21.

Pagpangalagad

21.0

Pasiuna

Ang pagpangalagad nagpasabot sa pagserbisyo sa uban sama sa gibuhat sa Manluluwas (tan-awa sa Mateo 20:26–28).

Gusto sa Ginoo nga ang tanang miyembro sa Iyang Simbahan makadawat sa ingon nga pag-amuma. Alang niini nga rason, ang mga naghupot sa pagkapari gisangonan isip tigpangalagad nga mga igsoong lalaki ngadto sa matag miyembro nga pamilya. Ang tigpangalagad nga mga igsoong babaye gisangonan ngadto sa matag hamtong nga igsoong babaye.

21.1

Mga Responsibilidad sa Tigpangalagad nga mga Igsoong Babaye ug mga Igsoong Lalaki

Ang tigpangalagad nga mga igsoong babaye ug mga igsoong lalaki aduna sa mosunod nga mga responsibilidad alang sa mga indibidwal ug mga pamilya nga gisangon kanila:

• Motabang kanila sa paglig-on sa ilang hugot nga pagtuo diha sa Langitnong Amahan ug ni Jesukristo.

• Motabang kanila nga mangandam sa paghimo ug pagtuman og sagradong mga pakigsaad sa Dios samtang modawat sila sa mga ordinansa.

• Moila sa mga panginahanglan ug mohatag og Kristohanong gugma, pag-amuma, ug pagserbisyo.

• Motabang kanila nga makabarog sa kinaugalingon nga paningkamot sa espirituwal ug temporal nga paagi.

21.2

Pag-organisar sa Pagpangalagad

21.2.1

Paghimo og mga Buluhaton

Ang mga kapangulohan sa korum sa mga elder ug sa Relief Society mainampoong mokonsiderar sa mga buluhaton alang sa tigpangalagad nga mga igsoong lalaki ug mga igsoong babaye. Sila sa kasagaran mosangon sa duha ka igsoong lalaki o duha ka igsoong babaye isip managkompanyon. Sila mangayo sa pagtugot sa bishop alang sa mga managkompanyon ug mga buluhaton sa pagpangalagad.

Ang managtiayon mahimong sangonan nga magkauban nga mangalagad ngadto sa usa ka tawo o pamilya.

Ang tigpangalagad nga mga igsoong lalaki ug mga igsoong babaye dili tawagon, paluyohan, o i-set apart.

21.2.2

Mga Buluhaton sa Pagpangalagad alang sa Kabatan-onan

Ang usa ka batan-ong babaye mahimong moserbisyo isip tigpangalagad nga kompanyon ngadto sa usa ka igsoong babaye sa Relief Society kon ang batan-ong babaye andam ug makahimo. Mahimo siyang mosugod sa pagserbisyo sa tuig nga siya mag-edad na og 14.

Ang usa ka batan-ong lalaki moserbisyo isip tigpangalagad nga kompanyon ngadto sa usa ka naghupot sa Melchizedek nga Pagkapari kon siya na-orden sa katungdanan sa teacher o priest.

21.3

Mga Interbiyo sa Pagpangalagad

Ang presidente sa korum sa mga elder ug ang iyang mga magtatambag mointerbiyo sa tigpangalagad nga mga igsoong lalaki. Ang presidente sa Relief Society ug ang iyang mga magtatambag mointerbiyo sa tigpangalagad nga mga igsoong babaye.

Kini nga mga interbiyo ipahigayon dili mominos kausa matag tulo ka bulan.

Ang mga katuyoan niini mao ang:

• Pagtinambagay mahitungod sa mga kalig-on, mga panginahanglan, ug mga hagit sa gisangon nga mga indibidwal ug mga pamilya.

• Paghisgot og mga paagi sa pagtabang og mga tawo nga mangandam sa pagdawat sa mga ordinansa kon gikinahanglan.

• Pagkonsiderar kon sa unsang paagi nga makatabang ang korum sa mga elder, Relief Society, konseho sa ward, ug uban pa.

• Pagtudlo ug pag-awhag sa tigpangalagad nga mga igsoong lalaki ug mga igsoong babaye.

21.4

Pagkoordinar sa mga Paningkamot sa Pagpangalagad

Ang mga kapangulohan sa Relief Society ug korum sa mga elder magmiting dili mominos sa matag tulo ka bulan. Morebyo sila sa unsay ilang nakat-onan sa mga interbiyo sa pagpangalagad (tan-awa sa 21.3). Mokoordinar usab sila sa mga buluhaton sa pagpangalagad.

Sa mga yunit nga diyotay ra ang aktibong mga miyembro, ang mga kapangulohan sa Relief Society ug korum sa mga elder mahimong mohukom nga dili mosangon og tigpangalagad nga mga igsoong babaye ug tigpangalagad nga mga igsoong lalaki ngadto sa ubang mga miyembro.