15.

Semineri kan oh Insdiduhd kan en Palien Lamalam

15.0

Kapehse

Semineri oh Insdiduhd kan en Palien Lamalam (S&I) kin sewese nohno oh pahpa oh sounkaweid kan en Mwomwohdiso en sewese me pwulopwul oh aramas laud pwulopwul kan kalaudehla arail pwoson Sises Krais oh Sapwelime rongamwahu kopwurupwurdo wet.

Oh S&I weliepeh men idihdahr ong ehu ehu stake pwehn sewese sounkaweid kan apwahpwalih S&I pwirokrahm kan.

15.1

Semineri

Semineri iei pwirokrahm sounpar pahieu ehu me pwulopwul kan kin onopki rongamwahu en Sises Krais me kak dierek nan pwuhk sarawih kan oh padahk kan en soukohp en imwin rahn-akan. Tohnskuhl en semineri kin sang sounpar 14 kohda lel sounpar 18.

Pisoprik, sounkaweid en me pwulopwul kan, oh presidensi en pwihn kan kin kangoange me pwulopwul koaros en towehda semineri ni unsek.

15.1.1

Sounpadahk kan

Sounpadahk kan en semineri anahne wia tohn Mwomwohdiso me ahniki pwoson Kaun Sises Krais oh kadehde Sapwelime rongamwahu kopwurupwurdohu. Irail anahne momourki padahk kan me irail kin padahngki oh kak en kin ehueng me pwulopwul kan. Ni ansou koaros, sounpadahk kan anahne en mie neirail kisin likou en mweimwei ong nan tehnpas sarawi.

Emen sounsawas en sdeik presidensi de emen tohn pwihn lapalap me pahn kin malipe, kasarawihala, oh kakomoalihedi sounpadahk kan en semineri nan stake oh sounkaweid kan en sdeik.

Mehn perehre ong sounpadahk oh tohnskuhl kan, anahne aramas laud riemen en mih nan ihmwo de wasahn kousoano wasa me kaskuhl en semineri wiawi ie.

15.1.2

Soahng kan me kak wiawi nan Semineri

Semineri kin sawas laud ni ansou me tohn skuhl kan kin kak tuhweng sounpadahk men nan rahn akan en wihk kan. Ahpw, met kakete sohte kin pweida pwehki kahpwal en onopek mwahu, dohn tangatang, oh kahrepe teikan.

Sounkaweid kan en Mwomwohdiso kaweidki welieparailo S&I en pilada soahng da me pahn mwahu en:

• Me pahn keieu mwahu en sewese tohn skuhl kan en esehla rongamwahuo oh keirda ni palingehn.

• Kolokol epwel mwahu en tohn skuhl kan.

• Sohte kiheng peneinei kan katoutou.

Kaskuhl kan sohte pahn wiawi Rahn Sarawi.

15.1.3

Ihmw kan, Mehn Doadoahk, oh Dipwisou kan

Sounkaweid kan en sdeik oh ward kin tehk mwahu wasah kan me duwehte wasahn kaudek kan de en tohn mwomwohdiso wasahn kousoan kan en kak wia perehn wasahn kaskuhl en semineri.

Weliepehu S&I pahn kin kaunopada dipwisoun kaskuhl kan ong sounpadahk kan oh tohn skuhl kan ong ehu ehu wasahn kaskuhl. Tohn skuhl kan anahne wahda pein neirail pwuhk sarawih kan, me wiawidahr de me mih pohn online nan dipwisou en wai kan.

15.1.5

Tohtohn awahn kaskuhl oh Kesepwil

Tohn skuhl kan en semineri kak esehla mwahu oh kalaudehla arail souleng ma irail kin iang kaskuhl rahn koaros, towehda kemwekid kan nan kaskuhl, oh onopki pwuhk sarawih kan likin wasahn kaskuhl. Ma irail wia mepwukat, irail pahn pil alehdi tohtohn awahn kaskuhl en ehu ehu pahr oh kak kesepwilsang semineri.

Pwehn kak kesepwilsang semineri, tohns kuhl men anahne alehdi tohtohn awahn kaskuhl erein sounpar pahieu oh alehdi mweimwei sang mwomwohdiso sang emen tohn pisoprik.

15.2

Insdiduhd

Insdiduhd kin sawaskihda wasahn kaskuhl en rongamwahu nan rahn akan me pahn kakehlaka pwoson oh kadehdepen Sises Krais oh Sapwelime rongamwahu kopwurpwurdohu. Aramas pwulopwul kiripw koaros sang sounpar 18 - 30 anahne en ngoangki towehda kaskuhl en insdiduhd, menda ma irail kin skuhl de soh.

15.3

Wasahn Kaskuhl kan en Mwomwohdiso oh Palien Kaskuhl en Mwomwohdiso

Ireh kan me pid duwen dake keiou oh keriau ong kaskuhl kan en Mwomwohdiso, BYU–Pathway Worldwide, oh wasahn kaskuhl kan ong skuhl laud kan, kilang CES.ChurchofJesusChrist.org. Ireh kan me pid duwen kanekehla mweimwei sang mwomwohdiso ong tohn skuhl kan en kak towehda wasahn kaskuhl pwukat pil kak dierek wasahu.

Pil kapatahieng, ireh kan me pid duwen mweimwei sang mwomwohdiso ong doadoahk sang nan ohpis en CES Ecclesiastical Clearance kak dierek help.ChurchofJesusChrist.org.