27.

Tiahk Sarawi kan ong me Momour kan.

27.0

Kapehse

Tehnpas sarawi iei tehnpas en Kauno. E kin idiheng kitail ong atail Sounkomour, Sises Krais. Nan tehnpas sarawi, kitail kin iang towehda tiahk sarawi kan oh wiahda inou ong Samatail Nanleng me kin katengei kitail ong Ih oh atail Sounkomouro. Inou oh tiahk sarawi pwukat kin kounop kitailda pwe kitail en kak pwurala rehn Samatail Nanleng oh katengteng pene pwe en wiahla peneinei soutik.

Nan Inou oh tiahk sarawi kan en nan tehnpas sarawi, “kin kasalehda manaman en Koht” (Doctrine and Covenants 84:20).

Inou oh tiahk kan en nan tehnpas sarawi udahn sarawi. Kilel akan me wia kisehn inou sarawi kan kitail sohte kak kin kosoia likin tehnpas sarawi. De ire kesempwal kan me kitail inoukihdi nan tehnpas sarawi kitail sohte pahn kak kasalehda. Ahpw, kitail kak kosoiapene karepe mengei oh padahk akan en inou en nan tehnpas sarawi oh tiahk sarawi kan oh pepehm en ngehn sarawi me kitail kin ahniki nan tehnpas sarawi.

Kaun en Ward oh Steik kan kin kosoiahieng iroakan en nan irelaud wet ong irail akan me koukounop ren iang ale tiahk sarawi en endaumen de katengtengpene.

27.1

Aliale Tiahk Sarawi kan en nan Tehnpas Sarawi

27.1.1

Kaukaunop en Ale Tiahk Sarawi kan en nan Tehnpas Sarawi

Towehkan anahne kaunopada pali ngenarail pwe irail en kak ale tiahk sarawi kan oh wiahda oh kesempwalki inou kan en nan tehnpas sarawi.

Pahpa oh nohno ahneki pwukoah kesempwal en sewese neirail seri kan en kounopada oh ale tiahk sarawi kan. Kaun kan en steik oh ward kan, irail soun sawas en minisder akan, oh peneinei laud akan pahn kin utung pahpa oh nohno nan pwukoah wet.

Mehn sawas akan me kin sewese towe kan en kounopada oh alehdi tiahk sarawi kan en tehnpas sarawi kin kak dierek nan temples.ChurchofJesusChrist.org.

Towe kan me kin koukounop en wia arail endaumen de katengetengdi ong arail pwoud pahn anahne iang patehng kasukuhl pen kounopadahn nan tehnpas sarawi (kilang 25.2.8).

27.1.3

Towe Kan Me Ahneki Soumwahu en Paliwar

Towe kan me warohng ahpw ahneki soumwahu en paliwar kak alehdi tiahk sarawi kan koaros. Towe pwukat pahn anahne iang arail peneinei kan me endaulahr nan tehnpas sarawi de kompokepahrail kan me duwe irail (lih sewese lih de ohl sewese ohl) pahn kak sewese irail. Ma en towe kan peneinei de kompokepahrail sohte kak iang irail, irail kak delepwohn ih tehnpas sarawi mwowe pwe en kilang ma mie wiepe ehu kak wiawihda.

27.1.4

Sawasepen Kawehwe ni Lokaia oh Inting

Ma towe kan anahne sawasepen kawehwe ni lokaia de inting, irail anahne alehdi tehnpas sarawio mwowe pwe en kilang ma mie soangen sawas wet.

27.1.5

Likou me konehng aramas en Likauih kohla ni Tehnpas Sarawi

Ansou en kohla ni tehnpas sarawi, towe kan pahn anahne likawih soangen likou me irail kin likawih kohla ni kaudek en kamadipw sarawi.

Kilang 27.3.2.6 ong ire kan me pidada duwen likou en kohla ni kapwopwoud en nan tehnpas sarawi de katengtengpene.

Kilang 38.5 ong ire kan me pid:

• Likou me emen pahn likawih ansou en endaumen oh tiahk sarawi en katengetengpene kan.

• Alehdi, likawih, oh epwelpen likou en kasarawi kan nan tehnpas sarawi oh karmend kan.

27.1.6

Oapwoalpen Seri

Seri kan anahne aramas laud en kilekilang irail ansou me re mihmi nan kelen tehnpas sarawi. Tohn doadoahk en tehnpas sarawi kan kak pil apwalih seri kan ongete nan soangen irair pwukat:

• Ma irail pahn katengteng ong arail nohno oh pahpa

• Ma irail pahn iang kadehde katengetengpenehn rierail kan me momour, me irail rian kilahr kan, de me re pahn rianekier kan ong arail nohno oh pahpa

27.1.7

Tuhwong Towe Kan mwurin arail Alehdier Arail Tiahk Sarawi kan

Towe kan kin pak tohto ahneki kalelapak mwurin arail alehdier tiahk sarawi kan. Peneinei kan me endaulahr, pisop, ekei kaun en ward, oh ohl oh lih me wia soun minisder kan kak tuhwong towe kan pwe ren kosoia duwen dahme irail lelehngehro.

Wasahn sawas akan ong pasapengpen peidek kan kak dierek nan temples.ChurchofJesusChrist.org.

27.2

Endaumen o

Lepin lokaia endaumen wehwehki “kisakis ehu.” Endaumen en tehnpas sarawi iei kisakis ehu sang rehn Koht me E kin ketin Kapai kihda Sapwelime seri kan. Ekei kisakis me towe kan kin alehdi sang endaumen en tehnpas sarawi kan iangahki:

• Laudlahn kamarain kan duwen Sapwelimen Kauno kahrepe kan oh padahk kan.

• Manaman en wia soahng koaros me Samatail Nanleng kupwurki Sapwelime seri kan en wia.

• Kaweidpen nanleng ansoun papah Kauno, arail peneinei kan, oh mehteikan koaros.

• Kalaudlahn koapwoaroapwoar, kaloalamwahu, oh meleilei.

Pweidahn kapai pwukat pahn kohsang ni pwoson laud rongamwahu en Sises Krais.

Endaumen kin alahldi ni pali riau. Nan pali keiou, aramas emen kin alehdi inou sarawi ehu me kahdaneki initiatory. Initiatory pil kin kahdaneki kamwakelehda oh keiehdi (kilang Eksodus 29:4–9). E kin iangahki kapai kesempwal akan me kin kohsang ni keinek en aramas o oh pweida kan.

Nan ansou en initiatory, towe men o ahnekier mweimwei en likawih likou en tehnpas sarawio. Karmendo wehwehki ah ehu ong Koht oh inou kan en kapwaiada inou koaros me wiawihda nan tehnpas sarawi. Ansou me towe men pahn kin kapwaiada arail inou oh likawih karmend ni pwung nan arail mour kan, e pil kin wia mehn doareparail. Ong ire kan en likawih oh kesempwaliki karmend, kilang 38.5.5.

Nan pali keriau en endaumen o, kasukuhlpen pilahn en komour kin wiawi, iangahki wiawidahn sampah oh lahng, Pwopwilahn Adam oh Eve, Tomwpen Sises Krais, Pwupwilahu, oh Kapwurupwurdohu. Towe kan pil kin alehdi kaweidpen duwen aramas arail kak pwurala rehn Kauno.

Nan endaumen, towe kan pil kin luhkong en wiahda inou sarawi kan me sansal pah kan:

• Momouriki kosonned en peik oh nantiong kolokol kosonned akan en Samatail Nanleng.

• Peikiong kosonned en meiroang, me wehwehki kin meiroang pwe en utungada Sapwelimen Kauno doadoahk oh koluhla sang ni mongiong karakarahk oh ngehn peik.

• Peikiong kosonned en rongamwahu en Sises Krais, me wia kosonned laud ehu me E ketin padahngki ansou me E ketiket pohn sampah.

• Kolokol kosonned en mwakelekel, me wehwehki me towe men pahn kak wia insenen pwopwoud ongete aramas me e kasarawih ongehr nin duwen Sapwelimen Koht kosonned.

• Kolokol kosonned en kasarawihla, me wehwehki towe men pahn kihda arail ansou, arail koahiok, oh soahng koaros me Kauno kapaiakidahr ong kakehlepen Sapwelimen Sises Krais Mwomwohdiso pohn sampah.

En kapwurehdo, Samatail Nanleng inouki me irail akan me kolokol arail inou kan en nan tehnpas sarawi pahn endaukilahr“manaman sang powe” (Doctrine and Covenants 38:32, 38; pil kilang Luhk 24:49; Doctrine and Covenants 43:16).

27.2.1

Ihs me Kak Alehdi Endaumen

Koaros towe kan me laud nan Mwomwohdiso luhk ohng en kounopada oh alehdi pein arail endaumen. Koaros tiahk sarawi me anahne pahn wiawi oh kileledi mwohn towe kan arail pahn kak alehdi endaumen (kilang 26.3.1).

27.2.1.1

Towe kan me apwtehn Pepdaisla

Towe kapw kan me warohng kak alehdi arail endaumen mwurin sounpar ehu sang rahn me re wialahr toweh o.

27.2.1.2

Towe men Me Ah Pwoud saikinte Endaula

Towe men me warohng me ah pwoud saikinte alehdi endaumen kak alehdi pein ah endaumen ansou me soahng pwukat koaros pweida:

• Ah pwoud me saikinte endaulahr o pahn mweidada.

• Towe men o, pisop, oh steik preseden pahn tehk mwahu pwe pwukoah en inou en tehnpas sarawi kan en sohte keremwpwahla pwopwoud wet.

Ire pwukat doadoahk ma ah pwoudo iang wia tohn Mwomwohdiso de soh.

27.2.1.3

Towe Kan Me Ahneki Soumwahu en Paliwar kan

Towe kan me ahneki soumwahu en paliwar kak alehdi arail endaumen ma:

• Irail alehdier soangen tiahk sarawi kan koaros (kilang 26.3.1).

• Irail ahneki marain en madamadau en esehla, wiahda, oh kolokol inou kan koaros.

Pisop o pahn kosoiong towe meno oh, ma kak, pil iangahki ah pahpa oh nohno. E pil kin peki kaweid en Ngehno Pisop kan kin ale kaweid sang steik preseden.

27.2.2

Pilahnehda Ansou en Alehdi Endaumen

Pilahn en alehdi endaumen pahn sang pein ah koasoandi oh e anahne wiawihda sang ni kapakap. Endaumen wia kapai en manaman oh kaudiahl ong koaros me kounopada en alehdi. Towe kan kak pein pilada en alehdi pein arail endaumen ansou me irail alehdier soahng kat koaros:

• Irail pahn anahne sounpar 18.

• Irail kanekelahr de solahr mih nan high school, secondary school, de me duwehte kan.

• Sounpar ehu douier powe mwurin arail iangalahr mwomwohdiso.

• Irail kin ahneki pepehm en inongiong en alehdi oh wauneki inou sarawi kan en tehnpas sarawi nan arail mour kan.

Towe men me alehdi ah pwukoah en wia misin de koukounop en katengetengdi nan tehnpas sarawi pahn anahne alehdi endaumen.

Mwohn alehdi kisin likou en mweimwei en tehnpas sarawi ong towe men en alehdi ah endaumen, pisop oh steik preseden anahne ahneki pepehm me aramas o kounopadahr en wewehkila oh kolokol inou kan koaros en tehnpas sarawi. Me kak alehdi kin koasoandi ong emen emen.

27.2.3

Pilahneda oh Koasoanehdi Rahn en Endaumen

27.2.3.1

Alehdi Mweimwei ong Tiahk Sarawi ong Me Momour Kan

Towe men anahne alehdi mweimwei ong tiahk sarawi ong me momour kan pwe en pidelong nan tehnpas sarawi oh alehdi endaumen. Ong ire kan ong mweimwei kan, kilang 26.5.1.

27.2.3.2

Alehdi Tehnpas Sarawi

Towe kan me pilpilahnen alehdi endaumen pahn anahne alehdi tehnpas sarawi o mwowe pwe en wiahda rahn en tiahk sarawio.

27.2.3.3

Soun Kahluwa irail akan me pahn Alehdi Endaumen

Towe men me pahn ale ah endaumen kak luke towe men me endaulahr en sewese kahre oh sewese irail nan ansou en sesin en endaumen o. Me pahn kahre towe men o pahn anahne naineki kisin likou en mweimwei en tehnpas sarawi me wie doadoahk te. Tehnpas sarawio kak sawasiki soun pakahr ma mie anahnepe.

27.3

Katengtengdien Pwopwoud Ehu

Katengtengdi nan tehnpas sarawi ong pwopwoud ehu ong nan mour wet oh nan mour teio. Ira pahn alehdi kapai kan ma irail pahn kolokolete inou kan me ira wiadahr nan tehnpas sarawi. Nan tiahk sarawi wet, neirail seri kan kak patehng arail peneinei soutuk.

Kaun en Mwomwohdiso kan kin koangongehki towe kan en kounopada pwe ren kak kapwopwoud oh katengtengdi nan tehnpas sarawi. Wasahkan me kopwopwoud en tehnpas sarawi kan sohte kin nohn sansal, Kaun akan en Mwomwohdiso de mehteikan kak wia kopwopwoud en palien kosonned akan me pahn mwuhr wahdo katengetengdi nan tehnpas sarawi (kilang 38.3). Mwekid wet kak wiawi ma kopwopwoud en tehnpas sarawi pahn kahreiong pwopwoud de peneinei tikitik en towe ko arail pahn insensuwedla pwehki arail sohte iang towehda sang ni arail sohte kak iang patehng kasarawi en tehnpas sarawi.

27.3.1

Ihs Me Kak Katengtengpene nan Tehnpas Sarawi.

Koaros me saik kopwopwoud nan mwomwohdiso luhkong ren kaunopada ong katengteng pene en nan tehnpas sarawi. Irail kan me kopwopwoud ehr liki koangoangehr rehn katengteng pene ni erein ansou oh soutik nan tehnpas sarawi ni ansou me re kaunopadahr. Towehkan pahn anahne endaula mwohn arail kak katengteng pene {(kilang 27.2).

Pwopwoud me pahn katengteng pene nan tehnpas sarawi pahn anahne (1) kopwopwoud liki nwohn arail pahn katengteng pene de (2) kopwopwoud oh katengteng pene nan tehnpas sarawi ehute. Kilang 27.3.2.

27.3.1.2

Towehkan me ahniki soumwahu en palien madamadau

Towehkan me ahniki soumwahu en palien madamadau kak en katengteng eng arail pwoud kan, inou en pwopwoud, de inou en pwopwoud ma mie:

• Irail alehdier inou kan koaros me irail anahne, iangahki endaumeno (kilang 27.2.1.3).

• Irail ahniki marain en wehwehki, wiahda, oh kolokol inou kan me koasoandier.

Pisop kin kaweid ong towehu oh ah pwoud, inou en pwopwoudo. E pil kin peki kaweidpen Ngehn Sarawi. E kak ale kaweid rehn steik preseden.

27.3.2

Kosonehdi ansou en kopwopwoud en nan Tehnpas Sarawi de Katengteng pene.

27.3.2.1

Alehdi mweimwei ong kasarawi en me momour kan.

Towe emen pahn anahne ale mweimwei ong kasarawien me momour pwe ren kak katengteng ong arail pwoud kan. Ong irehkan duen mehkat, kilang 26.3.

27.3.2.2

Kesehki Tehnpas Sarawio

Towehkan me koskosone ren kopwopwoud de katengteng ong arail pwoud kan anahne mwadang kesehki tehnpas sarawio pwe en kosonehdi iahd doadoahk sarawi pahn wiawi.

27.3.2.3

Alehda Silikou en Kopwopwoud

Mwohn ara pahn kopwopwoudla, pwopwoudo anahne alehdi silikou en kopwopwoud wasa me kopwopwoudo pahn wiawie. Ma pwopwoudo kosonehdi ira en kopwopwoud oh katengteng ansou tehiou, ira pahn anahne wahdo silikou en kopwopwoud ni tehnpas sarawio.

Pwopwoud me kin katengteng pene mwurin ara kopwopwoudehr sohte anahne en wahdo silikoun kasalepen kopwopwoud. Ma kaidehn, ira pahn kihda rahn oh wasa me ira wia kopwopwoud pwe en wia kisehn kasalepen doadoahken rekohd.

27.3.2.4

Soun Pakahr en Lih oh Ohl me pahn Kopwopwoud

Lih me endaulahr kak iangih lih me pahn kopwopwoudo pwe en sewese nan wasahn likoudahu. Ohl me endaulahr pil kak wia songohte ong ohl me pahn kopwopwoudo. Sohn kahlu pahn anahne en mie nah silikou en mweimwei ong nan tehnpas sarawi. Tehnpas sarawi pil kak sawaski soun kahlu ma mie anahnepe.

27.3.2.5

Ihs me kin wia kopwopwoud en nan Tehnpas Sarawi de Katengtengdi.

Kopwopwoud de katengtengdi en nan tehnpas sarawi kin kalapw wiawi sang emen soun katenteng me kosondieng en wia doadoahk nan tehnpas sarawio wasa pwopwoudo pahn kopwopwoud de katengtengdi. Ama emen kisehn peneinei me ahniki mweimwei en wia katengtengdio oh kosondieng ehr nan tehnpas sarawio wasa me pwopwoudo pahn kopwopwoud de katengteng peneu, ira kak luke pwe en wia kopwopwoudo de katengtengdio.

27.3.2.6

Songen likou me mweimwei ong wia kopwopwoud de katengtengdi en nan tehnpas sarawi.

An lih me pahn kopwopwoudo likou. An lih me pahn kopwopwoudo likouo pahn poh pwetepwet, kaselel oh deideida, oh sohte mweimwei pahn mih ie. E pil anahne perehla karmend en nan tehnpas sarawio. Likou menipinip pahn anahne pweipweidi.

Pwe en kak duehte likouli teikan me kin mweimwei nan tehnpas sarawi, an lih me pahn kopwopwoudo likouo pahn mie peh reirei de reireiki pahkis siluh. Likouli sohte pahn anahne en ruruahdek ihte ma e pahn katengtengda de kohsang ansou en katengteng penehu.

Tehnpas sarawio kak sawaskihda likou ma mie anahnepe de inengieng.

An ohl pwopwoudo likou. Ohl kopwopwoudo likawih likou en nan tehnpas sarawi ansou kasarawihn kopwopwoud de katengteng (kilang 38.5.1 oh 38.5.2).

Mwomwen an aramas me kohdo kan likou. Irail kan me pahn iang kopwopwoud en nan tehnpas sarawi pahn likawih likou me re kin likawih nan ansou en sacrament. Towehkan me kodohn iang katengtengdio ni ahr kohsang nan arail endaumen kak likawih likou en kasarawihn nan tehnpas sarawi me irail likawiher.

Wahn rohs akan. Pwopwoudo oh ara aramas kan sohte kak mware wahn rohs nan ansou en kopwopwoudo de katengtengdio.

27.3.2.7

Welialihn Rihng mwurin Kopwopwoud en nan Tehnpas Sarawi de Katengtengdi.

Welialihn rihng sohte wia kisehn kasarawi en katengteng penehn nan tehnpas sarawi. Apw, pwopwoudo pahn kak weliali rihng mwurin kasarawio nan perehn katengteng peneu. Pwopwoudo sohte pahn kak weliali ring nan erein ansou ehu de nan ehu wasa nan tehnpas sarawi de likin tehnpas sarawi.

Pwopwoud me kopwopwoud oh katengteng pene nan ehute kasarawi kak en weliali ring mwuhr pwe en kak ehu ong peneinei me sohte kak iang towehda kopwopwoud en nan tehnpas sarawi. Welialio sohte pahn weliandi mehkot nan kopwopwoudo de kasarawi pen katengtengdio. Pwopwoudo sohte pahn kieng emen emen ara inou mwurin ara kopwopwoud lahr de katengteng pene nan tehnpas sarawi.

Pwopwoud me kopwopwoud nan mwolen kopwung mwohn arail katengteng nan tehnpas sarawi kak en weliali ring nan ara kopwopwoudo, nan ara katengteng pene nan tehnpas sarawi, de ni koros kasarawiko.

27.3.4

Ihs me kak iang towehda kopwopwoud en nan Tehnpas Sarawi de Katengteng

Pwoupwoud kan pahn lukehte arail peneinei kan de komokepahrail kan ong kopwopwoud en nan tehnpas sarawi de katengteng. Irail me pwukoaki kan pahn udahn endaulahr oh pahn mie neirail silikou en mweimwei en towehda.

Steik preseden kak mweidada emen aramas me saik pepdais de endau sang ni kahrepe en soumwahu en kak iang kilang kopwopwoud en nan tehnpas sarawi de katengteng en rie me momour kan. Aramas o anahne:

• En sohte tikitik sang sounpar 18.

• En kak kolokol wahu nan ansou en kasarawi kan.

Steik preseden pahn intingiada silikou ehu me pahn kasalehda me serio kak iang kilang katengtengdio. Kisin silikou wet kin kasansalada nan tehnpas sarawi.

27.4

Katengehdi Seri kan me Momour ong Pahpa Nohno

Serihkan me ipwidi mwurin arail nohno ah katengteng ehng ah pwoud nan tehnpas sarawi ipwidiong ehr nan inou en katengtengo. Irail sohte anahne ale inou en katengteng ehng pahpa oh nohno.

Serihkan me sohte ipwidieng nan inou pil kak wiahla tohn ehu peneinei soutik sang ni arail pahn katengteng ehng arail pahpa, nohno de pwopwoud me pwok irailda. Seri pwukat kak iang alehdi soangen kapai kan me irail me ipwidieng nan inou wet kin ale.

27.4.2

Alehdi Tehnpas Sarawio

Pwopwoud ehu me mwahuki neira serihkan en katengteng ong ira, de serihkan me inengieng ren katengteng ong arail pahpa oh nohno me melahr, pahn anahne alehdi tohn tehnpas sarawio pwe irail en kak kilelehdi rahn en wia tiahk sarawihkan.