4.

Panangidaulo ken dagiti Konseho iti Simbaan ni Jesucristo

4.0

Pakauna

Kas maysa a lider iti Simbaan, naawaganka babaen ti pammaregta babaen dagiti napusgan a katulongan ti Apo. Addaanka iti pribilehio ti panangtulong iti aramid ti Nailangitan nga Ama ti “[panangi]patungpal iti saan nga ipapatay ken agnanayon a biag ti tao” (Moises 1:39).

4.2

Dagiti Pagbatayan ti Panangidaulo iti Simbaan

Kabayatan ti panagministrona iti daga, impakita ti Mangisalakan ti pagwadan ti panangidaulo para iti Simbaanna. Ti kangrunaan a panggepna ti panangaramid iti pagayatan iti Nailangitan nga Ama ken panangtulong kadagiti dadduma a makaawat ken agbiag iti ebangheliona (kitaen iti Juan 5:30; Mosiah 15:7).

Agkalikagum a maaddaan iti pannarabay a makatulong kenka a mangsursuro ken mangipatungpal kadagiti pagrebbengan ti callingmo.

4.2.1

Agsagana a Naespirituan

Insagana ni Jesus ti bagina a naespirituan para iti naindagaan a misionna (kitaen iti Lucas 4:1–2). Kasta met nga agsaganaka a naespirituan babaen ti yaasidegmo iti Nailangitan nga Ama babaen ti panagkararag, panagadal iti nasantuan a kasuratan, ken panagtungpal kadagiti bilinna.

Agkalikagum a maaddaan iti paltiing tapno maawatam dagiti kasapulan dagiti idauluam ken no kasano ti mangipatungpal iti aramid a nakaawagan ti Dios kenka nga aramidem.

Inkari pay ti Apo a mangipaay kadagiti naespirituan a sagut kadagiti agsapsapul kadagitoy (kitaen iti Doktrina ken Katulagan 46:8).

4.2.2

Agministro iti Amin nga Annak ti Dios

Ayatem dagiti tao a pagserbiam a kas iti inaramid ni Jesus. Agkararagka “iti amin a kabaelan ti puso” tapno mapno iti ayatna (Moroni 7:48).

Tulongam dagiti indibidual a mangpauneg iti kumbersionda ken mangpapigsa iti pammatida iti Nailangitan nga Ama ken ni Jesucristo. Tulongam ida nga agsagana a mangaramid kadagiti katulagan bayat ti yaawatda iti sumaruno nga ordinansada. Allukoyem ida nga agtungpal kadagiti katulaganda ket makiranud kadagiti bendision ti panagbabawi.

4.2.3

Mangisuro iti Ebanghelio ni Jesucristo

Mannursuro ti amin a lider. Ikagumaanam ti mangsurot iti pagwadan ti Mangisalakan kas maysa a mannursuro (kitaen iti kapitulo 17; Panangisuro iti Wagas ti Mangisalakan). Babaen dagiti balikas ken tignaymo, isurom ti doktrina ni Jesucristo ken dagiti pagbatayan ti ebangheliona (kitaen iti 3 Nephi 11:32–33; Doktrina ken Katulagan 42:12–14).

Mangisuro manipud kadagiti nasantuan a kasuratan ken balikas dagiti propeta iti ud-udina nga aldaw (kitaen iti Doktrina ken Katulagan 52:9).

No naawaganka wenno nadutokanka a mangidaulo iti maysa a miting wenno aktibidad iti Simbaan, penkem a ti panangisurom ket makaitandudo ken umno iti doktrina (kitaen iti Doktrina ken Katulagan 50:21–23).

4.2.4

Mangidaulo iti Kinalinteg

Agserbi ti tunggal mangimatmaton a dadaulo babaen ti panangiturong ti maysa a tao nga agiggem kadagiti tulbek ti priesthood (kitaen iti 3.4.1). Daytoy nga istruktura ti mangipaay iti urnos ken nalawag a linia ti pagrebbengan ken kaadda ti sungsungbatan iti panangaramid iti trabaho ti Apo.

Mabalin nga idutok ti maysa a mangimatmaton a dadaulo iti sabali a tao ti temporario a pagrebbenganna a mangidaulo.

Ti maysa a lider a mangidaulo iti maysa nga organisasion, miting, wenno aktibidad iti Simbaan penkenna a maipatungpal dagiti panggep ti Apo. Iti panangaramid iti daytoy, suroten ti lider dagiti pagbatayan ti ebanghelio, pagannurotan ti Simbaan, ken ti panangiturong ti Espiritu Santo.

Ti maysa a calling wenno naidutok nga aramiden a mangidaulo ket saan a mamagbalin iti tao nga umawat iti daytoy tapno napatpateg wenno ad-adda nga ik-ikkan pateg ngem dagiti dadduma (kitaen iti Doktrina ken Katulagan 84:109–10).

Saan a maitutop a tarigagayan ti mangidaulo iti ania man nga organisasion iti Simbaan ti Apo (kitaen iti Doktrina ken Katulagan 121:37).

4.2.5

Ipakumit ti Pagrebbengan ken Ipasigurado ti Kaadda ti Sungsungbatan

Inted ti Mangisalakan kadagiti disipulona dagiti napnuan kaipapanan a naidutok nga aramiden ken pagrebbengan (kitaen iti Lucas 10:1). Inikkanna pay ida iti gundaway a mangilanad kadagiti nagapuananda (kitaen iti Lucas 9:10).

Kas maysa a lider, matulongam dagiti dadduma a dumur-as babaen ti panangipakumit kadagiti naidutok nga aramiden kadakuada. Ikagumaanam a mangiraman iti amin a miembro iti panangaramid iti trabaho ti Dios.

Ti panangipakumit ti mangaramidto pay a nasamsamay ti panagserbim. Agkalikagum a manggun-od iti pannarabay ti Espiritu maipapan no ania ti ipakumit tapno makapagpokuska kadagiti kangatuan a prayoridadmo.

4.2.6

Isagana dagiti Dadduma nga Agbalin a Lider ken Mannursuro

No mangibilbilang no asino ti mabalin nga agserbi kadagiti calling wenno naidutok nga aramiden iti Simbaan, agbalin a managkararag. Laglagipen nga aramidento ti Apo a maikari dagiti awaganna. No ania ti kapatgan ket ti panagtallugodda nga agserbi, sipapakumbaba nga agkalikagumda iti tulong ti Apo, ken ikarkarigatanda ti agbalin a maikari.

4.2.7

Agplano kadagiti Miting, Adalen, ken Aktibidad nga Addaan kadagiti Nalawag a Panggep

Agkalikagum a manggun-od iti pannarabay ti Espiritu iti panangplano kadagiti miting, adalen, ken aktibidad nga addaan kadagiti nalawag a panggep. Nasken a dagitoy a panggep ti mangpapigsa kadagiti indibidual ken pamilia, mangyas-asideg kadakuada ken ni Cristo, ken mangtulong a mangipatungpal iti aramid ti Dios iti pannakaisalakan ken pannakaitan-ok (kitaen kadagiti kapitulo 1 ken 2).

4.2.8

Panangamiris kadagiti Panagkagumaanmo

Kanayon nga irebyum dagiti pagrebbengam ken naespirituan a panagdur-asmo kas maysa a lider. Ibilangmo pay ti panagdur-as dagiti idauluam.

Ti balligim kas maysa a lider ket umuna a marukod babaen ti panagkumitmo iti panangtulong kadagiti annak ti Dios nga agbalin a napudno a disipulo ni Jesucristo. Maammuam a maragsakan ti Apo kadagiti panagkagumaanmo bayat ti pannakariknam nga agtartrabaho ti Espiritu babaen kenka.

4.3

Dagiti Konseho iti Simbaan

Imbilin ti Apo kadagiti lider ti Simbaanna nga aggiinnuman iti panangaramid iti trabahona (kitaen iti Doktrina ken Katulagan 41:2–3). Dagiti konseho ti mangted kadagiti gundaway a maawat dagiti miembro ti konseho ti paltiing bayat ti panagkalikagumda iti pannakaawat kadagiti kasapulan dagiti annak ti Dios ken agplano no kasano a matulongan a maipaay dagitoy.

4.4

Dagiti Pagbatayan dagiti Nasamay a Konseho

4.4.1

Dagiti Panggep dagiti Konseho

Mangted dagiti konseho iti naisangsangayan a panangyunay-unay iti panangtulong kadagiti miembro nga umawat kadagiti ordinansa ken agtungpal kadagiti mainaig a katulagan.

4.4.2

Panagsagana para kadagiti Miting iti Konseho

Manamnama a regular nga agmiting dagiti panguluen ken konseho. Agkalikagum dagitoy a lider iti pannarabay ti Apo iti panangplano kadagiti miting ti konseho. Agkalikagumda pay iti input manipud kadagiti miembro ti konseho iti panangikeddeng no ania ti ilawlawag.

Pakaammuan a nasapsapa dagiti lider dagiti miembro ti konseho maipapan kadagiti banag a panaglilinnawagan. Agsagana dagiti miembro ti konseho a mangibinglay kadagiti nalawag a pannakaammo ken pannakaawat maipapan kadagitoy a banag.

4.4.3

Panaglilinnawag ken dagiti Pangngeddeng

Kabayatan ti maysa a miting ti konseho, ilawlawag ti lider (wenno ti maysa a tao a dutokan ti lider) ti banag a maibilbilang. Kalpasanna yallukoy ti lider ti panaglilinnawag kadagiti amin a miembro ti konseho, nga agdamdamag kadagiti saludsod ken agkalkalikagumda kadagiti kapanunotan.

Siraraem nga agbibinninglay iti singasing ken agdidinnengngeg dagiti miembro. Bayat ti panagkalikagumda a mangammo iti pagayatan ti Apo, makapagtalinaed ti espiritu ti pammaregta ken panagkaykaysa.

Iti maysa a konseho a mangiraman kadagiti babbai ken lallaki, agkalikagum ti lider kadagiti nalawag a pannakaammo ken pannakaawat ken kapanunotan manipud iti agpada. Masansan nga agduma dagiti pannirigan dagiti babbai ken lallaki a mangted iti kasapulan a panagtimbeng.

Ti maysa a lider ti mangiwanwan kadagiti panaglilinnawag ti konseho. Nupay kasta, nasken nga ad-adda a dumngeg isuna ngem iti agsarita.

Kalpasan ti panaglilinnawag, mabalin nga ikeddeng ti lider ti maysa a turongen ti tignay wenno itantanna ti desision bayat ti panagkalikagumna a maaddaan iti nayon nga impormasion ken pannarabay.

4.4.4

Panagkaykaysa

Agkalikagum nga agkaykaysa dagiti miembro ti konseho iti tarigagay ken panggep iti Nailangitan nga Ama ken ni Jesucristo. Ikarigatanda ti maaddaan iti panagkaykaysa kadagiti pananglilinnawag ken desisionda.

4.4.5

Tignay ken Kaadda ti Sungsungbatan

Aramiden dagiti miembro ti konseho ti kaaduan ti aramidda sakbay ken kalpasan dagiti miting ti konseho. Kabayatan dagiti miting, agkalikagumda iti pammaregta iti panangpadur-as kadagiti plano a mangipatungpal kadagiti pangngeddeng. Awisen ti lider iti konseho dagiti miembro a mangipatungpal kadagiti naidutok nga aramiden a mainaig kadagitoy a plano.

Agreport dagiti miembro ti konseho kadagiti naidutok nga aramidenda. Gagangay nga agkasapulan ti panagdur-as iti nakanunongan nga atension ken masurnadan a naidutok nga aramiden.

4.4.6

Kumpidensialidad

Usaren dagiti lider ti nainsiriban a pangngeddeng [discretion] no mangibinglay iti personal nga impormasion iti konseho. Gagangay a kalikagumanda ti pammalubos ti miembro a mangibinglay iti daytoy nga impormasion.

Nasken a saan nga ibinglay dagiti miembro ti konseho ti personal nga impormasion iti ruar ti konseho malaksid no naidawat a mangipatungpal iti maysa a naidutok nga aramiden manipud iti lider ti konseho.

Sensitibo unay ti sumagmamano a pakaseknan a banag tapno idatag iti sanguanan ti sibubukel a konseho.