Soifua Maloloina Faalemafaufau

11:26

O le soifua maloloina faalemafaufau e aafia ai o tatou mafaufauga, lagona, amioga, ma mafutaga. O i latou e i ai luitau o le soifua maloloina faalemafaufau po o gasegase e mafai ona afaina ai i lo latou gafatia e taulima faiga masani ma mea e tatau ona fai o le olaga i aso taitasi. O tulaga faapena e masani ona faavaivaia ma le mautonu ai faalelagona le tagata, faapea foi ma i latou o e pele atoa ma taitai o loo taumafai e auauna atu i le tagata ua aafia ai.

O i latou o e e le o ni tagata tomai faapitoa polofesa faalemafaufau, e le o faamoemoeina pe uunaia ia suesueina pe tuuina atu ni togafitiga i tagata o loo tauivi ma faafitauli o le soifua maloloina faalemafaufau. Pe a foliga mai e le tali mai tagata i taumafaiga masani a taitai ina ia fesoasoani atu, e leai se tasi e tatau ona lototiga ona o lo latou le tali mai. Ae ui i lea, e tatau i taitai ona manatunatu ma le loto i ai e uunaia le tagata ia saili ia maua mai se iloiloga o le soifua maloloina faalemafaufau mai se tagata faamaonia agavaa i ia tomai (tagai i le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai [2020], 31.2.6). O le Tautua mo Aiga a le AAG (i nofoaga e maua ai) e mafai ona tuuina atu faatalatalanoaga ma ofo atu ni fautuaga i taitai e uiga i punaoa i le lotoifale mo le iloiloga o le soifua maloloina faalemafaufau. E tatau i taitai ona tagai i le “Gasegase Faalemafaufau“ i le vaega o Puanoa o Manaoga Faapitoa o le ChurchofJesusChrist.org mo nisi faamatalaga e uiga i le gasegase faalemafaufau.

Saili ina ia Malamalama

A o e talanoaina popolega o le soifua maloloina, faamautinoa e faaali atu le alofa ma le loto malamalama faapei ona faia e le Faaola. Afai sa aapa atu le tagata mo se fesoasoani, faafetai atu ia te ia mo le talosagaina o le fesoasoani. Talu ai e eseese tulaga uma ma e eseese foi tulaga o le siomaga o tagata taitoatasi, ia mafaufau ma le agaga tatalo e fai atu i le tagata fesili e pei o nei, ma faalogologo i le Agaga e fesoasoani ia e malamalama lelei i ona atugaluga ma iloatino ai ona manaoga.

Na i ai se taimi na e maua ai i se faafitauli o le soifua maloloina faalemafaufau? Afai sa i ai, o le a le umi na e maua ai i lea tulaga? O faapefea ona aafia ai lau galuega ma au mafutaga faaleaiga?
O a ni ou atugaluga sili ona tetele po o popolega i le taimi nei?
O a ni tausiga (pe afai o i ai) o loo e maua mai i se vaega e tuuina atu le tausiga mo le soifua maloloina faalemafaufau? O e mulimuli i faatonuga mai le au tausi [soifua maloloina faalemafaufau] ma po o e fiafia i le tausiga o loo e mauaina?
Pe o e lagona o lou soifua maloloina faalemafaufau o loo faasolo ina manuia, po o tumau lava i le mea e tasi pe ua atili ona faaletonu?
O faapefea mai lou feagai ai ma lou mafatiaga?
O faapefea ona taulima e tagata o lou aiga lou mafatiaga? Pe na latou fautuaina atu soo se mea e te le o faia i le taimi nei e te manatu atonu e aoga?
O a ni alagā fesoasoani o e maua?
Pe na e maua ni malamalamaaga mai le Tama Faalelagi e uiga i le tulaga o e i ai? Afai o lea, o a na malamalamaaga?

Faatasi ai ma le faatagaga a le tagata, atoa ma le faaaloalogia o ona lagona, manatunatu e faafesootai atu tagata o le aiga mo se malamalamaaga faaopoopo i le mataupu.

Fesoasoani i le Tagata

A o e fesoasoani i le tagata ia malamalama pe faapefea e o latou luitau ona aafia ai o latou olaga, mafaufau e faaaoga nisi o fautuaga nei:

Toe faamautinoa atu i le tagata e alofa le Tama Faalelagi ia te ia ma e malamalama le Faaola i ona luitau.

Fesoasoani i le tagata ia malamalama o le gasegase faalemafaufau e le o se faasalaga mai le Atua.
Fesoasoani i le tagata ia iloa o le gasegase faalemafaufau e le mafai ona faatoilaloina i le na o le naunautaiga malosi o le tagata lava ia. O le gasegase faalemafaufau e le faapea ua leai se faatuatua, uiga totino, po o le agavaa o se tagata.

Ia faaaofia le tagata i gaoioiga a le Ekalesia ma avanoa talafeagai e auauna atu ai.

Ia feutagai ma le tagata, tagata o le aiga, ma isi o e silafia lelei le tagata ina ia malamalama i malosiaga ma tapulaa o le tagata.

Mafaufau e logo le Tautua mo Aiga a le AAG (i nofoaga e maua ai) po o auaunaga i le lotoifale mo le soifua maloloina faalemafaufau e faailoa atu vaega e filifili ai mo le lagolago ma togafitiga. Ia nofouta o nisi o tulaga e mafai ona tumau mo se taimi umi o le olaga e tusa lava po o maua le tausiga e sili ona lelei.

O i latou o loo faaaogaina fualaau ma vai mai fomai e le tatau ona suia pe taofia togafitiga e aunoa ma le logoina muamua o o latou fomai.

O le pule i le ola, e masani lava o se tulaga lamatia lea mo i latou o e mafatia mai le lē lelei o le soifua maloloina faalemafaufau. Ia faamasani i faailoga lapatai mo le pule i le ola ma ia manatu mamafa i ai pe a matauina.

A foliga mai o loo “faatofa mai,” le tagata, talanoa e uiga i le pule i le ola, po o faaalia ni lagona ogaoga o le faanoanoa, ia saili vave le fesoasoani mo ia. Feutagai ma le epikopo, fomai, le aiga o le tagata, po o [tagata faigaluega o] potu o faalavelave faafuasei o le falemai. O loo avanoa foi le laina fesoasoani mo taitai. Mafaufau e valaau atu i se vaega e tuuina mai auaunaga mo faalavelave faafuasei i le lotoifale e aumai ai se fesoasoani i le taimi lava lea. Faamolemole tagai i le tusiga e uiga i le pule i le ola i le vaega o Autu o le Talalelei ChurchofJesusChrist.org mo nisi faamatalaga i le pule i le ola ma le puipuiga o le pule i le ola.
Valaaulia le tagata e mafaufau i vaega lagolago e faatautaia e le lotoifale i nofoaga o loo maua ai.

Lagolago le Aiga

O luitau o le soifua maloloina faalemafaufau o le tagata, e mafai foi ona aafia ai olaga o tagata o lona aiga. Iloilo le aafiaga o tagata o le aiga ma mafaufau i auala e sili ona lelei e auauna atu ai i o latou manaoga. Faaali le alofa ma le loto malamalama a o outou galulue ai ma tagata o le aiga.

Ia uunaia le aiga, aiga potopoto, ma isi e aofia ai e soalaupule faatasi e uiga i manaoga o le tagata ma punaoa e ono maua e fesoasoani ai (tagai i le Tusitaulima Aoao, 22.3–22.11).

Ia uunaia tagata o le aiga e saunia mo taimi e ono manaomia ai e le tagata le fesoasoani i manaoga masani o le olaga.
Pe a manaomia, ia soalaupule i auala e mafai ai e tagata o le aiga ona fesoasoani i pili, teugatupe, auala o feoaiga, ma punaoa e manaomia mo le tausiga o le soifua maloloina (mo se faataitaiga, fautuaga faapolofesa, talavai, ma le i ai i le falemai).

Ia fautuaina tagata o le aiga e aua nei soona maualuluga pe itiiti tele foi [ae fuafua tatau] mea e faamoemoe i ai. O le toe malosi/manuia e faalagolago pe fuafua i le iloa o le gasegase e maua ai ma le togafitiga ua faia i ai. I nisi o tulaga, o le mea sili lava e mafai ona faamoemoe i ai, o sina sologa manuia lea nai lo o le toe faaleleia atoatoa.

Mafaufau i alagā fesoasoani mo tagata o le aiga ma uo a i latou ua i ai tulaga o le soifua maloloina faalemafaufau.

E masani ona fesoasoani atu i latou e nafa ma le tausiga o le soifua maloloina e faailoa atu ni vaega lagolago e fitoitonu ma luitau o le tagata.

Faaaoga Punaoa a le Uarota ma le Siteki

Pe a talafeagai ai, mafaufau e fesili atu i taitai o le uarota ma isi tagata faatuatuaina e tuuina atu le lagolagosua faifaipea. Talosaga mo le faatagaga a le tagata ao lei talanoaina le tulaga ma isi.

Faailoa se tagata faatuatuaina e avea o se faufautua mo le tagata ma lona aiga, ma faamalosiau ia latou feiloai i aso faisoo.

O le tagata faufautua e tatau o se tasi e mafana lelei ma le tagata ma e mafai ona avea o se tasi o uso po o se tuafafine mo auaunaga.
Ia faaeteete e aua le tuua faufautua o le au paia i tulaga e ono faatāsina ai i latou i ni tulaga ogaoga e ono afaina ai.

Afai e talafeagai, faamalosiau i le aiga e faaaoga taitai o le Ekalesia i le auauna atu ai i lē e pele ia i latou.

Ia faamalosiau ia i latou o loo fesoasoani i le tagata e fai faatasi mea ma le tagata ae le mo le tagata (mo se faataitaiga: ave o ia i se gaoioiga po o le galulue soosootauau ma ia i se tofiga i le uelefea).

Afai e manaomia e le tagata le fesoasoani mai se tagata e tuuina atu le tausiga ona o le gasegase faalemafaufau o le tagata, tagai i le punaoa o le Lagolago mo Tagata e Tuuina Atu le Tausiga.

Fesoasoani i le tagata e faailoa i ai le fesoasoani o tomai faapitoa faapolofesa pe a tatau ai.

Faaaoga punaoa i le lotoifale e tuuina atu auaunaga e ogatasi ma mataupu faavae o le talalelei.
Faafesootai le Tautua mo Aiga o le AAG i le lotoifale po o ofisa i le eria mo nisi punaoa po o filifiliga mo fautuaga.