28.

Tiahk Sarawi kan ong me Melahr

28.0

Kapehse

Tiahk Sarawi kan me kin wiawi nan tehnpas sarawi kin kihpene peneinei kan ong mour soutik oh alehdi popohl unsek rehn Koht.

Pwe Sapwelimen Kauno serihkan en kak pwurala Reh, emen emen irail anahne koluhla, warohng alehda tiahk sarawi kan en komourla oh lapalapala, oh wauneki inou kan nan tiahk sarawio.

Samatail Nanleng mwahngiher me tohto Sapwelime serihkan pahn sohte alehda tiahk sarawi kan nan mour wet. E ketin wiahdahr ehu ahl pwe ren kak iang alehda tiahk sarawi kan oh wiahda inou ong Ih. Nan tehnpas sarawi kan, tiahk sarawi kan kak wiawi sang rehn emen welipe me ale mweimwei. Met wehwehki me aramas momour emen alehda tiahk sarawi kat ong emen me melahr. Nan sapwen ngehn, aramas mehla emen kak pilada de soikala tiahk sarawi kan me wiawiher ong ih (kilang Doctrine and Covenants 138:19, 32–34, 58–59).

Tohn mwomwohdiso kan pwukoahkier ren rapahkihda arail peneinei me melahr akan me saik iang alehda tiahk sarawi ong komourla oh lapalapala. Toweh kan eri wiahda tiahk sarawi kan ong arail peneinei kan me melahr.

Ama toweh kan sohte kounopada eden peneinei kan ong doadoahk en nan tehnpas sarawi (kilang 28.1.1), eden irail kan me melahr me anahne arail tiahk sarawi en wiawi pahn kohdasang ni tehnpas sarawio.

28.1

Iren kaweid Lap akan ong Weliepe Wiewia Tiahk Sarawi kan

Aramas me melahr me sounpar 8 de mahsang ni ansou me re mehlau kak wia arail tiahk sarawi sang emen weliepe me ale mweimwei. Ihte, me sansal nan 28.3, tiahk sarawi en weliepe men kak wiawi ong irail koaros me melahr mwurin te rahn-30 douier powe sang rahn me re mehla ma mepwukat koaros doke:

• Peneinei keren men en me melahro ( ohl de lih me sohte mweisang ah pwoud, seri me laudlahr, pahpa oh nohno, de rie kan) kihlong ahd o ong tiahk sarawi kan en tehnpas sarawi.

• Mweimweidahn wia tiahk sarawi pwukat kin kohsang peneinei me karanih me mehlao (lih oh ohl me sohte mweisang ah pwoud, seri laud men, pahpa oh nohno, de rie kan).

Ma sohte ehu me sansalada powe doke, tiahk sarawi kan en weliepe kan kak wiawi sounpar 110 mwurin aramas mehlao ah ipwidi.

28.1.1

Kounopadahn Ahd akan en Aramas me Mehla kan ong Tiahk Sarawi en Tehnpas Sarawi.

Ma kak, oretikpen rapahkihda irail peneinei kan me mehla kak koapidelong ong FamilySearch.org mwohn tiahk sarawi kan en tehnpas sarawi ah pahn wiawi (kilang 25.4.2).

28.1.1.1

Koapidelong Eden Tohn Peneinei kan

Ansou en koapidelong ahd akan ong weliepen tiahk sarawi kan en tehnpas sarawi, towe kan anahne koapidelong eden aramas akan me irail peneineiki.

28.1.2

Ihs me Kak Patehng Tiahk Sarawi kan en Me Mehlar

Koaros towe me naineki kisin likou en mweimwei ong tehnpas sarawi kak iang pepdais oh kasarawihla en wiahla towe men ong me melahr akan. Towe men me endaulahr me naineki kisin likou en mweimwei kak iang patehng nan tiahk sarawi koaros ong me melahr kan. Kilang 26.3.

28.1.4

Koasoandihn rahn oh ansou

Towe men anahne wiahda ah koasoandihn rahn mwohn ah kak wia tiahk sarawi ong me melahr. kilang temples.ChurchofJesusChrist.org En ehu ehu tehnpas sarawi kan oaretikpen alahldi oh anahn akan en koasoandihn ansou

28.2

Wiewia Tiahk Sarawi kan en Tehnpas Sarawi ong Aramas Mehla kan

Ansou me ke welian oh wia tiahk sarawi kan, towe men kak wia weliepe ong aramas mehlao ma e ohl ah e anahne en ohl ah ma lih ah e anahne en pil lih te.

28.2.1

Pepdais oh Kasarawihalan wiahla towe men ong me Mehla

Towe men me kolokol kisin likou en mweimwei en tehnpas sarawi me wie doadoahk kak luhk ong en papah oh wia pwukoah en pepdais. Ekei pwukoah pwukat kak iangahki:

• Wia weliepe men ong palien pepdais oh kasarawialahn kan.

• Wia soun kadehde men ong weliepehu nan pepdais kan.

• Sewese tohn doadoahk kan.

Irail me kolokol Melkisedek Prihsduhd oh Prihsduhd en Aron kak iang wia doadoahk en pepdais ong me mehla kan. Me kolokol Melkisedek Prihsduhd kan kak lukehng en wia pwukoahn kasarawiala irail akan me melahr.

Ongete ohl me endaulahr kak lukehng en:

• Wia soun rekohd ni wasahn pepdaiso.

• Wia soun rekohd ni ansoun kasarawihla.

28.2.2

Endaumen (iangahki initiatory)

Ansou en wia weliepe men ong endaumen en aramas me mehla men, palien initiatory nan endaumeno kin wiawi oh kileledi tohrohr (kilang 27.2). Towe men me endahuer me kolokol kisin likou en mweimwei en tehnpas sarawi me wie doadoahk kak wia weliepe men pwe en alehdi tiahk sarawi pwukat.

28.2.3

Katengtengpenehn Pwopwoud ehu oh Katengtengpenehn Seri kan ong Pahpa oh Nohno kan

Nan tehnpas sarawi, aramas mehla kan kak katengteng iong arail pwoud kan me irail pwoudikier ni arail momour. Aramas mehla kan kak katengteng ong neirail seri me momour oh me melahr kan. Towe men me kolokol kisin likou en mweimwei en tehnpas sarawi me wie doadoahk kak wia weliepe men ong tiahk sarawi kan en katengetengedi.

28.3

Irair Kesempwal akan

Pali wet kawewehda irair kei me ekei mehn kaweid kan nan 28.1 kakete sohte doke.

28.3.1

Seri Me Mehla Mwohn Ipwidi (seri kan me mehla nan kapehd)

Tiahk sarawi en tehnpas sarawi kan sohte anahne wiawi ong seri me mehla mwohn ipwidi. Ong iren kaweid kapatapat, kilang 38.7.3.

28.3.2

Seri Kan Me Mehla mwohn Sounpar Waluh

Seri tikitik kan komourlahr sang ni Tomwpen Sises Krais oh “komourlahr nan wein celestial me mih nanleng” (Doctrine and Covenants 137:10). Pwehki kahrepe wet, sohte pepdais oh endaumen kin wiawi ong seri me mehla mwohn ah lel sounpar 8. Ahpw, katengteng ong pahpa oh nohno kak wiawi ong seri me sohte ipwidi ong nan inou o de sohte alehdi tiahk sarawio nan mour wet (kilang 18.1).