kau tangata ʻoku sio ki ha komipiuta

33.

ʻŪ Lekōtí mo e Lipōtí

33.0

Talateú

Kuo hoko maʻu pē ʻa e tauhi lekōtí ko ha meʻa mahuʻinga ʻi he Siasi ʻo e ʻEikí. Hangē ko ʻení:

Naʻe tauhi ʻe ʻĀtama “ha tohi ʻo e manatú” (Mōsese 6:5).

Naʻe akoʻi ʻe Molonai ko e ngaahi hingoa ʻo kinautolu naʻe papitaiso ki he Siasi ʻo Kalaisí naʻe lekooti koeʻuhí “ke manatuʻi mo fafanga ʻa kinautolu ʻaki ʻa e folofola lelei ʻa e ʻOtuá” (Molonai 6:4).

Naʻe fakahinohinoʻi ʻe Siosefa Sāmita ʻoku totonu ke ui ha taha tauhi lekooti ʻi he uooti kotoa pē ke “hiki ha lekooti ʻo ha moʻoni ʻi he ʻao ʻo e ʻEikí” (Tokāteline mo e Ngaahi Fuakava 128:2).

33.1

Vakai Fakalūkufua ki he ʻŪ Lekooti ʻa e Siasí

Ko e ngaahi lekooti ʻa e Siasí ʻoku toputapu. ʻOku pelepelengesi ʻa e fakamatala ʻi aí pea ʻoku totonu ke maluʻi. ʻOku fakamafaiʻi ʻe he polokalama lekooti ʻa e Siasí ke hū ki he fakamatala mēmipasipí ʻo makatuʻunga ʻi he ngaahi fatongiá.

ʻE lava ke tokoni e ngaahi lekōtí ki he kau takí:

• Ke ʻilo pē ko hai te ne ala fiemaʻu ha tokanga makehé.

• ʻIloʻi pe ko e hā e ngaahi ouau ʻo e fakamoʻuí kuo maʻu ʻe ha taha pe te ne ala fiemaʻu.

• Kumi ʻo e kāingalotú.

Ko e faʻahinga lekooti ʻeni ʻoku tauhi ʻi he ngaahi ʻiuniti ʻo e Siasí:

• Lipooti ʻo e kau ʻa e mēmipá (vakai, 33.5)

• Ngaahi lekooti mēmipasipí (vakai, 33.6)

• Ngaahi lekooti fakahisitōliá (vakai, 33.7)

• Ngaahi lekooti fakapaʻangá (vakai, 34)

33.2

Ngaahi Fakahinohino Fakalūkufua ki he Kau Kalaké

ʻOku totonu ke nau maʻu ha lekomeni temipale ʻoku kei ʻaonga.

ʻE muimui tokanga ʻa e kau kalaké ki he ngaahi tuʻutuʻuni lolotongá ke maluʻi e paʻanga ʻa e Siasí mo fakapapauʻi ʻoku tonu e ngaahi lekooti ʻo e Siasí. ʻE fakahā vave ʻe he kau kalaké ki he kau taki lakanga fakataulaʻeikí ka ʻi ai ha ngaahi meʻa ʻoku ʻikai totonu. Kapau ʻe hoko ha ngaahi palopalema ʻi hono fakaleleiʻí, ʻoku totonu leva ke fetuʻutaki ʻa e kau kalaké ki he ʻŌfisi ki he ʻo e Ngaahi Lekooti ʻOku ʻIkai Fakahāhā Holó ʻi he hetikuota ʻo e Siasí.

Telefoní: 1-801-240-2053 pe 1-800-453-3860, laine 2-2053

Taʻe totongi (telefoni GSD): 855-537-4357

ʻĪmeili: [e-mail]

ʻOku totonu ke lōloa feʻunga pē ngāue ʻa e kalaké ke nau ʻilo honau ngaahi fatongiá mo pukepuke ʻa e hokohoko ʻo ʻenau ngāué. Koeʻuhí ʻoku ʻikai ko ha kau mēmipa kinautolu ʻo e kau palesitenisī fakasiteikí pe kau pīsopelikí, ʻoku ʻikai leva fie maʻu ke tukuange kinautolu ʻi he taimi ʻoku fetongi ai ʻa e kau palesitenisī fakasiteikí pe kau pīsopelikí.

33.4

ʻŪ Lekooti mo e Lipooti ʻa e Uōtí

33.4.1

Kau Pīsopelikí

ʻE tokangaʻi ʻe he pīsopé ʻa e tafaʻaki tauhi-lekooti ʻa e uōtí.

33.4.2

Kalake ʻo e Uōtí

ʻOku totonu ke maʻu ʻe he uooti kotoa pē ha kalake ʻoku poto feʻunga mo ngāue mālohi. ʻOku fakaongoongoleleʻi ia ʻe he kau pīsopelikí kae vaheʻi ʻe ha taha ʻo e kau palesitenisī fakasiteikí pe ʻe ha aleaʻanga māʻolunga ne vahe ki ai. ʻOku totonu ke ne maʻu ʻa e Lakanga Taulaʻeiki Faka-Melekisētekí pea ʻi ai haʻane lekomeni temipale ʻoku kei ʻaonga. Ko ha mēmipa ia ʻo e fakataha alēlea fakauōtí. Te ne kau atu ki he ngaahi fakataha fakauōtí ʻo hangē ko ʻene hā ʻi he 29.2.

Ko e kalake fakauōtí ʻoku akoʻi ia ʻe he kau pīsopelikí pea mo e kau kalake fakasiteikí. ʻE malava foki ke uiuiʻi ha kau tokoni kalake ke tokoni.

33.4.2.1

Ngaahi Fatongia Tauhi-Lekōtí

ʻOku ʻa e kalake fakauōtí, pe ha tokoni kalake ʻa e ngaahi fatongia ko ʻení:

• Tauhi ha lekooti ʻo e ngaahi ngāue ne vahé mo e ngaahi tuʻutuʻuni ne fai ʻi he ngaahi fakataha takimuʻa fakauōtí.

• Fakapapauʻi ʻoku tonu mo taimi totonu ʻa e ngaahi lekōtí mo e ngaahi lipōtí.

ʻOku totonu ke maheni ʻa e kalake fakauōtí mo e ngaahi meʻangāue tauhi lekooti ʻa e Siasí (vakai, 33.0). Te ne ngāueʻaki e ngaahi meʻangāue ko ʻení ke tokoni ke ʻilo ʻe he kau takí ʻa e:

• Ngaahi fiemaʻu ʻa e kāingalotú mo e ngaahi houalotú.

• Ngaahi maʻuʻanga tokoni ʻoku maʻú, kau ai e ngaahi meʻa fakapaʻangá.

ʻE fakalotolahiʻi ʻe he kau kalake fakauōtí ʻa e kāingalotú ke nau lipooti ha faʻahinga fehālaaki ʻi he fakamatala ʻi honau lekooti mēmipasipí.

ʻE lava ke kau ʻi he ngaahi fatongia tauhi lekooti kehé ʻa e:

• Fakapapauʻi ʻoku lekooti totonu mo taimi totonu ʻa e ngaahi ouaú.

• Teuteuʻi ʻo e foomu Fokotuʻu ʻo e Kau ʻŌfisáki he konifelenisi fakauōtí.

• Lekooti ʻo e fakamatala ki he ngaahi fakataha alēlea fakauooti ki he tuʻunga mēmipasipí.

• Ko hono tokangaʻi ʻo e ngaahi lekooti fakapaʻangá (vakai, 34.2.2

33.5

Lipooti ʻo e Kau Mai ʻa e Mēmipá

ʻOku tokoni e ngaahi lipooti ʻo e kau mai ʻa e mēmipá, ki he kau takí ke tukutaha ʻenau tokangá ki he fakalakalaka pea mo e ngaahi fiemaʻu ʻa e kāingalotú.

33.5.1

Ngaahi Faʻahinga ʻo e Lipōtí

33.5.1.1

Lipooti ʻo e Maʻulotú

Ko e maʻulotu ʻi he ngaahi houalotu sākalamēnití mo e lakanga fakataulaʻeikí pea mo e ngaahi houalotú ʻi he Sāpaté ʻoku lekooti fakaʻilekitulōnika ʻo fakaʻaongaʻi ʻa e LCR pe Ngaahi Meʻangāue ki he Mēmipá.

Houalotu Sākalamēnití. Ko e maʻulotu he sākalamēnití ʻoku lekooti fakauike ia ʻe he kalake ʻo e uōtí pe ʻe ha tokoni kalake fakauooti. Ko e laú ʻa e tokolahi ʻoku ʻi ai tonu ʻi he fakatahá pe mamata mai, ʻo kau ai e kau ʻaʻahí.

Ngaahi Fakataha ʻa e Kōlomú mo e Houalotú ʻi he Sāpaté. ʻOku lekooti e maʻulotú he uike takitaha ʻe he kau sekelitali mo e kau ʻetivaisa ʻo e kōlomú mo e houalotú. ʻE toe lava foki ke tokoni ʻa e kau taki ʻo e toʻutupú ʻi hono lekooti ʻo e maʻulotú. Ko e laú ʻa e tokolahi ʻoku ʻi ai tonu ʻi he fakatahá pe mamata mai, ʻo kau ai e kau ʻaʻahí. Ko e kāingalotu ko ia ʻoku ngāue ʻi he Palaimelí pe ko ha kau taki ʻo e toʻutupu ʻi he uōtí, ʻoku lau mo kinautolu foki, ʻoku nau maʻulotu.

ʻE lava ke lekooti ʻe he kalake fakauōtí ʻa e maʻulotú maʻá ha faʻahinga houalotu pē.

33.5.1.2

Ngaahi Lipooti ʻo e ʻInitaviu Ngāue Fakaetauhí

Vakai, 21.3.

33.5.1.3

Lipooti Fakakuatá

ʻOku fakafofongaʻi ʻe he mataʻifika kotoa pē ʻi ha lipooti ha taha ʻoku ʻi ai ʻene ngaahi fiemaʻu makehe (vakai, Hilamani 15:13).

ʻOku ʻi he Lipooti Fakakuatáha fakamatala ʻaonga ʻe lava ke maʻu ai ʻe he kau takí ha ngaahi ʻilo ʻi heʻenau fekumi ki ha tataki fakalaumālie fekauʻaki mo ʻenau ngāue fakaetauhí.

ʻE vakai maʻu pē ʻa e kau taki fakasiteikí mo e fakauōtí ki he Lipooti Fakakuatáke vakaiʻi e fakalakalaka ʻa e fakafoʻituituí.

ʻE fakafonu mo fakahū ʻe he uooti kotoa pē ha Lipooti Fakakuata ki he hetikuota ʻo e Siasí. ʻE toe vakaiʻi ʻe he kalaké mo e pīsopé ʻa e lipōtí pea fakahū ia kimuʻa he ʻaho 15 ʻo e māhiná hili e fakaʻosinga ʻo e kuata taki taha.

33.5.2

Lisi Mēmipasipí

ʻOku ʻoange ʻe he ngaahi meʻangāue tauhi lekooti ʻa e Siasí ki he kau takí ha faingamālie ke nau hū ai ki he ngaahi lisi mēmipasipí. ʻE lava ke tokoni e ngaahi lisi ko ʻení ki he kau takí ke nau ʻiloʻi:

• Ko hai ʻa e kāingalotu ʻoku teʻeki ai ke nau maʻu ʻa e ngaahi ouau ʻoku feʻunga ke nau maʻú.

• Ko hai ha kau talavou mo ha kau finemui ʻoku feʻunga ke ngāue fakafaifekau.

• Ko hai e toʻutupu ʻoku ʻikai haʻanau lekomeni temipale kei ʻaongá.

• Ko e fē ʻa e toʻutupu ʻoku fiemaʻu ke fakataimi-tēpileʻi ke talanoa mo ha mēmipa ʻo e kau pīsopelikí.

ʻOku totonu ke maʻu ʻe he kau taki fakakōlomú mo e houalotú ʻa e lisi ʻo kinautolu ʻoku kau ʻi heʻenau kōlomú pe houalotú.

33.6

Lekooti Mēmipasipí

ʻOku ʻi he ngaahi lekooti mēmipasipí e hingoa ʻo e kāingalotú, fakamatala fetuʻutakí, fakaikiiki ʻo e ouaú, mo ha fakamatala mahuʻinga kehe.

ʻOku totonu ke tauhi ʻae ngaahi lekooti memipasipí ʻi he uooti ʻoku nofo ai ʻa e mēmipá. Ko e ngaahi fakaʻatā makehé, ʻa ia ʻoku totonu ke tātātaha ʻene hokó, ʻe fiemaʻu ai e loto ʻa e kau pīsopé mo e kau palesiteni fakasiteiki ʻoku kau aí. Ke kole ha fakaʻatā makehé, ʻe fakaʻaongaʻi ʻe he palesiteni fakasiteikí ʻa e LCR ke fakahū ʻa e kolé ki he ʻŌfisi ʻo e Kau Palesitenisī ʻUluakí.

ʻOku fuʻu mahuʻinga ke fakahoko taimi totonu ʻa e ngaahi meʻa ko ʻení:

• Lekooti e fakamatala ouaú.

• Hiki ʻa e ngaahi lekooti ʻo e kāingalotu ʻoku hiki mai pe hiki atu mei he uōtí.

• Faʻu ha lekooti moʻó e kāingalotu foʻoú mo e fānau foʻou ʻoku mēmipa ʻenau mātuʻá.

• Lekooti e pekia ʻa ha mēmipa.

• Lekooti ʻa e malí mo e fakamatala ki he fāmilí.

ʻE fakapapauʻi ʻe he pīsopé pe palesiteni fakasiteikí ʻoku ʻi he uooti totonú ha lekooti mēmipasipi kimuʻa pea toki ʻinitaviu ha mēmipa ke ne maʻu:

• Ha uiuiʻi faka-Siasi.

• Ha lekomeni temipale.

• Lakanga Taulaʻeiki Faka-Melekisēteki pē ke fakanofo ki ha tuʻunga ʻi he lakanga fakataulaʻeiki ko iá.

Te ne toe fakapapauʻi foki ʻoku ʻikai ke ʻi he lekōtí ha taha ʻo e ngaahi meʻa ko ʻení:

• Ha kiʻi tohi fakamatala fakatokanga

• Ha fakamatala fakangatangata ki ha sila pe ouau

• Ngaahi Fakangatangata pau ki he tuʻunga mēmipá

ʻOku ʻikai ha faʻahinga tuʻunga ia ʻe lava ke ʻoange pe fakahā ai e ngaahi lekooti memipasipí ki ha taha kehe ka ko e pīsopé pē pe ko ha kalake.

ʻE lava ke sio ʻa e kāingalotú ki he fakamatala ʻi he mēmipasipi ʻonautolú pe ʻo ha fānau kei iiki ʻoku nau kei nofo mo ia, ʻi he Member Tools App. ʻE lava foki ke nau kole ha tatau kuo ʻosi paaki ʻo e Fakamatala Fakaikiki honau ouaú mei he kalaké. Kapau ʻoku maʻu ai ha ngaahi fehalaaki, ʻe fakapapauʻi ʻe ha kalake ʻoku fakatonutonu ia ʻi he lekooti mēmipasipí.

33.6.1

Hingoa ʻOku Fakaʻaongaʻi ʻi he Ngaahi Lekooti ʻo e Siasí

ʻOku totonu ke fakaʻaongaʻi e hingoa kakato fakalao ʻo e tokotahá, ʻo hangē ko hono tuʻutuʻuni ʻe he lao mo e anga fakafonuá, ʻi he ʻū lekooti mēmipapsipí pea mo e tohi fakamoʻoni ouaú.

33.6.2

Kāingalotu ʻo e Lekōtí

Ko e niʻihi fakafoʻituitui ko ʻení ko e kau mēmipa kinautolu ʻo e lekōtí pea ʻoku totonu ke ʻi ai hanau lekooti mēmipasipi:

• Kinautolu kuo ʻosi papitaiso mo hilifakinimá.

• Kinautolu ʻoku taʻu siʻi ange ʻi he taʻu 9 naʻe tāpuakiʻi ka ʻoku teʻeki papitaiso.

• Kinautolu ʻoku ʻikai ala fakamāuá koeʻuhí ko ha ngaahi faingataʻaʻia fakaeʻatamai, ʻo tatau ai pē pe ʻoku nau taʻu fiha.

• Fānau teʻeki tāpuakiʻi ʻoku siʻi hifo he taʻu 9, kapau ʻoku fakatou hoko ʻa e ongo meʻa ko ʻení:

  • Kapau ʻoku mēmipa ha taha ʻi he ongo mātuʻá pe taha ʻo e ongo kuí, ʻi he Siasí.

  • Kapau ʻoku fakatou loto ʻa e ongomātuʻá ke faʻu hano lekooti. (Kapau ko e tokotaha pē he ongomātuʻá ʻokú ne maʻu e totonu fakalao ke tauhí, ʻe feʻunga pē ngofua mei he mātuʻa ko iá.)

Ko ha taha ʻoku taʻu 9 pe motuʻa ange ʻoku ʻi ai hano lekooti memipasipi ka ʻoku teʻeki ai papitaiso mo hilifiakinima, ʻoku ʻikai ko ha mēmipa ia ʻo e lekōtí. Ka neongo ia, ʻe kei tauhi pē ʻe he uooti ʻoku nofo ai e tokotahá ʻa e lekooti memipasipí kae ʻoua kuó ne taʻu 18. ʻI he taimi ko iá, kapau ʻe fili ʻa e tokotahá ke ʻoua ʻe papitaiso, ʻe kaniseli leva ʻe he pīsopé ʻa e lekooti mēmipasipí. ʻE fie maʻu ha fakangofua mei he palesiteni fakasiteikí.

ʻOku ʻikai kaniseli ʻa e ngaahi lekōtí maʻanautolu kuo teʻeki ai papitaisó koeʻuhí ko ha faingataʻaʻia fakaeʻatamai tukukehe kapau ʻe kole ʻe he tokotahá pe ko ha tauhi fakalao, kau ai ha mātuʻa.

33.6.3

Lekooti ʻo e Kāingalotu Foʻou ʻo e Uōtí

ʻE fetuʻutaki ʻa e kalake pe ko ha tokoni kalake ʻo e uōtí ki he kau mēmipa foʻou ʻo e uōtí, ʻi he aʻu mai pē ʻa e ngaahi lekooti memipasipí, ke vakaiʻi pe ʻoku tonu ʻa e Fakamatala Ouau Fakafoʻituituí.

33.6.6.

Lekooti ʻo e Kāingalotu ʻOku Ngāue Mavahe mei Honau Uooti Fakasiokālafí

33.6.6.2

ʻŪ Lekooti ʻo e Kau Faifekau Taimi Kakató

Vakai, 24.6.2.8

33.6.13

Lekooti ʻo e Fānau ʻa e Mātuʻa Kuo Veté

ʻOku fakaʻaongaʻi ʻi he ngaahi lekooti mēmipasipi kotoa ʻa e hingoa fakalao ʻo ha taha, ʻo hangē ko hono fakaʻuhingaʻi ʻe he lao fakalotofonuá pe anga fakafonuá. ʻOku kau heni e fānau ʻa e ngaahi mātuʻa kuo vete malí.

ʻOku faʻa maʻulotu e fānau kuo vetemali ʻenau mātuʻá ʻi he uooti fakatouʻosi ʻa e mātuʻá. Neongo pē ‘oku tauhi mo fakatonutonu ʻe ha ʻiuniti ʻe taha ʻa e lekooti mēmipasipi totonu ‘a ha fānau, ka ʻe malava pē ke faʻu ha lekooti mēmipa ʻi ha ʻiuniti kehe, ʻi he uooti ʻe taha ʻokú ne maʻulotu aí. ‘Oku lava heni ke fakakau ʻa e hingoa mo e fakamatala fetuʻutaki ʻo ha fānau ʻi he lisi fakauōtí mo e taliui fakakalasí.

ʻE lava ke maʻu ʻe he fānau ʻoku mēmipa ʻi ha ʻiuniti kehe honau lekōtí, ha uiuiʻi ʻi he ʻiuniti ko iá.

33.6.15

Fehikitaki ʻa e Ngaahi Fakangatangata ʻi he Lekooti Mēmipasipí

Kapau ʻe hiki ha mēmipa ʻoku lolotonga ʻi ai hano fakataputapui ʻi hono tuʻunga mēmipá pe ha meʻa mamafa ʻoku fai ki ai ha tokanga, ʻe lava ke fokotuʻu ʻe he pīsopé pe ha kalake kuo fakamafaiʻi ha fakangatangata ʻo ʻene hikí ʻi he lekooti memipasipí. Te ne fakaʻaongaʻi ʻa e LCR ke fai ʻeni.

Ko ha lekooti ʻoku ʻi ai ha fakangatangata ki he hikí he ʻikai ʻave ia ki ha uooti foʻou kae ʻoua kuo fakangofua ʻe he taki lakanga fakataulaʻeiki naʻá ne fokotuʻu ʻa e fakangatangatá ke toʻo.

33.6.16

Lekooti Mei he Faile “ʻIkai ʻIlo e Tuʻasilá”

ʻOku faʻa maʻu ha mēmipa he taimi ʻe niʻihi hili hano maʻu hono lekōtí ʻi he faile “tuʻasila ʻikai ʻiloʻí” ʻi he hetikuota ʻo e Siasí. ʻI he tūkunga ko ʻení, ʻe kole ʻe he kalake fakauōtí ʻa e lekōtí ʻo fakaʻaongaʻi ʻa e LCR.

33.6.17

Ko Hono Lekooti mo Fakatonutonu ʻo e Fakamatala Ouaú

Vakai, vahe 18.

33.6.19

ʻAotitaʻi ʻo e Lekooti Mēmipasipí

ʻE fakapapauʻi ʻe he kalake fakasiteikí pe ʻe ha tokoni kalake fakasiteiki ʻi he taʻu kotoa, ʻoku fakahoko hano ʻaotita ʻo e ʻū lekooti memipasipí ʻi he uooti takitaha ʻo fakaʻaongaʻi ʻa e LCR. ʻOku totonu ke kakato ʻa e ʻaotitá kimuʻa he ʻaho 30 ʻo Sune ʻo e taʻu taki taha.

33.7

Lekooti Hisitōliá

33.7.1

Hisitōlia ʻo e Uōtí mo e Siteikí

Kuo fekauʻi ʻe he ʻEikí “ke tohi mo tauhi ha hisitōlia ʻo e meʻa mahuʻinga kotoa pē” fekauʻaki mo Hono Siasí (Tokāteline mo e Ngaahi Fuakava 69:3; vakai foki, veesi 5; ʻAlamā 37:2).

Kuo pau ke hiki ʻe he ʻiuniti takitaha ʻi he Siasí ha fakamatala ʻo e ngaahi meʻa mahuʻinga kotoa fekauʻaki mo e ʻiunití.

Ko ha ngāue fakalaumālie ʻa hono tauhi ha hisitōliá, he te ne fakamālohia e tui ʻa kinautolu ʻoku nau tohi mo lau iá.

ʻOku ʻomi ʻe he kau taki ʻo e lakanga fakataulaʻeikí mo e houalotu ʻi he siteikí mo e uōtí ha ngaahi talanoa ʻo fakaʻaongaʻi ʻa e Unit History tool ʻi he ChurchofJesusChrist.org. ʻOku ʻa e kau kalake fakasiteikí mo fakauōtí ʻa e tefitoʻi fatongia ke fokotuʻutuʻu mo fakafekauʻaki ʻa e ngāue ko ʻení. ʻOku lava ke maʻu atu ha ngaahi fakahinohino lahi ange ʻi he Quick Start Guide

33.8

Ko e Tuʻunga ʻIkai Fakahāhāholo ʻo e Ngaahi Lekōtí

Ko e ʻū lekooti ʻo e Siasí ʻoku ʻikai totonu ke fakahāhāholo, tatau ai pē pe ʻoku tuʻu ʻi ha pepa pe fakakomipiuta. ʻOku kau heni ʻa e:

• ʻŪ lekooti mēmipasipí.

• ʻŪ lekooti fakapaʻangá

• Meʻa mei he ngaahi fakatahá

• Ngaahi foomu mo e ngaahi fakamatala fakapepa (kau ai e ngaahi lekooti ʻo e ngaahi fakataha alēlea ki he tuʻunga mēmipá).

ʻE fakapapauʻi ʻe he kau takí ko e fakamatala ʻoku maʻu mei he kāingalotú ʻoku:

• Fakangatangata pē ki he meʻa ʻoku fiemaʻu ʻe he Siasí.

• Fakaʻaongaʻi pē ki he ngaahi taumuʻa faka-Siasi kuo fakangofuá.

• ʻOange pē kiate kinautolu kuo fakamafaiʻi ke nau fakaʻaongaʻí.

Ko e fakamatala ʻoku tauhi fakaʻilekitulōniká ʻoku malu mo maluʻi lelei (vakai, 33.9.1).

33.9

Tokangaʻi ʻo e Lekōtí

33.9.1

Maluʻi

ʻOku totonu ke maluʻi ʻa e ngaahi lekooti, ngaahi lipooti, mo e fakamatala kotoa pē ʻa e Siasí ke ʻoua naʻa fai ha hū, ha liliu, fakaʻauha, pe tukuange ki tuʻa taʻe-fakamafaiʻi. ʻOku totonu ke tauhi ʻa e fakamatala ko ʻení ʻi ha feituʻu malu.

Ko e ngaahi meʻangāue ʻa e Siasí ʻoku mole pe kaihaʻasí ka ʻoku tauhi ai e fakamatala fakamītiá, ʻoku totonu ke lipooti ʻi he vave tahá ʻi he incidents.ChurchofJesusChrist.org. ʻOku totonu foki ke lipooti hono ngāue hala ʻaki e fakamatala ʻo e Siasí.

33.9.1.1

Ngaahi Hingoa Ngāué mo e Lea Fufuú

ʻOku ʻikai totonu ke teitei fevahevaheʻaki ʻe he kau palesiteni fakasiteikí, kau pīsopé, mo e kau taki kehé ʻenau hingoa ngāué mo e lea fufuú mo e kau tokoní, kau kalaké, kau sekelitali pulé, pe ha toe niʻihi kehe.

33.9.1.3

Malu ʻo e Fakamatala Fakatāutahá

ʻOku lahi ha ngaahi fonua kuo nau fokotuʻu ha ngaahi lao maluʻi fakamatala ʻokú ne puleʻi hono ngāue ʻaki e fakamatala fakafoʻituituí. ʻOku kau heni e fakamatala ʻi he lekooti mēmipasipí mo e ngaahi lekooti kehe ʻa e Siasí ʻoku ʻiloʻi ai e niʻihi fakafoʻituituí. Ko e kau taki ko ia ʻoku ʻi ai haʻanau fehuʻi fekauʻaki mo hono fakaʻaongaʻi ʻo e ngaahi lao maluʻi ʻo e fakamatalá ki hono tokangaʻi fakalotofonua ʻo e ngaahi lekooti ʻa e Siasí, ʻe lava ke nau fetuʻutaki ki he ʻōfisi ʻo e Siasí ki he maluʻi ʻo e meʻa fakafoʻituituí ʻi he [e-mail]..