Lagolago mo Taitoalua o E Faaaogaina Ponokalafi

O le faaaogaina o Ponokalafi e ono i ai se aafiaga tele i le toalua o le tagata e faaaogaina. O taitoalua atonu o le a lagona le ita, faavaivai, ma le faalataina e le tagata e faaaogaina. Ae le gata i lea, o lagona o le le mautonu, te‘i, tiga matuitui, faanoanoaga, le fiafia, atoa ai ma le ita po o le atuatuvale e taatele. O taitoalua e tele ina latou lagonaina le matua faalumaina ma fesiligia ai lo latou lava taua. O nisi taitoalua e aafia foi i auga faaletino e pei o le gasegase, tiga o le fatafata po o le fatu e le mafaamatalaina, tiga o le ulu, le mafai ona moe.

Atonu latou te lagona foi le tuulafoaiina e le Atua ma mafaufau ai pe faapefea ona Ia faatagaina lenei mea e tupu. E le o taitoalua uma o le a lagona ma tali atu i lea ala e tasi. O isi faafitauli faaleulugalii po o le fai soo ma le umi o le faaaogaina o ponokalafi e mafai ona aafia ai o latou faalogona ma le mamafatu o lo latou tali atu.

O taitoalua atonu e mumusu e talanoa i se tasi e uiga i o latou tauiviga faalelagona ma faaleagaga ma filifili ai i nisi taimi e mafatia leleoa nai lo le aapa atu mo se fesoasoani po o lagolago. Ao latou saili atu mo se fesoasoani, o taitoalua e masani ona manaomia se tasi e faalogo gaua‘i ma tuuina atu le lagolago ma le agaalofa. E masani lava ona mafaufau sese taitoalua o le faafitauli atonu o latou le faapogai ma e ono manaomia ai le fesoasoani e malamalama ai e le tuuaiina i latou mo le amioga a le tagata e faaaogaina ponokalafi.

Saili ina ia Malamalama

O le fesoasoani i le toalua o le tagata e faaaogaina ponokalafi ina ia lagona le amanaia ma le malamalama e mafai foi ona taua e faapei o soo se fautuaga e mafai ona e tuuina atu. O le faalogologo atu ma le loto malamalama o le a auina atu ai se savali malosi i le toalua e faapea o loo alofagia o ia, talitonuina, ma amanaia. Saili ia faaali atu le alofa ma le loto malamalama faapei ona faia e le Faaola. Mafaufau ma le agaga tatalo e fai atu fesili e pei o nei ia fesoasoani ai ina ia e malamalama lelei i le tulaga o le toalua ma iloatino ai ona manaoga. Ia naunau e faaalu se taimi e faalogo ai i le toalua o faasoa mai ona popolega, masalosaloga, ma atugaluga.

Atonu e sili atu le to‘amalie o le toalua e talanoa e uiga i lea tulaga pea afai o i ai iina se uo, matua, po o se taitai faatuatuaina o le Ekalesia. Ia mautinoa e iloa e le toalua e mafai ona i ai iina se tagata lagolago. Mafaufau e fai atu fesili e pei o nei i se ala magafagafa ma le alofa:

O le a le tulaga o i ai nei, ma o a ni mea o feagai ma oe?
O le a se tulaga sili ona e le fiafia ai i le faaaogaina e lou toalua o ponokalafi?
O a ni mea ua sili ona e popole ai e uiga i le lua mafutaga i le taimi nei?
Na faapefea ona aafia oe ma lou aiga ona o ponokalafi (faalavelave faaleaiga, soifua maloloina, ma isi mea faapena)?
O a ni alagā lagolago o loo e tapa atu i ai i le taimi nei?
O le a le faamaoni ma le moni o lou toalua e tusa ai ma lenei luitau i ponokalafi?
O le a le faamaoni na e talanoa atu ai po o loo e naunau foi e talanoaina lenei faafitauli faatasi ma lou toalua?
O a nisi mea e tatau ona ou iloa e uiga i lenei mataupu?
Na faapefea ona fesoasoani le Alii ia te oe e onosaia lenei tofotofoga?

Afai e te silafia soo se sauaga faatautala, sauaga i le lotoifale, po o matamataga, faatauina, po o le faasalalauina o ponokalafi e faaaoga ai tamaiti, ia faafesootai pulega a le malo. Ua iai i epikopo se faaopoopoga o le laina fesoasoani e mafai ona latou valaau atu i ai i tulaga faapenei.

Fesoasoani i le Tagata

Ao e fesoasoani atu i le toalua, mafaufau e faaaoga nisi o fautuaga nei.

Ia faamamafa atu le gafatia e le Faaola ona tuuina mai le faamalologa patino mo le toalua o le tagata e faaaogaina ponokalafi (tagai i le Alema 7:11 ma le Mataio 11:28-30).

Valaaulia le toalua e suesue ala na faaaogaina e Keriso e auauna atu ai ia i latou na feagai ma faigata ma le ala e mafai ai foi ona Ia fesoasoani e faamalolo o ia.
Fesoasoani i le toalua ia malamalama ma ia maua le faatuatua i sauniga o le perisitua, aemaise o sauniga o le malumalu.
Faamalosiau i le toalua e saili se faamanuiaga faaleperisitua.

Ia tuuina atu le lagolago ina ia fesoasoani ai ia te ia e taulimaina lagona tiga.

Faailoa atu lou alofa ma le popole mo ia lava, e faapena foi mo lona toalua ma le fanau.
Fesoasoani i le toalua ia malamalama o filifiliga a le tagata e faaaogaina le ponokalafi e le suia ai le auala e silasila mai ai le Atua i le toalua lava ia.
Faamanino atu e le tuuaiina o ia mo le faaaogaina e lona toalua o ponokalafi po o amio leaga ma e le o faamoemoe ina ia ona onosaia ia amioga faatautala. Afai e te silafia soo se sauaga, ia vave faafesootaia pulega a le malo.
Faamanatu i le toalua lona taua ma lona aoga.
Ia uunaia le toalua e talanoa ma le epikopo, pe afai na te lei faia lea tulaga.

Valaaulia le toalua e toe iloilo punaoa mo taitoalua ma le aiga i le “Faatoilaloina Ponokalafi” i luga o le ChurchofJesusChrist.org.

Fesoasoani i le toalua ia malamalama e mafai ona ia maua ana lava musumusuga e iloa ai le auala e faatulaga ai ni tuaoi manino i le mafutaga ma i le aiga.

Valaaulia o ia e suesue le “Mataupu Faavae 8: Ia Mausali ma Tumau” i totonu o le Taiala Lagolago: Fesoasoani mo Taitoalua ma Aiga o i Latou o Loo Toe Faaleleia (o loo maua i le ”Toe Faaleleia o Vaisu” vaega o le ChurchofJesusChrist.org) ina ia fesoasoani ia te ia ia malamalama i le auala e faatulaga ai tuaoi lea e mafai ona fesoasoani e toefuatai le faatulagaga tatau i lona olaga ma lona aiga.
Fesoasoani i le toalua ia malamalama o loo ia te ia le aia tatau i le mauaina o le faamaoni atoatoa, e leai ni ponokalafi i le fale, ma se aofaiga o isi amioga lea e faatupulaia ai le filemu ma le lotogatasi.
Fesoasoani ia te ia ia malamalama o ia e mafai ona ia filifili ma talanoaina faatasi ma lona toalua o ona manao e iloa e uiga i lona faaaogaina o ponokalafi (e pei o le natura, le umi, ma le matuia o le mataupu). O le faailoaina atoa o mea uma atonu o le a saofaga i taualumaga o le faamalologa.

Fesoasoani i le toalua ina ia maua se uo faatuatuaina po o se tagata o le aiga e mafai ona tuuina atu le lagolago anoa i se tulaga faifai pea ao ia sailia le mauaina o le filemu ma le mautu i lona olaga.

Pe a talafeagai, fautuaina le toalua e talanoa ma isi o e le faitioina le tagata e faaaogaina ponokalafi pe uunaia le toalua ia faia ni faamasinoga le faamaoni po o faaiuga faanatinati.
Pe afai e maua, o fono lagolago a le aiga ma le toalua e masani lava o se nofoaga lelei e lagona ai le lagolagoina, lagonaina, ma taliaina ma ia maua le malosi ia Keriso e ala i le mana o Lana Togiola.

Fesoasoani ia te ia ia malamalama o le faamagaloina o lona toalua o se faagasologa ma e mafai ona ia maua ana lava musumusuga i le iloaina pe faapefea ma o afea foi e amata ai lenei faagasologa.

Uunaia le toalua ina ia magafagafa i ona lava lagona ma le faagasologa o lona faamalologa faaleagaga, lea e ono alu ai se taimi tele ma o le a ese mai i le faamalologa a le tagata e faaaogaina ponokalafi. Aua nei taumafai e faatopetope pe faatonutonu le faagasologa. Faataga o ia e galue i ona lava lagona ma luitau e faatatau i le tulaga ao lei talanoaina le faamagaloga.
Faamanatu atu i le toalua o le tuuina atu o le faamagaloga e le faapea o le a tuuina atu ai foi ma le faatuatuaina. O le faatuatuaina e ono oo mai i se taimi mulimuli, pe e le oo mai foi, e faalagolago lava i filifiliga ma amioga i le lumanai. O le a toe fausia le faatuatuaina ao galueaina e le tagata e faaaogaina ponokalafi lona lava faamalologa ma o loo vaaia e le toalua lona maelega ma le tuuto ina ia suia.

E tatau i taitai o le Ekalesia ona faaeteete ina ia aua nei faauigaina faapea o sootaga vavalalata o le ulugalii i taimi ua tuanai e i ai se fesootaiga tatau ma le faaaogaina o ponokalafi e soo se tasi o i la’ua. Peitai, o le faaaogaina o ponokalafi e mafai ona faatamaia ai sootaga vavalalata. E tatau i taitai o le Ekalesia ona aloese mai le tuuina atu o fautuaga e uiga i mataupu o sootaga vavalalata ma, pe a manaomia le fesoasoani, faafesootai atu le Tautua mo Aiga a le AAG po o isi tagata tomai lagolago faapitoa tau agafesootai ma faalemafaufau ma fautua atu le ulugalii i se tautua faapolofesa talafeagai.

Lagolago le Aiga

Iloilo le aafiaga i luga o le faaipoipoga ma le aiga ma talanoa soo se faafitauli.

Afai e manaomia e paaga faaipoipo uma e toalua fesoasoani faaopoopo, uunai i la’ua ia la sailia fesoasoaniga taitoatasi faatasi ai ma fesoasoaniga faalepaaga faaipoipo.

Afai e i ai ni fanau i le aiga ua iloaina lenei faafitauli, fesoasoani i matua ia malamalama i o la tiute e auauna atu ai ia i latou ma fesoasoani ia i latou pe a manaomia.

Saili e lagolagoina le tagata e faaaogaina ponokalafi i lana faagasologa o le faafouina faaleagaga. O punaoa i vaisu ma le faaaogaina o ponokalafi, o le “faatoilaloina o ponokalafi,” o le vaega o le ChurchofJesusChrist.org, ma le uepisaite Polokalama o le Toe Faaleleia o Vaisu e mafai ona fesoasoani ao e fesoasoani i le tagata o loo tauivi ma ponokalafi ia malamalama i lona tiutetauave e foia le amio.

Uunaia le tagata o loo faaaogaina ponokalafi e tali atu mo ana amioga ma lagolago lona toalua. Tagai i le punaoa i le faaaogaina o ponokalafi mo nisi faamatalaga.

Faaaoga Punaoa a le Uarota ma le Siteki

A uma ona maua mai le faatagaga a i la’ua uma, le toalua ma le tagata o loo faaaogaina ponokalafi e talanoaina ai le tulaga ma isi tagata, mafaufau e faamaopoopo faatasi ma taitai o le uarota po o isi tagata faatuatuaina e tuuina atu le lagolago, taitaiga, ma le fesoasoani faifai pea.

Faailoa se tagata faatuatuaina e mafai ona avea ma se lagolagosua mo le toalua o le tagata e faaaogaina ponokalafi. I se tulaga fautuaina, o lenei tagata lagolago e ono taulimaina ma le manuia se luitau talitutusa, ae o soo se tagata matua faaleagaga ma agaalofa e mafai ona tuuina atu le lagolagosua alofa.

Valaaulia le toalua e auai atu i se vaega lagolago i le lotoifale mo taitoalua ma tagata o le aiga.

Asiasi i le uepisaite Polokalama o le Toe Faaleleia o Olaga Mai le Tagofia o Mea ua Fai ma Vaisu (“Faaleleia o Vaisu” vaega i luga o le ChurchofJesusChrist.org) ina ia maua se fonotaga a vaega lagolago i le lotoifale mo taitoalua ma aiga, lea e faia faafesagai pe e ala i se fonotaga i le telefoni.
Afai e leai ni fonotaga faapea o i ai, mafaufau e faafesootai le epikopo ia talosaga ai e amata se fonotaga po o le faaaogaina o vaega lagolago i le lotoifale.

Mafaufau e faasino atu le toalua o le tagata e faaaogaina ponokalafi i fesoasoani faapolofesa po o faufautua. Faailoa mai punaoa i le lotoifale e tuuina atu auaunaga e ogatasi ma mataupu faavae o le talalelei.