tamaitai talavou o loo sii lona lima i le vasega

15.

Seminare ma Inisitituti o Mataupu Faalelotu

15.0

Faatomuaga

O Seminare ma Inisitituti o Mataupu Faalelotu (S&I) e lagolago atu i matua ma taitai o le Ekalesia i le fesoasoani ai i le autalavou ma talavou matutua ia faateleina lo latou faatuatua ia Iesu Keriso ma Lana talalelei toefuataiina.

E tofia se sui o le S&I i siteki taitasi e fesoasoani i taitai e faatautaia polokalama a le S&I.

15.1

Seminare

O le seminare o se polokalama e 4-tausaga lea e suesue ai e le autalavou le talalelei a Iesu Keriso e pei ona maua i tusitusiga paia ma a’oa’oga a perofeta o aso e gata ai. O tamaiti a’oga o le seminare e masani lava o le 14–18 tausaga le matutua.

O le au epikopo, taitai o le autalavou, ma au peresitene o korama ma vasega e faamalosiauina talavou uma ia auai atoatoa i le seminare.

15.1.1

O Faiaoga

Ofaiaoga seminare e tatau o ni tagata o le Ekalesia e i ai le faatuatua i le Alii o Iesu Keriso ma se molimau i Lana talalelei toefuataiina. E tatau ona latou ola i mataupu faavae latou te a’oa’o atu ma galulue lelei ma le autalavou. Afai e mafai, e tatau i faiaoga ona i ai se pepa faataga o aoga o le malumalu.

O se uso o le au peresitene o le siteki po o se fautua maualuga e tofia, e valaauina, vaetofia, ma faamalolo ia faiaoga seminare a le siteki ma supavaisa a le siteki

Ina ia puipuia faiaoga ma tamaiti aoga, e tatau ona toalua ni tagata matutua e i ai i le nofoaga po o le fale i le mea o loo a’oa’o ai le vasega seminare.

15.1.2

Filifiliga o le Seminare

E sili ona aogā le seminare pe a mafai ona potopoto tamaiti a’oga ma se faiaoga i aso taitasi o le vaiaso. Peitai, atonu e le mafai lea mea ona o faafitauli tau le saogalemu, mamao o feoa’iga, ma isi tulaga.

E fefautuaai taitai o le Ekalesia ma lo latou sui o le S&I e fai se faai’uga pe o lē fea filifiliga o le a:

• Sili ona fesoasoani i tamaiti a’oga e a’oa’o ai le talalelei ma tuputupu a’e ai faaleagaga.

• Tausisia ai le saogalemu o tamaiti a’oga.

• Lē faamamafa ai ma le lē talafeagai i aiga.

E le tatau ona faia vasega i le Aso Sa.

15.1.3

Fale, Masini, ma Anomea

E faamautinoa e taitai o le siteki ma uarota o nofoaga e pei o falelotu po o fale o aiga o loo avanoa mo vasega seminare.

O le sui o le S&I e tuuina atu anomea mo faiaoga ma tamaiti aoga mo vasega taitasi. E tatau i tamaiti aoga ona aumai a latou lava tusitusiga paia, tusilolomi pe faatekinolosi.

15.1.5

Togi ma Faauuga

E mafai e tamaiti a’oga seminare ona a’oa’o ma le mataalia atili ma faalolotoina lo latou liua pe afai latou te auai e le aunoa i le vasega, auai i fetufaaiga, ma suesue i tusitusiga paia i fafo atu o le vasega. A latou faia nei mea, latou te mauaina foi se togi o le seminare i tausaga taitasi ma mafai ona faauu mai le seminare.

Ina ia faauu mai le seminare, e tatau i se tamaitiiti a’oga ona saili ia maua le fa tausaga o togi ma maua se faamaoniga faale-ekalesia mai se tasi o le au epikopo.

15.2

Inisitituti

O le inisitituti e saunia ai vasega mo le suesueina o le talalelei i se aso o le vaiaso, lea e faamalosia ai le faatuatua ma molimau ia Iesu Keriso ma Lana talalelei toefuataiina. O talavou nofofua matutua uma ua ta’i 18–30 tausaga, e tatau ona faamalosiauina e auai i vasega inisitituti, pe o aooga pe leai foi.

15.3

Aoga a le Ekalesia ma le Ofisa o Aoga a le Ekalesia

Mo faamatalaga e uiga i a’oga tulagalua ma a’oga maualuga a le Ekalesia, BYU–Pathway Worldwide, ma faalapotopotoga o a’oga maualuluga atu, tagai i le CES.ChurchofJesusChrist.org. O faamatalaga e uiga i faamaoniga a taitai faale-ekalesia ina ia auai ai taimaiti aoga i nei a’oga o loo maua atu ai foi iina.

Ma le isi, o faamatalaga e uiga i faamaoniga faalegaluega mai taitai faalelotu e ala i le Ofisa o le Faatagaga Faalelotu a le Ofisa o Aoga a le Ekalesia e mafai ona maua i le help.ChurchofJesusChrist.org.