Taimi e Mafaufau ai i le Fesoasoani Faapolofesa

O taitai faale-ekalesia, e le o faamoemoe pe uunaia ia avea o ni tagata atamamai faapitoa i le soifua maloloina faalemafaufau. Peitai, o tagata e pagatia i tulaga faapena, e masani ona tapa atu i o latou taitai mo se fesoasoani ia latou iloa le mea e fai.

E ui e toetoe o tagata uma o le a oo i se tulaga o luitau o le soifua maloloina faalemafaufau i ni taimi eseese o le olaga, o luitau e mafai ona matuai ogaoga ona aafiaga. O tagata e feoloolo ni ituaiga luitau o loo i ai, o le a masani ona tali atu i fautuaga o loo otooto atu i le lomiga Fetuunaiga i le Olaga Faafaifeautalai” (tamaitusi, 2013). E ui o lenei punaoa sa saunia mo faifeautalai, ae e fesoasoani e faailoa atu ai auala e mafai ai e soo se tagata ona tali atu i luitau. Ma le isi, o le lagolago ma le loto malamalama mai ia te oe, tagata o le aiga, ma isi, e mafai ona fesoasoani ai i le tagata i se luitau o le soifua maloloina faalemafaufau.

Ae peitai, afai e le tali mai le tagata i nei taumafaiga, atonu e mafai e se polofesa o le soifua maloloina faalemafaufau ona tuuina atu ni suesuega tonu faafomai.

O loo i lalo nisi o faafitauli tau i le soifua maloloina o le mafaufau, e ono manaomia ai le iloiloga mai se polofesa i le soifua maloloina o le mafaufau, ma e ono fetaiai ma taitai faale-ekalesia i totonu o a latou uarota po o paranesi.

• Mafaufauga po o taumafaiga e pule i le o la

• Lagona faaumiumi o le faanoanoa

• O le le mafai ona faia o galuega masani o le aso

• Lotovaivai, leai o se faamoemoe, ita ia te ia lava.

• Taseleina, tipiina, faaāfāina e le tagata o ia lava

• Soona popole i le faaopoopo o pauna o le mamafa, soona tele o pauna e lusi pe faaopoopo.

• Amioga po o faamatalaga e soonafai ma le le pulea pe fai soo.

• Mafauafuga po o lagona ua fai ma mausa pe tutupu soo

• Ta‘uta‘u faafia atu o faafitauli laiti

• Fefe, atuatuvale, ma mafaufauga popole e le mataofiofia.

• Faaesea

• Malosi o lagona po o uiga fesuisuiai

• Fefevale, fesasisasia‘i, faalogo i leo [i lona mafaufau]

• Amioga faalefeusuaiga e lamatia ai

• Amioga maaleale, (ita, saua, faatautee)

I tulaga nei ma isi, mafaufau i faufautua faapolofesa o se isi filifiliga e ono mafai ona fai (tagai i le “Faufautua ma Fofo Faapolofesa,” Tusitaulima Aoao, 31.2.6). E mafai e taitai o le Ekalesia ona fesootai atu i Tautua mo Aiga a le AAG (pe a fai o maua) po o le ofisa o le eria ia iloa le ala e fesoasoani ai i le tagata ma maua punaoa.