Ang kamatuoran mohimo kaninyo nga gawasnon

Juan 8:32

Ang inyong Langitnong Amahan mao ang Dios sa kamatuoran. Siya nasayod sa tanan. Ang tanan nga kamatuoran naggikan Kaniya ug paingon ngadto Kaniya. Kamo mopakita nga inyong gihatagan og bili ang kamatuoran samtang kamo nagtinguha og pagkat-on, magpakabuhi uban sa kaligdong, ug maisogon nga mobarog alang sa unsay inyong nahibaloan nga husto—bisan kon kinahanglan nga mobarog nga mag-inusara.

Mahangtoron nga mga kamatuoran

Ang Langitnong Amahan gusto nga ang Iyang mga anak nga babaye ug mga anak nga lalaki kanunayng makakat-on. Kamo adunay temporal ug espirituhanong mga rason sa pagtinguha ug mahalon ang pagkat-on. Ang edukasyon dili lang mahitungod sa pagkita og kwarta. Kini kabahin sa inyong mahangtoron nga tumong sa pagkahimong mas sama sa Langitnong Amahan.

Ang pagpakabuhi nga may kaligdong nagpasabot nga kamo mohigugma sa kamatuoran sa tibuok ninyong kasingkasing—labaw pa kay sa kamo mohigugma sa personal nga kahupayan, ka ilado, o kasayon. Nagpasabot kini sa pagbuhat sa unsay matarong tungod lang kay kini husto.

Kamo adunay butang nga bililhon nga ikapaambit. Ang ebanghelyo ni Jesukristo aduna sa mga tubag sa mga pangutana sa kinabuhi. Mao kini ang dalan ngadto sa kalinaw ug kalipay. Tingali wala kamo kahibalo sa tanang butang, apan kamo adunay igong kahibalo aron sa pagtabang sa uban nga makasabot ug mohatag og bili sa tinuod, mahangtoron nga mga baroganan.

Mga pagdapit

Kanunay nga magkat-on. Pangita og mga oportunidad sa pagpalapad sa inyong hunahuna ug sa inyong kahanas. Kini nga mga oportunidad naglakip sa pormal nga edukasyon sa eskwelahan o sa bokasyonal nga pagbansay ingon man sa dili pormal nga pagkat-on gikan sa mga tinubdan nga inyong gisaligan. Ilakip ang Ginoo diha sa inyong mga paningkamot, ug Siya mogiya kaninyo. Samtang kamo magkat-on mahitungod sa kalibotan sa inyong palibot, kat-oni usab ang mahitungod sa Manluluwas, kinsa milalang sa kalibotan. Tun-i ang Iyang kinabuhi ug mga pagtulon-an. Himoa ang seminary, institute, ug ang personal nga pagtuon sa ebanghelyo nga kabahin sa inyong tibuok kinabuhi nga pagkat-on.

Higugmaa ang kamatuoran sa hilabihan nga kamo dili gayod gusto nga mangawat, mamakak, manikas, o molingla sa bisan unsa nga paagi—sa eskwelahan, sa trabaho, sa internet, sa bisan asang dapit. Pagpaka-samang matinud-anon nga sumusunod ni Jesukristo diha sa publiko ug sa pribado.

Pagpaka-himong kahayag ngadto sa uban. Itugot nga ang inyong mga pulong ug ang inyong mga aksiyon moaninag sa inyong hugot nga pagtuo diha kang Jesukristo. Pangandam karon alang sa mga oportunidad sa umaabot sa pagpaambit sa Iyang mahimayaong ebanghelyo, isip usa ka misyonaryo ug sa tibuok ninyong kinabuhi. Ug pangandam sa pagsulti ni bisan kinsa nga mangutana kaninyo mahitungod sa paglaom ug kalipay nga inyong gibati.

Gisaad nga mga panalangin

Ang edukasyon makapadako sa inyong abilidad sa pagserbisyo sa Ginoo. Kini mohatag og gahom kaninyo sa pagpanalangin sa uban, ilabi na sa inyong pamilya. Kon magkadako ang inyong makat-onan, mas makatabang kamo sa pagtukod sa gingharian sa Dios ug makaimpluwensiya sa kalibotan alang sa maayo.

Ang pagkamatinuoron makahatag og kalinaw ug pagtahod sa kaugalingon. Kon ang inyong mga pulong ug mga aksiyon nagsubay sa kamatuoran, kamo nagpakita nga kamo masaligan—pinaagi sa ubang mga tawo ug sa Ginoo.

Kon kamo mobarog alang sa mga pagtulon-an ni Jesukristo, Siya mobarog uban kaninyo. Ang uban mahimong dili mouyon kaninyo, apan ang inyong kaisog ug sinseridad mabatyagan. Mosunod man o dili ang uban sa inyong ehemplo, ang inyong pagpamatuod, kamasaligon, ug hugot nga pagtuo diha ni Kristo molambo.

Mga pangutana ug mga tubag

Sayop ba ang pagbaton og mga pangutana mahitungod sa Simbahan? Unsaon nako sa pagpangita og mga tubag? Ang pagbaton og mga pangutana dili usa ka timailhan sa kahuyang o kulang sa hugot nga pagtuo. Gani, ang pagpangutana makatabang sa pagtukod og hugot nga pagtuo. Ang Pagpahiuli sa ebanghelyo misugod sa dihang ang 14 anyos nga si Joseph Smith nangutana inubanan sa hugot nga pagtuo. Pangitaa ang mga tubag diha sa mga kasulatan, diha sa mga pulong sa mga propeta sa Dios, gikan sa inyong mga lider ug matinud-anon nga mga ginikanan, ug gikan sa Dios Mismo. Kon ang mga tubag dili moabot diha diha dayon, salig nga kamo makakat-on og pagtulon-an human sa laing pagtulon-an. Ipadayon ang pagsunod sa unsay inyo nang nahibaloan, ug ipadayon ang pagpangita sa kamatuoran.

Unsaon nako sa pagbarog alang sa unsay husto nga dili makasilo niadtong kinsa adunay lahi og tinuohan? Pagsugod pinaagi sa pagsiguro nga ang inyong mga pulong ug mga aksiyon dinasig sa gugma alang sa Dios ug sa Iyang mga anak. Ang pagpaambit sa ebanghelyo kinahanglan dili himoon diha sa usa ka diwa sa panagbingkil apan hinoon adunay katin-awan, kaaghop, ug kamabination. Mahimo kita nga magmahigugmaon ngadto sa uban bisan kon kamo dili mouyon sa ilang mga panglantaw.

Tan-awa sa Mateo 5:14–16 (Ipadan-ag ang inyong kahayag); Juan 14:6 (si Jesus ang kamatuoran); 1 Pedro 3:15 (mangandam kanunay sa pagpaambit sa inyong paglaom diha ni Kristo); Doktrina ug mga Pakigsaad 88:77–80 (mga butang nga gusto sa Ginoo nga atong makat-onan); 93:36 (ang himaya sa Dios mao ang salabotan); 124:15 (ang kaligdong nagpasabot og paghigugma sa unsay matarong); 130:18 (ang atong salabotan madala uban kanato sa atong pagkabanhaw).

Mga pangutana sa rekomend sa templo

Ikaw ba naningkamot nga magmatinuoron sa tanan nimong gibuhat?