0.

Pasiunang Kinatibuk-ang Pagpasabot

0.0

Pasiuna

Ang Ginoo mitudlo, “Himoa ang matag tawo nga makakat-on sa iyang katungdanan, ug sa pagbuhat sa buhatan diin siya natudlo, diha sa tanan nga kakugi” (Doktrina ug mga Pakigsaad 107:99). Isip usa ka lider sa Ang Simbahan ni Jesukristo sa mga Santos sa Ulahing mga Adlaw, kinahanglan ka nga magtinguha og personal nga pagpadayag aron matabangan ka nga makat-on ug makatuman sa mga katungdanan sa imong calling.

Ang pagtuon sa mga kasulatan ug sa mga pagtulon-an sa mga propeta sa ulahing mga adlaw makatabang nimo nga makasabot ug makatuman sa imong mga katungdanan. Samtang ikaw magtuon sa mga pulong sa Dios, ikaw mas bukas sa impluwensya sa Espiritu (tan-awa sa Doktrina ug mga Pakigsaad 84:85).

Ikaw makat-on usab sa imong mga katungdanan pinaagi sa pagtuon sa mga instruksiyon niining tamdanan nga basahon. Kini nga mga instruksiyon makadapit og pagpadayag kon sila gamiton aron sa paghatag og panabot sa mga baroganan, mga palisiya, ug mga pamaagi nga magamit samtang nagtinguha sa giya sa Espiritu.

0.1

Ang Tamdanan nga Basahon

Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw naghatag og giya alang sa kinatibuk-an ug lokal nga mga lider sa Simbahan.

Ang mga ulohan ug ubos nga mga ulohan niini nga tamdanan nga basahon ginumerohan aron mapasayon ang pagpangita sa mga hilisgotan ug pakisayran. Sama pananglit, ang instruksiyon mahitungod sa kon si kinsa ang masilyo diha sa templo gihatag diha sa 27.3.1. Ang numero 27 nagpasabot sa kapitulo, ang numero 3 nagpasabot sa usa ka seksiyon niana nga kapitulo, ug ang numero 1 nagpasabot sa ubos nga seksiyon.

0.2

Pagpahiangay ug Opsiyonal nga mga Kapanguhaan

Dili tanang stake ug ward adunay managsama nga mga panginahanglan.

Ang mga lider magtinguha og inspirasyon mahitungod kon unsa nga mga lagda ug opsiyonal nga mga kapanguhaan ang gamiton aron matubag ang mga panginahanglan sa mga miyembro.

0.4

Mga Pangutana mahitungod sa mga Instruksiyon

Kon adunay mga pangutana nga wala matubag sa mga kasulatan, sa mga pulong sa buhi nga mga propeta, o niini nga tamdanan nga basahon, ang mga miyembro sa Simbahan kinahanglang mosalig sa ilang mga pakigsaad sa Dios, sa tambag sa ilang lokal nga mga lider, ug sa inspirasyon sa Espiritu alang sa giya.

Kon ang mga lider adunay mga pangutana mahitungod sa impormasyon nga anaa niini nga tamdanan nga basahon o mahitungod sa mga isyu nga wala matubag niini, sila magpakitambag sa ilang direkta nga tigdumalang awtoridad.

0.5

Terminolohiya

Gawas kon gipasabot nga lahi:

• Ang mga pulong nga bishop ug bishopric niini nga tamdanan nga basahon nagpasabot usab ngadto sa mga presidente sa branch ug sa mga kapangulohan sa branch. Ang mga pulong nga presidente sa stake ug kapangulohan sa stake nagpasabot usab ngadto sa mga presidente sa district ug sa mga kapangulohan sa district. Alang sa katingbanan kon sa unsang paagi nga ang awtoridad sa mga presidente sa district lahi nianang sa mga presidente sa stake, tan-awa sa 6.3.

• Ang paggamit sa mga pulong nga mga ward ug mga stake sa kinatibuk-an nagpasabot usab ngadto sa mga branch, mga district, ug mga misyon.

• Ang paggamit sa pulong nga Dominggo nagpasabot sa bisan unsa nga adlaw nga ang Igpapahulay lokal nga gisunod.

• Ang termino nga yunit nagpasabot ngadto sa mga ward ug mga branch.

• Ang paggamit sa pulong nga mga ginikanan sa kinatibuk-an nagpasabot usab ngadto sa legal nga mga magbalantay.

Ang mga calling sa bishop ug presidente sa branch dili pareha og awtoridad ug responsibilidad, ni ang mga calling sa presidente sa stake ug presidente sa district. Ang bishop usa ka katungdanan diha sa pagkapari, ug ang ordinasyon itugot lamang sa Unang Kapangulohan. Ang mga presidente sa stake tawagon sa mga General Authority ug sa mga Area Seventy.

0.6

Pagkontak sa Punoang Buhatan sa Simbahan o sa Buhatan sa Area

Ang pipila sa mga kapitulo niini nga tamdanan nga basahon naglakip sa mga instruksiyon sa pagkontak sa punoang buhatan sa Simbahan o sa buhatan sa area. Ang instruksiyon sa pagkontak sa punoang buhatan sa Simbahan magamit niadtong anaa sa Estados Unidos ug Canada. Ang instruksiyon sa pagkontak sa buhatan sa area magamit niadtong anaa sa gawas sa Estados Unidos ug Canada.