Apendiks A

Alang sa mga Ginikanan—Pag-andam sa Inyong Mga Anak nga Maanaa sa Dalan sa Pakigsaad sa Dios sa Tibuok Kinabuhi

Tungod kay Siya nahigugma kaninyo, nagsalig kaninyo, ug nakahibalo sa inyong potensyal, ang Langitnong Amahan naghatag kaninyo sa oportunidad sa pagtabang sa inyong mga anak sa pagsulod ug pag-uswag subay sa dalan sa pakigsaad, ang dalan ngadto sa kinabuhing dayon (tan-awa diha sa Doktrina ug mga Pakigsaad 68:25–28). Kini naglakip sa pagtabang kanila sa pagpangandam sa paghimo ug sa paghupot og sagradong mga pakigsaad, ingon sa pakigsaad sa bunyag ug ang mga pakigsaad nga gihimo diha sa templo. Pinaagi niini nga mga pakigsaad, ang inyong mga anak mobugkos sa ilang mga kaugalingon ngadto sa Manluluwas, si Jesukristo.

Adunay daghang paagi sa pag-andam sa inyong mga anak alang sa panaw diha sa dalan sa pakigsaad, ug ang Langitnong Amahan motabang kanimo sa pagdiskobre sa labing maayo nga paagi sa pagtabang kanila. Samtang magtinguha kamo og inspirasyon, ibutang sa hunahuna nga dili tanan nga pagkat-on mahitabo atol sa gieskedyul nga mga leksiyon. Sa tinuod, kabahin sa unsay naghimo sa pagkat-on diha sa panimalay nga hilabihan ka gamhanan mao ang oportunidad sa pagkat-on pinaagi sa ehemplo ug pinaagi sa gagmay, yano nga mga higayon––ang matang nga mahitabo sa natural nga paagi sa dagan sa inadlaw nga pagpuyo. Sama lamang nga ang pagsunod sa dalan sa pakigsaad usa ka makanunayon, tibuok kinabuhi nga proseso, mao usab ang pagkat-on mahitungod sa dalan sa pakigsaad. (Tan-awa diha sa “Panimalay ug Pamilya,” Pagtudlo Sumala sa Pamaagi sa Manluluwas [2022], 30–31.)

Adunay daghang paagi sa pag-andam sa inyong mga anak alang sa panaw diha sa dalan sa pakigsaad sa Dios.

Sa ubos mao ang pipila sa mga ideya nga mahimong mogiya ngadto sa dugang pa nga inspirasyon. Makakaplag kamo og dugang nga mga ideya alang sa pagtudlo sa mga bata nga Primary ang pangidaron diha sa “Apendiks B: Alang sa Primary—Pag-andam sa mga Bata nga Maanaa sa Dalan sa Pakigsaad sa Dios sa Tibuok Kinabuhi.”

Bunyag ug Pagkompirma

Gitudlo ni Nephi nga “ang ganghaan pinaagi diin [kita] mosulod” sa dalan sa pakigsaad “mao ang paghinulsol ug bunyag pinaagi sa tubig” (2 Nephi 31:17). Ang inyong mga paninguha sa pagtabang sa inyong mga anak sa pag-andam alang sa bunyag ug pagkompirma makabutang sa ilang mga tiil sa lig-on nga paagi diha niana nga dalan. Kini nga mga paninguha paggasugdan sa pagtudlo mahitungod sa hugot nga pagtuo diha ni Jesukristo ug sa paghinulsol. Kini naglakip usab sa pagtudlo mahitungod kon unsaon nato sa pagbag-o sa atong mga pakigsaad sa bunyag pinaagi sa pag-ambit sa sakramento matag semana.

Aniay pipila ka kapanguhaan nga makatabang kaninyo: 2 Nephi 31; espesyal nga isyu sa Higala nga magasin mahitungod sa bunyag.

• Bisan kanus-a ikaw adunay kasinatian nga naglig-on sa imong hugot nga pagtuo diha sa Langitnong Amahan ug ni Jesukristo, ipakigbahin kini ngadto sa inyong anak. Tabangi siya sa pagsabot nga ang hugot nga pagtuo usa ka butang nga makatubo nga mas lig-on ug mas lig-on pa sa tibuok kinabuhi. Unsa ang pipila ka butang nga mabuhat sa inyong mga anak sa pagpalambo og mas lig-on nga hugot ga pagtuo diha ni Kristo sa dili pa siya bunyagan?

• Kon ang inyong anak nalahimo og sayop nga pagpili, malipayong paghisgot mahitungod sa gasa sa paghinulsol. Ug kon kamo nakahimo og usa ka sayop nga pagpili, ipakigbahin ang kalipay nga moabot kon kamo maghinulsol. Ipamatuod nga tungod kay si Jesukristo miantos ug namatay alang sa atong mga sala, Siya mihatag kanato og gahom sa pag-usab. Kon ang inyong anak nagtinguha og kapasayloan, gawasnon ug pagmalipayon sa pagpasaylo.

• Sultihi ang inyong anak mahitungod sa inyong bunyag. Pagpakita og mga litrato ug pakigbahin og mga panumdoman. Paghisgot mahitungod kon unsa ang gibati, giunsa sa inyong mga pakigsaad sa bunyag pagtabang kaninyo nga mahibalo og mas maayo ni Jesukristo, ug giunsa niini sa pagpadayon og panalangin sa inyong kinabuhi. Awhaga ang inyong anak sa pagpangutana.

• Kon adunay bunyag sa inyong pamilya o sa inyong ward, dad-a ang inyong anak sa pagtan-aw niini. Pagsultihanay mahitungod kon unsay nakita ug gibati ninyo ug sa inyong anak. Kon mahimo, pakigsulti ngadto sa tawo nga gibunyagan ug pangutana sama sa mosunod: “Giunsa nimo paghimo niini nga desisyon? Giunsa nimo pagpangandam?”

• Bisan kanus-a nga inyong mamatikdan nga ang inyong anak nagbuhat og usa ka butang nga iyang gisaad nga buhaton, hatagi og kinasingkasing nga pagdayeg. Pasabta nga ang pagsunod sa mga pasalig nagtabang kanato sa pag-andam sa pagsunod sa mga pakigsaad nga atong himoon kon kita bunyagan. Unsay atong gisaad sa Dios kon kita bunyagan? Unsa ang Iyang saad kanato? (tan-awa diha sa Mosiah 18:8–10, 13).

• Kon kamo ug ang inyong anak mag-uban nga adunay sagradong kasinatian (sama nga diha sa simbahan, samtang nagbasa sa mga kasulatan, o samtang nagserbisyo og usa ka tawo), sultihi siya mahitungod sa espirituhanong mga pagbati o mga panghunahuna nga aduna kamo. Dapita ang inyong anak sa pagpakigbahin kon unsa ang iyang gibati. Timan-i ang lainlaing mga paagi ang Espiritu makasulti ngadto sa katawhan, lakip sa paagi nga Siya nagsulti nganha kanimo sa personal nga paagi. Tabangi ang inyong anak sa pag-ila sa mga higayon nga siya mahimong nagsinati sa impluwensiya sa Espiritu Santo.

• Pagdungan og tan-aw sa pipila ka bidyo diha sa koleksiyon sa Gospel Library nga giulohan og “Paminaw Kaniya!” Pag-uban og hisgot mahitungod sa lainlaing mga paagi nga ang mga sulugoon sa Ginoo makadungog sa Iyang tingog. Dapita ang inyong anak sa pagdrowing og usa ka hulagway o sa paghimo og usa ka bidyo mahitungod kon giunsa niya sa pagdungog sa tingog sa Manluluwas.

• Paghisgot mahitungod kon giunsa nga ang pagkahimo nga usa ka miyembro sa Ang Simbahan ni Jesukristo sa mga Santos sa Ulahing mga Adlaw nagpanalangin kaninyo. Giunsa ninyo nga mas napaduol ngadto sa Langitnong Amahan ug ni Jesukristo samtang kamo nagserbisyo sa uban ug samtang ang uban nagserbisyo kaninyo? Tabangi ang inyong anak sa paghunahuna og mga paagi sa pagserbisyo ug paglig-on sa uban isip usa ka miyembro sa Simbahan.

• Himoa ang sakramento nga usa ka sagrado ug malipayong hitabo sa inyong pamilya. Tabangi ang inyong anak sa pagplano og mga paagi sa pagtutok diha ni Jesukristo sa panahon sa sakramento. Unsaon nato sa pagpakita nga ang sakramento sagrado ngari kanato?

• Daghang mga isyu sa Higala nga magasin naglakip og mga artikulo, mga istorya, ug mga kalihokan sa pagtabang sa mga bata sa pagpangandam alang sa bunyag ug pagkompirma. Papilia ang inyong anak og pipila nga basahon ug kalingawan uban kaninyo.

  

  Gitudlo ni Nephi nga “ang ganghaan pinaagi diin [kita] mosulod” sa dalan sa pakigsaad “mao ang paghinulsol ug bunyag pinaagi sa tubig” (2 Nephi 31:17).

Gahom, Awtoridad, ug mga Yawe sa Pagkapari

Ang pagkapari mao ang awtoridad ug gahom sa Dios pinaagi diin Siya nagpanalangin sa Iyang mga anak. Ang pagkapari sa Dios ania sa yuta karon nga anaa diha sa Ang Simbahan ni Jesukristo sa mga Santos sa Ulahing mga Adlaw. Ang tanang miyembro sa Simbahan kinsa motuman sa ilang mga pakigsaad—lakip sa mga bata—mapanalanginan sa gahom sa pagkapari sa Dios diha sa ilang mga panimalay aron sa paglig-on sa ilang kaugalingon ug sa ilang mga pamilya (tan-awa sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 3.5, Librarya sa Ebanghelyo). Kini nga gahom motabang sa mga miyembro sa paghimo sa buhat sa Dios bahin sa kaluwasan ug sa kahimayaan diha sa ilang personal nga mga kinabuhi ug sa mga pamilya (tan-awa diha sa Kinatibuk-ang Tamdanan nga Basahon, 2.2).

Kita nagdawat og mga ordinansa pinaagi sa awtoridad sa pagkapari. Kon ang mga lalaki ug mga babaye nagserbisyo diha sa mga calling sa Simbahan, sila nagbuhat sa mao uban sa awtoridad sa pagkapari, ubos sa pagdumala niadtong kinsa naghupot sa mga yawe sa pagkapari. Ang tanan nga mga anak sa Langitnong Amahan––Iyang mga anak nga lalaki ug Iyang mga anak nga babaye––mapanalanginan samtang mahimo sila nga mas makasabot sa pagkapari.

Sa pagkat-on pa mahitungod sa pagkapari, tan-awa sa Russell M. Nelson, “Espirituhanon nga mga Bahandi,” Liahona, Nob. 2019, 76–79; Russell M. Nelson, “Ang Bugti sa Gahom sa Pagkapari,” Liahona, Mayo 2016, 66–69; “Mga Baroganan sa Pagkapari,” kapitulo 3 diha sa Kinatibuk-ang Tamdanan nga Basahon.

• Himoa ang mga ordinansa sa pagkapari nga usa ka makanunayong bahin sa inyong kinabuhi sa pamilya. Sama pananglitan, tabangi ang inyong anak sa pagpangandam sa espirtuhanong paagi alang sa sakramento matag semana. Awhaga ang inyong anak sa pagtinguha og mga panalangin sa pagkapari kon siya nasakit o nagkinahanglan og paghupay o paggiya. Himoa kini nga batasan sa pagtudlo sa mga paagi ang Ginoo nagpanalangin sa inyong pamilya pinaagi sa gahom sa pagkapari.

• Samtang kamo mag-uban sa pagbasa sa mga kasulatan, bantayi ang mga oportunidad sa paghisgot kon giunsa sa Dios pagpanalangin ang mga tawo pinaagi sa Iyang gahom. Pakigbahin sa inyong kaugalingong mga kasinatian sa dihang ang Dios nagpanalangin kaninyo pinaagi sa Iyang pagkapari. Alang sa mga ehemplo sa mga panalangin nga atong nadawat gikan sa Dios pinaagi sa pagkapari, tan-awa diha sa Kinatibuk-ang Tamdanan nga Basahon, 3.2, 3.5.

• Kat-oni ang linya sa awtoridad sa pagkapari sa usa ka tawo diha sa imong pamilya. (Ang mga naghupot sa Melchizedek nga Pagkapari makadawat og kopya sa ilang linya sa awtoridad pinaagi sa pagpadala og email ngadto sa [e-mail]; tan-awa usab sa “Request a Priesthood Line of Authority” diha sa Help Center sa ChurchofJesusChrist.org.) Paghisgot mahitungod kon nganong kini importante nga mahibalo nga ang awtoridad sa pagkapari nagagikan ni Jesukristo Mismo. Nganong nakigbahin Siya niini ngari kanato?

• Tudloi ang inyong anak nga human sa bunyag, siya makadawat og gahom sa pagkapari pinaagi sa pagsunod sa pakigsaad sa bunyag. Pag-uban og rebyo sa mensahe ni Presidente Russell M. Nelson “Espirituhanon nga mga Bahandi” (Liahona, Nob. 2019, 76–79). Sultihi ang inyong anak kon giunsa sa mga ordinansa sa pagkapari pagdala sa gahom sa Dios nganha sa inyong kinabuhi. Alang sa usa ka lista sa pipila ka paagi nga kita napanalanginan pinaagi sa gahom sa pagkapari, tan-awa diha sa Kinatibuk-ang Tamdanan nga Basahon, 3.5.

• Hisgoti ang pangutana “Sama sa unsa ang usa ka sulugoon sa Ginoo?” Pag-uban ug basa sa Doktrina ug mga Pakigsaad 121:36–42, ug pangita alang sa mga tubag. Bisan kanus-a nga kamo makamatikod sa inyong anak (o lain nga tawo) nga naggamit sa usa sa mga baroganan o mga hiyas niini nga mga bersikulo, itudlo kini.

• Kon kamo o ang inyong anak naggamit sa mga yawe sa pag-abli og pultahan o sa pagpaandar og sakyanan, hunong sa makadiyot aron sa pagtandi niadto nga mga yawe ngadto sa mga yawe nga gihuptan sa mga lider sa pagkapari. (Alang sa usa ka kahulogan sa mga yawe sa pagkapari, tan-awa diha sa Kinatibuk-ang Tamdanan nga Basahon, 3.4.1). Unsay “giablihan” o “gipaandar” sa mga yawe sa pagkapari alang kanato? Tan-awa usab sa Gary E. Stevenson, “Asa ang mga Yawe ug Awtoridad sa [Pagkapari]?,” Liahona, Mayo 2016, 29–32.

• Kon kamo gi-set apart alang sa usa ka calling, dapita ang inyong anak nga maanaa, kon mahimo. Pakitaa ang inyong anak nga kamo nagtuman sa inyong calling. Mahimo gani nga mangita kamo og tukma nga mga paagi nga siya makatabang kaninyo. Ihulagway kon giunsa ninyo pagbati ang gahom sa Ginoo diha sa inyong calling.

Pag-adto sa Templo––Mga Bunyag ug Pagkompirma alang sa mga Patay

Ang mga templo usa ka bahin sa plano sa Langitnong Amahan alang sa Iyang mga anak. Diha sa mga templo, kita naghimo og sagradong mga pakigsaad uban sa Langitnong Amahan samtang nag-apil kita sa sagradong mga ordinansa, tanan niini nagpunting ngadto ni Jesukristo. Ang Langitnong Amahan naghatag og paagi alang sa Iyang tanan nga mga anak sa paghimo og mga pakigsaad ug sa pag-apil diha sa mga ordinansa, lakip niadtong kinsa wala makadawat niini dinhi nga kinabuhi. Sa sinugdanan sa tuig nga siya mag-edad og 12, ang inyong anak igo na ka hingkod nga magpabunyag ug magpakumpirma didto sa templo alang sa patay nga mga katigulangan.

• Tambong sa templo kutob sa itugot sa imong mga kahimtang. Pakigsulti sa inyong anak mahitungod kon nganong kamo moadto ug sa unsang paagi ang templo nagtabang kaninyo nga mobati nga mas duol ngadto sa Langitnong Amahan ug ni Jesukristo.

• Magkauban sa pagrebyo ug paghisgot sa mga pangutana sa rekomend sa templo. Pakig-istorya ngadto sa inyong anak mahitungod kon unsa ang mahitabo diha sa usa ka interbiyo sa rekomend sa templo. Pakigbahin kon nganong ang pagbaton og rekomend sa templo importante kaninyo.

• Mag-uban sa pagbasa sa Malaquias 4:6. Pag-istoryahanay mahitungod kon unsaon sa inyong mga kasingkasing pagbalik ngadto sa inyong mga katigulangan. Pagkat-on pa og dugang mahitungod sa inyong mga katigulangan pinaagi sa pagsuhid og dungan sa inyong kasaysayan sa pamilya diha sa FamilySearch.org. Pangita og mga katigulangan kinsa nagkinahanglan nga mabunyagan ug makumpirmahan. Ang usa ka templo ug family history consultant sa ward makatabang kaninyo.

• (Tan-aw usab diha sa “Preparing Your Child for Temple Baptisms and Confirmations” diha sa ChurchofJesusChrist.org.)

Pagdawat og Patriyarkal nga Panalangin

Ang usa ka patriyarkal nga panalangin mahimong usa ka tinubdan sa giya, paghupay, ug inspirasyon. Kini naglangkob og personal nga tambag gikan sa Langitnong Amahan ngari kanato ug nagtabang kanato sa pagsabot sa atong mahangtorong pagkatawo ug katuyoan. Tabangi ang inyong anak sa pagdawat og usa ka patriyarkal nga panalangin pinaagi sa pagtudlo kaniya sa kamahinungdanon ug sa sagrado nga kinaiyahan sa patriyarkal nga mga panalangin.

• Ipakigbahin sa inyong anak ang inyong kasinatian sa pagdawat og usa ka patriyarkal nga panalangin. Kamo makahimo sa pagpakigbahin og mga butang sama sa kon giunsa ninyo pag-andam sa pagdawat niini, kon giunsa niini sa pagtabang kaninyo nga mas mapaduol ngadto sa Dios, ug giunsa ninyo paggamit ang panalangin diha sa inyong kinabuhi. Madapit usab ninyo ang inyong anak nga makig-istorya ngadto sa ubang mga sakop sa pamilya kinsa nakadawat sa ilang patriyarkal nga mga panalangin.

• Sa pagkat-on mahitungod sa proseso sa pagdawat og usa ka patriyarkal nga panalangin, tan-awa diha sa Kinatibuk-ang Tamdanan nga Basahon, 18.17.

• Kon kamo adunay mga katigulangan kinsa nakadawat og patriyarkal nga mga panalangin, kini mahimong makadasig sa pagbasa og pipila niini uban sa inyong anak. Sa paghangyo og mga panalangin sa mga katigulangan kinsa namatay, log in ngadto sa ChurchofJesusChrist.org, iklik ang account nga icon diha sa ibabaw sa tuong bahin sa screen, ug pilia ang “Patriyarkal nga Panalangin.”

• Human ang inyong anak nakadawat og usa ka patriyarkal nga panalangin, dapita ang bisan hain sa mga sakop sa pamilya kinsa dinha aron sa pagrekord sa ilang mga pagbati ug sa pagpakigbahin niini ngadto sa inyong anak.

Pag-adto sa Templo––ang Pagtuga [Endowment]

Ang Dios gusto nga motuga, o mopanalangin, sa tanan sa Iyang mga anak uban sa “gahom gikan sa kahitas-an” (Doktrina ug mga Pakigsaad 95:8). Kita moadto sa templo sa pagdawat sa atong kaugalingong pagtuga sa makausa lamang, apan ang mga pakigsaad nga atong gihimo uban sa Dios ug ang espirituhanong gahom nga Siya naghatag kanato isip kabahin sa pagtuga makapanalangin kanato sa matag adlaw sa atong mga kinabuhi.

• Pagpakita og hulagway sa templo diha sa inyong panimalay. Sultihi ang inyong anak mahitungod sa mga pagbati nga inyong nasinati didto sa templo. Paghisgot kanunay mahitungod sa inyong gugma alang sa Ginoo ug sa Iyang balay ug sa mga pakigsaad nga inyong nahimo didto.

• Magkauban nga mosuhid sa temples.ChurchofJesusChrist.org. Papangutan-a ang inyong anak og bisan unsa nga mga pangutana nga siya aduna mahitungod sa templo. Alang sa giya mahitungod kon unsay imong masulti gawas sa templo, tan-awa diha sa mensahe ni Elder David A. Bednar “Andam nga Makaangkon sa Matag Gikinahanglan nga Butang” (Liahona, Mayo 2019, 101–4; tan-awa ilabi na ang seksiyon nga giulohan og “Nakasentro sa Panimalay ug Gisuportahan sa Simbahan nga Pagkat-on ug Pagpangandam alang sa Templo”).

• Samtang kamo ug ang inyong anak nag-apil o nagsaksi sa ubang mga ordinansa (sama sa sakramento o usa ka pagpanalangin nga mamaayo), paggahin og higayon sa paghisgot sa simbolismo nga nalakip diha sa ordinansa. Unsa ang girepresentar sa mga simbolo? Sa unsang paagi kini nagpamatuod ni Jesukristo? Kini makatabang sa inyong anak sa pag-andam sa pagpamalandong sa simbolikanhon nga kahulogan sa mga ordinansa sa templo, diin nagpamatuod usab ni Jesukristo.

• Tabangi ang inyong anak sa pagmatikod kon giunsa niya sa pagsunod ang pakigsaad sa bunyag nga gihulagway diha sa Mosiah 18:8–10, 13. Usab tabangi ang inyong anak sa pagmatikod kon giunsa sa Ginoo sa pagpanalangin kaniya. Lig-ona ang pagsalig sa inyong anak sa iyang abilidad sa pagsunod sa mga pakigsaad.

• Dayag ug kanunay nga paghisgot mahitungod kon sa unsang paagi ang inyong mga pakigsaad sa templo naggiya sa inyong mga pagpili ug nagtabang kaninyo sa paglambo nga mas maduol ngadto ni Jesukristo. Mahimong gamiton ninyo ang Kinatibuk-ang Tamdanan nga Basahon, 27.2, sa pagrebyo sa mga pakigsaad nga atong himoon diha sa templo.

Pagserbisyo og Misyon

Si Elder David A. Bednar mitudlo: “Ang bugtong nga labing importanteng butang nga inyong mahimo sa pagpangandam alang sa usa ka tawag aron sa pagserbisyo mao ang pagkahimong usa ka misyonaryo sa dili pa kamo moadto sa usa ka misyon. … Ang isyu dili nga moadto sa usa ka misyon; kondili, ang isyu mao ang pagkahimong usa ka misyonaryo ug pagserbisyo sulod sa atong tibuok kinabuhi sa bug-os natong kasingkasing, gahom, hunahuna, ug kusog. … Ikaw nangandam alang sa usa ka tibuok kinabuhi sa misyonaryo nga buhat” (“Pagkahimong usa ka Misyonaryo,” Liahona, Nob. 2005, 45–46). Ang mga kasinatian nga ang inyong anak aduna nga mahimong usa ka misyonaryo mopanalangin kaniya sa kahangtoran, dili lamang alang sa mubo nga panahon nga siya nagserbisyo isip usa ka misyonaryo.

Aron makat-on og dugang pa, tan-awa sa Russell M. Nelson, “Pagsangyaw sa Ebanghelyo sa Kalinaw,” Liahona, Mayo 2022, 6–7; M. Russell Ballard, “Misyonaryo nga Pagserbisyo Mipanalangin sa Akong Kinabuhi sa Kahangtoran,” Liahona, Mayo 2022, 8–10; Misyonaryong Pagpangandam: Pag-adjust sa Kinabuhing Misyonaryo, Librarya sa Ebanghelyo.

• Paghatag og panig-ingnan kon unsaon sa pagpakigbahin sa ebanghelyo sa natural nga mga paagi. Kanunay nga mag-alisto sa mga oportunidad sa pagpakigbahin ngadto sa uban sa imong mga pagbati mahitungod sa Langitnong Amahan ug sa Manluluwas ug sa mga panalangin nga imong nadawat isip usa ka miyembro sa Iyang Simbahan. Dapita ang uban sa pag-apil sa inyong pamilya diha sa Simbahan- ug sa mga kalihokan nga may kalabotan sa pamilya.

• Pangita og mga oportunidad alang sa inyong pamilya sa pakig-uban sa mga misyonaryo. Dapita sila sa pagtudlo sa inyong mga higala, o pagtanyag kanila sa pagtudlo sa mga tawo diha sa inyong panimalay. Hangyoa ang mga misyonaryo mahitungod sa mga kasinatian nga sila aduna ug sa unsang paagi ang misyonaryong pagserbisyo nagtabang kanila nga mas mapaduol ngadto ni Jesukristo. Pangutana usab kon unsa ang ilang gibuhat (o naghinaot nga ila untang nabuhat) sa pag-andam nga mahimong mga misyonaryo.

• Kon kamo miserbisyo og usa ka misyon, sulti sa dayag nga paagi ug sa kanunay mahitungod sa inyong mga kasinatian. O dapita ang mga higala o mga sakop sa pamilya kinsa miserbisyo og mga misyon sa paghisgot mahitungod sa ilang pagmisyon. Ikaw makahisgot usab mahitungod sa mga paagi nga kamo mipakigbahin sa ebanghelyo ngadto sa uban sa tibuok ninyong kinabuhi. Tabangi ang inyong anak sa paghunahuna og mga paagi nga siya makahimo sa pagpakigbahin sa ebanghelyo.

• Hatagi ang inyong anak og mga oportunidad sa pagtudlo sa inyong pamilya og mga baroganan sa ebanghelyo. Ang inyong anak makahimo usab sa pagbansay sa pagpakigbahin sa iyang mga pagtuo ngadto sa uban. Sama pananglitan, ikaw makahisgot og mga pangutana sama sa “Unsaon nato sa pagpaila sa Basahon ni Mormon ngadto sa usa ka tawo nga wala gayod sukad makadungog niini?” o “Unsaon nato paghulagway ang panginahanglan alang sa Manluluwas ngadto sa usa ka tawo kinsa dili usa ka Kristiyano?”

• Tabangi ang inyong anak nga mahimong komportable sa pagsulti ngadto sa mga tawo. Unsa ang pipila ka maayong mga paagi sa pagsugod og usa ka panagsultihanay? Awhaga ang inyong anak sa pagkat-on kon unsaon sa pagpaminaw ngadto sa unsay gisulti sa uban, pagsabot kon unsay anaa sa ilang mga kasingkasing, ug sa pagpakigbahin og mga kamatuoran sa ebanghelyo nga makapanalangin sa ilang mga kinabuhi.

• Pangita og mga oportunidad alang sa inyong anak sa pagkat-on mahitungod sa ubang kultura ug mga pagtuo. Tabangi siya sa pag-ila ug pagrespeto sa maayo ug tinuod nga mga baroganan sa ubang mga tinuohan.

Pag-adto sa Templo––Pagselyo

Diha sa templo, ang bana ug asawa mahimong magminyo alang sa kahangtoran. Kini mahimo sa usa ka ordinansa nga gitawag og pagselyo. Bisan tuod og kini nga ordinansa mahimong daghang mga tuig pa ka layo alang sa imong anak nga lalaki o babaye, ang gamay, yano, kanunay nga mga butang nga inyong gibuhat nga mag-uban kanunay atol niadto nga mga katuigan makatabang kaniya sa pag-andam alang niining talagsaon nga panalangin.

• Magkauban sa pagbasa sa “Ang Pamilya: Usa ka Pamahayag ngadto sa Kalibotan diha sa Librarya sa Ebanghelyo. Unsa ang gitudlo niini nga pamahayag mahitungod sa kalipay sa kinabuhi sa pamilya ug mahitungod sa malamposon nga mga kaminyoon? Uban sa inyong anak, pagpili og usa sa mga baroganan nga gilista diha sa pamahayag nga tun-an. Makahimo ka sa pagpangita og mga kasulatan nga kalabot ngadto niana nga baroganan diha sa Giya ngadto sa mga Kasulatan. Makahimo usab kamo og mga tumong sa paggamit niana nga baroganan sa mas hingpit nga paagi diha sa inyong pamilya. Samtang naningkamot kamo sa inyong mga tumong, hisgoti nga mag-uban ang epekto nga aduna diha sa pagpuyo niana nga baroganan sa kinabuhi sa inyong pamilya.

• Uban sa inyong anak, basaha ang mensahe ni Presidente Dieter F. Uchtdorf “Ang Pagdayeg Niadtong Miluwas” (Liahona, Mayo 2016, 77–80). Kon moabot kamo sa seksiyon nga giulohan og “Ang Katilingban nga Pagkahuman Ilabay,” mahimo kamong mangita alang sa mga butang diha sa inyong panimalay nga ilabay ug ubang mga butang nga dili mahimong ilabay. Paghisgot mahitungod kon sa unsang paagi inyong atimanon og lahi ang mga butang kon gusto ninyo kining molungtad og dugay nga panahon. Unsa ang gisugyot niini mahitungod kon kinahanglan unsaon nato sa pag-atiman ang kaminyoon ug mga relasyon sa pamilya? Unsa pa ang atong makat-onan gikan sa mensahe ni Presidente Uchtdorf mahitungod kon sa unsang paagi ang Manluluwas makatabang kanato sa pagtukod og lig-ong mga kaminyoon ug mga pamilya?

• Kon minyo na kamo, mahimong dayag ngadto sa inyong anak mahitungod sa mga butang nga inyong gibati nga maayo ninyong gibuhat isip usa ka magtiayon, sa mga butang nga inyong gikat-onan, ug sa mga paagi nga kamo naninguha sa pagpalambo. Kon ikaw ug ang imong kapikas naselyo diha sa templo, ipakita sa inyong anak pinaagi sa ehemplo kon giunsa ninyo sa pagpaningkamot sa pagsunod sa inyong mga pakigsaad ngadto sa usag usa ug ngadto sa Ginoo. Sultihi ang inyong anak kon giunsa ninyo pagpaningkamot sa paghimo nga ang Langitnong Amahan ug si Jesukristo ang sentro sa inyong relasyon ug sa unsang paagi Sila nagtabang kaninyo.

• Kon ang mga desisyon sa pamilya kinahanglan nga pagahimoon, paghimo og mga pagtambag ug mga panaghisgot sa pamilya. Seguroha nga ang tanang mga opinyon sa mga sakop sa pamilya paminawon ug hatagan og bili. Gamita kini nga mga panaghisgot isip oportunidad sa paghatag og panig-ingnan sa maayong komunikasyon ug kaluoy diha sa mga relasyon sa pamilya, bisan pa og dili tanan nakakita sa mga butang sa samang paagi.

• Diin adunay dili panag-uyon o panagbangi diha sa pamilya, pagpakita og pailob ug kaluoy. Tabangi ang inyong anak nga makakita kon unsaon pagdumala og panagbangi sa Kristohanong mga paagi nga makatabang kaniya sa pagpangandam alang sa usa ka malipayong kaminyoon. Magkaubang basahon ang Doktrina ug mga Pakigsaad 121:41–42, ug paghisgot mahitungod kon sa unsang paagi ang mga baroganan dinhi niini nga mga bersikulo magamit ngadto sa kaminyoon.