia e auauna atu. A o ou faamalosiau ia te ia ma tali i fesili o le talalelei, sa ou maua le mautinoa sili atu i o‘u lava tomai e auauna atu ai o se faifeautalai. O Ryan sa lava lona matua e alu ai ae sa tauivi o ia ma lana filifiliga.
“Ou te lei mautinoa pe o la‘u molimau sa lava le malosi, e ui lava ina sa ou maua se lagona lelei e uiga i le Ekalesia i lena taimi,” o lana tala lea. “Sa ou manao e alu, ae sa matuai faigata lava ona tuua le aiga.”
Na iu lava ina oo mai le aso ua mafai ai ona ou amata ona faatumuina au pepa o le misiona. Ina ua ou ta‘u atu ia Ryan, sa ia faateia a’u i le faapea mai ua ia filifili e auauna atu foi. Na taunuu mai o ma valaauga faamisiona i le po lava e tasi. Sa malaga ese Ryan e auauna atu i Kanata i le masina a‘o lei amataina la’u misiona i Farani.
Ina ua ou sau i le fale i le lua tausaga mulimuli ane, sa ou sueina uma ositaulaga sa matou galulue faatasi. O se faanoanoaga ia te au le iloaina o nisi e lei toe o mai i le lotu i le taimi na faatoa ou alu ese ai, ae sa ou fiafia lava e toe vaai ai Ryan. Sa ia auauna atu i se misiona faamamaluina, ma na pei lava o Alema ma atalii o Mosaea, sa ou maua ai le olioli sili e iloa o loo avea pea o ia ma o‘u uso i le Alii (tagai i le Alema 17:2).