26.

Mga Rekomend sa Templo

26.0

Pasiuna

Ang pagsulod sa balay sa Ginoo usa ka sagrado nga pribilehiyo. Ang mga lider sa ward ug stake moawhag sa tanang miyembro nga mahimong takos ug maghupot og balido nga rekomend sa templo bisan kon wala sila magpuyo duol sa templo.

Ang mga lider sa Simbahan mohimo sa tanang paningkamot sa pagseguro nga ang tanan nga mosulod sa balay sa Ginoo takos nga mobuhat niini (tan-awa sa Salmo 24:3–5).

Ang mga miyembro kinahanglan nga adunay balido nga rekomend sa templo aron makasulod sa templo.

Ang bishop magpakitambag sa iyang presidente sa stake kon siya adunay mga pangutana kalabot sa mga rekomend sa templo nga wala matubag dinhi niini nga kapitulo. Ang presidente sa stake mahimong mokontak sa Buhatan sa Unang Kapangulohan kalabot sa mga pangutana.

26.1

Mga Matang sa mga Rekomend sa Templo

Adunay tulo ka matang sa mga rekomend:

1. Rekomend sa templo alang sa wala matugahan nga mga miyembro. Kini nga mga rekomend mao ang alang sa wala matugahan nga mga miyembro kinsa naselyo ngadto sa ilang mga ginikanan o sa pagpahigayon og puli nga mga bunyag ug mga kompirmasyon. Kini gi-isyu pinaagi sa Leader and Clerk Resources (LCR). Alang sa dugang nga impormasyon, tan-awa sa 26.4

2. Rekomend sa templo alang sa buhi nga mga ordinansa. Kini nga mga rekomend alang sa mga miyembro nga modawat sa ilang kaugalingong pagtuga o iselyo ngadto sa kapikas. Ang rekomend sa mga ordinansa alang sa mga buhi ipasukip ngadto sa regular nga rekomend sa templo alang sa natugahan nga mga miyembro (gihulagway sa ubos).

3. Rekomend sa templo alang sa natugahan nga mga miyembro. Kini nga mga rekomend mao ang alang sa mga miyembro kinsa natugahan na kaniadto. Kini maisyu pinaagi sa LCR. Nagtugot kini sa usa ka miyembro nga makaapil sa tanang ordinansa sa templo alang sa patay. Gamiton usab kini kon ang usa ka natugahan nga miyembro iselyo ngadto sa buhi o patay na nga mga ginikanan o mga anak. Alang sa dugang nga impormasyon, tan-awa sa 26.3.

26.2

Pag-amping sa mga Rekomend sa Templo

26.2.1

Mga Lider sa Pagkapari Nag-amping sa mga Rekomend sa Templo

Ang mga lider sa pagkapari kinsa awtorisado nga magbaton og mga libro sa rekomend sa templo kinahanglang moamping niini pag-ayo.

Ang mga lider sa pagkapari mosiguro usab nga ang wala tugoti nga mga indibidwal dili maka-access sa impormasyon sa rekomend sa templo diha sa LCR.

26.2.2

Nawala o Gikawat nga mga Rekomend

Ang bishop mohangyo sa mga miyembro sa pagpahibalo kaniya sa labing dali nga mahimo kon ang ilang rekomend nawala o gikawat. Siya o ang gisangonan nga magtatambag o clerk mogamit sa LCR sa pagkanselar sa rekomend sa labing dali nga mahimo. Kon wala kini nga sistema, ang bishop mokontak sa opisina sa templo aron ipakanselar ang rekomend.

26.2.3

Mga Naghupot og Rekomend Kinsa Wala Magsunod sa mga Sumbanan sa Katakos

Kon ang bishop mitino nga ang usa ka miyembro kinsa adunay magamit nga rekomend wala magsunod sa mga sumbanan sa katakos (tan-awa sa 26.3), iyang pangayoon ang rekomend gikan sa miyembro. Siya mogamit sa LCR sa pagkanselar sa rekomend. Kon wala kini nga sistema, ang bishop mokontak sa opisina sa templo aron ipakanselar ang rekomend.

26.3

Kinatibuk-ang mga Lagda sa Pag-isyu og mga Rekomend sa Templo

Ang mga lider sa pagkapari kinahanglang mo-isyu lamang og rekomend kon ang miyembro nakatubag sa mga pangutana sa rekomend sa templo sa tukma nga paagi.

Sa mga stake, ang usa ka sakop sa kapangulohan sa stake o klerk sa stake mo-activate sa rekomend sa templo diha sa LCR human kini ma-isyu. Sa mga district, ang usa ka sakop sa kapangulohan sa misyon o mission clerk mo-activate sa rekomend. Ang mga rekomend alang sa mga puli nga bunyag ug kompirmasyon ma-activate kon kini i-imprinta sa usa ka sakop sa bishopric o sa presidente sa branch.

26.3.1

Mga Interbiyo sa Rekomend sa Templo alang sa mga Miyembro sa mga Ward ug mga Branch

Sa usa ka ward, ang bishop o usa ka gisangonan nga magtatambag mopahigayon sa mga interbiyo sa rekomend sa templo ug mo-isyu og mga rekomend ngadto sa mga takos. Sa usa ka branch, ang presidente sa branch lamang ang mopahigayon sa mga interbiyo sa rekomend sa templo ug mo-isyu og mga rekomend.

Sa usa ka ward, ang bishop personal nga mointerbiyo sa mga miyembro kinsa:

• Modawat sa ilang kaugalingong tuga (tan-awa sa 27.1 ug 27.2).

• Iselyo ngadto sa kapikas (tan-awa sa 27.3).

Sa dinalian nga mga sitwasyon nga dili makahimo ang bishop, siya mahimong motugot sa usa sa iyang mga magtatambag sa pagpahigayon niini nga mga interbiyo.

Sa dili pa mo-isyu og rekomend sa mga sitwasyon nga gilista sa ibabaw, ang bishop morebyo sa rekord sa miyembro aron sa pagsuta nga wala kini maglakip og notasyon mahitungod sa mga restriksiyon sa pagkamiyembro sa Simbahan. Alang sa mga miyembro nga modawat sa ilang kaugalingong tuga o iselyo ngadto sa kapikas, siya usab moseguro nga:

• Ang bunyag ug kompirmasyon sa tawo narekord diha sa rekord sa pagkamiyembro.

• Ang mga igsoong lalaki nakadawat sa Melchizedek nga Pagkapari.

Human sa interbiyo sa usa ka sakop sa bishopric o sa presidente sa branch, usa ka sakop sa kapangulohan sa stake mointerbiyo sa mga miyembro kinsa nagpuyo sulod sa stake. Usa ka sakop sa kapangulohan sa misyon mopahigayon sa ikaduhang interbiyo alang sa mga miyembro kinsa nagpuyo sa usa ka district. Ang usa ka presidente sa district dili mopahigayon og mga interbiyo sa rekomend sa templo gawas kon gitugotan sa Unang Kapangulohan.

26.3.2

Mga Interbiyo sa Rekomend sa Templo alang sa mga Miyembro diha sa Hilit nga mga Dapit

Ang ubang mga miyembro nagpuyo sa mga dapit nga magkinahanglan og mahal nga pagbiyahe o lisod kaayo nga makahimamat og usa ka sakop sa kapangulohan sa stake o misyon. Niini nga mga sitwasyon, ang presidente sa templo mahimong mointerbiyo sa tawo ug mopirma sa rekomend. Sa dili pa mopahigayon sa interbiyo, siya makigsabot sa presidente sa stake o misyon. Ang bishop, usa ka gitugotan nga magtatambag, o presidente sa branch nakainterbiyo na sa miyembro ug nakapirma na sa rekomend.

26.3.3

Pagpahigayon og Interbiyo sa Rekomend sa Templo

Ang mga lider kinahanglang dili modugang o motangtang sa bisan unsa nga mga kinahanglanon.

Ang mga interbiyo sa rekomend sa templo kinahanglang dili dali-dalion. Kinahanglan kining pribado. Hinoon, ang tawo nga giinterbiyo mahimong modapit sa kapikas, ginikanan, o laing hamtong sa pagtambong.

26.4

Pag-isyu og mga Rekomend sa Templo alang sa Wala Matugahi nga mga Miyembro

26.4.1

Kinatibuk-ang mga Lagda

Ang mga rekomend sa templo giisyu ngadto sa wala matugahi nga mga miyembro sumala sa mosunod:

• Alang sa mga miyembro nga nag-edad og 11 ug pataas nga bunyagan ug kompirmahan alang sa mga patay. (Batan-ong babaye ug mga batan-ong lalaki nga naordinahan mao ang makaangkon og rekomend sa templo sugod sa Enero sa tuig nga sila mag-12 anyos.)

• Alang sa mga miyembro nga nag-edad og 8 hangtod sa 20 aron maselyo ngadto sa ilang mga ginikanan. Ang mga bata nga ubos sa edad nga 8 wala magkinahanglan og rekomend aron maselyo ngadto sa ilang mga ginikanan (tan-awa sa 26.4.4).

• Alang sa mga miyembro nga nag-edad og 8 hangtod 20 nga makaobserbar sa mga pagselyo sa ilang buhi nga mga igsoon, mga anak sa ilang ama-ama o ina-ina, o mga igsoon diha sa amahan o inahan lamang, ngadto sa ilang mga ginikanan.

Mga miyembro kinsa natugahan na kaniadto nga wala maisyuhi og bisan unsa nga mga rekomend gipasabot niini nga seksiyon.

Ang usa ka lalaki nga miyembro sa Simbahan kinsa igo na ang pangidaron sa paghupot sa pagkapari kinahanglang i-orden ngadto sa usa ka katungdanan sa pagkapari sa dili pa siya makadawat og rekomend sa templo.

26.4.2

Mga Rekomend sa Templo alang sa Bag-ong Nabunyagan nga mga Miyembro

Ang bishop mointerbiyo sa bag-ong mga miyembro kinsa anaa sa saktong edad aron modawat og rekomend nga adunay limitasyon ang paggamit alang sa mga bunyag ug mga kompirmasyon sa patay lamang. Siya mopahigayon niini nga interbiyo dili madugay human sa kompirmasyon sa miyembro, kasagaran sulod sa usa ka semana (tan-awa sa 26.4.1). Alang sa mga lalaki, kini nga interbiyo mahimong mapahigayon isip kabahin sa interbiyo aron makadawat sa Aaronic nga Pagkapari.

26.4.3

Mga Rekomend sa Templo alang sa Puli nga mga Bunyag ug mga Kompirmasyon Lamang

Ang mga rekomend sa templo nga giisyu alang sa mga puli nga bunyag ug mga kompirmasyon mahimong gamiton lamang alang niana nga katuyoan.

26.4.4

Mga Rekomend sa Templo alang sa Pagselyo sa Buhi nga mga Anak ngadto sa mga Ginikanan

Ang mga miyembro nga nag-edad og 21 o pataas tingali maselyo ngadto sa ilang mga ginikanan o mag-obserbar lamang sa pagselyo kon sila (1) natugahan na ug (2) adunay balido nga rekomend sa templo.

26.5

Pag-isyu og mga Rekomend sa Templo diha sa Espesyal nga mga Sirkumstansya

26.5.1

Mga Miyembro nga Modawat sa Ilang Kaugalingong Pagtuga

Ang mga takos nga mga miyembro nga nagtinguha sa pagdawat sa ilang kaugalingong pagtuga mahimong mobuhat sa ingon kon sila nakatuman sa tanan sa mosunod nga mga kondisyon:

• Sila dili mominos sa 18 anyos.

• Sila nakakompleto o wala na mag-eskwela sa high school, secondary school, o katugbang niini.

• Usa ka tuig na ang milabay sukad sa ilang kompirmasyon.

• Sila mobati og tinguha nga modawat ug motahod sa sagrado nga mga pakigsaad sa templo sa ilang tibuok kinabuhi.

Dugang pa, ang usa ka lalaki kinahanglang maghupot sa Melchizedek nga Pagkapari sa dili pa modawat sa iyang pagtuga. Alang sa impormasyon mahitungod sa mga miyembro nga nangandam sa pagdawat sa ilang kaugalingong pagtuga, tan-awa sa 25.2.8. Alang sa impormasyon kon kinsa ang mahimong modawat sa pagtuga, tan-awa sa 27.2.1.

26.5.3

Batan-ong mga Misyonaryo nga Mipauli gikan sa Pagserbisyo nga Layo sa Panimalay

Ang presidente sa misyon mobutang og petsa ug mo-activate sa rekomend aron nga kini mo-expire tulo ka bulan gikan sa petsa sa pagpauli sa misyonaryo.

Ang bishop mointerbiyo sa namauli nga mga misyonaryo aron sa pag-isyu og bag-o nga rekomend sa templo duol sa kataposan sa tulo ka bulan nga panahon sa pag-expire.

26.5.4

Mga Miyembro Nga Wala Magpuyo sa Samang Ward sulod sa Dili Mominos Usa ka Tuig

Ang bishop o usa ka gisangonan nga magtatambag mokontak sa kanhi bishop sa dili pa mopahigayon og interbiyo sa rekomend sa templo.

26.5.7

Mga Miyembro nga Mikonsiderar sa Ilang Kaugalingon isip Transgender

Ang presidente sa stake magpakitambag sa Kapangulohan sa Area sa pagtubag sa indibidwal nga mga sitwasyon nga adunay pagkasensitibo ug Kristohanong gugma (tan-awa sa 38.6.23).

26.5.8

Mga Miyembro nga Nakabuhat og Seryoso nga Sala

Ang miyembro nga nakabuhat og seryoso nga sala dili makadawat og rekomend sa templo hangtud nga siya nakahinulsol (tan-awa sa 32.6).

26.5.9

Mga Miyembro Kinsa Gidawat Pag-usab human sa Pagbakwi ug Pagluwat sa Pagkamiyembro diha sa Simbahan

26.5.9.1

Mga Miyembro nga Wala pa Matugahi

Kining mga miyembro dili maisyuhan og mga rekomend sa pagdawat sa ilang kaugalingong tuga hangtod sa usa ka tuig human sa petsa sa pagkadawat nila pag-usab ngadto sa Simbahan pinaagi sa bunyag ug kompirmasyon.

26.5.9.2

Mga Miyembro nga Natugahan na Kaniadto

Ang mga miyembro kinsa natugahan na kaniadto dili makadawat og bisan unsang matang sa rekomend hangtod nga ang ilang mga panalangin sa templo napahiuli na pinaagi sa ordinansa sa pagpahiuli sa mga panalangin.