“Sa ka tabu na yagomu,” Me iSakisaki ni iTabagone: iDusidusi ni Vakayaco Digidigi (2022)
“Sa ka tabu na yagomu,” Me iSakisaki ni iTabagone
Sa ka tabu na yagomu.
1 Korinica 6:18–20
Na yagomu e dua na iloloma veivakurabuitaki mai vua na Tamamu Vakalomalagi. A solia vei iko o Koya me vukei iko mo yaco mo vakataki Koya vakalevu cake. Ni tiko na yagomu e na solia vei iko na kaukauwa levu mo vakayagataka kina na nomu galala ni digidigi. Na kosipeli vakalesui mai i Jisu Karisito e rawa ni vukei iko mo raica na yagomu mai na rai ni Kalou. Oya e na vakavuna na veisau levu e na nomu digidigi me baleta na ka mo vakayacora ki yagomu kei na sala mo qarauna kina.
Dina tawamudu
Na yagomu e buli e na kena ibulibili na Kalou—na Kabula lagilagi, ka vakaturaga duadua e vuravura taucoko. Na ivolanikalou e vakatauvatana na yagoda ki na dua na valetabu savasava, na vanua e rawa ni tiko kina na Yalo. E dina, na yagomu e sa sega soti sara ni daumaka e na gauna oqo. Ia na veika o sotava tiko mai na yagomu ena rawa ni vukei iko mo vakavakarau mo na ciqoma ena dua na siga e dua na yago e uasivi sara, sa vakaturi tale mai, ka lagilagi.
Sa buli o iko mai na yagomu kei na yalomu. Ena vuku ni ka oqo, na tiko bulabula ni yago kei na tiko bulabula vakayalo e rau sa semati vakavoleka sara. A vakatakila mai e na Vosa ni Vuku na iVakabula na ivakavuvuli ni kena qarauni na yago—ka yalataka kina na veivakalougatataki vakayago ka vakayalo.
Na yalo ni veiyacovi sa tiki bibi ni ituvatuva ni Kalou me tauyavutaki kina na vakamau vinaka kei na matavuvale tawamudu. Na yalo e da vakila oqo e ra sega ni ivalavala ca—e ra ka tabu. Me vaka ni sa rui ka tabu ka kaukauwa na vakilai ni yalo ni veiyacovi, sa solia kina vei iko na Kalou na Nona lawa ni tiko savasava me vakarautaki iko mo vakayagataka na yalo vakaoqo me vaka e sa lokuca o Koya. E tukuna na lawa ni tiko savasava ni sa vakadonuya na Kalou na gauna ni veiyacovi e na kedrau maliwa ga e dua na tagane kei na dua na yalewa vakamau. E vuqa e vuravura e ra sega ni kauwaitaka se e ra vakalialia sara mada ga na lawa ni Kalou, ia na Turaga e sureti keda me da Nona tisaipeli ka bulataka e dua na ivakatagedegede cecere cake mai na kena e vuravura.
Veisureti
Qarava na yagomu—kei na yagodra na tani—e na vakarokoroko. Ni ko vakatulewataka na nomu isulu, ikotikoti, kei na kemu irairai, tarogi iko, “Au sa doka tiko beka na yagoqu ni sa isolisoli tabu mai vua na Kalou?” E vinakata na Tamada Vakalomalagi me da veiraici vakai keda e na keda ituvaki dina: sega walega e na yagoda vakatamata ia ni da sa Luvena lomani ka vaka icavacava vakalou. Gole tani mai na ivakarau e so e vakabibitaka se kauta mai na kauwai ki na yagomu ka sega ki na dina ni ko sa dua na luve ni Kalou ka tiko na nomu veisiga ni mataka e tawamudu. Vakatara na savasava ni yalo kei na lomana na Kalou me dusimaka na nomu digidigi. Kere ivakasala mai vei rau na nomu itubutubu.
Vakayacora na veika e na vakaqaqacotaka na yagomu—me kakua na ka e na vakamavoataka se vakacacana. Marautaka e na vakavinavinakataki na vuqa na veika vinaka e vakarautaka tu na Kalou. Ia mo nanuma tiko ni wai ni veivakamatenitaki, tavako, kofi, ti, kei na waigaga veivakamavoataki tale eso e sega ni vinaka ki na yagomu se yalomu. Na veika veivukei e so me vaka na wainimate ni tauvimate, e rawa ni veivakarusai kevaka e sega ni vakayagataki vakadodonu.
Raica me ka tabu na veiyacovi kei na yalo e vakananuma na veiyacovi. Me ra kakua ni ulutaga ni veiwali se veivakamarautaki. E na taudaku ni nodrau vakamau e dua na tagane kei na dua na yalewa, e sega ni dodonu me tarai na tiki ni yago tabu, vakatabui nona e dua tale kevaka mada ga e vakaisulu. E na nomu digidigi me baleta na veika o cakava, raica, wilika, vakarogoca, vakasamataka, biuta cake e na initaneti, se tex, levea na ka e nakiti me rawa ni yaco kina na garo ca vei ira na tani se vei iko. Oqo e oka kina na iyaloyalo tawakilikili ena kena ituvaki cava ga. Kevaka o raica ni dau kaukauwa cake na veitemaki ena ituvaki se itaviqaravi, levei ira. O sa na kila vinaka tu na ituvaki kei na itaviqaravi cava o ya. Kevaka o sega ni rawa ni vakadeitaka, na Yalo, o rau na nomu itubutubu, kei ira na nomu iliuliu e rawa ni ra vukei iko mo kila. Vakaraitaka vua na Tamamu mai Lomalagi ni ko doka ka rokova na kaukauwa tabu mo bulia kina na bula.
Kalougata yalataki
Na nomu dokai iko vakai iko kei ira na tamata tale e so e na torocake sara ni o rokova na yagomu ena nomu itovo, kemu irairai, kei na isulusulu.
Sa yalataka tu na Turaga na iyautalei levu ni kila-ka vei ira era rokova na Vosa ni Vuku. Na yago bulabula, galala mai na veivakatotogani, e na vakalevutaka talega na nomu rawa ni ciqoma na ivakatakila yadua, vakasama matata, kei na qarava na Turaga.
Na bulataki ni lawa ni tiko savasava e kauta mai na veivakadonui ni Kalou kei na kaukauwa vakayalo ni tamata yadua. Ni ko sa vakamau, na lawa oqo ena kauta mai na loloma cecere, veivakabauti, kei na duavata ki na nomu bula vakamau. Na talairawarawa ki na lawa oqo e na rawa kina vei iko mo toso ki liu ka tawamudu ka yaco mo vakataka sara na Tamamu Vakalomalagi. E na tubu na nomu yalodei ni ko bula vakatisaipeli i Jisu Karisito.
Taro kei na isaunitaro
Na cava na ivakaitagede ni Turaga me baleta na isulusulu, rairai, samuqawe, kei na culai ni yago? Na ivakaitagede ni Turaga sa ikoya mo rokova na bibi ni yagomu, kevaka sara mada ga e kena ibalebale oya mo na duatani mai na vo kei vuravura. Mo vakayagataka na dina oqo kei na Yalo me nomu idusidusi ni ko vakatulewa tiko—vakabibi na vakatulewa e na tiko kina na revurevu tudei ki na yagomu. Mo yalomatua ka yalodina, ka vakasaqara na ivakasala mai vei rau na nomu itubutubu kei na iliuliu.
Me‘u na vorata rawa vakacava na veitemaki kei na itovo ca? E tiko vua na Tamada Vakalomalagi kei Jisu Karisito na kaukauwa ni veivukei vei iko. Vakasinaita na nomu bula ena veika e sureta na kaukauwa oqori ki na nomu bula, me vaka na masu, vulici ni ivolanikalou, kei na veiqaravi vei ira na tamata. Gole vei Jisu Karisito kei na Nona kosipeli ko na qai kunea kina ni malumalumu e rawa ni yaco me kaukauwa. Vakasaqara na veivuke mai vei ira na itubutubu, iliuliu, kei ira na daunivakasala kevaka e gadrevi. Ki vei ira e ra vakararawataki tu mai na veivakatotogani, sa vakarautaka tu na Lotu e dua na parokaramu ni veivagalalataki mai na veivakatotogani. Oqo na veivakalougatataki e vakarautaka na Lotu ni iVakabula me vukei iko mo taura lesu tale na lewa ni nomu bula. E na taura na gauna, mo vosota tiko, ka kakua ni soro.
Au dau vinakati ira era vakataki au na yagodra ni sucu. E ra na taurivaki vakacava na ivakatagedegede oqo vei au? Na vakilai ni veivinakati vaka-tagane se yalewa vata e sega ni ivalavala ca. Kevaka e tiko vei iko na yalo vakaoqo ia ko sega ni saga se vakayacora, o sa bulataka tiko na lawa tabu ni tiko savasava nei Tamada Vakalomalagi. O iko e dua na luvena daulomani na Kalou ka tisaipeli i Jisu Karisito. Nanuma tiko ni iVakabula e kila vinaka na veika kece o sotava. Mai na nomu veisemati ni veiyalayalati kei Koya, o na kunea kina na kaukauwa mo talairawarawa ki na ivakaro ni Kalou ka ciqoma na veivakalougatataki e yalataka o Koya. Vakararavi Vua kei na Nona kosipeli.
Au a vakacacani, ka‘u a madua. Au sa ivalavala ca beka? Ni ko a dua ka a vakacacani se vakamavoataki e sega ni kena ibalebale oya ni o sa caka cala. Yalovinaka kakua ni nanuma ni ko sa cala se mo madua. E lomani iko na iVakabula. E vinakata o Koya me vukei iko, vakabulai iko, ka solia vei iko na vakacegu. Sa rawa talega vei ira na daunivakasala, nomu lewe ni matavuvale, kei ira na nomu iliuliu me ra veivuke.
Raica Nai Vakatekivu 1:27 (eda sa buli meda ucuya na Kalou); Joni 14:18 (sa yalataka na iVakabula na vakacegu); Filipai 4:7 (na vakacegu ni Kalou sa uasivia na ka e kilai rawa); Vunau kei na Veiyalayalati 88:15 (na yalo kei na yago sa tamata); 89 (na Vosa ni Vuku); 121:45 (na vakasama savasava ena veimuataki ki na nuidei vakalevu cake).
Taro ni ivolatara ni valetabu
Sa kaya na Turaga na ka kecega me “caka vakasavasava” e Matana (Vunau kei na Veiyalayalati 42:41). O dau saga beka na bula savasava vakayalo ena nomu vakanananu kei na itovo? O bulataka tiko li na lawa ni tiko savasava?
O kila ka muria tiko li na Vosa ni Vuku?