10.

Kuoramu ni Matabete i Eroni

10.1

iNaki kei na iSoqosoqo

10.1.1

iNaki

Na inaki ni dua na kuoramu sai koya na nodra vukei na lewe ni matabete me ra cakacaka vata ka vakaitavi ena Nona cakacaka ni veivakabulai kei na bula vakacerecerei na Kalou.

10.1.2

iToko ni Kuoramu ni Matabete i Eroni

“Koi au e dua na luvena tagane lomani na Kalou, ka sa tiko Vua e dua na cakacaka me baleti au.

“Au na lomana na Kalou, ka rokova na noqu yalayala mai vu ni yaloqu, ena noqu igu taucoko kei na kaukauwa kecega, ka vakayagataka na Nona matabete meu qaravi ira na tamata, vakatekivu ena noqu itikotiko.

“Niu segata meu veiqaravi, cakacakataka na vakabauta, veivutuni, ka vinaka cake ena veisiga yadua, au sa na vakadonui meu ciqoma na veivakalougatataki ni valetabu kei na reki tudei ni kosipeli.

“Au na vakavakarau me yaco me dua na daukaulotu gugumatua, tagane vakawati yalodina, ka tama dauloloma niu sa dua na tisaipeli dina i Jisu Karisito.

“Au na veivuke ena vakarautaki ni vuravura me baleta na nona lesu mai na iVakabula ena noqu sureta na tamata kecega me lako mai vei Karisito ka ciqoma na veivakalougatatki ni Nona Veisorovaki.”

10.1.3

Kuoramu

10.1.3.1

Kuoramu ni Dikoni

Era na lewena na kuoramu ni dikoni na cauravou tekivu ena Janueri ni yabaki era sa yabaki 12 kina. Ena gauna oqo sa rawa talega ni ra tabaki me dikoni kevaka era sa vakarau tu ka kilikili kaya.

Na itavi ni dua na dikoni sa vakamacalataki tu ena Vunau kei na Veiyalayalati 20:57–59; 84:111. Na itavi tale eso e oka kina na votai ni sakaramede ka vukea na bisopi ena kena “qaravi na veika vakayago” (Vunau kei na Veiyalayalati 107:68).

10.1.3.2

Kuoramu ni iVakavuvuli

Era na lewena na cauravou na kuoramu ni ivakavuvuli me tekivu ena Janueri ni yabaki era sa yabaki 14 kina. Ena gauna oqo sa rawa talega ni ra tabaki me ra ivakavuvuli kevaka era sa vakarau tu ka kilikili kaya.

O ira na ivakavuvuli e tautauvata na nodra itavi kei ira na dikoni. Era na vakarautaka talega na sakaramede ka dauveiqaravi tagane. Na ikuri ni itavi sa vakamacalataki tu ena Vunau kei na Veiyalayalati 20:53–59; 84:111.

10.1.3.3

Kuoramu ni Bete

Era na lewena na cauravou na kuoramu ni bete me tekivu ena Janueri ni yabaki era sa yabaki 16 kina. Ena gauna oqo sa rawa ni ra tabaki me ra bete kevaka era sa vakarau tu ka kilikili kaya.

Na bete e tautauvata na nona itavi kei na dikoni kei na ivakavuvuli. Na ikuri ni itavi sa vakamacalataki tu ena Vunau kei na Veiyalayalati 20:46–52, 73–79.

10.1.4

Na iDola ni Matabete

Ena ikuri ni itukutuku baleta na idola eso oqo, raica na 3.4.1.

10.1.5

Tuvanaki ni Kuoramu ki na Noda Gagadre

Ena dua na tabanalevu se tabana ka vica ga na kena cauravou, me ra na sota vata na kuoramu ni Matabete i Eroni me baleta na veidusimaki kei na itaviqaravi.

10.2

Vakaitavi ena Nona Cakacaka ni Veivakabulai kei na Bula Vakacerecerei na Kalou

10.2.1

Bulataki ni Kosipeli i Jisu Karisito

10.2.1.2

Vulici ni Kosipeli

E dau vakayacori na soqoni ni kuoramu ena ikarua kei na ikava ni Sigatabu ni veivula yadua. E 50 na miniti na kena dede. Ena liutaka e dua na lewe ni mataveiliutaki ni kuoramu (se dua vei rau na ivukevuke nei bisopi ena kuoramu ni bete). Ena liutaka na kuoramu me ra cavuqaqataka na itoko ka veivakasalataki vakaiira me baleta na ilesilesi, na itavi, kei na veika tale eso.

Ena qai liutaka na veituberi e dua na lewe ni kuoramu se dua na iliuliu uabula.

10.2.1.3

Veiqaravi kei na iTaviqaravi

Na veiqaravi kei na itaviqaravi e dodonu me tara cake na ivakadinadina, vaqaqacotaka na matavuvale, susuga cake na duavata ena kuoramu, ka vakarautaki kina na madigi me ra vakalougatataki na tani.

Eso na veiqaravi kei na itaviqaravi e dodonu me ra oka ruarua kina na cauravou kei na goneyalewa, vakabibi vei ira na itabagone qase toka.

iTaviqaravi Vakayabaki. Me ikuri ni itaviqaravi ni itabagone tudei, sa rawa talega me ra dau vakaitavi na cauravou ena veika oqo e veiyabaki:

• Na keba ni kuoramu ni Matabete i Eroni (raica na iDusidusi ni Keba ni Kuoramu ni Matabete i Eroni

• E dua na koniferedi ni itabagone ni tabanalevu se iteki se dua na koniferedi ni (MST) Me iSakisaki ni iTabagone.

10.2.1.4

Torocake Yadudua

Ena nodra sasaga me ra vakataka vakalevu cake na iVakabula, era sa sureti na itabagone me ra tuvanaka na inakinaki me ra tubucake vakayalo, vakaveimaliwai, vakayago, kei na vakasama (raica Luke 2:52).

Me baleta na ikuri ni ivakamacala, raica na ChildrenandYouth.ChurchofJesusChrist.org.

10.2.2

Nodra Vukei na Vakaleqai Tu

Era na vukea na bisopi o ira na lewe ni Matabete i Eroni me “qarava na veika vakayago” (Vunau kei na Veiyalayalati 107:68). E dodonu me tiko na madigi eso ena veigauna me ra qaravi ira na tani ena loma ni nodra matavuvale, ena gauna ni itaviqaravi ni itabagone, ka vakakina ena nodra gauna vakataki ira.

10.2.2.1

Veiqaravi

Era na ciqoma na Matabete i Eroni na ilesilesi ni veiqaravi me tekivu ena Janueri ni yabaki era na yabaki 14 kina. Me baleta na ikuri ni ivakamacala, raica na wase 21.

10.2.3

Sureti ira na Tamata Kecega me ra Ciqoma na Kosipeli

E tiko na nodra itavi na Matabete i Eroni me ra “sureti ira na tamata kecega me ra lako mai vei Karisito” (Vunau kei na Veiyalayalati 20:59).

Era na veivakayaloqaqataki na itubutubu kei na iliuliu vei ira na cauravou me ra vakavakarau me ra laki kaulotu tudei ka wasea na kosipeli ena nodra bula taucoko.

10.2.4

Vakaduavatataka me Tawamudu na Matavuvale

E levu sara na sala e rawa ni ra veivuke kina na lewe ni Matabete i Eroni me vakaduavatataka me tawamudu na matavuvale.

• Rokovi ira na nodra itubutubu ka ivakaraitaki ni bula va-Karisito ena nodra vale.

• Vakavakarau me ciqoma na cakacaka vakalotu ni valetabu, oka kina na vakamau tawamudu.

• Vakaraici ira na qase e liu era gadreva tu na cakacaka vakalotu ni valetabu (raica na FamilySearch.org).

• Vakaitavi ena papitaiso kei na veivakadeitaki me baleti ira na mate ena kena levu ga e rawa.

10.3

Matabisopi

Na itavi taumada nei bisopi o ya me dau kauwaitaki ira na cauravou kei na goneyalewa ena nona tabanalevu. Ena vulica na yacadra ka kila na ituvaki ni nodra bula vakavuvale. Ena dau tiko wasoma ena nodra itaviqaravi kei na veisoqoni ni Sigatabu.

Na bisopi e peresitedi ni kuoramu ni bete.

Na imatai ni daunivakasala ena matabisopi sa nona itavi na kuoramu ni ivakavuvuli. Na ikarua ni daunivakasala sa nona itavi na kuoramu ni dikoni.

Oqo na ikuri ni nodratou itavi na matabisopi ena veikuoramu ni Matabete i Eroni:

• Me sota vata kei na cauravou yadua ke lailai me vakarua ena dua na yabaki (raica na 31.3.1

• Vukei na Cauravou me ra Vakavakarau ka Ciqoma na Matabete i Melikiseteki

• Raica raraba na ivolatukutuku, ripote, kei na veika vakailavo ni kuoramu ni Matabete i Eroni.

Era na veivuke ena itavi oqo na daunivakasala ni kuoramu kei ira na kenadau ni ra kerei vakakina.

10.4

iLiuliu ni Kuoramu ni iTabagone

10.4.1

Nodra Kacivi, Tokoni, ka Vakatikori

Ena kaciva na bisopi e dua se rua na bete me nona ivukevuke ena kena liutaki na kuoramu ni bete.

E na kaciva na peresitedi ni kuoramu ni dikoni kei na ivakavuvuli e dua ena matabisopi. Ni sa veirauti na iwiliwili ni Matabete i Eroni me ra veiqaravi, era na vakasamataka ena yalomasumasu na cauravou oqo na lewe ni kuoramu me vakaturi me daunivakasala kei na sekeriteri.

Ni sa soli yani na veikacivi oqo, e dua ena matabisopi ena vakaraitaki ira na iliuliu ni kuoramu ni itabagone me baleta na laveliga ni veitokoni ena nodra soqoni ni kuoramu. Ena vakatikori rau na nona ivukevuke kei rau na peresitedi ni dikoni kei na ivakavuvuli o bisopi. Ena solia na idola ni matabete vei rau na peresitedi ni kuoramu. E rawa me lesia nona daunivakasala me vakatikori ira na vo ni mataveiliutaki kei na sekeriteri.

10.4.2

iTavi

• Liutaka na sasaga ni kuoramu me vakaitavi ena Nona cakacaka ni veivakabulai kei na bula vakacerecerei na Kalou (raica na wase e 1).

• Me kilai ira ka qaravi ira yadua na lewe ni kuoramu, oka kina o ira era sega ni dau lakova na soqoni ni kuoramu.

• Veiqaravi ena matabose ni itabagone ena tabanalevu (raica na 10.4.4).

• Vakavulici ira na lewe ni kuoramu ena nodra itavi ni matabete (raica na Vunau kei na Veiyalayalati 107:85–88).

• Tuvalaka ka liutaka na soqoni ni kuoramu (raica na 10.2.1.2).

• Tuvalaka ka vakayacora na cakacaka kei na itaviqaravi ni kuoramu (raica na 10.2.1.3).

10.4.3

Bose ni Mataveiliutaki ni Kuoramu

Era dau bose vakawasoma na mataveiliutaki ni kuoramu ni Matabete i Eroni. Ena liutaka na bose oqo na peresitedi ni kuoramu. Kevaka e lailai me rau tiko kina e rua na uabula—dua ena matabisopi, dua na dauvakasala se dua na kenadau.

10.4.4

Matabose ni iTabagone ena Tabanalevu

Raica na 29.2.6me baleta na ikuri ni ivakamacala ni matabose ni itabagone ena tabanalevu.

10.8

iKuri ni Dusidusi kei na Lawatu

10.8.1

Taqomaki ni iTabagone

Ni ra veimaliwai tiko na uabula kei ira na itabagone ena veigauna vaka-Lotu, me rau dau tiko kevaka e lailai, e rua na uabula nuitaki.

Sa dodonu me ra vakacavara na uabula taucoko ka cakacaka vata kei ira na itabagone na veituberi ni veitaqomaki vei ira na gonelalai kei na itabagone ena loma ni dua na vula ni nodra tokoni tu (ProtectingChildren.ChurchofJesusChrist.org