E na vukei iko o Jisu Karisito

(Same 147:3).

Sa nomu kaukauwa o Jisu Karisito. E sa vakayacora oti o Koya na veika taucoko e gadrevi mo reki kina e na bula oqo ka tawamudu. E na nomu digitaki Koya kei na Nona kosipeli, o sa digitaka tiko na reki tawamudu.

E na gauna mada ga o saga kina mo solia na nomu vinaka duadua mo vakayaco digidigi vinaka, e na so na gauna o na caka cala. O na vakayacora na veika o a diva mo a sega ni cakava. Na tamata taucoko e yaco vua oqo. Ni yaco oqori, e dau rawarawa mo yalolailai se vakataroga se ko na vinaka cake beka. Ia e tiko na itukutuku rogo vinaka—e totoka, ka nuitaki! Baleta ni lomani iko na Kalou, a tala mai na Luvena, o Jisu Karisito, o Koya ka a ciqoma na nomu ivalavala ca me rawa kina ni o veivutuni ka toso tikoga ki liu.

Dina tawamudu

O Jisu Karisito e rawa ni vakaukauwataki iko. E rawa ni vukei iko o Koya mo veisautaka na nomu gagadre, nomu vakanananu, kei na nomu ivalavala. Ni ko lomaleqa, rere, se sasaga dredre tiko e na sala cava ga, ena vakacegui iko o Koya. E na vukei iko o Koya e na veituvaki kece ni nomu bula.

E sega ni totogi ni ivalavala ca na veivutuni; oqori na sala e sereki keda kina na iVakabula mai na ivalavala ca. Na veivutuni e kena ibalebale me da veisau—me da vuki tani mai na ivalavala ca ka gole vua na Kalou. E kena ibalebale me da vinaka cake ka ciqoma na veivosoti. Na mataqali veisau vakaoqo e sega ni ka ni dua ga na gauna; oqo e dua na sasaga e na tomani tikoga.

Veisureti

Veivutuni. Gole vua na Turaga e na gagadre mo vinaka cake. Ni o sa cakava e dua na ka cala, tusanaka e na yalodina ena mata ni Kalou, kevaka e gadrevi, vua na nomu bisopi kei na dua tale o a rairai caka cala vua. Solia na nomu vinaka duadua mo vakadodonutaka na veika kece sara.

Rekitaka na isolisoli ni caka vinaka cake ka vinaka sara. E na gauna mada ga e sega ni rawarawa kina ka taura e dua na gauna balavu mai na kena o vinakata, kakua ni muduka na nomu tovolea tiko ga. Cakacakataka tiko ga ka nuitaka tiko na Turaga. E na vukei iko na iVakabula ena veikalawa yadua ni sala.

Kalougata yalataki

E na vosoti iko ka vakabulai iko o Jisu Karisito ni ko sa veivutuni. E na vakaisosomitaka na nomu yalo ni caka cala ena vakacegu kei na reki. E na sega tale ni nanuma na nomu ivalavala ca. E na Nona kaukauwa, na nomu gagadre mo muria na Nona ivunau e na tubu cake.

E na veisautaka o Koya na yalomu kei na nomu bula. Vakamalua tiko, o na tubu ka yaco mo vakataki Koya vakalevu cake. Na nomu isema ni veiyalayalati kei Koya e na kauta mai vei iko na kaukauwa levu cake mo sema ki na Nona kaukauwa.

Taro kei na kena isau

Au na kila vakacava ni sa vosoti au na Kalou? Sa yalataka na Kalou ni na vosoti ira era veivutuni. Ni o vakila na vakacegu mai vua na Yalo, e rawa ni o kila ni kaukauwa veisorovaki ni iVakabula sa cakacaka tiko e na nomu bula.

E na gauna cava beka au na gadreva kina na veivuke nei bisopi me‘u veivutuni? Na nomu bisopi e tu vua na idola ni matabete kei na isolisoli vakayalo me vukei iko mo veivutuni. E rawa ni o vakasaqara na nona veivuke kei na ivakasala e na gauna cava ga. Kevaka o sa vakayacora e so na cala bibi, me vaka na voroki ni lawa ni tiko savasava, veitalanoa kei nomu bisopi. E na sega ni cudruvi iko o koya. O koya e dua vei ira na matataki Jisu Karisito ka na vukei iko mo kila na sala mo veivutuni vakataucoko kina ka ciqoma na kaukauwa ni veivakabulai kei na veivakaqaqacotaki ni iVakabula.

Au tovolea tiko me‘u veivutuni, ia au cakava tikoga na cala vata ga oqori. Na cava me‘u na cakava? E na taura e dua na gauna na kena sagai me da vakaitovotaki keda e na itovo vinaka ka voroka na kena ka ca, kakua ni soro. Gole vei Karisito. Sa rauti keda na Nona loloma. Tovolea tale. O na sega vakadua ni tu taudua e na nomu sasaga mo toso ki liu. O Jisu Karisito e tiko vata kei iko e na veigauna kecega.

Raica na Inosi 1:6 (na yalo ni cala e rawa ni kau laivi); Mosaia 4:3 (mai vua na Yalo Tabu, na Kalou e na vakatakila vei iko ni ko sa vosoti); 26:30 (sa dau vosoti keda na iVakabula ena veigauna kece eda veivutuni kina); Ica 12:27 (na loloma soli wale ni iVakabula ena cakava na ka malumalumu me kaukauwa); Moronai 6:8 (o ira sa veivutuni era na vosoti); 10:32 (mo vinaka sara vei Karisito); Vunau kei na Veiyalayalati 1:32 (na Turaga sa dau vosoti ira sa veivutuni); 58:42–43 (na veivutuni e oka kina na vakatutusa kei na kena biu tani na ivalavala ca).

Taro ni ivolatara ni valetabu

O vakabauta ka vakadinadinataka na Kalou, na Tamada Tawamudu; kei na Luvena, o Jisu Karisito; kei na Yalo Tabu?

E dua tiko li na nomu ivakadinadina ni Nona Veisorovaki o Jisu Karisito kei na Nona itavi vaka nomu iVakabula ka Dauveivueti?