“Akó—Taimi Lōloa Tahá: Miniti ʻe 85,” Ko Hono Tataki e Ngaahi Kulupu maʻá e Moʻui Fakafalala pē Kiate Kitá (2016)
“Akó—Taimi Lōloa Tahá: Miniti ʻe 85,” Ko Hono Tataki e Ngaahi Kulupú
ʻĪmisi
fakaʻilonga akó
Akó—Taimi Lōloa Tahá: Miniti ʻe 85
Ko e Hā ʻa e Kulupu Moʻui Fakafalala Pē Kiate Kita? (miniti ʻe 10)
Mamataʻi:“I Will Provide for My Saints,” ʻoku maʻu ʻi he srs.lds.org/videos ʻi he konga “Video Resource” ʻi he “Facilitating Groups” (ʻIkai ha vitiō? Hoko atu hono laú.)
Aleaʻi:ʻE kaunga fēfē ʻa ʻeku tui kia Sīsū Kalaisí ki heʻeku moʻui fakafalala pē kiate kita fakatuʻasino mo fakalaumālié?
Lau:Ko e taumuʻa ʻo e ngaahi kulupu moʻui fakafalala pē kiate kitá ke tokoniʻi pē e kakaí ke liliu ʻenau tōʻonga moʻuí. Naʻe akoʻi ʻe ʻEletā M. Lāsolo Pālati ʻo pehē: “ʻOku ou tui ko e fakataha alēleá ko e founga lelei taha ia ke maʻu ai ha ngaahi ola moʻoni. ʻIkai ngata ai, ʻoku ou ʻiloʻi ko e fakataha alēleá ko e founga ia ʻa e ʻEikí pea naʻá ne fakatupu ʻa e meʻa kotoa pē ʻi he ʻunivēsí ʻo fakafou ʻi ha fakataha alēlea fakalangi, hangē ko ia ʻoku fakamatala ʻi he folofola māʻoniʻoní (“Ngaahi Fakataha Alēlea Fakafāmilí,” Ensign pe Liahona, Mē 2016, 63).
ʻI hoʻomou ngāue fakataha ʻi ha fakataha alēleá, ʻoku maʻu ʻe he kau mēmipa ʻo e kulupú ha faingamālie ki ha ngaahi talēniti lahi ange, ueʻi fakalaumālie, aʻusia mo e ʻilo lahi ange ʻi he meʻa ʻoku nau maʻú. Ko e kulupu moʻui fakafalala pē kiate kitá:
ʻOku kau ai ha kau mēmipa ʻe toko 8–12 ʻoku nau ngāue ki ha meʻa ʻoku nau tokanga taha ki ai, hangē ko hono levaʻi ʻo e ngaahi meʻa fakapaʻangá, kumi ʻo ha ngāue lelei angé, fakalakalaka ʻi heʻenau akó, pe kamata mo fakatupulaki ʻo ha pisinisí.
Ko ha ʻātakai malu ia ʻoku ongoʻi fiemālie ai ʻa e tokotaha kotoa pē pea tuʻunga tatau pē ʻi heʻenau kau ki aí.
ʻOku nau fakataha ʻo aʻu ki ha uike ʻe 12 ke fakatupulekina ha ngaahi taukei mo e tōʻonga foʻou.
ʻOku fakaʻaongaʻi ai ha sīpinga fakataha alēlea koeʻuhí ke feakoʻaki mo fepoupouʻaki ai e kau mēmipá.
ʻOku tukupā ke ngāue ʻi he uike takitaha ki he meʻa ʻoku ako ʻe hono kau mēmipá.
ʻOku lipooti e fakalakalaká koeʻuhí ke haʻisia ʻa e tokotaha takitaha ki heʻenau ngaahi tukupaá.
Aleaʻi:ʻOku kehe fēfē ʻa e ngaahi kulupu moʻui fakafalala pē kiate kitá mei he ngaahi ako mo e kalasi kuó ke kau atu ki aí?
Ko Ho Fatongia ko e Tokotaha Tokoní (miniti ʻe 15)
Mamataʻi:“How to Facilitate a Group,” maʻu atu ʻi he srs.lds.org/videos ʻi he “Video Resources” ʻi he konga “Facilitating Groups” (ʻIkai ha vitiō? Hoko atu hono laú.)
Aleaʻi:Ko e hā naʻe maʻu ʻe he tokotaha tokoni ʻi he vitioó ke liliu mei heʻene hoko ko ha faiakó ke hoko ko ha tokotaha tokoní? Naʻe tokoni fēfē ia ki he kulupú?
Lau:Naʻe folofola ʻa e ʻEikí fekauʻaki mo e ngaahi fakataha alēleá pe ngaahi kulupu ʻi he Siasí ʻo pehē, “ʻOua ʻe tuku ke lea fakataha kotoa; kae tuku ke lea pē ha toko taha, pea tuku ke fanongo kotoa pē ki heʻene ngaahi leá, koeʻuhí ka ʻosi lea kotoa ke fakamāmaʻi kotoa pē, pea ke maʻu ʻe he tangata kotoa pē ʻa e faingamālie tatau” (T&F 88:122; tānaki atu ʻa hono fakamamafaʻí.)
ʻI he ngaahi kulupu moʻui fakafalala pē kiate kitá, ʻoku ʻikai uiuiʻi ha taha ke faiako! ʻI hoʻo hoko ko e tokotaha tokoní, ko ho fatongiá ke tokoniʻi e kau mēmipa ʻo e kulupú ke nau muimui ki he naunaú, kau atu, pea fakaafeʻi e Laumālié ki he fealeaʻakí. Naʻe ʻikai uiuiʻi koe ke ke hoko ko ha mataotao ʻi he tefito ko iá. Ka ʻoku totonu ke ke kau atu ko ha mēmipa ʻo e kulupú, ʻo fakatahaʻi e ngaahi tukupaá mo e akó. ʻE tokoni ʻa e muimui ki he ngaahi tefitoʻi moʻoni ʻi laló (ʻoku fakamamafaʻí) ke maʻu ʻe hoʻo kulupú ha aʻusia lelei.
Fokotuʻu ha ‘ātakai malu. ʻE lipooti tauʻatāina ʻe he kau mēmipá ki he kulupú ʻi he uike takitaha, ʻa ʻenau fakalakalaka ʻi hono tauhi ʻo ʻenau ngaahi tukupaá. Te nau fakahoko ha ngaahi fehalaaki mo aʻusia ʻa e tōnounoú ʻi heʻenau fononga ke moʻui fakafalala lahi ange pē kiate kitá. Ko ha meʻa angamaheni pē ʻeni mo lelei. ʻOku matuʻaki mahuʻinga ke ongoʻi ʻe he kau mēmipa ʻo e kulupú ʻoku nau ʻi ha ʻātakai malu ke feinga, tō pea faifai pē pea ola lelei.
Aleaʻi:Ko e hā mo ha toe ngaahi founga kehe te ke lava ai ʻo tokoni ki he kau mēmipa ʻo e kulupú ke nau ongoʻi malu, fiemālie mo ongoʻi ʻoku tali kinautolu ʻi he kulupú?
Lau:Poupouʻi e kau maí. ʻI hoʻo hoko ko e tokotaha tokoní, ʻoku ʻikai totonu ke ke lea lahi ange ʻi ha toe taha ʻi he kulupú. ʻOku totonu ke ke hangē pē ko ha taha ʻi he kulupú pea ʻoange ha faingamālie ke lea ʻa e tokotaha kotoa pē.
Aleaʻi:Te ke fehangahangai fēfē mo ha tokotaha ʻokú ne maʻu kotoa e fepōtalanoaʻakí pe ʻikai kau mai?
Lau:Kamata mo fakaʻosi taimi totonu. ʻOku totonu ke falala ʻa e kau mēmipa ʻo e kulupú ʻe kamata mo ʻosi ʻa e kulupú ʻi he taimi totonu. Kuo ʻosi fokotuʻu atu ha ngaahi taimi fakangatangata ʻi he konga mo e ʻekitivitī takitaha. Te ke lava ʻo vahe ha taha ʻi he kulupú he uike takitaha ke ne hoko ko e tokotaha tauhi taimi.
Aleaʻi:Ko e hā mo ha toe meʻa te ke lava ʻo fai ke tokoniʻi e kulupú ke tauhi e taimí?
Lau:Tauhi e ngaahi fakamatalá ke lelei mo felāveʻi [mo e kaveingá]. ʻOua ʻaupito naʻa vahevahe ha ngaahi talanoa ʻokú ne fakaangaʻi e niʻihi kehé, neongo pe ʻoku fekauʻaki ia mo ha taha ʻoku ʻikai ʻilo ʻe he kau mēmipa ʻo e kulupú.
Aleaʻi:Te ke poupouʻi fēfē e ngaahi fakamatala ʻa e fakakulupú ke nofotaha [ʻi he kaveingá] mo fakaʻapaʻapá?
Ko e Fokotuʻutuʻu ʻo ha Fakataha Kulupu Moʻui Fakafalala Pē Kiate Kitá (miniti ʻe 40)
Mamataʻi:“‘Go and Do’ Learning,” maʻu atu ʻi he srs.lds.org/videos ʻi he “Video Resources” ʻi he konga ko e “Facilitating Groups.” (ʻIkai ha vitiō? Hoko atu hono laú.)
Lau:ʻOku konga nima ʻa e fakataha fakakulupu takitaha. ʻOku ʻikai totonu ke ke hiki fakalaka ʻi ha konga ʻe taha.
ʻĪmisi
fakaʻilonga lipōtí
Lipooti:ʻI he konga ko ʻení, ʻe fakafuofuaʻi ai ʻe he kau mēmipa ʻo e kulupú ʻenau tuʻunga ngāué mo lipooti ʻenau fakalakalaká ki he kulupú. ʻOku totonu ke nau vahevahe e ngaahi meʻa kuo nau ako mei heʻenau ʻahiʻahi fakahoko e ngaahi taukei mo e tōʻonga foʻoú. ʻOku matuʻaki mahuʻinga hono fakafuofuaʻi e fakalakalaká ke fakatupulaki ha ngaahi tōʻonga foʻou. (Miniti ʻe 20–30.)
Aleaʻi:ʻE tokoniʻi fēfē kitautolu ʻi hono lipooti tauʻatāina ʻetau fakalakalaká ki he kulupú?
ʻĪmisi
fakaʻilonga Ko Hoku Fakavaʻé
Ko Hoku Fakavaʻé:ʻE ako e kau mēmipá ʻi he konga ko ʻení, mo fakaangaanga hono moʻui ʻaki e ngaahi tefitoʻi moʻoni ʻo e tuí, akó, ngāue mālohí, mo e falala ki he ʻEikí. ʻE toe vakaiʻi ʻe he kau mēmipá ʻi he uike takitaha ha tefitoʻi moʻoni te ne tokoniʻi kinautolu ke nau hoko ʻo toe moʻui fakafala ange kiate kinautolu. (Miniti ʻe 20.)
Aleaʻi:Ko e hā ʻoku tau ako ai e ngaahi taukei fakatokāteliné mo fakatuʻasinó fakatouʻosi ʻi heʻetau ngaahi kulupú?
ʻĪmisi
fakaʻilonga akó
Ako:ʻI he konga ko ʻení ʻe lau, aleaʻi, mo ʻahiʻahi fakahoko ai ʻe he kau mēmipa ʻo e kulupú ha ngaahi fakakaukau mo e taukei foʻou ʻa ia ʻe tokoni kiate kinautolu ke nau moʻui fakafalala fakatuʻasino pē kiate kinautolu. (Miniti ʻe 40–50.)
ʻĪmisi
fakaʻilonga fakalaulaulotó
Fakalaulauloto:ʻI he konga ko ʻení, ʻe fakalaulauloto mo tohi ai ʻe he kau mēmipa ʻo e kulupú ʻa e ngaahi meʻa kuo nau ako lolotonga e fakataha ʻa e kulupú. ʻOku nau fekumi ki ha fakahinohino mei he ʻEikí ke ʻilo ha ngaahi founga ke fakalakalaka ai. Kātaki ʻoua naʻa hiki fakalaka mei he konga ko ʻení. (Miniti ʻe 5–10.)
Aleaʻi:ʻOku founga fēfē hono fakaʻatā ʻe he fakalaulauloto—fakalongolongo pea ʻikai ha fealeaʻakí—ke akoʻi kitautolu ʻe he Laumālie Māʻoniʻoní?
ʻĪmisi
fakaʻilonga tukupā
Tukupā:ʻI he konga ko ʻení, ʻoku tukupā e kau mēmipá ke ʻahiʻahi fakahoko ha ngaahi tōʻonga mo e taukei foʻou kuo nau ako mo aleaʻi ʻi he fakataha ʻa e kulupú. ʻOku matuʻaki mahuʻinga ke fakahoko mo tauhi e ngaahi tukupaá ki hono fakatupulaki ha tōʻonga foʻoú. ʻE fili ʻe he kau mēmipá ha mēmipa ʻe taha ʻo e kulupú ke ne hoko ko ha hoa ngāue ke tokoni atu. ʻE fevakaiʻiʻaki e ongo hoa ngāué ʻi he lolotonga ʻo e uiké ke fai ha fakalotolahi mo e poupou. ʻOku tukupā foki ʻa e kau mēmipá ke akoʻi e meʻa kuo nau akó ki honau fāmilí mo e kaungāmeʻá. (Miniti ʻe 5–10.)
Aleaʻi:Ko e hā ʻoku mahuʻinga ai ke te hoko pea maʻu ha hoa ngāué?
ʻĪmisi
fakaʻilonga ngāué
Ngāue: Kuo pau ke ngāueʻi ʻe he kau mēmipá ʻenau ngaahi tukupaá ʻi he lolotonga ʻo e uiké ke liliu ʻenau tōʻonga moʻuí! ʻOku tokoni hono fakahoko mo akoʻi ki he niʻihi kehé ʻa e meʻa kuo nau akó ke fakatupulaki ha ngaahi taukei mo e tōʻonga moʻui ʻo e moʻui fakafalala pē kiate kitá. (Houa ʻe 3–8 ki he uike)
Aleaʻi:Te u tokoniʻi fēfē e kau mēmipa ʻo e kulupú ke nau ngāue lolotonga e uiké ke tanumaki ha ngaahi tōʻonga lelei?
Lau:Tau ʻahiʻahi fakahoko kotoa ha konga ʻo e fakatahá, he ko ʻeni kuo mou ʻilo e fokotuʻutuʻú.
Founga ke Kau Ai e Kakaí ki he Ngaahi Kulupú (miniti ʻe 10)
Mamataʻi:“Choosing a Self-Reliance Group,” maʻu atu ʻi he srs.lds.org/videos ʻi he “Video Resources” ʻi he konga ko e “Facilitating Groups.” (ʻIkai ha vitiō? Hokohoko atu hono laú.)
Lau:ʻOku sitepu ʻe tolu ʻa e founga ke kau ai ki ha kulupú.
ʻUluakí, ʻoku fakaafeʻi ʻe he ngaahi fakataha alēlea fakauōtí ha kau mēmipa ke kau atu ki ha fakataha lotu moʻui fakafalala pē kiate kita.
Uá, ko e kau mēmipa ʻoku nau kau atu ki he fakataha lotú te nau:
Ako ha ngaahi tefitoʻi tokāteline mo e ngaahi tefitoʻi moʻoni ʻo e moʻui fakafalala pē kiate kitá.
Vakaiʻi ʻenau ngaahi fie maʻu fakalaumālie mo fakatuʻasino lolotongá.
Fili ha kulupu ʻe fakatupulaki ai ʻenau ngaahi taukeí.
Fili ha ʻaho, taimi mo ha feituʻu ki he ngaahi fakataha ʻa e kulupú.
Tolú, ʻoku angamaheni ʻaki ke kamata e kau atu ʻa e kau mēmipá ki he kulupu naʻa nau filí hili ha uike ʻe taha mei he fakataha lotú.
Ngaahi Fatongia Kehe ʻo ha Tokotaha Tokoní (miniti ʻe 10)
Lesisita e Kulupú
Lau:ʻOku mahuʻinga ke lesisita e kulupú pea fakafonu ha lipooti kimui ange ʻi he ʻosi ʻa e kulupú. ʻE fakaʻatā koe ʻe he foungá ni ke ke kole ha ʻū tohi fakamoʻoni maʻá e kau mēmipa ʻo e kulupú, maʻu ha ngaahi naunau tokoni lahi ange, mo tokoni ki he Siasí ke fakalakalaka e polokalama moʻui fakafalala pē kiate kitá. Kātaki ʻo toe vakaiʻi e ngaahi fakahinohino ko ʻeni ʻi laló:
Kimuʻa ʻi he fuofua fakataha ʻa e kulupú, download ʻa e Foomu Lesisita e Kulupú ʻi he srs.lds.org/report. Fakafonu e fōmú lolotonga e fuofua fakataha ʻa e kulupú. Hili pē hono fakafonu ʻo e fōmú, ʻalu ki he srs.lds.org/report ke fakahū e fakamatalá.
Fetuʻutaki ki he mataotao moʻui fakafalala pē kiate kita ʻa e siteikí ʻi he uike takitaha ke fakahoko ange ko hai naʻe kau mai ki he fakatahá pea mo ha ngaahi talanoa lavameʻa mei ha taha ʻo e kau mēmipa ʻo e kulupú.
Download ʻa e Lipooti Fakaʻosinga ʻo e Kulupú mo e Foomu Kole Tohi Fakamoʻoní ʻi he srs.lds.org/report kimuʻa ʻi he fuofua fakataha ʻa e kulupú. Fakafonu e fōmú lolotonga e fakataha fakamuimui taha ʻa e kulupú. Hili pē hono fakafonu ʻo e fōmú, ʻalu ki he srs.lds.org/report ke fakahū e fakamatalá.
Ko Hono Teuteu e Lokí mo e Ngaahi Vitioó he Uike Takitaha
Lau:ʻOku totonu ke taʻofi ʻe he mataotao ki he moʻui fakafalala pē kiate kita ʻi homou siteikí ha loki ʻi he ʻApisiasí maʻa moutolu. ʻOku totonu ke ke vave mai ʻaki ha kiʻi taimi kimuʻa ʻi he uike takitaha ke fokotuʻutuʻu e ʻū seá mo e tēpilé. ʻOku totonu foki ke ke fokotuʻu mo e ngaahi naunau ʻata mo e leá pea fakapapauʻi ʻoku ngāue ʻa e ngaahi vitioó pea ngāue mo e meʻaleá.
Ko Hono Tataki ʻo ha Kulupu “Kumi ha Ngāue Lelei Ange”
Kapau ʻokú ke tokoni ki ha kulupu Kumi ha Ngāue Lelei Ange, ʻoku ʻi ai ha meʻa ʻe ua ʻoku fie maʻu ke ke ʻilo.
ʻUluakí, ʻi hoʻo kamataʻi hoʻo kulupu fakataha lotu moʻui fakafalala pē kiate kitá, fakaafeʻi e kau mēmipa ʻo e kulupú ke nau ʻomi ha tatau ʻo ha lisi ngāueʻanga ʻoku nau nau fie ngāue ai ki he fakataha takitaha ʻa e kulupú.
Uá, ʻoku malava ke liliu e ngaahi meʻa ʻoku fili ki hoʻomou fakatahá. Kātaki ʻo lau e peesi 16–17 ʻi he fakamatala fakalahí. Fakahoko ange ʻa e ngaahi meʻa ke nau fili mei ai ki he fakatahá, kiate kinautolu ʻoku nau fili hoʻo kulupú ʻi he fakataha lotu moʻui fakafalala pē kiate kitá.
Fakamatala Fakanounoú
Lau:Toutou vakaiʻi e lisi ko ʻení lolotonga hoʻo hoko ko e tokotaha tokoní.
Meʻa Ke Ke Fai kimuʻa ʻi he Fakataha ʻa e Kulupú
Telefoni pe ʻave pōpoaki ki he kau mēmipa ʻo e kulupú ke fakamanatu ange e ʻahó, taimí, mo e feituʻú.
Toe vakaiʻi e naunaú ke ke teuteu ai ke fai fakahinohino—kae ʻoua naʻá ke teuteu ke akoʻi ia ko ha lēsoni.
Kole ki he mataotao moʻui fakafalala pē kiate kita ʻa e siteikí ke ʻoatu ha ʻū tohi ngāue feʻunga maʻá e tokotaha kotoa naʻe fie kau atú mo ha tatau kehe ʻe ua.
ʻAlu vave ke fokotuʻutuʻu lelei e ʻū seá, tēpilé mo e ngaahi vitioó.
Tuku ha ʻū peni mo e penivahevahe maʻá e niʻihi ne ngalo ke ʻomí.
Meʻa Ke Ke Fai ʻi he Fakataha ʻa e Kulupú
Talitali lelei e kau mēmipa ʻo e kulupú pea feinga ke ʻiloʻi kinautolu.
Fakatokangaʻi pea hikihikiʻi ʻenau ngaahi lavameʻá mo e fakalakalaká.
Vahe ha taha tauhi taimi ke ne puleʻi e taimi ʻoku fokotuʻu atú.
Poupouʻi e fealeaʻaki ʻa e kau mēmipa ʻo e kulupú.
Fakamamafaʻi hono ngāueʻi e ngaahi tukupaá ʻi he vahaʻataimi ʻo e ngaahi fakatahá.
Fakamanatu ki he kau mēmipa ʻo e kulupú ke fakaʻapaʻapaʻi e ngaahi fakamatala ʻoku ʻikai fakahāhāholó.
Meʻa Ke Ke Fai hili e Fakataha ʻa e Kulupú
ʻAlu ki he srs.lds.org/report hili e fuofua fakatahá mo e fakataha fakaʻosí ki he lesisitá, lipōtí, mo e ngaahi tohi fakamoʻoni akó.
Poupouʻi e ngaahi hoa ngāué ke nau fetuʻutaki mo fetokoniʻaki lolotonga e uiké.
Fetuʻutaki ki he mataotao moʻui fakafalala pē kiate kita ʻa e siteikí ʻi he uike takitaha ke fakahoko ange ko hai naʻe kau mai ki he fakatahá pea naʻe fēfē ʻa e fakatahá.
Toe vakaiʻi ʻi he faʻa lotu ʻa e ngaahi naunau ki he fakataha hoko ʻa e kulupú.
Mateuteu fakalaumālie pea fakahoko ʻa e ngaahi ueʻi fakalaumālie ʻokú ke maʻú.