4.

Tiyugang’ nge fapi Councils ulan e Galasia ku Yesus Kristus

4.0

Mornga’agen

I gur ni reb e tiyugang’ ko Galasia, I gur e kan pinningem u dakean e thogthog nike yib u dakean fapi tapigpig rok’ Somoel nike pii’ mat’won. I gur e kan tawa’ath nigem ni ngam pii’ e ayuw ko fare muruwel rok’ e Chitamangiy nu Tharmiy ni nge “yib nag e yafos ni manemus nge yafos ni manechubog” (Moses 1:39).

4.2

Yalen e Tiyugang’ ulan e Galasia

Napan e machib rok’ u fayleng, fare Tathapeg e dag rogon ni nge rrin’ e tiyugang’ nifan e Galasia rok’. Bin luk’ungun fan e muruwel rok’ e be rrin’ fare muruwel nifan ngak e Chitamangin nu Tharmiy ni nge ayuweg e gidii’ ni ngar nangfaned fare gospel rok’ (muguy ko John 5:30; Mosiah 15:7).

4.2.1

Ngongliy Rogom nib Thothup Rogon

Yesus e fal’ag rogon ko tin nib thothup nifan e muruwel rok’ ni yibi tay nga fayleng (muguy ko Luke 4:1–2). Ku woed gur ni garam fal’eg rogom nib thothup nira chugur nigem ngak e Chitamangiy nu Tharmiy u fithik’ e meybil, nge fil fapi chep nib thothup, ma gabe fol ko fapi m’ag rok’.

Mu gay fapi yi’iy ni nge ayuwegnem ni ngam nang e tin nib tu’uf rok’ e pi’in ni gabe powi’iy nge rogon ni ngan rrin’ e muruwel rok’ Got nike pii’ ngom ni ngam rrin’.

Somoel e ki michmicheg nira fulweg fapi tawa’ath nib thothup nga dakean e pi’in nira gay (muguy ko Doctrine and Covenants 46:8).

4.2.2

Machib ngak Pifak Got ni Gubin

Mu t’ufeg e gidii’ ni gabe pigpig ngak ni woed rogon ni rrin’ Yesus. Meybil “u poloʼ i gelingin gumʼirchaʼmed,” ni nge suguymed e t’ufeg rok’ (Moroni 7:48).

Ayuweg e gidii’ ni nge gel e michaen’ roraed nge mich roraed ngak e Chitamangiy nu Tharmiy nge Yesus Kristus. Mu ayuwegraed ni ngar ngongliyed fapi m’ag ko napan ni bayra thapegned e bin migid e gam’ing. Pu pii’ e athamgil ngoraedd ni ngar ayuweged fapi m’ag roraed ni ngar ngongliyed mi yaed un i fek fapi tawa’ath ko kalngan’uy.

4.2.3

Machib nag fare Gospel ku Yesus Kristus

Gubin e tiyugang’ e yaed e fapi sensey. Gay rogon ngam leak wo’en fare Tathapeg ni woed e sensey (muguy ko guruy 17; Machib ni woed Rogon Kanawo’en fare Tathapeg). U dakean e thin nge ngongol, machib nag yalen Yesus Kristus nge fapi yalen e gospel rok’ (muguy ko 3 Nephi 11:32–33; Doctrine and Covenants 42:12–14).

Machib ko chep nib thothup nge fapi thin ko profet ko tin tomur e rran (muguy ko Doctrine and Covenants 52:9).

Fa’anra yira pinningem fa ni pii’ mat’won ngom ni ngam gagiyeg nag reb e mo’olung ko Galasa fa reb e activity, micheg ni fapi n’en ni ngam machib nag eba mangil ma puluw ko yalen e machib ko Galasia (muguy ko Doctrine and Covenants 50:21–23).

4.2.4

Gagiyeg u Fithik’ e Yul’yul’

Ra reb fapi officer nibay mat’won e be pigpig u tan paa’ bee’ nibay fapi kiy ko priesthood rok’ (muguy ko 3.4.1). Biney e bachan ni nge tomilang nag me yarmiy fapi muruwel ni yibe rrin’ ni muruwel rok’ Somoel.

Facha’ nibay mat’won ko officer e rayag nira duugliy e muruwel ngak bee’ ko chingiyal’nem ni nge gagiyegnag.

Reb e tiyugang’ nibay mat’won ulan e ulung ko Galasia, mo’olung, fa activity e nge guy ni tirok’ Somoel ban’en e yibe rrin’ rogon. Napan ni yira rrin’ e biney, ma fare tiyugang’ era leak wo’en fapi yalen e gospel, yalen e motochiyel ko Galasia, nge rogon nibe powi’iy nag fare Kan ni Thothup.

Fare muruwel ni bay mat’wom riy e dar dag ni facha’ nike thapaeg e ba gaa’ ngak boech e gidii’ (muguy ko Doctrine and Covenants 84:109–10).

Dani fel’ ni ngan og nigey ni ngan pii’ mat’wom ni ngam gagiyeg nag reb e ulung ko Galasia rok’ Somoel (muguy ko Doctrine and Covenants 121:34–37).

4.2.5

Mat’won e Muruwel nge Michegnag e Muruwel

Fare Tathapeg e pii’ ngak fapi gachalpen fapi muruwel ni rib ga’fan (muguy ko Luke 10:1). Make pag raed ni ngar ngongliyed rogon fapi muruwel nikan pii’ ngoraed ni ngar rrin’ed (muguy ko Luke 9:10).

Tiyugang’, e rayag ni ngar ayuweged e gidii’ ni ngar pii’ed mat’won fapi muruwel ngoraed ni nge ayuwegraed ni ngar mon’og gaed. Gay rogon ni ngam uneg gubin e member ko fare muruwel rok’ Got.

Pii’ mat’won fare muruwel era mom nag e pigpig rom. Gay e pin’en nibe thogthog nag e Thothup ngom ko n’en ni rayag ni ngam pii’ mat’won ni ngeyag ni ngam tin’um ko tirrom e muruwel nib ga’fan.

4.2.6

Fal’ag Rogon Boech e Gidii’ ni Ngar Manged fapi Tiyugang’ nge Sensey

Napan ni gabe tafney nag ko mini’ e nge pigpig ulan e Galasia, mu meybil nag mornga’agen. Tay u wun’um ni Somoel e rayag nag ngak e pi’in nira pinning. N’en ni th’abi ga’fan e yaed roraed e yaed ba’adag ni ngar pigpig gaed, ni yaedra gay rogon ni ngar ninged e ayuw rok’ Somoel u fithik’ e sobut’aen’, ma yaed be gay rogon ni ngar pired nib fel’ thawingraed.

4.2.7

Ngongliy Rogong fapi Mo’olung, fapi Lesson, nge fapi Activity nib Tomilang Rogon

Gay e tin nibe powi’iy nag fare Thothup ko napan ni gabe ngongliy rogon fapi mo’olung, fapi lesson, nge fapi activity nib tomilang rogon. Fan e tiney e nge gel nag e gidii’ nge fapi tabinaew, me chugur nagraed i yib ngak Kristus, me pii’ e ayuw ko muruwel rok’ Got ko thapagnag nge n’uf ngalang ko bin th’abi tolang e falfalaen’ (muguy ko guruy 1 nge 2).

4.2.8

Sap ko Rogon e Athamgil Rom

Mu sap ko rogon e muruwel rom nge tin ni gabe fil nib thothup ni gur fare tiyugang’. Mu tafney nag e tin nike mon’og e gidii’ riy ni gabe powi’iy.

Fal’ngin e muruwel rom ni gur reb e tiyugang’ e be yaen u rogon ni gabe pii’ e ayuw ko pifak Got ni ngar yul’yul’ gaed ni yaed e gachalpen Yesus Kristus. Rayag ni gara nang nibe falfalaen’ Somoel ngom ko rogon e athamgil rom ko napan ni gara thamiy fare Thothup nibe pii’ e ayuw ngom.

4.3

Fapi Councils ulan e Galasia

Somoel e ke yoeg ngak fapi tiyugang’ ko Galasia rok’ ni nga ur mo’olung gaed u ta’abang ni yaed be rrin’ e muruwel rok’ (muguy ko Doctrine and Covenants 41:2–3). Fapi council e rayag nira pii’ kanawo’en ngak fapi members ko council ni ngar thapaegned fapi yi’iy napan ni yaed be gay rogon ni ngar nanged fan e tin nib tu’uf ko pifak Got mi yaed puruy’nag rogon ni ngar rrin’ed nib fel’.

4.4

Rogon e Yalen ko fapi Councils ni rib Fel’

4.4.1

Fan fapi Councils

Fapi councils e yaed ma pii’ e ayuw ngak fapi members ni ngar thapegned fapi gam’ing min ayuwegraed ni ngar ayuweged fapi m’ag nibay rogon ngay.

4.4.2

Fal’ag Rogon ko fapi Mo’olung ko Council

Fapi presidencies nge fapi councils e susun ni ngar ted e mo’olung nib pethpeth. Pi tiyugang’ mu gayed e tin nibe powi’iy Somoel ko rogon i rrin’ fapi mo’olung ko councils. Maki yaedra motoyil ko tin nibe yoeg fapi members ko council ko n’en ni yibe tafney nag ni ngan weliy mornga’agen.

Fapi tiyugang’ e yaedra yoeg ngak fapi members ko council e pin’en ni yira weliy mornga’agen u mm’on ko fare mo’olung. Fapi members ko council e yaedra fal’eg rogon raed ni ngar weliyed e tin ni yaed be lemnag ko mornga’agen e pin’ey.

4.4.3

Puruy’nag Mornga’agen nge tin ni ngan Duugliy

Napan fare mo’olung ko council, fare tiyugang’ (fa en nike pii’ fare tiyugang’ mat’won) era weliy fare n’en ni yibe puruy’nag. Ma arram me pii’ fare tiyugang’ mornga’agen e biney ngak fapi members ko council ni ngar puruy’ niged u dakean raed, mi yaed fith e duwer nge rogon ni ngan rrin’ nib fel’.

Gidii’en e biney e mo’olung e susun ni ngar motoyilgaed ngoraed ma yaed be tayfan raed. Napan ni yaed be gay ni ngar nanged rogon ni ba’adag Somoel, ma fare thothup nima thogthog nag era yib.

Ulan e council nib mathuk e bpin nge pumo’on riy, fare tiyugang’ era motoyil ngorow. Pi’in ni bpin nge pumo’on e oren ni ngiyal’ mab thil rogon e tafney roraed nira ayuweg e biney nge par nib thabthabil rogon.

Facha’ ni’ir e tiyugang’ era powi’iy fapi n’en ni yibe puruy’nag ulan fare mo’olung. Machane, susun ni’ir e nge motoyil ma gathi ir e nge non ni bo’or yay.

Tomuren e tin nikan puruy’nag mornga’agen, fare tiyugang’ e rayag ni nge duugliy e n’en ni ngan rrin’ fa yoen’ rran e n’en ni ngan duugliy ni ngeyag ni powi’iy ko boech mornga’agen nib tu’uf ni nge nang.

4.4.4

U Ta’abang

Fapi members ko council e ngar gayed rogon ni ngar ta’areb gaed ko tin ni yaed ba’adag nge fan raed ni nge ta’areb ngak e Chitamangiy nu Tharmiy nge Yesus Kristus. Ngar gayed rogon ni ngar ta’arebgaed ko tin ni yaed be puruy’nag nge tin ni ngar duugliyed.

4.4.5

Tin ni ngan Rrin’ nge Muruwel Riy

Fapi members ko councils e ngar rrin’ed e muruwel roraed u mm’on nge tomuren fapi mo’olung ko councils. Tomuren fapi mo’olung, ma yaed e ngar gayed rogon e tin ni yibe thogthog nag ni ngar ngongliyed rogon e tin nikan duugliy ni ngan rrin’. Fare tiyugang’ ko fare council era pinning fapi members ni ngar rrin’ed fapi muruwel nibay rogon ko tin nikan ngongliy rogon.

Fapi members ko council e yaedra fulweg e thin ko tin ni yaed be rrin’ ko biroraed e muruwel. Fa’anra ngan mon’og ma rib tu’uf ni ngan sap ko tiney nib ga’fan min sul ko fapi muruwel ni ngan fal’ag rogon ni gathi ta’abiyay.

4.4.6

Mitheg Thibolngin

Fapi tiyugang’ e ngar ayuwged mornga’agen facha’ napan ni yibe weliy mornga’agen ulan fare council. Susun ni yaedra fith mat’won ngak facha’ u mm’on ni ngar weliyed mornga’agen.

Fapi members ko council e susun ni dabra weliyed mornga’agen facha’ u wuru’ fare council makemus ni fa’anra ba tu’uf ni ngan rrin’ e muruwel riy nike yoeg e tiyugang’ ko fare council.

Boech ban’en e rib gel e tamra’ riy ni ngan fek ngalan fare council.