“Lako tiko e na rarama ni Kalou,” Me iSakisaki ni iTabagone : iDusidusi ni Vakayaco Digidigi (2022)
“Lako tiko e na rarama ni Kalou,” Me iSakisaki ni iTabagone
Lako tiko e na rarama ni Kalou.
Kalatia 5:25
O na digidigi vinaka cake ni ko rawa ni raica vakamatata na veika e so. Oqori na vuna e sa rui bibi kina na rarama: e na vakarawarawataka na noda raica na salatu dodonu. Sa solia vei iko na Tamada Vakalomalagi na rarama vakalomalagi—na isolisoli ni Yalo Tabu—me vukei iko mo raica vakamatata na ka e vinaka kei na ka e ca, dodonu kei na cala.
Dina tawamudu
E na gauna ni papitaiso o na lako curuma kina e dua na veiwekani ni veiyalayalati rekitaki kei na Tamada Vakalomalagi kei Jisu Karisito. E na valetabu, o na vakayacora e so tale na veiyalayalati ka na rawa ni vakaqaqacotaka na veiwekani oya. O sa vakavouya tiko na nomu veiyalayalati e na veimacawa e na gauna ni sakaramede. O vakaraitaka na nomu lomasoli mo muria na ivakaro, ka na vakalougatataki iko na Turaga e na madigi mo rawata kina na Yalo Tabu me nomu itokani tudei. Oqo e dua na Nona isolisoli cecere vei iko.
Na nomu vakayaco digidigi vinaka e na vakavinakataka cake na nomu rawa ni vakila na Yalo. E vuqa sara na veika vinaka ka savasava e ra tu e na vuravura oqo. Me vaka ga ni na laurai na ituvaki ni yagomu mai na veika o kania ka gunuva, e na laurai na ituvaki ni nomu vakasama kei na yalomu mai na veika o wilika, sarava, ka vakarorogo kina.
Veisureti
Solia e dua na tiki ni nomu gauna vua na Turaga e veisiga. Vuli mai Vua. Dau nanumi Koya. Masuta na Tamamu Vakalomalagi. Vulica na ivolanikalou tabu kei na nodra vosa na parofita bula. Qai saga mo bulataka na veika o sa vulica.
Vakasaqara na veika e veilaveti, veivakauqeti, ka sureta na Yalo. Ni o vakayaco digidigi me baleta na ka mo sarava, wilika, vakarogoca, se vakaitavi kina, vakasamataka na veika o vakila kina. E na sureta beka na vakasama vinaka? Lako tani mai na veika cava ga e vakalialia na veika tabu se veika tawasavasava. Kakua ni vakaitavi e na dua na ka e vakamalumalumutaka na nomu vakatulewa se kauwai ki na Yalo, me vaka na ivalavala kaukauwa, wai ni veivakamatenitaki, kei na waigaga e vakaleqa na yago kei na bula. Me tiko vei iko na yalo mo rawa ni bokoca kina e dua na vidio se qito, lako tani mai na dua na iyaloyalo se dua na danisi, veisautaka na nomu ivakatagi, se gole tani mai na dua na ka e sega ni salavata kei na Yalo.
Vakayagataka na itukutuku raraba me veilaveti. Na itukutuku raraba e rawa ni dua na gacagaca kaukauwa vinaka ni veitaratara. Kevaka o vakayagataka, vakanamata ki na rarama, vakabauta, kei na dina. Kakua ni vakatauvatana na nomu bula ki na veika era sotava tiko na tamata tale eso. Nanuma tiko ni kemu yaga e vu mai ni o luvedrau na itubutubu vakalomalagi, ka sega e na itukutuku raraba.
Vakasaqara na veika e taucoko kei na veimaliwai dina ka tawayalani. Qarauna na nomu vakayagataka na tekinolaji kei na itukutuku raraba me na kakua ni sosomitaka na nomu gauna vata kei na nomu matavuvale kei ira na itokani. Na itukutuku raraba kei na tekinolaji tale e so e rawa ni taura e levu na nomu gauna ka na sega ni kauta mai e levu na ka yaga. Cegu mada mai e na vakayagataki ni tekinoloji ni veivosaki e na vidio kei vuravura, ka semati iko vei ira na tamata e na veitalanoa e na matana votu.
Kalougata yalataki
Sa rawa ni tiko vata kei iko na Yalo e na veigauna. Na Yalo Tabu e na vakadinadinataka vei iko na Tamada Vakalomalagi kei Jisu Karisito. E na vakacegui, veituberi, veivakaroti, ka vakasavasavataki iko o Koya. E na vukei iko o Koya mo kila na dina ka raica na vinaka e vuravura.
Taro kei na isaunitaro
Au na kila vakacava ni‘u sa vakila tiko na Yalo Tabu? Na vulici ni kena vakilai na Yalo e na taura na gauna, na kena cakacakataki, kei na vosota. E vosa o Koya ki na tamata yadua e na sala duidui e so. Kakua ni vakawalena na veika rawarawa—na yalo veivakacegui o na rogoca mai na nona ivakadinadina e dua se na nomu vakila na veilecayaki ni yalomu ni o sa vakayacora e dua na digidigi cala. Vakasaqara na ivolanikalou me baleta na sala e so e dau vosa mai kina na Yalo, masulaka, ka vakasaqara na madigi mo vakila kina na Yalo.
Na cava na iyaloyalo tawakilikili? Na cava na vuna me‘u levea kina? Na iyaloyalo tawakilikili e dua na ivakaraitaki, e na iyaloyalo se vosa, e caka me vakayavalata na vakanananu ni veiyacovi. Na iyaloyalo tawakilikili e dau yaco mai e na vuqa na sala, ka oka kina na vidio, iyaloyalo, ivola, kei na ivakatagi. E rawa talega ni itukutuku se iyaloyalo e ra veiwaseitaka o ira na itokani. Na iyaloyalo tawakilikili e ra vakatanitaka na veika tabu—na yagoda kei na yalo ni veiyacovi—e na yalo e sega ni veirokovi. E rawa ni o sotava na iyaloyalo tawakilikili e na sala e sega ni nakiti. Ke o sotava na iyaloyalo tawakilikili ni ko nakita se sega, mo gole tani sara vakatotolo. Sa rawa talega ni o veitalanoa kei na dua na itubutubu se so tale na qase nuitaki. Ni o nakita mo sarava na iyaloyalo tawakilikilie sa ivalavala ca ka na vakaleqa na nomu rawa ni vakila na Yalo. E vakamalumalumutaka na nomu lewa maqosa ka vakaduatanitaka na nomu raici iko kei ira na tani. Sa tu vei Jisu Karisito na kaukauwa me vukei iko mo vorata rawa na iyaloyalo tawakilikili ka veivutuni. Mo gole Vua; ka lako tani mai na butobuto. Sa rawa me vukei iko o nomu bisopi mo ciqoma na kaukauwa kei na veivosoti mai vua na iVakabula.
Raica na Emosi 5:14 (vakasaqara na vinaka); Kalatia 5:22–23 (na vua ni Yalotabu); Moronai 7:18–19 (na rarama i Karisito); Vunau kei na Veiyalayalati 6:23 (na Turaga e tukuna na vakacegu); 20:77, 79 (na masu ni sakaramede).
Taro ni ivolatara ni valetabu
Sa kaya na Turaga na ka kecega me “caka vakasavasava” e Matana (Vunau kei na Veiyalayalati 42:41). O dau saga beka na bula savasava vakayalo e na nomu vakanananu kei na itovo? O bulataka tiko li na lawa ni tiko savasava?
O dau saga beka mo vakatabuya na Siga ni Vakacecegu, mai vale ka vakakina e valenilotu; lakova na nomu soqoni, vakavakarau ka vakayagataka na sakaramede e na bula kilikili, ka bula muria na lawa kei na ivakaro ni kosipeli?