38

Kosonned oh Koasondi kan en Mwomwohdiso

38.1

Towehda Mwomwohdiso

Samatail Nanleng ketin poakohng Sapwellime seri kan koaros. “Koaruhsie duwepene rehn Koht,” oh E ketin luke koaros “en kohdo reh oh ale sapwellime kalahngan” (2 Nihpai 26:33).

Aramas kin kalap peidek rehn sounkaweid kan oh tohn Mwomwohdiso ihs me kak iang mihting kan en Mwomwohdiso en Sises Krais en Souleng en Imwin Rahn-akan, ihs me kak wiahla towehkan en Mwomwohdiso, oh ihs me kak iang kohla nan tehnpas sarawi.

38.1.1.

Ieiang Mihting kan en Mwomwohdiso

Sounkomouro padahkihong Sapwellime tohnpadak kan en poakohng mehn mparail kan (tehk Madiu 22:39). Paul luke souleng kapw kan en “sohla wia mehn liki oh aramas dohla kei, ahpw en wiahla tohn ehu peneinei en souleng kei” (Episos 2:19). Sounkomouro pil padahngki me tohn Mwomwohdiso kan en dehr kausala aramas sang … wasahn mihting kan me kin wiewiawi mwohn wehipokon (Doctrine and Covenants 46:3).

Irail koaros lukehng en iang kamadipw sarawi, mihting teikan en Rahn Sarawi, oh mwekid kan en Mwomwohdiso en Sises Krais en Souleng en Imwin Rahn-akan. Opsihr me kakaun me kin pwukoahki kilang pwe koaros me kin iang en kin wauneki wasa sarawi kan.

Irail kan me kin iang anahne dehr kedirapwa de wiahda mehkoat me sohte kin wiawi nan ansoun kaudek de mihting teikan. Wahu en kohieng songosongen dih oh aramas koaros me kin ieiang mihting oh mwekid kan en Mwomwohdiso. Met irehdi aramas en wia soangen mwohmw kan de likauwi soangen likou kan me pahn kahrehda katiamau. Met pil iangahki wia koasoi en politic de koasoia duwen limpoak en nan pwungen lih oh ohl ni soangen mwohmw ehu me pahn kerempwa koasoiepen Sounkomouro nan mihting kan.

Ma mie wiewia suwed pwarada, pisopo de steik presiden pahn kin wia kaweid tohrohr ni mwohmw ehu me pahsonki limpoak. E pahn kangoange irail kan me kasalehda wiewia suwed ni ansouo pwehn sewese kolokol wahu ong koaros me ieiang mihting pwe ren kak kaudekiong Sahm Nanleng oh Sounkomouro.

Imwen kaudek kan en Mwomwohdiso wia dipwsou kei me mih pahn kosonned en Mwomwohdiso. Aramas akan me sohte idawehn koasondi pwukat pahn kapidohi ni wahu oh sohla pwurehng iang mihting oh mwekid kan en Mwomwohdiso.

38.2

Kosonned kan en Tiahk Sarawi oh Kapai kan

Wiepe kan en kihda tiahk sarawi kan oh kapai kan kileledier nan pwuhk pwukat:

• Irelaud 18 en pwuhk en kaweid doadoahk wet

• Pwuhk en Kaweid Peneinei, pali 18–25

Kosonned me pid tiahk sarawi en nan tehnpas sarawi kawehwedahr nan irelaud 27 oh 28 en pwuhk en kaweid doadoahk wet.

38.2.3

Pepdais oh Tiahk Sarawi en Kasarawi emen en Towehla

38.2.3.14

Aramas akan Me Wia Transgender

Misin presiden udahn anahne ale kaweid rehn Ehria Presidensi pwehn apwali ehu ehu ire kesempwal pwulat (tehk 38.6.23).

Aramas emen me medemedewe en doadoahngki pali en roson mwahu pwehn soang en wekidala paliwere sang ni mwohmw me e netingkihdi. (“sex reassignment”) sohte pahn kak pepdaisla de katengetengdi.

Pepdais oh katengetengdi en aramas emen me wekidalahr paliwere sang ni mwohmw me e neitingkihdi pahn anahne kamanaman sang Presidensi Keieu. Misin presiden kak peki kamanaman wet ma e kapeidekiher aramaso oh diar me aramaso warehng, oh kak peki en pepdaisla. Ahpw, aramaso pahn irairdi sang en ale de de doadoahngki prihsduhd, sohla ale de doadoahngki doropwehn mweimwei ong tehnpas sarawi, oh sohte ale malipilip en Mwomwohdiso.

38.6

Kosonned kan en Iren Mour kan

Irehn kosonned kei me sansal nan pali wet pid wiewia kan me Mwomwohdiso kin “uhwong.” Tohn Mwomwohdiso kan sohte kin kalap loieng irair pwukat pwehki sang ni arail pilipil ong ni ire pwukat. Ahpw, aramas koaros uhdahn kin ale kadeik rehn Koht pwehki pilipil me re wiahda.

38.6.1

Kawehla Liseian

Kauno mahsani, “Ko dehr kemehla aramas, de wia mehkoat me duwehte” (Doctrine and Covenants 59:6). Mwomwohdiso uhwong wiepen kawehla liseian ong emen aramas de aramas emen me sohte inoangieng en kawehla liseian. Towe kan sohte pahn utung, wia, koasone, pwain, pwungki, de kangoange kowehla lisean. Ihte ansou me kitail kak kawehla liseian iei:

• > Liseiano wiawihda sang ni angkehlail de tuhpenehn en peneinei.

• > Emen semen en pali en roson mwahu kadierekda me mour en aramas liseiano patohier nan kahpwal en mehla.

• > Emen semen en tohkte kadierekda me kisin serio ahneki soumwahu me sohte pahn mweidohng en kak wie momour mwurin ah ipwidi.

Ahpw ire pwukat sohte kasalehda me aramas kak ouhdahte kawehla liseiano. Kawehla liseian wia ire kesempwal ehu oh anahne en wiawi mwurin en aramas me liseiano ah tuhongher oh ale kaweid sang ah pisop oh alehier kaweid sarawi sang kapakap.

Kaun kan anahne teneki mwahu ire pwukat ma emen tohn Mwomwohdiso iangehr kawehla ah liseian. Kakommoldi kak wiawi ong towe men ma e utung, wia, koasone, pwain, pwungki, de kangoange ohlahn ehu liseian (kilang 32.6.2.5). Ahpw, kakommoldi sohte konehng wiawi ma emen toweo iang kawehla ehu liseian mwohn eh pepdaisla. Oh sohte kosoi pen kakommoldi, de keinepwdi pahn wiawi ong towe kan me iang kawehla liseian pwehki sang ni kahrepe silu me sansal powe nan pali wet.

Pisop kan pahn kin kalelehki arail steik presiden ire me pid mwekid pwukat. Steik presideno kak peideklahng Ohpis en Presidensi Keieu ma mie anahnepe.

Nin duwen me sansalehr, aramas emen kak koluhla oh ale mahk sang ni dihp en kawehla liseian.

38.6.2

Wiakawe

Wiakaw iei mwamwaleki de sohte katapaniki mehteikan ni mwoahmw ehu me kahrehda olahn paliwar, nenek, sengiseng loal oh paisuwedila. Mwomwohdiso kamehlele me wiakaw sohte konehng en wiawi. Irail kan me kin wiakawe arail pwoud kan, seri kan, tohn peneinei teikan, de sohte lipilipil aramas, kawelahr kosonned akan en Koht oh aramas.

Towe koaros, mehlel pahpa/nohno oh kaun kan anahne tetehk mwahu oh nantiong wia uwen arail kak koaros en pere serih kan oh mehteikan sang ni wiakaw. Ma towe kan pehmada mwekid en wiakau, irail anahne tuhkihong pisop. Kaun en Mwomwohdiso kan anahne tehk mwahu oh sohte pohnsehsehla repwoht kan en wiakau.

Aramas mah koaros me pwukoahki epwel pen seri kan de me pwulepwul kan anahne kanekehla kaiahn en apwali seri oh me pwulepwul nan irair en sounpwong ehu mwurin arail kasarawi ong pwukoa (kilang ProtectingChildren.ChurchofJesusChrist.org). Irail pahn anahne pwurehng ale kaiahno nan irair en pahr silu koaros.

Ansou me wiakau wiawi, keieun pwukoah me kaun en Mwomwohdiso kan anahne wia iei en sewese irail me alehier wiakau oh pere meteikan sang wiakau me pahn pwarada mwhur. Sounkaweid kan sohte konehng kangoange aramas emen en koukouson nan ihmw ehu de wasa me kin wiakau de keper.

38.6.2.1

Wasahn Apwali irail akan me kin wiakau.

Nan ekei wehi laud kan, Mwomwohdiso kawadahr ehu pwihn me pahn kin apwalih ahl kan me pid wiakau pwehn sewese pisop kan oh steik preseden kan. Kaun pwukat pahn anahne en eker nempehn wasahu ansouohte me pid duwen soahng koaros me pidada aramas me miher nan kahpwal en wiakau—de me miher ni keper pen wiakau (kilang 38.6.2.1). Irail anahne pil pakairki ma irail esehda toweh men me kin kilekilang, pwapwain, de kihkiseli kilel suwed en seri.

Wasa kiset kin wie langalang awa 24 koaros nan rahn ehu, rahn 7 nan wihk koaros. Nempe delepwohn kan iei me sansal pah.

• United States oh Canada: 1-801-240-1911 de 1-800-453-3860, nempe 2-1911

• United Kingdom: 0800 970 6757

• Ireland: 1800 937 546

• France: 0805 710 531

• Australia: 02 9841 5454 (sang nan masloalen wehio)

• New Zealand: 09 488 5592 (sang nan masloalen wehio)

Pisop oh steik presiden kan anahne eker pali en sawas pwehn ale ire pisetik kan me pid duwen soun repwoht oh anahnepen repwohtki songesongen wiakau pwukat. Sounsawas en kosonned oh semen kan pahn sapeng arail peidek kan. Semen pwukat pil pahn kaweid kin irail mwomwen arail kak:

• Sewese me paisuwedla kan oh sewese peresang irail wiakau en mwuhr kan.

• Sewese aramas kan me pahn kak paisuwedla mwuhr.

• Idawehn koasondi en kosoned ni arail repwohtki wiakau pwukat.

Mwomwohdiso inoukiher en idawehn kosonned en repwohtki kamwamwahl (tehk 38.6.2.7). Kosonned kan kin wekpeseng nan ehu ehu wasa, oh pali tohtohn sounkaweid en Mwomwohdiso sohte wia semen en kosonned kei. Eker telepwohn en pali en sawas wia meahkot kesempwal ong pisop oh steik presiden kan ni arail kapwaiada arail pwukoah kan en repwohtki wiakau.

Pisop men pil anahne padahkigong ah steik presiden mwekid en wiakau koaros.

Nan wehi laud teikan me sohte sawas en delepwohn wet, pisop meno me esehier me mie kahpwal en wiakau pahn anahne eker ah steik preseden. Steik presiden anahne rapahki kaweid sang semen en kosonned nan ohpis en ehria. Kangoang pil wiawihongehr ohlo en alehdi semen en Family Services de manager en pali en welfare oh self-reliance sang opis en ehria.

38.6.2.2

Kaweid ong Aramas me alehdi Wiakau

Aramas me wiakau kin kalap ahneki soumwahu oh pepehm me irail me sapwung. Steik presiden kan oh pisop kan pil kin kihda sawas ong tohn peneinei kan me anahne. Kaun kan anahne pohnese irail oh kiong irail kaweid mwahu oh sawas pwehn sewesei irail powehdi kasohwahu suwed kan en wiakaw.

Ekei pak irail kin ahneki namenek oh medewe me re dipada. Aramas pwukat sohte dipekihda dihp ehu. Kaunakan kin sewese irail oh arail peneinei kan wehwehkihda duen sapwelimen Koht limpoak oh kamwahu kan me kin kohsang ni an Sihses Krais kamatalahu (kilang Alma 15:8; 3 Nephi 17:9).

Steik presiden kan oh pisop kan anahne sewese irail kan me dipekidahr wiakaw en koluhla oh uhdi sang arail wiewiahn wiakau kan. Ma aramas mah men dipekidahr ah neneki seri men, wiewia wet pahn inenen apwal en kamwahula. Mwekid en koluhla kak wiewiawi ki ansou reirei. Kilang 38.6.2.3.

Steik presiden oh pisop kan anahne pil epwel mwahui oh kin kanaiehng ni arail kin apwahpwali peneinei kan en irail me aledier oh dipekidahr kamwamwahl.

Kaweid en sawas ong irail me aledier oh dipekidahr kamwamwahl kin diereik nan Wiakau:

Me patehng sawas sarawi sang kaun kan, ekei toweh kan kak ale sawas sang rehn semen en sawas ong pali wet. Ong irehn kaweid kapatapat, kilang 31.2.6.

Ong irehkan me pid dahme pisop kan oh steik presiden kan anahne wia ni ansou me irail alehdi repwoht en wiakau, kilang 38.6.2.1. Ong ire me pid kaweid kan ong mwekid kan en dipen nenek , angkehlail oh songen dipen nenek teikan, kilang 38.6.18.2.

Pil kilang FamilyServices.ChurchofJesusChrist.org.

38.6.2.3

Wiakaue Seri de Me Pwulepwul

Kamwamwahli seri de me pwulepwul wia ehu dihp me inenen laud (kilang Luke 17:2). Me sansal wasakiset, wiakue seri oh me pwulepwul: pil iangahki mepwukat:

• Wiakaupen paliwar: Kawehla paliwar sang ni kamakam de pei. Ekei ohla kakete sohte sansal.

• Dipen nenek de mwersued: Wia dipen nenek ong seri men de me pwulepwul men de mweidohng de sewese mehteikan en wia songen tiahk o. Nin duwen ire wet, nenek nan pwungen me pwulepwul riemen me pwungkidahr oh ara sounpar kan keren pene sohte wia tiahk en idihd ong nenek,

• wiakaulahn amw pepehm Doadoahngki mwekid oh lokaia kosukloal kin kawehla en seri men oh me pwulepwul men ara wahu oh likilik. Met iangahki mwekid kan me kin wiewiawi ansou koaros pwehn kasaroh, sohte kamelele, oh lipahned me kin kanameneki oh kamwamwalihla. Met kak iangahki soukautih.

• Kilelen Seri Kilel Suwed: Kilang 38.6.6.

Ma pisop men de steik presiden men esehda de lemelemehngki me seri men de me pwulepwul men kamwamwahlla, e anahne idawehn kaweid kan nan 38.6.2.1. E pil pahn sawas pwe wiakau en dehr pwurehng wiawi mwuhr.

Kakommoldi oh ntingdi en dihpo pahn uhdahn wiawi ong nan rekohd en towe men me kamwamwahli seri men de me pwulepwul men nin duwen me sansal nan pali wet. Tehk 32.6.1.1 and 38.6.2.5.

Ma emen me pwulepwul kamwamwahli emen seri, steik presiden pahn alehdi Ohpis en Presidensi Keieu pwehn ale kaweid.

Pei oh ak lemei nan pwungen seri kan de me pwulepwul kan me dih ehute pahn anahne ale kaweid sang kaun en ward kan, Mihting en kaunsel me pwukoahki membership sohte anahne wiawi,

38.6.2.4

Wiakawe ahmw Pwoud de Emen Aramas Tohrohr

Wiakawe ahmw pwoud de emen aramas torohr kak wiawi ni soangen mwohmw kei. Wiakau pwukat kak pidada paliwar, nenek, madmadau, oh mwohni. Aramas me likeilap, mengei, de soumwahu kin mengei en alehdi wiakau.

Pak tohto e sohte kin sansal soangen wiakau da me kin wiawi nan ansou koaros. Ahpw, wiewiahn wiakau kan kin inenen doar. Soangen wiewia pwukat me kin wiawi iei lokaia kamedek lel ohla laud.

Ma pisop men de steik presiden men esehda duwen kamwamwahlahn en emen tohn pwopwoud de emen me mah, e anahne mwadang doadoahngki kaweid kan nan 38.6.2.1. E pil pahn wia mehkot me pahn kauhdi wiakau wet en dehr pwurehng wiawi mwuhr.

Kaun kan pahn rapahki kaweid en Ngehno pwehn diarada ma kaweid de koakommoldi en toweh men me konehng wiawi pwehn kahudi wiakau. Irail pil kak ale kaweid sang arail kaun en prihsduhd me pid mwekido. Ahpw, soangen wiakau ong emen aramas de emen me mah tohrohr me pahrekiong irehkan me sansal pah pahn anahne tenek sang pwihn en kaweid kan.

• Wiakaupen paliwar: Kawehla paliwar sang ni kamakam de pei. Ekei ohla kakete sohte sansal.

• Wiakau en nenek: Tehk irehkan me sansal nan 38.6.18.3.

• Wiakaulahn amw pepehm: Doadoahngki mwekid oh lokaia me kin kawehla wahu oh katep en aramas emen. Met iangahki mwekid kan me kin wiewiawi ansou koaros pwehn kasaroh, sohte kamelele, oh lipahned me kin kanameneki oh kamwamwalihla.

• Kamwamwahlli mwhoni: Kihsang en emen tohrohr ah pai oh nah mwohni. Met kak iangahki doadoahngki ni sohte mweimwei en emen tohrohr ah dipwisou, mwohni, de dipwisou kesempwal teikan. Met pil kak iangahki alehdi manaman ni sapwung pwehn doadoahngki nein emen tohrohr nah mwohni. iangahki doadoahngki mwohni pwehn iding emen tohrohr. Pil tehk 32.6.1.3.

38.6.2.5

Malipilip kan en Mwomwohdiso, Doropwehn Mweimwei ong Tehnpas Sarawi, oh Rekohd en Toweh kan

Towehkan me wiakawe mehteikan sohte pahn ale malipilip sang Mwomwohdiso oh sohte pil pahn ale doropwhen mweimwei ong nan tehnpas sarawi lau irail koluhlahr, oh arail kalikilikdi kan kemwekid sangehr.

Ma aramas emen neneki seri men de me pwulepwul men, de wiakawe seri men de me pwulepwul men kahrehda ah pepehm ohla de ohlahn paliwar, mwekid en wiakau o pahn kileledi nan en aramaso rekohd en towehkan. Aramaso sohte pahn ale malipilip de pwukoah me pid seri oh me pwulepwul kan. Met iangahki pwukoa en kalohk de kasukuhl ong peneinei me mie seri oh me pwulepwul ni imwarail kan, Pil sohte me pwulepwul pahn pilipilda pwehn iang aramaso kalohk de kasukuhl. Kalikilikdi pwukat pahn wie manaman oh doadoahk lao Presidensi Keieu kamanahla irihrlahn kalikilikdi pwukat. Tehk 32.14.5 ong irehkan me pid kileledi en kalikilikdi kan.

38.6.2.7

Iren Kosonned akan Me Pid duwen Wiakau

Ma en toweh men ah mwekid en wiakau kan kawelahr ehu kosonned, pisop oh steik presiden anahne kangoangehki toweho en padahkihong palien kakehlaka kosonned de pali teikan me konehng duwen iren wiakau o. Pisop de steik presiden kak ale ire me pid duwen anahnepen repwoht sang Mwomwohdiso (tehk 38.6.2.1). Ma mie towe men ahneki peidek me pid anahnepen repwoht, e pahn kangoangehkin irail en ale kaweid sang pali en kosonned.

Kaun kan en Mwomwohduso oh toweh kan anahne kapwaiada ilek en kosonned koaros oh repwohtki wiakau kan ong pali en kakehlaka kosonned. Nan ekei wasa, kaun oh sounpadahk kan me apwalih seri oh me pwulepwul wia “soun repwoht ket” oh irail anahne repwohtki wiakau ong pali en kakehlaka kosonned kan, Ni soangen mwohmwohte, nan wasa tohto, sohte lipilipil aramas me esehda duwen wiakau o anahne pakairkilahng pali en kakehlaka kosonned, Pisop oh steik presiden kan anahne eker pali en sawas pwehn ale ire pisetik kan me pid duwen soun repwoht oh anahnepen repwohtki wiakau o. Kosonned en Mwomwohdiso iei en kapwaiada kosonned.

38.6.5

Mwakelekel oh Loallopwot

Kosonned en Kauno me pid mwakelekel iei:

• > Sohte wia insenen nenek likin ehu pwopwoud nan pwungen ohl emen oh lih emen nin duwen kosonned en Koht,

• > Loallopwot pene nan pwopwoud

Tuhpenehn paliwar nan pwungen pwopwoud ehu wia mehkoat lingang oh sarawi. Ire wet kasarawilahr sang Koht pwehn wiahda seri oh kasalehda limpoak nan pwungen ehu pwopwoud

Ihte ohl emen oh lih emen me kasarawilahr nin duwen kosonned oh wiahla ehu pwopwoud kak wia nsenen paliwar. E inenen kesempwal en ahneki mour mwakelekel mwohn silahngin Koht. Kawehla kosonned en mwakelekel wia mehkoat kesempwal (tehk Exodus 20:14; Matthew 5:28; Alma 39:5). Irail ko me pidada wiakawe dodohk sarawi me Koht ketin kapikada duwen mour.

Soun kaweid en Mwomwohdiso pahn anahne tuhpene me emen toweho:

• Kin tuhtuong emen tohrohr likin ah pwoud me kasarawilahr rehn Koht, oh kin wiewia kamwahl, wie suwed, oh ohl mwahuki ohl de lih mwahuki lih (kilang 32.6.2).

• Kin wie pwopwoud de ehupene nan ire ehu me sohte kasarawi sang Koht, oh kin wie pwopwoud seli, wie patpatpene, oh wie pwopwoud en lih ong lih de ohl ong ohl.

• Kalapw kilekilang kilel suwed me kawelahr nan pwungen ih oh ah pwoud oh ah peneinei (kilang 38.6.13).

Tuhpenehn kaunsel en towehkan me pid mwekid pwukat pahn pahsan ire tohto kei. Ire pwukat sansal nan 32.7. Ni karasepe, pwihn en kaunsel pahn kin anahne sewese aramas me kauwehla inou kan en tehnpas sarawi pwehn kak koluhla. Ong ekei sapwung kan, kaweid oh kalikilikdi me sohte ntingdi nan rekohd pahn kak itar en apwali (kilang 32.8).

Tehk 32.6.1.2 ong ire me kaunsel udahn anahne wiawi ong dipen nenek kan.

38.6.6

Kilel de Kasdo en Seri Kilisou

Mwomwohdiso keinepwihdi kilel en seri kilisou ni soangen mwohmw sohte lipilipil. Ma pisop men de steik presiden men esehda me emen tohweo kin kilekilang de wiewia kilel en seri kilisou, e pahn mwadangete idawehn irehkan nan 38.6.2.1.

Kaunsel en towehkan en Mwomwohdiso pahn uhdahn kilelehdi nan en toweho rekohd ma toweho kin wiahda, ehukihda, kolokol, de kilekilang kilel en seri kilisou (kilang 32.6.1.2 and 32.14.5). Kaweid wet sohte doke seri de me pwulepwul me sounparte ehu me kin ehukipene kilelarail de kilel en mehteikan me kilisou. Kaweid en peneu oh irairdi en towehkan kak itar ong kapwungala soangen mwekid pwuko.

Ong irehn kaweid kapatapat, kilang 38.6.13.

38.6.10

Nenek nan pwungen peneinei

Mwomwohdiso keinepwihdi nenek nan pwungen peneinei ni soangen mwohmw sohte lipilipil. Pil duwehte wasaht nenek nan pwungen peneinei me kin wiawi nan pwungen:

• >Pahpa de nohno oh seri men.

• > Emen rehn pahpa/nohno kahlap oh emen nein nah.

• > Nan pwungen perian kan.

• > Emen rien ah pahpa de nohno iangahki seri me re pahn naineki.

Pwehn sansal, seri, nein nah, perian, kan, oh nein rie iangahki uhdan nain serihkan, seri pwekpwekda, step de seri me wie epwehpwel nan ehu peneinei. Nenek nan pwungen peneinei kak wiawi nan pwungen me pwulepwul riemen, emen me mah oh emen me pwulepwul, de me mah riemen. Ma steik president men ahnekida peidek kei duwen mour sakanakan me uhwongadahr kosonned kan, e pahn rapahki kaweid en Ohpis en Presiden Keieu.

Ansou me emen me pwulepwul alehdi kahpwal en nenek nan pwungen peneinei, pisopo de steik presiden pahn eker pali en sawas en Mwomwohdiso wasa me pali wet mie 38.6.2.1). Nan wehi teikan, steik presiden pahn rapahki kaweid sang rehn loahier en ehria ni ohpis en ehria. Nan wasa teikan, kaun kan kak alehdi semen en Family Services de manager en pali en welfare oh self-reliance sang opis en ehria.

Kaunsel en towehkan en Mwomwohdiso anahne ntingiedi mwekid wet nan en toweho rekohd ma toweho dipekihda dipen nenek nan pwungen peneinei (kilang 32.6.1.2 oh 32.14.5). Mwomwohdiso kin kalap anahne kakommolehdi towe men me dipekihda dipen nenek nan pwungen peneinei.

Ma emen me pwulepwul dipekihda dipen nenek nan pwungen peneinei steik presiden pahn alehdi Ohpis en Presidensi Keieu pwehn ale kaweid.

Aramas me alehdi kahpwal en nenek nan pwungen peneinei kin ahneki kahpwal en sengiseng loal oh medemedewe me irail me sapwung. Steik presiden kan oh pisop kan pil kin kihda sawas ong tohn peneinei kan me anahne. Kaun kan anahne apwalih irail mwahu oh kihong irail kaweid keneinei oh sawas pwehn sewese irail powehdi kotoutou laud en nenek nan pwungen peneinei.

Ekei pak irail kin ahneki namenek oh medewe me re dipada. Aramas pwukat sohte dipekihda dihp ehu. Kaunakan kin sewese irail oh arail peneinei kan wehwehkihda duen sapwelimen Koht limpoak oh kamwahu kan me kin kohsang ni an Sihses Krais kamatalahu (kilang Alma 15:8; 3 Nephi 17:9).

Me patehng sawas sarawi sang kaun kan, ekei toweh kan kak ale sawas sang rehn semen en sawas ong pali wet. Ong iren kaweid kapatapat, kilang 31.2.6.

38.6.13

Kilel de Kasdo Suwed

Mwomwohdiso keinepwihdi kilel suwed ni soangen mwohmw sohte lipilipil. Doadoahngki kilel suwed kin kauwehla mour en aramas, peneinei kan, oh wehi. E pil kin kalipehda Ngehn en Kauno. Tohn Mwomwohdiso anahne liksang soangen kilel suwed koaros oh uhwong wiawihda, nehnepeseng oh doadoahngki mepwukat.

Mwomwohdiso kin kihda mepwukat pwehn sewese aramas me arail mour kan ohkihlahr kilel suwed:

• AddressingPornography.ChurchofJesusChrist.org

• AddictionRecovery.ChurchofJesusChrist.org

• Sewese koaros me kin ahneki kahpwal en kilel suwed kan (pwuhk ehu)

• Let Virtue Garnish Thy Thoughts (pwuhk ehu)

Steik presiden kan oh pisop kan pil kin kihda sawas ong tohn peneinei kan me anahne.

Kaun en Mwomwohdiso kan anahne wehwehki me doadoahngki kilel suwed kin kak wiahla tiahk ehu me tengala rehn aramas. Me patehng sawas sarawi sang kaun kan, ekei toweh kan kak ale sawas sang rehn semen en sawas ong pali wet. Kaun kan kak alehdi sawas sang Family Service. Kilang 31.2.6 ong irehn alehdi sawas.

Kaweid en peneu oh irairdi en toweh kan me sohte ntingdi nan rekohd pahn itar ong apwali aramas emen en koluhla oh sohla doadoahngki kilel suwed 32.8). Tuhpenehn kaunsel en towehkan sohte kin kalap wiawi nan ire wet. Ahpw, ehu tuhpenehn kaunsel kak wiawi ma toweh men doadoahngki kilel suwed uklahr oh kahrehiong kahpwal nan pwungen ih oh ah pwoud pil iangahki ah peneinei. (see 38.6.5). Kaunsel en towehkan en Mwomwohdiso pahn uhdahn kilelehdi nan en toweho rekohd ma toweho kin wiahda, ehukihda, kolokol, de kilekilang kilel en seri kilisou (kilang 38.6.6).

38.6.18

Wiakau en nenek, Angkehlail, oh sohng mwekid sakanakan kan koaros ong palien tuhpene en palliwar

Mwomwohdiso kainapwih wiakau en nenek. Nin duwe met, wiakau en nenek me wehweki wia insenen tuhpenen paliwar ni aramas teio ah sohte mwahuki. Tiahk en nenek me wiawihong aramas emen me sohte kak pwungki kin wehwehki wiakau en nenek . Wiakau en nenek pil kin kak wiawi nan pwungen ehu pwopwoud de nan pwungen riemen me kin wie mwemweitpene. Ong irehkan me pid nenek kamwamwahl ong emen seri de me pwulepwul, kilang 38.6.2.3.

Nenek kamwamwahl iangahki soangen ire tohto kei, sang kamasak lel kamakam. E kin kak wiawi ong paliwar, ni lokaia, oh ni soangen mwohmw teikan. Kaunsel en towehkan anahne tuhpene ma emen toweo dipekihda dipen nenek me idihd de dipekihda dipen nenek kamwamwahl 38.6.18.2.

Ma towehkan esehda duwen nenek kamwamwahl, irail anahne mwekid karwaru pwehn pere irail kan me alehdi doahk suwedo oh meteikan ni ansou mwadang. Met iangahki pakair ong pisop de steik presiden. Ma seri men lelohng nan songen irair en wiakau wet, towe kan pahn anahne idawen kaweid kan nan 38.6.2.

38.6.18.1

Wasahn Apwali irail akan me kin wiakau.

Ma pisop men de steik presiden esehda duwen nenek kamwamwahl, e pahn eker pali en sawas en Mwomwohdiso nan wehi me sawas wet mie (see 38.6.2.1 ong iren kaweid). Sounsawas en kosonned oh semen kan pahn sapeng arail peidek kan. Semen pwukat pil pahn kaweid kin irail mwomwen arail kak:

• Sewese me paisuwedla kan oh sewese peresang irail wiakau en mwuhr kan.

• Sewese aramas kan me pahn kak paisuwedla mwuhr.

• Idawehn koasondi en kosoned ni arail repwohtki wiakau pwukat.

Nan wehi laud teikan me sohte sawas en delepwohn wet, pisop meno me esehier me mie kahpwal en wiakau pahn anahne eker ah steik preseden. E pahn rapahki kaweid sang pwihn en kaunsel en ohpis en ehria. Nan wasa teikan, kaun kan kak alehdi semen en Family Services de manager en pali en welfare oh self-reliance sang opis en ehria.

38.6.18.2

Sewese Irail akan me mihla nan kahpwal en Nenek me Wiakau, Angkehlail, oh songen mwohmw suwed akan duwen Wiakau en Nenek.

Irail akan me mihla pahn kahpwal en wiakau en nenek, angkehlail, de songen mwohmw teikan me pidada suwed en nenek kin kakete lelohng lapalahn kahpwal en soumwahu. Ni ansou me toweh men kin wehkada dipe, pisop de steik preseden kin kasalehiong irail duwen poakehla oh kasalehiong duwen limpok. Kaun kan anahne pohnese irail oh kiong irail kaweid mwahu oh sawas pwehn sewesei irail powehdi kasohwahu suwed kan en kamwamwahl. E pil pahn eker nein Mwomwodiso delepwohn en sawas ni ansou me kak (kilang 38.6.18.1).

Ekei pak irail kin ahneki namenek oh medewe me re dipada. Aramas pwukat sohte dipekihda dihp ehu. Kaun akan sohte pahn kapwokonkin irail mwekid suwed wet. Kaun akan kin sewese irail oh arail peneinei kan wehwehkihda duen sapwelimen Koht limpoak oh kamwahu kan me kin kohsang ni an Sises Krais Kamatalahu (kilang Alma 15:8; 3 Nephi 17:9).

Ni ansou me towe kan pahn pilada en ehukiwei mwekid en wiakau wet, kaun kan sohte pahn kilangete mwomwen arail kosoi kan. Met e pahn kak kamadekihla aramas me wia mwekid o.

Me patehng sawas sarawi sang Kaun en Mwomwodiso kan, aramas ko iangahki arail peneinei kan pahn anahne ale palien sawas soamoan kan. Ong iren kaweid kapatapat, kilang 31.2.6.

38.6.18.3

Tohn Ward Kaunsel

Tuhpenehn kaunsel pahn anahnepe wiawi ong aramas emen me wia mwekid en wiewia suwed de wiakawehla aramas emen. Kaunsel en towehkan anahne tuhpene ma emen toweo dipekihda dipen nenek me idihd de dipekihda dipen nenek kamwamwahl (kilang 32.6.1.1)

Kaunsel pil anahne tuhkipene ire me pid nenek ong aramas mah me soakoahiek. Me sansal met, aramas mah me soakoahiek wia aramas emen me, pwehki soumwahu en paliwar de mwahliel, sohte kak en pwungki de sohte kak wehwehki dahme pahn wiawi.

Pwehn apwali soangen nenek kamwamwahl teikan, kaun kan kin rapahki kaweid en Ngehno pwehn diar ma kaweid en peneu de tuhpenehn kaunsel en towehkan me konehng apwalih irehko (kilang 32.6.2.2 oh 32.8). Kaunselo kin anahne tuhkipene mwekid me doar kan. Kaun kan pil kak ale kaweid sang arail kaun en prihsduhd me pid mwekido.

Ma mie irairdih kei me pwarada sang nan en kaunsel en towehkan me pid nenek kamwamwahl, mepwukat pahn ngtingdi nan en toweho rekohd.

Ong ire me pid kaweid kan ong mwekid kan en kamwamwahl, kilang 38.6.2.2. Ong ire me pid kaweid kan ong mwekid kan en kamwamwahl, kilang 38.6.18.2.

38.6.23

Aramas me Wekidala Arail Kepikipik

Aramas me wekidala arail kepikipik kin sohpai kahpwal liseliping kei. Towe kan oh irail me sohte kin iang wia towe en mwomwodiso kan me kin wekidala duwen arail kapikipik— oh arail peneinei oh kompokepah rail kan— pahn anahne aramas en kin pohnese kin irail pohmwahu, kadek, apwal mwahu, oh duwen limpok en Krais. Irail koaros lukehng en iang kamadipw sarawi, mihting teikan en Rahn Sarawi, oh mwekid kan en Mwomwohdiso (kilang 38.1.1).

Wia ohl oh lih wia ehu mehkot kesempwal nan en Sahm Nanleng koasondi en popohl. Uhdahn wehwehn ohl oh lih nan family proclamation iei dahme ke ipwikihdi ma ke wie ohl de lih. Ekei aramas kehn me mie sou pwungpene ehu nan pwungen mwomwarail ni ahr ipwidi oh uhdahn mwomwarail. Ihme kahrehda, irail kin wekidala mwomwen arail kepikipik. Mwomwohdiso sohte uhki de kasohwe kahrepe kan me aramas wekidkihla ahr kepikipik.

Pali tohtohn mwekid kan en Mwomwohdiso oh ekei tiahk sarawi kan en prihsduhd kin doke sohte lipilipil ma ohl de lih. Aramas me wekidala arail kepikipik kak pepdaisla oh kasarawihla nin duwen me sansal nan 38.2.3.14. Irail kak pil iang ale kamadipw sarawi oh ale kapai kan en prihsduhd. Ahpw, kasarawi ong prihsduhd oh alahldi en tiahk sarawi nan tehnpas sarawi kin wiawi ong mwomwen aramaso ni ah neitikdi.

Kaun kan en Mwomwohdiso sohte kin kaweidki aramas en koadoahki pwe ren wekidala mwomwarail sang ni mwohmw me re neitingkihdi. (“sex reassignment”). Kaun kan kin kaweidki me soangen mwekid pwukat pahn kahrehda kakommoldi sang tohn Mwomwohdiso.

Kaun kan pil sohte kangoange mwekid pwukat en wiawi. Mwekid pwukat iangahki wekidala mwomwen likou de mwomwe, de wekidala ahd de mwohmw kan me pahn kasalehda aramaso eh sohla pahrekiong mwomwe ni eh ipwidi. Kaun kan kaweidki me towehkan me wiewia soangen mwekid pwukat pahn kakommoldi sang Mwomwohdiso erein ansou me re wiewia soangen mwekid pwukat.

Kakommoldi iangahki sohla ale de doadoahngki prihsduhd, sohla ale de doadoahngki doropwehn mweimwei ong tehnpas sarawi, oh sohla ale malipilip en Mwomwohdiso. Detehn towehkan pahn sohla ale ekei pwuhkoa kan irail pil lukehng en iang mwekid teikan en Mwomwohdiso.

Aramas me wekidala arail kepikipik me sohte koadoahki wekdeklahn paliwararail, de mwomwarail sang mwohmw me re neitingkihdi kak ale malipilip en Mwomwohdiso, doropwehn mweimwei ong tehnpas sarawi on tiahk sarawi ma irail warehng.

Ekei seri, me pwulepwul oh me mah alehier sawas sang semen en pali en roson mwahu pwehn katikala arail pwunodiki mwomwarail oh medemedewehn kemehla pein irail. Mwohn en aramas emen pahn ale soangen sawas wet, e kesempwal ong ih (oh pahpa/nohnohn seri) en wehwehki kasuwedpe oh kamwahupe kan. Ma towehkan me wekidala arail kepikipik ahpw sohte koadoahki wekdeklahn paliwararail, de mwomwarail sang mwohmw me re neitingkihdi kak ale malipilip en Mwomwohdiso, doropwehn mweimwei ong tehnpas sarawi on tiahk sarawi ma irail warehng.

Ma towe men medewehda en wekidala ede de wiepen ede, ahd kapwo pahn uhd ntingdi nan wasa me ahd pilipilda kin ntingdi ie nan nah rekohd en towehkan. Aramaso pahn doadoahngki, oh ihme mehteikan pan ekerki, ahd kapwo nan ward.

Mwekid kan kin wekpeseng laud nan wasa kan oh rehn aramas akan. Towehkan oh kaun kan kin kaweid pene pahn kupwuren Kauno. Presidensi Keieu pahn kin sewese kaun teikan apwalih ehu ehu mekid pwukat. Pisop kan kin ale kaweid rehn steik presiden. Steik presiden kan oh mission presiden kan uhdahn pahn kin ale kaweid sang Ehria Presidehsi (kilang 32.6.3 oh 32.6.3.1).

Ong irehn wehwehki oh sewese aramas me wekidala arail kepikipik, tehk “Transgender” on ChurchofJesusChrist.org.

38.8

Kosonned kan en Apwahpwali

38.8.27

Sounsawas en Kosonned ong Mwomwohdiso

Ansou me anahnepen sawas en kosonned kin miehda ong Mwomwohdiso, sounkaweid kan en Mwomwohdiso kin alehdi sounsawas en kosonned en Mwomwohdiso. Nan United States oh Canada, steik presiden kan anahne alehdi Ohpis Lap en General Clounsel en Mwomwohdiso (1-801-240-6301 de 1-800-453-3860). Likin United States oh Canada, steik presiden kan anahne alehdi ohpis en ehria pwehn tuhong sounsawas en kosonned.

38.8.27.1

Patehng de Doropwe kan me pid Doadoahk en Kosonned

Sounkaweid kan en Mwomwohdiso sohte anahne koadoahki kapwung en pwuhng de dihp en towehkan nan arail unit kan, koarum kan, de pwihn kan ahpw sohte ekerki mahs sounsawas en kosonned en Mwomwohdiso. Kosonned wet doke ntinglahng de email lahng sounsawas en kosonned kan de tohn doadoahk en mwolehn kopwung kan.

Sounkaweid kan anahne tuhkihong sounsawas en kosonned, nan arail pwukoahn Mwomwohdiso, ma Irail:

• Kamehlele me irail anahne kadehde de pakairki duwen irehn kosonnedo.

• Irail uhdahn anahne sang ni menen kosonned kadehde de pakairki duwen irehn kosonnedo.

• Oaht wiawi ong irail en kihda mehn kadehde.

• Pekipek wiawi ong irail en kihda doropwe de ireh kan ni saledek.

• Pekipek wiawi ong irail en tuhong sounsawas en kosonned de pali en kosonned kan iangahki kodahn pwunglahn kopwung de karongorong en parohl.

Mendahte ma e wiawi ni pwung, en sounkaweid en Mwomwohdiso kan arail patehng pali en kosonnedo kak imwila ni sawehwe oh paisuwed. Songen ehupene wet kak wia mehkoat kamedek ong me paisuwed kan oh arail peneinei kan. Ideidawehn kosonned en Mwomwohdiso pil kin sewese Mwomwohdiso en dehr lohdi nan ehu pingiping en kosonned.

Sounkaweid kan en Mwomwohdiso sohte kak iang kadehdeki Mwomwohdiso nan sohte lipilipil kopung ni arail sohte alehdi kamanaman sang Ohpis en General Counsel. Kosonned wet pil doke pwunglahn kopwung oh karongorong en parohl. Sounkaweid kan en Mwomwohdiso sohte kak kihda kadehde ni nting nan arail pwukoa en sounkaweid ma sohte kamanaman.

Sounkaweid kan sohte kak nda de kawehwe me arail kadehde nan ehu kopwung pahrekiong dahme Mwomwohdiso uhki.

Sounkaweid kan sohte kak wekid de kamana kadehde kan en emen sounkadehde nan sohte lipilipil kopwung.

Wiepen alehdi sounsawas en kosonned en Mwomwohdiso sansalehr nan 38.8.27. Likin United States oh Canada, sounkaweid kan anahne alehdi neirail sounsawas en kosonned en ehria.