Punaoa Faufautua

O le a se aoaoga faavae e mafai ona fesoasoani i tagata e faatoilaloina faafitauli faaponokalafi?

O se tasi o ou tiutetauave o se tagata o le Ekalesia o le aoao atu ma molimau atu i le mama a’ia’i o aoaoga faavae o le talalelei a Iesu Keriso. E mafai ona faia lea e ala i le aoao atu o le mataupu a Keriso, e faapea e tatau i tagata uma ona faatuatua ia Iesu Keriso, salamo mai a latou agasala, ia papatisoina, maua le meaalofa a le Agaga Paia, ma tumau e oo i le iuga. Tagai i saunoaga nei, ia o loo maua foi i “Taulimaina o Ponokalafi” vaega i le ChurchofJesusChrist.org:

“O Le Mana o le Aoaoina Atu o Aoaoga Faavae”

“O Le Mataupu Faavae a Keriso”

“Taulai atu i le Mataupu Faavae a Keriso”

“Mulimuli i Aoaoga Faavae ma le Talalelei a Keriso”

O tagata taitoatasi o loo i ai le tiute mo le foia o o latou lava luitau e faatatau i ponokalafi. E tatau ona latou tauaveina le tiutetauave mo o latou lava olaga ma suiga e latou te manaomia ona fai. A o e auai i talanoaga musuia faatasi ma tagata, taitai latou ina ia saili atu i faaaliga patino faatatau i fofo. Uunai latou e saili atu i le ola tutoatasi faaleagaga e ala i taumafaiga ina ia malamalama ma faaaoga le mataupu a Keriso. O le suesue ma le tatalo e moomia i lenei faagasologa.

O loo i ai foi i tagata le tiutetauave mo le malamalama ma le talanoaina o le tiga o lo latou faaaogaina o ponokalafi ma ua aafia ai ma isi. A o outou galue faatasi ma i latou, taitai latou ina ia opogi lenei tiutetauave ma faia mea latou te mafai ona toe faaleleia ai.

O le faatoilaloina o ponokalafi e ono faigata. E tatau i tagata ona galulue e faailoa ma talanoaina mafuaaga iloga lea e tosina ai lo latou faaaogaina o ponokalafi. E taua le matauina e faapea o tali faaleagaga, e ui e taua ma fesoasoani i le faatoilaloina o ponokalafi, ae tele lava ua na’o se vaega o le fofo atoa. E tatau i tagata ona mafaufau e suesueina faafitauli o le natura faaletino , faalemafaufau ma faaagafesootai, lea e tele ina i ai lo latou sao i le faaaogaina o ponokalafi.

Aoao Atu le Aoaoga Faavae

A o e aoao atu i latou o loo tauivi ma ponokalafi, galulue faatasi e faamautu po o le fea aoaoga faavae atonu e fesoasoani ia i latou e foia tosinaga ia e mafua ai a latou amioga. Na aoao mai Peresitene Boyd K. Packer: “O mataupu faavae moni, a malamalama i ai, e suia ai uiga ma amioga. O le suesueina o aoaoga faavae o le talalelei o le a vave ai ona faaleleia le amio nai lo se suesuega o amio e faapea e faaleleia ai le amio.” O le mafaufau lofia i amioga le talafeagai e taitai atu ai i amioga le talafeagai. O le ala lea ua matou faamamafa malosi atu ai le suesueina o aoaoga faavae o le talalelei” (Fanau Iti,”,” Ensign, Nov. 1986, 17).

O aoaoga faavae patino o loo aoaoina i le seminare ma le inisitiuti o se taiala aoga mo le faailoaina pe o le fea aoaoga faavae e taulai i iai (tagai i le “Aoaoga Faavae”). Aoao atu le aoaoga faavae e ala i le faaaogaina o punaoa o le talalelei e pei o tusitusiga paia ma savali o konafesi aoao.

Auauna atu faatasi ma le alofa mama a o e aoao atu, ma taulai atu i le fesoasoani i tagata ina ia iloa le Agaga Paia i o latou olaga. Uunai i latou ia iloa pe faapefea ona tuputupua‘e e ala i o latou luitau i le ponokalafi. Mafaufau e fai atu fesili musuia e uiga i lo latou alualu i luma; o latou tuputupua’e i le malamalama ia i latou lava faaletino natura, faalemafaufau, faaleagafesootai; ma le faaleagaga; ma lo latou atiina’ega o uiga faaKeriso. Taitai tagata ia malamalama i le ala e mafai ai e le mana o Keriso ona suia i latou ma fauina i latou i ituaiga tagata o loo faamoemoe iai.

Taulai atu au aoaoga i le fesoasoani i tagata ia malamalama i le salamo ma le mana o Iesu Keriso ma Lana Togiola. E mafai foi ona fesoasoani lea i le uunaia o i latou ia saili atu faamatalaga e uiga i tulaga feusuai maloloina, faailoaga tatau o feusuaiga, ma le matafaioi o le uunaiga feusua‘i i totonu o tuaoi ua faavaeina e le Atua.

Faataitaiga o Aoaoga o Mataupu Faavae

O faataitaiga nei o loo faailoa atu ai luitau e tele ina feagai ma tagata o loo tauivi ma ponokalafi ma tuuina atu aoaoga faavae lea e ono mafai ona fesoasoani i nei luitau. Tatalo faatasi ma tagata taitoatasi ina ia fesoasoani ia te ia e faailoa aoaoga faavae patino aupito manaomia i le taimi nei.

Tuuatoatasi ma le Faanofoesea

O tagata o loo tauivi ma ponokalafi e tele ina i ai aafiaga o lagona o le tuuatoatasi ma le faanofoesea. Atonu e leai so latou sootaga faaagafesootai ma isi. O le malamalama i le aoaoga faavae o le Aiga Atua e mafai ona fesoasoani i tagata e lagonaina le alofa mai, ma le fesootai atu i le Tama Faalelagi, Iesu Keriso, ma le Agaga Paia. Saili ina ia aoao atu le natura paia ma le matafaioi a sui taitasi o le Aiga Atua.

Punaoa

• E alofa le Atua i Lana fanau (tagai i le Mose 1:39).

• Na faavaeina e le Atua poloaiga ma tulaga faatonuina ia tausia ai tatou i le saogalemu ma le fiafia. O nei poloaiga e faamanuia ai tatou i lenei olaga ma i le olaga a sau (tagai i le Mosaea 2:41).

• O Iesu Keriso e togiolaina tatou mai lo tatou tulaga pau. E tatou te tali atu i le agasala ma le tiga (tagai i le Alema 42:4–6). E leai se auala mo tatou e tatou te toe laveaiina ai o tatou lava agaga mai le lenei tulaga pau (tagai i le Alema 42:12–13). Pau le ala e mafai ai ona faaolaina i tatou o le ala atu ia Iesu Keriso ma Lana Togiola (tagai i le Alema 42:–15).

• O le salamo e fesoasoani ia i tatou e faaaoga le mana o Iesu Keriso ma Lana Togiola (tagai i le Alema 42:22–23.

• O le salamo e manaomia ai ona tatou iloa la tatou agasala, lagona le faanoanoa, taumafai e faamalolo le tiga na aafia ai isi, ta‘uta‘u atu, ma lafoaia amioga tausalaina (tagai i le Mosaea 4:2; Mataupu Faavae ma Feagaiga 58:43). Afai e tatou te faaaogaina atoa le vavega o le faamagalo atu, e tatau ona tatou lagonaina se “suiga tele i le loto” (tagai i le Mosaea 5:2; Alema 5:12–14).

• O le Agaga Paia e molimau ia Iesu Keriso (tagai i le 3 Nifae 28:11; Mataupu Faavae ma Feagaiga 20:27), fesoasoani ia i tatou ia tatou iloa lo tatou agavaa Roma 8:16–17), ma e mafai ona avea ma soa tumau ia i tatou (tagai i le David A. Bednar, “Tatou Soa Tumau” [vitio], ChurchofJesusChrist.org).

Maasiasi ma le Lafi

O lagona o le maasiasi e tele ina taitai atu ai tagata e nanā a latou amioga. O le maasiasi e mafua ai ona lagonaina e tagata o latou o ni tagata leaga ma lē agavaa ai mo le faamagaloga. I le isi itu, o le lagona ua sese e taitai atu ai tagata ina ia iloa o latou sese ma saili ina ia salamo ma suia. O le malamalama i le ata o le faaolataga e fesoasoani ia i tatou e faaaoga le mana o le filifiliga saoloto ma le tali atu. O Iesu Keriso ma Lana Togiola e aveeseina ai le maasiasi ma fesoasoani ia i tatou ia salamo, tuputupua’e, ma suia.

Punaoa

• Na faailoa mai e Elder D. Toff Christofferson le eseesega i le va o le tausalaina ma le maasiasi i lana tautalaga “O Le Leo o le Lapataiga,” tuuina atu i le konafesi aoao ia Aperila 2017 (tagai i le Liahona, Me 2017 108--11).

• O le maasiasi ma le lagona o le tausalaina e mafai foi ona malamalama i ai e ala i le suesueina o le taua paia ma le agavaa (tagai Joy D. Jones, “O Le Taua Le Mafuatiaina,” Liahona, Nov. 2017, 30-35). Wendy Ulrich, “E Le o Se Agasala le Vaivai,” Ensign, Ape. 2015, 30–35).

• O le suia o se faagasologa lea e manaomia ai le onosai (tagai i le Ezra Taft Benson, “Fanauina i le Atua,” Ensign, Iulai 1989, 2–5; David A. Bednar, “E Tatau Ona Outou Toe Fanau Fouina,” Liahona, Me 2007, 19–22; David A. Bednar, “Faaliliuina i le Alii,” Liahona, Nov. 2012, 106–9).

Fememea‘i e uiga i le Matafaioi o Tulaga Tau Feusuaiga

O talitonuga lē talafeagai pe lē sa’o e uiga i le faaalia o tulaga tau feusuaiga atonu e aliali mai e ala i le faaaogaina o ponokalafi. O le ata o le faaolataga e faamanino ai le matafaioi o le faatinoina o tulaga tau feusuaiga ma lona faamoemoe i le foafoaga o aiga ma sootaga alofa o faaipoipoga. Aoao atu faapea ata o le faaolataga ma isi aoaoga faavae e fesoasoani e tuu atu le taua i luga o le aoga o le agaga nai lo tulaga sese matautia ma le faaifoitupua e maua i totonu o ponakalafi.

Punaoa

• Na foafoaina e le Tama Faalelagi le ata o le faaolataga ina ia mafai ona tatou maua aafiaga o le olaga, toe foi atu i Lona afioaga, ma maua le olioli. E totonugalemu i lenei fuafuaga le tuufaatasia faaleagaga, faalelagona, ma le faaletino o loo atiina a’e i totonu o le faaipoipoga ma le olaga faaleaiga. Na Ia tuuina mai ia i tatou le mana mo feusuaiga faaletino ina ia mafai ona faamalolosia i tatou ma faatupuolaina o tatou aiga e faavavau. Na ia faamoemoeina mo tulaga tau feusuaiga ina ia avea ma se vaega matagofie, mamana, ma olioli ai o lo tatou olaga—a e le o se mea leaga pe toilalo. O feusuaiga vavalalata e mafai ai e se tane ma le ava ona mauaina fanau, faailoa atu le alofa, ma faamalolosia o la tulaga faaleagaga, faalelagona, ma mafutaga faaletino. O feusuaiga vavalalata o se vaega taua o le faaipoipoga, ma pe a faaaogaina i le ala lea na poloaiina mai e le Atua, e aumaia ai faamanuiaga ma le olioli. (tagai i le Mataio 19:5--6; Matthew O. Richardson, “Mataupu Faavae e Tolu o Faaipoipoga,” Ensign, Ape. 2005, 20–24.)

• O se tasi o mafuaaga na tatou o mai ai i le lalolagi ina ia maua se tino faaletino ma ia tofotofoina i tatou (tagai i le Tala‘i La’u Talalelei [2018], 50). Na tuuina mai e le Atua ia i tatou mana paia o le foafoaga o se vaega o o tatou tino faaletino. Pe a faaaogaina tatau, e mafai e lenei mana ona aumaia ia i tatou le olioli (tagai i le Boyd K. Packer, “O Outou o le Malumalu o le Atua,” Ensign, Nov. 2000, 72–74).

• Pe a tatou faaaogaina sese ma soli ai tulafono a le Atua, o le a tatou aumaia le faanoanoa tele ia i tatou lava atoa ma isi (tagai i le Talai La’u Talalelei, 52; Jeffrey R. Holland, “Mama Faaletagata Patino,” Ensign, Nov. 1998, 75–78).

• O se tasi o faamoemoega o lenei olaga o le faamaonia atu lea i le Atua ma ia i tatou lava o le a tatou faaaogaina tatau mana o le foafoaga (tagai i le Boyd K. Packer, “O le Fuafuaga o le Fiafia,” Liahona, Me 2015, 26–28).

• A tatou faaaogaina le loto pulea e puipuia lelei ai o tatou mana o le foafoaga ma faia mea uma ua finagalo le Atua tatou te faia, o le a avea nei mana o le foafoaga ma faamanuiaga tumau ia i tatou ma a tatou fanau (tagai James E. Faust, “Savali i Fanau Tama a La’u Fanau,” Liahona, Me 2007, 54–56).

• E fai e Satani mea uma na te mafaia e tauanau ai i tatou ia faaaoga sese ia mana o le foafoaga—o mana ia o le ‘a ia lē mauaina lava (tagai i le Dallin H. Oaks, “O le Fuafuaga Sili o le Fiafia,” Ensign, Nov. 1993, 72–75).

• O ponokalafi o se meafaigaluega lea ua faaaoga e Satani e faatauvaaina ai mana paia o le foafoaga ma ia faafoliga ai latou o ni meanoa ae ua tau lava mo se tuinanau ia faamalieina (tagai i le Richar G. Scott, “Ina Ia Maua le Taitaiga Faaleagaga,” Liahona, Nov. 2009, 6–9; Richard G. Scott, “O Le Paia o Tulaga Tautamaitai,” Ensign, Me 2000, 36–38).

• O ponokalafi e mafai ona taitai atu ai i isi agasala e solia ai a tatou feagaiga paia (tagai i le Dallin H. Oaks, “Ponokalafi,” Liahona, Me 2005, 87–90; Mataupu Faavae ma Feagaiga 42:22-23).

A o e faalogo atu i tagata o talanoaina luitau o latou feagai, o le a taitaia oe e faamautu le aoaoga faavae e sili ona aoga mo le faamalieina o latou manaoga. O nei faataitaiga ua na’o ni nai auala e faaaogaina e aoao atu ai aoaoga faavae.

Uunaia tagata e Faaaoga Aoaoga Faavae o le Talalelei

Fesoasoani i tagata ina ia taumafai e malamalama i aoaoga faavae faatatau i o latou manaoga iloga. O le Agaga Paia e mafai ona uunaia tagata e faailoa auala patino e faaaoga ai upumoni i o latou olaga. Uunai i latou e tuuto atu ia soifua e tusa ma musumusuga ua latou mauaina, poloaiga a le Alii, ma aoaoga o le talalelei a Iesu Keriso. O lenei faagasologa e mo se taimi umi o le olaga mo i latou uma o e saili ina ia avea ma soo o Iesu Keriso.

O mataupu nei o ni aoaoga faavae faaopoopo lea atonu e ono fesoasoani i tagata o loo tauivi ma le faaaogaina o ponokalafi.

Tali Atu

O i tatou taitoatasi o se atalii po o se afafine o le Atua. Ona o lena faasinomaga paia, ua ia i tatou meaalofa, e pei o le faitalia, ma tiutetauave, e pei o le tali atu.

O le tali atu i le tagata lava ia, i isi, ma le Alii o le ki lea i le alualu i luma. Aoao atu i tagata tulaga matautia o ponokalafi ma le avea ai ma auala e solia ai faatulagaga faatonuina a le Atua. Fesoasoani ia latou malamalama e le mafai ona latou agai i luma e aunoa ma le tali atu mo amioga leaga ma lē talafeagai.

Mo epikopo ma peresitene o paranesi: E aofia ai le ta‘uta‘u atu. O nisi taimi e ono sili atu ni feiloaiga e faia ona faatoa faailoa atoatoa mai lea e i latou o loo faaaogaina ponokalafi amioga lē talafeagai. A o e feiloai faatasi ma i latou, fesoasoani ia latou malamalama i le sootaga i le va o le faamasinoga tonu ma le alofa mutimutivale ma le auala e fesootai atu ai nei upumoni i le ta’uta’u atu ma tali atu i mea sese. Faaaoga le magafagafa, alofa, ma le mafanafana ina ia musuia ma faamalosiau ai. Ia faaeteete ina ia aloese mai le faalumaina po o le tauanau faamalosi. O se aufono a tagata o le ekalesia e le tatau ona faia e faasala pe taufaamata‘u ai i latou o e o loo tauivi ma ponokalafi (tagai i le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai [2020], 32.8.2).

Tatalo ma Suesuega i Tusitusiga Paia Faifaipea

O le tatalo ma le suesueina o tusitusiga paia e le aunoa, e alagatatau mo se suiga tele o le loto. Aoao atu tagata ina ia matua tatalo faapitoa, e ole atu ai mo le faamagaloga ma faatino le faatuatua i le Tama Faalelagi ma Iesu Keriso. E mafai foi e tagata ona maua le malosi e ala i le suesueina o le Tusi a Mamona i aso taitasi (tagai i le Russell M. Nelson, “O Le Tusi a Mamona: Faamata e Faape’i Lou Olaga e aunoa ma Ia?” Liahona, Nov. 2017, 60–63). Valaaulia i latou e suesue e le aunoa mo saunoaga o le konafesi aoao ma tusiga o mekasini a le Ekalesia e uiga i ponokalafi ma sini faaleagaga.

Faatuatua i le Tama Faalelagi ma Iesu Keriso

E tatau i tagata ona talitonu e mafai ona suia i latou. Saili ia faagaeetia ma aua le faa‘ole‘ole ma i latou a o e iloilo mataupu faavae o le faatuatua i le Tama Faalelagi ma Iesu Keriso. Aoao atu i latou e faapea o manaoga aupito laiti ina ia amatalia se faagasologa o le suia e mafai ona taitai atu ai i se taualumaga lelei (tagai i le Alema 32:27--28). A o faafailele ai e tagata lo latou faatuatua ma faaaoga mea o loo latou aoaoina, e mafai ona faatupulaia lo latou faatuatua e faaauauina ai se suiga tele.

O Se Faagasologa, E Le o se Faailoga

O le salamo o se faagasologa fiafia e manaomia ai se taimi faaumiumi (tagai i le Dale G. Renlund, “Salamo: O Se Filifiliga Fiafia,” Liahona, Nov. 2016, 121–24; Stephen W. Owen, “O Le Salamo o se Mea Lelei,” Liahona, Nov. 2017, 48–50). E pei o le tapueina o se masani leaga e faaaluina ai le taimi, e faapena foi le atiina a’e o amioga faasoifua maloloina faaKeriso. O le tatalo faifaipea, suesuega i tusitusiga paia ma le atiina a’e o le faatuatua i le Tama Faalelagi ma Iesu Keriso e fesoasoani i lenei faagasologa.

E le manaomia, ma e le matua moni foi, le faapea e tatau ona atoatoa le tagata i le agai ai i luma, pe ia ona vave maua foi se suiga tele o le loto. Peitai, e tatau i le tagata ona agai i luma ma le loto gaua‘i moni e sailia le faamagaloga, aveesea amioga tausalaina, ma faia taualumaga fuafua tatau. I le ma lenei, o se tasi o loo matamata i ponokalafi e tatau foi ona iloa ma tuuaiina mo le tiga e mafua mai i lena amioga atoa ma le ‘āia (po o le faaitiitia) o le faatuatuaina i ana sootaga. Atonu e ono aofia ai iinei le toe totogi atu ma le tatau ona aofia ai o le faamaoni i le toalua, pe afai ua faaipoipo lea tagata.

Ia molimau e le aunoa i le mana o le Togiola a Iesu Keriso ma Lona mana e fesoasoani ai i tagata ia suia. O le Togiola a Iesu Keriso e aumaia le olioli (tagai i le Mosaea 4:2-3).