Lomana na Kalou, ka lomana na wekamu

Maciu 22:37–40

Me vukei iko mo vakayaco digidigi vinaka, sa dau solia na Kalou na ivakaro. E vakayacora oqo o Koya baleta ni lomani iko. Na vu vinaka duadua ni nomu talairawarawa ki na ivakaro ni Kalou sa ikoya ni o lomani Koya. Na loloma sa uto tiko ni ivakaro ni Kalou.

Dina tawamudu

E lomani iko na Kalou. E sa Tamamu o Koya. Na Nona loloma uasivi e rawa ni vakauqeti iko mo lomani Koya. Ni sa veivakauqeti bibi duadua ena nomu bula na nomu lomana na Tamada Vakalomalagi, ena rawarawa cake e vuqa na vakatulewa.

Na rua na ivunau cecere duadua, e vakavulica o Jisu, sa ikoya mo lomana na Kalou ka lomana na wekamu. O cei na wekamu? Na tamata yadua! Na veika taucoko e ra vakavuvulitaka na ivolanikalou kei ira na parofita sa sema tiko ki na rua na ivakaro oqo.

Na tamata taucoko e ra tacimu ka ganemu—ka oka kina, e dina sara, o ira e ra duatani mai vei iko se e ra sega ni duavata kei iko. Na Tamada Vakalomalagi e vinakati ira na Luvena me ra veilomani vakai ira. Ni o qaravi ira na Luvena, o sa qaravi Koya tiko.

Veisureti

Vakaraitaka ni ko lomana na Kalou e na nomu talairawarawa ki na Nona ivunau. Me ivakaraitaki, e na nomu rokova na Siga ni Vakacecegu, ka oka kina e na nomu vakavakarau e na yalodina mo vakaivotavota e na sakaramede, o vakaraitaka tiko vua na Kalou ni o sa tu vakarau mo vakatabuya e dua na siga e na dua na macawa e na Vukuna. Ni ko lolo ka sauma na ikatini kei na isolisoli tale e so, ko sa vakaraitaka tiko vua na Kalou ni sa ka bibi cake vei iko na Nona cakacaka mai na veika vakayago. Ni o vakayagataka na yaca ni Kalou kei na Karisito ena vakarokoroko, ka sega e na sala tawayaga se e na veivakawaleni, o sa vakaraitaka tiko ni ko vakavinavinakataka na veika kece e Rau sa vakayacora e na vukumu.

Qarava na tamata kecega ni ra sa luve ni Kalou. Ni o tisaipeli i Jisu Karisito, e rawa ni o liutaka na nodra qaravi o i ira na vei kawatamata kecega kei na veimatalotu kei na veilawalawa tale e so e na loloma, veidokai, kei na veiciqomi—vakabibi o ira ka ra vakararawataki tu e na vosa kei na ivalavala mosimosi. Dodoliga yani vei ira e ra galili, tu taudua, se o ira e ra sega ni vukei rawa tu. Vukei ira me ra vakila mai vei iko na loloma ni Tamada Vakalomalagi.

Qarauna me na vakaraitaka tiko na loloma ni Kalou kei ira na tamata na nomu vosa—ena nomu veitalanoa e matana votu se e na vidio. Cavuta na vosa e veilaveti—ka me kakua na veika e vakavuna na veitawasei, na vakavu mosi ni yalo, se na veivakacudrui, se me vakayacori tu e na dela ni veiwali mada ga. E rawa ni ka mana na nomu vosa. Me ra mana me baleta na veika vinaka.

Na nodra lomani o ira taucoko na luve ni Kalou e tekivu mai vale. Mo vakayacora na nomu itavi me yaco na nomu itikotiko me vanua e rawa ni ra vakila kece kina na tamata na loloma ni iVakabula.

Kalougata yalataki

Na nomu veiwekani kei na Kalou e na yaco me titobu ni o vakaraitaka na nomu loloma e na nomu talairawarawa ki na Nona ivunau ka rokova na nomu veiyalayalati kei Koya.

Na nomu veimaliwai kei ira na tamata e na titobu sara ni ko vakaraitaka na nomu loloma e na veiqaravi sa va-Karisito. O na kunea na reki ni o cakava na vuravura me dua na vanua ni loloma levu cake.

Taro kei na isaunitaro

Me‘u na vakila vakacava na loloma ni Kalou? E na dau tu ga na loloma ni Tamada Vakalomalagi. Vosa vakawasoma Vua e na masu. Wasea Vua na nomu nanuma, ka vakarorogo ki na veivakauqeti mai Vua. Wilika na Nona vosa e na ivolanikalou. Vakasamataka na veika kece sa vakayacora o Koya e na vukumu. Mo tiko ka qaravi tavi e na veivanua e tiko kina na Yalona.

E namaka beka vei au na Turaga me‘u lomani ira na tamata kecega, o ira mada ga e ra dau vakalolomataki au? E namaka vei iko na Turaga mo lomani ira na nomu meca ka masulaki ira e ra vakalolomataki iko. Ia, e sega ni kena ibalebale oqori ni dodonu mo tiko ga ena dua na ituvaki ka vakavuna tiko me vakamavoataki na lomamu, yagomu, se yalomu. Tuvanaka na iyalayala dodonu mo taqomaki iko kina. Kevaka o sa vakasaurarataki se vakacacani—se o kila ni yaco tiko oqo vua e dua tale—veitalanoa kei na dua na qase nuitaki.

Na gauna kei na sala cava me‘u na kilai ira kina o ira ka duidui mai vei au na yagodra ni sucu? Na sala vinaka duadua mo kilai ira kina na tamata sa ikoya na veitokani dina. Ni ko se itabagone, tara cake na veitokani vinaka kei ira e vuqa na tamata. E na so na itovo vakavanua, o ira na itabagone era na kilai ira ka duidui na yagodra ni sucu mai vei ira e na sala eso ni itaviqaravi savasava vakailawalawa. Me baleta na vakatorocaketaki ni lomamu kei na yalomu kei na nomu taqomaki, na itaviqaravi ni veitalanoa taurua e dodonu me qai lokuci ni o sa matua—na yabaki 16 sa dua na idusidusi vinaka. Veitalanoa kei rau na nomu itubutubu kei na iliuliu. Lokuyara taka na veimaliwai vakatabakidua kei na dua mai na yasana kadua me yacova ni ko sa qase cake. Vakayagataka nomu gauna kei ira era na vukei iko mo maroroya na nomu iyalayala vei Jisu Karisito.

Na cava au rawa ni cakava kevaka e sega ni vanua ni loloma na noqu vale? Na nomu iVakabula e kila na nomu ituvaki, ka lomani iko o Koya. Mo dauvosota, tomana tikoga na nomu muria na ivunau ni Kalou, ka ivakaraitaki vinaka ki na nomu matavuvale. Tara cake na veimaliwai e na loma ni nomu matavuvale ni tabanalevu. Vakarau oqo mo tara cake na nomu matavuvale ka yavutaki e na ivakavuvuli i Jisu Karisito.

Raica na Aisea 58:3–11 (na inaki ni lolo); 58:13–14 (veivakalougatataki ni rokovi na Siga ni Vakacecegu); Malakai 3:8–10 (veivakalougatataki ni saumi ikatini); Luke 6:27–28 (lomana na kemu meca); 10:25–37 (o cei na wekaqu?); Joni 3:16–17 (E lomani keda na Kalou, a tala mai kina na Luvena); 14:15 (eda maroroya na vunau baleta ni da lomana na Kalou); 1 Joni 4:19 (eda lomana na Kalou baleta ni lomani keda o Koya); Mosaia 2:17 (ni da qaravi ira na tamata, eda sa qarava tiko na Kalou).

Taro ni ivolatara ni valetabu

O dau muria tiko beka na ivakavuvuli ni Lotu i Jisu Karisito e na nomu itovo sega ni laurai kei na itovo e matanalevu vei ira e na nomu matavuvale kei ira talega na tamata tale e so?

O dau saga beka mo vakatabuya na Siga ni Vakacecegu, mai vale ka vakakina ena lotu; tiko e na nomu soqoni, vakavakarau ka vakayagataka na sakaramede ena bula kilikili, ka bula muria na lawa kei na ivakaro ni kosipeli?

Ko sa sauma vakadodonu tiko beka na nomu ikatini?