E masu tiko e na nona loga ni moce e dua na goneyalewa.

Vakayaco digidigi e veivakauqeti

Ena Me iSakisaki ni iTabagone, o na kunea kina na ivakavuvuli i Jisu Karisito kei ira na Nona parofita. Ni sa nomu idusidusi na dina oqo, sa rawa ni o vakayacora na digidigi e so e veivakauqeti ka na vakalougatataki iko e na gauna oqo kei na veigauna tawamudu.

O Jisu Karisito na sala ki na reki tawamudu. Ni o vakayagataka na nomu galala mo digitaka mo muri Jisu Karisito, o sa tiko e na salatu e veimuataki ki na marau tawamudu. Cakava me nomu ivakatagedegede o Jisu Karisito, nomu yavu tudei kaukauwa. Tara cake na nomu bula e na Nona ivakavuvuli, ka vakarautaka na nomu digidigi mai vei ira. Na veiyalayalati o vakayacora ena papitaiso, e na gauna ni sakaramede, kei na valetabu sa ikoya na buloko e tarai kina na nomu yavu tudei vei Karisito. O na sotava tikoga na dredre kei na veitemaki, ia na Tamada Vakalomalagi kei na iVakabula e na vukei iko mo bula curumi ira kece yani.

Ko sa dua na luvena lomani vakayalo na Kalou. Na Nona ituvatuva cecere ni bula marau e rawa kina vei iko mo tubu vakayalo ka vakatoroicaketaki kina na kemu yaga vakalou. Oqo na vuna a talai Jisu Karisito mai kina o Koya me nomu iVakabula.

E nuitaki iko tiko na Tamada Vakalomalagi! Sa solia vei iko o Koya na veivakalougatataki cecere, ka oka kina na taucoko ni kosipeli kei na cakacaka tabu vakalotu kei na veiyalayalati ka na vauci iko ki Vua ka na kauta mai na Nona kaukauwa ki na nomu bula. Na veivakalougatataki oqori e lako vata mai kei na kena icolacola. E kila o Koya ni rawa ni o vakayaco veisau e vuravura, ka gadrevi kina, e na vuqa na gauna, mo duatani mai vei vuravura. Vakasaqara na veidusimaki ni Tamada Vakalomalagi ni vakayaco digidigi. E na vakalougatataki iko o Koya e na veivakauqeti ni Yalo Tabu.

Na inaki ni Me iSakisaki ni iTabagone e na sega ni solia vei iko na “io” se “sega” ena vuku ni veidigidigi kece sara o na rawa ni sotava. Ia, sa sureti iko na Turaga mo bula e na sala e cecere ka savasava cake—na Nona sala. Na idusidusi oqo e na vakavulici iko me baleta na Nona sala. E vakamacalataka na dina e sa vakatakila oti mai o Koya. Cakava na veidina oqo me idusidusi ni nomu digidigi—digidigi levu, me vaka na vakayaco veiyalayalati ena valetabu kei na veiqaravi vaka daukaulotu, ka vakakina na digidigi ni veisiga, me vaka na ivakarau ni nodra qaravi na tamata se na ivakarau ni vakayagataki ni nomu gauna.

Dina ni so e ra rawa ni vukei iko, na nomu tubu vakayalo e nomu vakatabakidua. Sa nomu ga o iko kei na Turaga. E kila o Koya na yalomu, ia o Koya duadua ga e rawa ni Turaganilewa cecere duadua. Cakava na nomu vinaka duadua mo vinaka cake kina ena veisiga yadua, muria na ivakaro ni Kalou ka rokova na nomu veiyalayalati, ka vukei ira na tamata me ra toro voleka vua na iVakabula.

Raica na Mosaia 4:29–30 (ni sa vuqa sara na sala ki na ivalavala ca, o koya gona meda sa qarauni keda); Ilamani 5:12 (tara na nomu yavu vua na Karisito); Vunau kei na Veiyalayalati 45:57 (taura na Yalo Tabu me nomu idusidusi); 82:15 (vauci iko vua na Turaga ena veiyalayalati).

era vakayagataka tiko na tamata na ivakatakilakila ni mape

Na sala e tuvai tu kina na idusidusi oqo

Na vei ulutaga yadua e wase vaka tolu:

1. Dina tawamudu, se ivunau ni kosipeli vakalesui mai i Jisu Karisito

2. Na veisureti me cakacakataki na dina oqori

3. Na veivakalougatataki yalataki e solia na Turaga vei ira e ra bula voli e na Nona ivakavuvuli