31.

Veivakatarogi kei na Soqoni Tale Eso kei Ira na Lewenilotu

31.0

Ai Vakamacala Taumada

E dau veiqaravi vakawasoma o Jisu Karisito vei ira na tamata vakayadudua (raica, me vakataka na Joni 4:5–26; 3 Nifai 17:21). E lomani ira yadua na luve ni Kalou o Koya. E vukei ira vakayadudua o Koya.

Na iwase oqo e rawa ni vukei ira kece na iliuliu sa tu na nodra madigi me ra sota ka veitalanoa kei ira na lewenilotu yadua.

31.1

IVakavuvuli ni Veidusimaki

31.1.1

Vakavakarau Vakayalo

Vakarautaki iko vakayalo ena masumasu, vuli ivolanikalou, kei na bula dodonu. Vakarorogo ki na vakasolokakana ni Yalo Tabu.

31.1.2

Vukea na Lewenilotu me Vakila na Loloma ni Kalou

Ni ra lako mai vei iko na lewenilotu me baleta e dua na veivakatarogi se me ra vukei ena vuku ni dua na bolebole, vakawasoma na ka ga era gadreva tu vakalevu sa ikoya me ra kila ni lomani ira na Tamada Vakalomalagi.

Na ivolanikalou kei na nodra vosa na parofita edaidai e sureta na Yalo ka vakavulica na ivunau savasava. Vakayagataki ira mo veivakauqeti ka veivakayaloqaqataki kina, kakua ni veivakacacani, veivakasaurarataki, se mo vakavuna na rere (raica na Luke 9:56

31.1.3

Vukea na Lewenilotu me Tautauri mai na Kaukauwa ni iVakabula

Vakayaloqaqataki ira na lewenilotu me ra gole Vua. Vukei ira me ra taura na Nona kaukauwa me ra veivakaqaqacotaki, veivakacegui, ka dauveivueti.

31.1.4

Vukea na Lewenilotu me Loma Vakacegu ka Taqomaki

Dau solia vei ira na lewenilotu na digidigi me dua tale e tiko ena gauna ni veivakatarogi se veitalanoa. Ni vakayacori na sota kei na dua na lewenilotu e tagane se yalewa veibasai, dua na gone, se itabagone, raica me tiko e dua na itubutubu se dua tale na uabula. Sa rawa vua me mai tiko ena veitalanoa se wawa ena taudaku ni rumu, vakatau ki na nona digidigi na lewenilotu o drau na veitalanoa kaya.

Kakua ni wasea na itukutuku maroroi vua e dua—oka kina na watimu se iliuliu tale eso ni Lotu—vakavo ga ke sa vakadonuya o lewenilotu.

31.1.5

Taroga na Taro e Veivakauqeti ka Vakarorogo Vakavinaka

Ni o veitalanoa kei na dua na lewenilotu, taroga na taro ena vukei iko mo kila vakavinaka na nona ituvaki.

Ni vosa tiko o lewenilotu, vakarogoca vakavinaka ka vakagumatua.

31.1.6

Vakayaloqaqataka na Bula Rawati Koya

Ena vuku ni nomu lomani ira na lewenilotu, o na vinakata beka mo solia na iwali ni nodra leqa ena kena gauna totolo. Ia, o na vakalougatataki ira vakalevu cake ena nomu vukei ira me ra kunea ga vakai ira na nodra iwali ni leqa ka vakatulewa ga vakataki ira (raica na Vunau kei na Veiyalayalati 9:8).

31.1.7

Sasaga Veitokoni ni Veivutuni

Na bisopi se peresitedi ni iteki duadua ga e rawa ni vukea e dua na tamata me walia na cala bibi. Eso vei ira oqo era volai tu ena 32.6. Kevaka sa vakayacora oti o lewenilotu e dua vei ira na ivalavala ca oqo, sa dodonu me na veitalanoa kei na bisopi se peresitedi ni iteki ena kena gauna totolo sara.

31.1.8

Walia Vakadodonu na Veivakararawataki

Ena sega ni rawa ni vosoti na veivakalolomataki ena kena ivalavala cava ga. Raica ena yalo ni kauwai na ripote ni veivakararawataki. Kevaka o sa kila ni dua esa vakayacori vua na veivakararawataki, ripotetaka na veivakararawataki vei ira na vakaitutu vakamatanitu ka veitalanoataka kei bisopi. Na idusidusi ni kena ripotetaki kei na wali ni veivakararawataki esa vakarautaki tu ena 38.6.2.

31.2

Veitarotarogi

31.2.1

iNaki ni Veivakatarogi

Vakararaba, era na vakatarogi ira na lewenilotu o ira na iliuliu ni Lotu me ra vakatulewataka se ra:

• Sa tu vakarau tu me ra ciqoma se vakaitavi ena dua na cakacaka vakalotu.

• E dodonu me ra kacivi ki na dua na itutu ena Lotu.

31.2.2

Na Veimataqali Veivakatarogi

O cei e rawa ni vakayacora na veivakatarogi	iNaki ni veivakatarogi
O cei e rawa ni vakayacora na veivakatarogi Bisopi ga	iNaki ni veivakatarogi Solia e dua na ivolatara ni valetabu vua e dua na lewenilotu e ciqoma tiko na nona edaumeni se vauci vua na watina (raica na 26.3.1). Solia e dua na ivolatara ni valetabu vua e dua na curuvou (raica na 26.4.2). Tabaka e dua na tagane curuvou ki na dua na itutu ena Matabete i Eroni. Tabaka e dua na cauravou se dua na tagane ki na itutu ni bete (raica na 18.10.2). Vakatura e dua na tagane me tabaki me italatala qase se bete levu (raica na 31.2.6). E gadrevi na veivakadonui mai na mataveiliutaki ni iteki me vakayacori kina na veivakatarogi oqo. Vakatura e dua na lewenilotu me veiqaravi vakadaukaulotu tudei (raica na 24.4.2). Kaciva e dua na lewenilotu me veiqaravi vaka peresitedi ni mataisoqosoqo ni tabanalevu. Kaciva e dua na bete me veiqaravi me ivukevuke ena kuoramu ni bete. Vukea e dua na lewenilotu me veivutunitaka e dua na ivalavala ca bibi (raica na wase 32). Vakadonuya e dua na lewenilotu me ciqoma e dua na dinau mai na iLavo Vure ni Vuli, ena vanua e tiko kina. Vakatara e dua na lewenilotu me vakaraitaka na itukutuku ni nona saumi ikatini (raica na 34.3.1.2). Vakadonuya na vakayagataki ni ilavo ni isolisoli ni lolo (raica na 22.6.1).
O cei e rawa ni vakayacora na veivakatarogi Bisopi se dua na daunivakasala e lesia o koya	iNaki ni veivakatarogi Vakavouya e dua na ivolatara ni valetabu (raica na 26.3.1). Solia e dua na ivolatara ni valetabu me vakaitavi ena papitaiso kei na veivakadeitaki veisosomitaki (raica na 26.4.3). Solia e dua na ivolatara ni valetabu me vauci vei rau na itubutubu se me vakadinadinataka na nodra vauci na veitacini vei rau na itubutubu (raica na 26.4.4). Kaciva e dua na lewenilotu me veiqaravi ena dua na veikacivi ni tabanalevu me vaka e vakaraitaki tiko ena 30.8. Vakadonuya na papitaiso kei na veivakadeitaki ni dua na yabaki 8 ka lewenilotu vakaivola se dua na nona itubutubu se dauveisusu e lewe ni Lotu (raica na 31.2.3.1). Vakadonuya na veitabaki vua e dua na cauravou ki na itutu ni dikoni se ivakavuvuli (raica na 18.10.2). Solia e dua na iVolatara ni Veivakalougatataki Vakapeteriaki (raica na 18.17). Vakadonuya e dua na lewe ni matabete me vakayacora na cakacaka vakalotu ni matabete ena dua tale na tabanalevu, kevaka e sega na nona ivolatara ni valetabu. (Raica na fomu ni iVolatara me Vakayacori e Dua na Cakacaka Vakalotu.)

31.2.3

Veivakatarogi ni Papitaiso kei na Vakadeitaki

31.2.3.1

O Ira na Gone Era Sucu ena Lotu

E tu vei bisopi na idola ni matabete ni nodra papitaiso na lewenilotu vakaivola yabaki 8 e na nona tabanalevu. Ena vuku ni ka oqo, ena veivakatarogi kina o koya se dua vei rau na daunivakasala sa lesi me baleta na papitaiso:

• Gone yabaki 8 era lewenilotu vakaivola.

• O ira na gone yabaki 8 era sega ni lewenilotu vakaivola ia e dua na nodra itubutubu se dauveisusu e lewenilotu.

• O ira na lewenilotu vakaivolatukutuku era yabaki 9 ka qase cake a vakadaroi tu nodra papitaiso ena vuku ni vakaleqai ni vakavakasama.

Ena veivakatarogi, me na raica na lewe ni matabisopi me kila vakavinaka na gone na inaki ni papitaiso (raica na 2 Nifai 31:5–20). Me raica talega me kila vakavinaka o gone na veiyalayalati ni papitaiso ka me vakadeitaka ni na bulataka. (raica na Mosaia 18:8–10). E sega ni gadrevi vua me vakayagataka e dua na lisi ni taro digitaki eso. Oqo e sega ni veivakatarogi me kilai kina na bula kilikili, me vaka ni “sa sega ni yaga vei ira na gonelalai na veivutuni” (Moronai 8:11).

31.2.3.2

Curuvou

E tiko vei peresitedi ni kaulotu na idola ni matabete me ra papitaisotaki kina na saumaki vou. Ena vuku ni ka oqo, ena veivakatarogi kina e dua na daukaulotu tudei:

• Yabaki 9 lako cake era sa bera ni bau papitaiso ka vakadeitaki. Raica na 31.2.3.1 me baleta na veika e sega ni vakatarai baleti ira e vakaleqai tu na nodra vakasama.

• Gone yabaki 8 ka qase cake ka rau sega ni lewe ni Lotu na nona itubutubu.

• O ira na gone yabaki 8 ka qase cake ka tiko e dua na nona itubutubu ka sa papitaiso ka vakadeitaki talega.

31.2.4

Veivakatarogi ni Veitabaki ki na Dua na iTutu ena Matabete i Eroni

Me baleta na ikuri ni ivakamacala, raica na 18.10.2.

31.2.5

Veivakatarogi ni iVolatara ni Valetabu

Na valetabu e vale ni Turaga Na curu ki na valetabu kei na vakaitavi ena cakacaka vakalotu e tiko kina e dua na madigi tabu. Na madigi oqo e maroroi tu me baleti ira era sa vakarau tu vakayalo ka saga me ra bulataka na ivakatagedegede ni Turaga, me vaka na vakatulewa mai vei ira na iliuliu ni matabete vakadonui.

Me vakadeitaki oqo, era na veivakatarogi na iliuliu ni matabete vua na lewenilotu ena kena vakayagataki na taro ena VLV (raica talega na idusidusi ena 26.3).

31.2.6

Na Veivakatarogi ni Veitabaki ki na iTutu ena Matabete i Melikiseteki

E tu vei peresitedi ni iteki na idola ni matabete ni kena vakatikori na Matabete i Melikiseteki. E tu talega vua na idola ni veitabaki ki na itutu ni italatala qase kei na bete levu.

Ena nodratou veivakadonui na mataveiliutaki ni iteki, ena veivakatarogi o bisopi kivei koya na lewenilotu ni vakayagataka tiko na taro e vakarautaki tu ena iVolatukutuku ni Veitabaki ki na Matabete i Melikiseteki.

31.3

Eso Tale na Madigi vei ira na iLiuliu me ra Veitalanoa kei ira na Lewenilotu

• E rawa ni ra kerea na lewenilotu me ra sota ka veitalanoa kei na dua na iliuliu ni Lotu ni ra gadreva na veidusimaki vakayalo se ni ra sotava tiko na leqa bibi eso.

• Na bisopi se dua e lesia me na sota ka veitalanoa kei ira na lewenilotu e tiko na nodra gagadre vakayago (raica na 22.6).

• Ena sota ka veitalanoa kei ira yadua na yabaki 11 e dua ena lewe ni matabisopi ena gauna sa toki mai kina mai na Lalai ki na kuoramu ni dikoni se dua na kalasi ni Goneyalewa.

31.3.1

Veitalanoa kei ira na iTabagone

Ena dau sota vakarua ena veiyabaki na bisopi se dua vei rau na nona daunivakasala kei ira yadua na itabagone. Ia me dua vei ira na sotasota oqo ena veiyabaki me na vakayacori vata kei bisopi. Ena itekivu ni yabaki era na yabaki 16 kina na itabagone, na sotasota ruarua ena loma ni yabaki e dodonu me vakayacori vata kei bisopi ke rawa.

Sa nona itavi talega na peresitedi ni Goneyalewa me na veiqaravi vei ira na goneyalewa yadua. E rawa ni na vakayacora oqo o koya ena nona sotavi ira yadua na goneyalewa (se kei na dua tale na uabula e tiko kina).

31.3.1.2

Ulutaga me Veitalanoataki

Na inaki levu ni sota kei ira na itabagone sa ikoya me tarai cake na vakabauta na Tamada Vakalomalagi kei Jisu Karisito ka vukei ira na itabagone me ra muri Rau. Na veitalanoa oqo e dodonu me vakilai kina na veilaveti cake vakayalo.

31.3.2

Sotasota kei ira na iTabagone Qase Cake

Na bisopi ena dau vakaliuca tiko na nodra tubu vakayalo na itabagone qase cake ena nona tabanalevu. O koya se dua na daunivakasala sa lesi ena sota ka veitalanoa kei ira yadua na itabagone qase cake ke lailai me vakadua ena dua na yabaki.

31.3.3

Sota ka Veitalanoa kei Ira na Lewenilotu me Baleta na Nodra Veikacivi kei na iTavi

O ira na mataveiliutaki ni iteki, matabisopi, kei ira na iliuliu tale eso era na sota ka veitalanoa vakayadudua kei ira na lewenilotu ni ra ripotetaka vei ira na iliuliu na nodra veikacivi.

E vakaraitaka na iliuliu na vakavinavinaka me baleta na nona veiqaravi na lewenilotu ka veivakayaloqaqataki.

31.3.6

iVakasala Vakenadau kei na iWali

Era sega ni dau kacivi na iliuliu ni Lotu me ra kenadau ni vakasala se me vakarautaka na iwali ni leqa. Na veivuke era solia e ka vakayalo, ka vakanamata ki na kaukauwa veivaqaqacotaki, veivakacegui, veivueti i Jisu Karisito. Me ikuri ni veivuke bibi ka veivakauqeti oqo, eso na lewenilotu ena yaga vei ira na ivakasala mai vei ira na kenadau ena vanua e tiko kina.

31.4

Sota kei na Veitalanoa kei Ira na Lewenilotu ena Initaneti

Ena kena ivakarau, e ra na dau sota ka veitalanoa kei ira na lewenilotu e matanavotu o ira na iliuliu ena veivakatarogi ka me ra vakarautaka na veivuke vakayalo kei na veiqaravi. Ia, kevaka e veiganiti, era na rawa ni veitalanoa ena initaneti kevaka era na sega ni rawa ni sota e matanavotu.