siasing ra telungalek

2.

Olengeseu ra re Dertal Chad ma Telungalek er sel Ureor el Olsobel ma Diak a Ulebengelel Klengar

2.0

Uchelel a Omesodel

Mesel domekrael er tial Ikelesia er a Jesus Kristo, e kau a molengeseu ra re dertal chad ma telungalek el kutmeklii a urerel a Dios er a olsobel ma diak a ulebengelel el klengar (mesa 1.2). Sel kmal moktek er tial lureor a molngeseu er a rokui el ngelekel a Dios el nguu a klengeltengat er a diak a ulebengelel klengar ma mui el deurreng.

Ng klou ra urerel a olsobel ma diak a ulebengelel klengar a meketmokl el lokiu a telungalek. Meng kirel a rokui el chedal a Ikelesia, e tial ureor a omuchel ra blai.

2.1

Sel Ngerechelel a Telungalek er a Uldesuel a Dios

Meng telkib e ra uldesuel, a Demad ra Babeluades a milkdebechii a telungalek er tial beluulechad. Ngii a soal a telungalek a le beskid a deurreng. A telungalek a meskid a techall el mesuub, mukeroul, mesiou, ouchel, e ousubes. Te sebechir el ngosukid el mengetmokl el kirel a diak a ulebengelel klengar.

A Dios a yaksok er a diak a ulebengelel klengar luldimukl er a diak a ulebengelel chebechiil, rengalek, ma ikel rokui el bebil ra klengeltengat er a diak a ulebengelel telungalek. Tial klengeltengat a mo er tirkel diak el bechiil er chelechang malechub eng diak a telungalek er tir er a Ikelesia.

2.1.1

Diak a Ulebengelel Telungalek

Diak a ulebengelel telungalek a morngii sel sekum a rechedal a Ikelesia a kutmokl a telbiil sel le ngai a ikel lomerenged el chedaol ruoll ra templo. A klengeltengat er a diak a ulebengelel el telungalek a lolchesuar a rechedal a Ikelesia sel loltirakl a ikel telbiil e louchel sel sekum e te mo mechitechut. A re merredel er a Ikelesia a olengeseu ra rechedal a Ikelesia mel keltmokl el ngmai a ikal chedaol ruoll e longull a telbilir.

A bebil ra telengtengil a omekdubech er a diak a ulebengelel telungalek a meruul a chedaol ruoll ra templo el mesterir a rechedal a Ikelesia el mo moak el mora re beldekir.

2.1.2

Robekel

Chebechiil ra delongelel a sechal ma redil a mechedaol ra Dios (mesa Doctrine and Covenants 49:15). A robekel a kirel omrolir el dmak el merael el kirel a diak a ulebengelel klengar ( mesa 1 Korinth 11:11).

A tara usbechall sel dolai ra diak a ulebengelel klengar a kirel a sechal ma redil el soiseb ra telbiil ra chebechiil er sel kot el ngarbab el renged (mesa Doctrine and Covenants 131:1–4). A robekel a kutmeklii tial telbiil sel le nguu sel chebechiil el merenged ra chedaol ruoll ra templo. Tial telbiil a dodai er a diak a ulebengelel el telungalek. Mesel loba klaumerang el mengeluolu er ngii, e a chelbechilir a melemolem el mo cherechar.

Sel bol ta bedengir a robekel a kirel klebokel e chedaol. Ng mlechedaol ra Dios el kirel a omeob ra rengalek e kirel di meketmokl ra delongelel a sechal ma redil. Delmedemk el reng ma omengull—diak el kldidai el reng—a kirel lomekrael er tir er tial dmolech el deleuill.

A Dios a mla mellach el kmo a teletael er a deleboes a di mekedmokl er a chelsel a chebechiil er a delongelel a sechal me a redil.

A robekel a diosisiu el terung er a osengel a Dios. Ng diak a ta er tir el kirel mengederedel ra tang. A ikel lolib a kirel lokiu a keltal reng ma beltik el reng, loba mui el klaingeseu ra delongelir.

2.1.3

Roungalek ma Rengalek

Uriul-klebesei el reprofet a mla olsisechakl el kmo “a llechul a Dios el mo e ra rengelekel el mo omdois e omekeek ra beluulechad a kmal dirk mesisiich” (“A Telunngalek: Chais el mora Beluulechad”; dirrek el mesa Doctrine and Covenants 49:16–17).

A oubeltik el reng el robekel a dmak el oldars a ikel kot lungil teletael el lomtebechel e omekeroul ra rengalek. A teletael le ngara chelsel a roungalek a locha sebechel torbengii meng diak lomekeroul ra rengelekir. Eng di, a Rubak a mo omekngeltengat er tir sel losiik er Ngii e lolengeseu e lolasem el loltirakl a telbilir el lobengkel.

A roungalek a ngarngii a ngerechelir el mo olengeseu ra rengelekir mel keltmokl el melai a ikel klengeltengat ra diak a ulebengelel klengar. Te olsisechakl ra rengelekir el mo betik a rengrir e mesiou ra Dios ma rebebil (mesa Mateus 22:36–40).

“A rechedam a bdelul a telungalek loba beltik el reng me a lemalt e ngerchelir el smiik e kudmokl a ikel lousbech ra klechad me a ungil ulekereu el mora telungalek” (“A Telungalek: Chais el mora Beluulechad”). Sel sekum ma sechal malechub eng chedam a diak er a blai, e a chedil a omtebechel er a telungalek.

A omtebechel er a telungalek a ngerachel el lolengeseu lomekrael ra telungalek mel luut el mo kiei lobengkel a Dios. Tiang a meketmokl sel losiou e lolsisechakl e lobang a delemdemk el reng, ngariou el reng, ma klikiid el beltik el reng, e loltirakl er a okesiul a Jesus Kristo (mesa Mateus 20:26–28). A omtebechel er a telungalek a uldimukl ra omekrael ra rechedal a telungalek ra omeluluuch, omesubel a ebangkelio, ma kuk bebil ra tekingel a omengull. A robekel a oureor el dmak el meruul a ikal ngerachel.

“A rechedil a kmal ngerchelir el omekeroul ra rengelekir (“Telungalek: Chias el mora Beluulechad”). A omekeroul a belkul a kmo te omtebechel, olisechakl, e olengeseu, loltirakl ra okesiul a Osobel (mesa 3 Nephi 10:4). Meng dmak ngii ma bechil, ea chedil olengeseu ra telungalek er ngii el mesuub er a ebangkelio ra klemerang e omekdubech ra klaumerang er a Chedam ra Babeluades ma Jesus Kristo. Te dmak e omekdubech ra basio ra beltik el reng ra chelsel a telungalek.

“Chelsel aikaikid el chedaol el ngerachel, ea re chedam ma re chedil a kirir el kaukledem e kaingeseu el tabesul a ngerchelir” (“A Telungalek: Chais el mora Beluulechad”). Te meluluuch e chadecheduch el terung lobengkel a Rubak. Te melib a tekoi el terung e dmak el kau beltik el reng, e mui el kaingeseu el terung.

2.2

Ureor ra Olsobel ma Diak a Ulebengelel Klengar

A Kot el Presidency a mla kmul kmo, “A blai a uchelel a melmalt el klengar” (babier er a First Presidency, Feb. 11, 1999).

Sel molengeseu ra rechedal a Ikelesia el meruul ra ureor el losobel ma diak a ulebengelel klengar ra blai, ea re merredel er a Ikelesia a melisiich er tir mel bekdebechii a blai el Reng a kiei er ngii. Te dirrek el melisiich ra rechedal a Ikelesia me bo longull ra Chedaol sils, longuiu e losuub ra ebangkelio ra rekeblirir, e longetmokl ra ongdibel ra telungalek ra bek el sandei.

2.2.3

Omesubel Ebangkelio er a Blai

Osisecheklel me a omesubel ebangkelio er a blai me a ngesou er a Ikelesia. A re merredel a melisiich ra rokui el rechedal a Ikelesia me losuub ra ebangkelio ra keblirir er sel Chedaol sils me sel rokir tal sandei.

A omesubel chedaol llechukl lulecholt ra Mei, Moltirakl er Ngak—Mora Dertal Chad ma Telungalek a usbechall el suobel ra ebangkelio ra omesuub ra blai.

2.2.4

Ongdibel ra Blai ma Bebil ra Tekoi

A re profet ra Uriul-klebesei a mla olisechakl ra rechedal a Ikelesia me longetmokl ra ongdibel ra blirir ra bek el sandei. Tiang a chedaol taem el mora re dertal chad ma telungalek me losuub ra ebangkelio, melisiich a klaumerang er tir, omekdubech a keltal reng, el dak el ngara deurreng.

A ongdibel ra blai a beot sel loltirakl a ikal moktek e ra rechedal a Ikelesia. Ng sebechel ngarngii sel Chedaol sils malechub a bebil ra sils ma taem. Ng uldimukl ra:

• Omesubel a ebangkelio ma osisecheklel (sel Mei, Moltirakl er Ngak klekedall el lusbechall a lungil).

• Mesiou ra rebebil.

• Mengitakl malechub ousekool a ongak ma chelitakl ra Primary (mesa chapter 19).

• Olengeseu ra rechedal a telungalek er a Ulekerulir a Rengalek ma Rengeasek.

• A osisechakl ra telungalek el kutmokl a moktek, mengedechuul a mondai, e mengituuk a blechebechel a tekoi.

• Tekoi ra Omilil

A re mesobil el rechedal a Ikelesia ma re bebil a sebechir el mo cheldull e dmak el mesiou ra Chedaol sils el mo teloi ra ongdibel ra blai e melisiich er a dertal tir lokiu omesubel a ebangkelio.

2.2.5

Olengeseu ra Dertal Chad

A re merredel ra Ikelesia a olengeseu ra rechedal a Ikelesia el diak el ngai a ngeseu ra rechad er a blirir.

A re merredel olengeseu er tirkel chedal a Ikelesia ma rechad ra blirir me ngarngii a techall el mo kaukledem, melchesuar a ungil blekeradel sel dak tir ma rebebil ra rechad, el mukeroul ra reng.

2.3

Sel Deliongel ra Telungalek me a Ikelesia

A ureor ra olsobel ma diak a ulebengelel klengar a delalem ra telungalek e ultuil er a ngeseu er a Ikelesia. A ikakid el llach a doltaut el kirel sel delongel er a Telungalek me a Ikelesia.

• A re merredel ma re sensei a mengull ra robekel e olengeseu er tir.

• A bebil ra miting er a Ikelesia a usbechall ra ward malechub a branch. A ikang a uldimukl er a chedaol belsoil ma ikel klas ma miting ra chelechad sel Chedaol sils. Bebil er a miting, omilil, ma prokuram a diak el sal meklou a ultutelel.

• A omesiou me a klaingeseu er a Ikelesia a sebeched el mo chuarm el kirel. A Rubak a mo omekngeltengat ra rechedal a Ikelesia sel bol charm el mesiou er a Ikelesia er Ngii. Eng di, sel klungel a taem el itii el mesiou ra Ikelesia a kirel el diak el bol terebengii a chedal a Ikelesia ra ikel ngerechelel ra blil, urerel, ma bebil ra tekoi.