“33. ບັນທຶກ ແລະ ລາຍງານ,” ພາກສ່ວນທີ່ຄັດເລືອກມາຈາກຄູ່ມືທົ່ວໄປ (2023).
“33. ບັນທຶກ ແລະ ລາຍງານ,” ພາກສ່ວນທີ່ຄັດເລືອກມາຈາກຄູ່ມືທົ່ວໄປ
33.
ບັນທຶກ ແລະ ລາຍງານ
33.0
ຄຳນຳ
ການຮັກສາບັນທຶກມີຄວາມສຳຄັນສະເໝີມາໃນສາດສະໜາຈັກຂອງພຣະຜູ້ເປັນເຈົ້າ. ຍົກຕົວຢ່າງ:
ອາດາມໄດ້ຮັກສາ “ປຶ້ມແຫ່ງຄວາມຊົງຈຳ” (ໂມເຊ 6:5).
ໂມໂຣໄນໄດ້ສິດສອນວ່າ ຊື່ຂອງຜູ້ທີ່ໄດ້ຮັບບັບຕິສະມາເຂົ້າໃນສາດສະໜາຈັກຖືກບັນທຶກໄວ້ ເພື່ອວ່າ “ເຂົາຈະໄດ້ຖືກຈົດຈຳ ແລະ ບຳລຸງລ້ຽງດ້ວຍພຣະຄຳອັນປະເສີດຂອງພຣະເຈົ້າ” (ໂມໂຣໄນ 6:4).
ໂຈເຊັບ ສະມິດ ໄດ້ແນະນຳວ່າ ທຸກຫວອດຄວນເອີ້ນຄົນໃດຄົນໜຶ່ງໃຫ້ເປັນຜູ້ບັນທຶກເພື່ອ “ເຮັດບັນທຶກຢ່າງແທ້ຈິງຢູ່ຕໍ່ພຣະພັກຂອງພຣະຜູ້ເປັນເຈົ້າ” (ຄຳສອນ ແລະ ພັນທະສັນຍາ 128:2).
33.1
ພາບລວມບັນທຶກຂອງສາດສະໜາຈັກ
ບັນທຶກຂອງສາດສະໜາຈັກແມ່ນສັກສິດ. ຂໍ້ມູນໃນນັ້ນລະອຽດອ່ອນ ແລະ ຄວນຮັກສາໄວ້ໃຫ້ດີ. ລະບົບບັນທຶກຂອງສາດສະໜາຈັກອະນຸຍາດໃຫ້ເຂົ້າເຖິງຂໍ້ມູນຂອງສະມາຊິກ ອີງຕາມການເອີ້ນ.
ບັນທຶກສາມາດຊ່ວຍໃຫ້ຜູ້ນຳ:
-
ຮູ້ວ່າໃຜຕ້ອງການການດູແລພິເສດ.
-
ຮູ້ວ່າພິທີການແຫ່ງຄວາມລອດໃດທີ່ບຸກຄົນໄດ້ຮັບ ຫລື ອາດຕ້ອງການ.
-
ຊອກຫາທີ່ຢູ່ຂອງສະມາຊິກ.
ບັນທຶກປະເພດຕ່າງໆທີ່ຖືກຮັກສາຢູ່ໃນໜ່ວຍຂອງສາດສະໜາຈັກມີດັ່ງຕໍ່ໄປນີ້:
33.2
ຄຳແນະນຳທົ່ວໄປສຳລັບສະໝຽນ
ເຂົາເຈົ້າຄວນມີໃບຮັບຮອງເຂົ້າພຣະວິຫານໃນປະຈຸບັນ.
ສະໝຽນຄວນເຮັດຕາມນະໂຍບາຍປະຈຸບັນຢ່າງຮອບຄອບ ເພື່ອຮັກສາເງິນທຶນຂອງສາດສະໜາຈັກ ແລະ ຕ້ອງແນ່ໃຈວ່າບັນທຶກຂອງສາດສະໜາຈັກຖືກຕ້ອງ. ສະໝຽນແຈ້ງໃຫ້ຜູ້ນຳຖານະປະໂລຫິດຊາບທັນທີ ຖ້າຫາກພົບເຫັນຄວາມບໍ່ຖືກຕ້ອງໃດໆ. ຖ້າຫາກເກີດມີບັນຫາໃນການແກ້ໄຂຄວາມບໍ່ຖືກຕ້ອງ, ສະໝຽນຄວນຕິດຕໍ່ຫາ Confidential Records Office ທີ່ ສຳນັກງານໃຫຍ່ຂອງສາດສະໜາຈັກ.
ໂທລະສັບ: 1-801-240-2053 ຫລື 1-800-453-3860, ຕໍ່ 2-2053
ໂທຟຣີ (ໂທລະສັບ GSD): 855-537-4357
ອີເມວ: ConfidentialRecords@ChurchofJesusChrist.org
ໄລຍະເວລາການຮັບໃຊ້ຂອງສະໝຽນຄວນດົນພໍໃຫ້ເຂົາເຈົ້າຮຽນຮູ້ໜ້າທີ່ຂອງເຂົາເຈົ້າ ແລະ ຮັກສາວຽກງານອັນຕໍ່ເນື່ອງຂອງເຂົາເຈົ້າ. ເພາະວ່າເຂົາເຈົ້າບໍ່ໄດ້ເປັນສະມາຊິກຄົນໜຶ່ງໃນຝ່າຍປະທານສະເຕກ ຫລື ໃນຝ່າຍອະທິການ, ເຂົາເຈົ້າບໍ່ຈຳເປັນຕ້ອງຖືກປົດເມື່ອຝ່າຍປະທານສະເຕກ ຫລື ຝ່າຍອະທິການຖືກຈັດຕັ້ງໃໝ່.
33.4
ບັນທຶກ ແລະ ລາຍງານຂອງຫວອດ
33.4.1
ຝ່າຍອະທິການ
ອະທິການດູແລການຮັກສາບັນທຶກຂອງຫວອດ.
33.4.2
ສະໝຽນຫວອດ
ທຸກຫວອດຄວນມີສະໝຽນທີ່ມີຄຸນວຸດທິ ແລະ ປະຕິບັດໜ້າທີ່ຂອງຕົນ. ລາວຖືກແນະນຳຊື່ໂດຍຝ່າຍອະທິການ ແລະ ຖືກເອີ້ນ ແລະ ຖືກແຕ່ງຕັ້ງເປັນທາງການໂດຍສະມາຊິກຄົນໜຶ່ງໃນຝ່າຍປະທານສະເຕກ ຫລື ສະມາຊິກສະພາສູງຄົນໜຶ່ງ. ລາວຄວນດຳລົງຖານະປະໂລຫິດແຫ່ງເມນຄີເສເດັກ ແລະ ມີໃບຮັບຮອງເຂົ້າພຣະວິຫານໃນປະຈຸບັນ. ລາວເປັນສະມາຊິກຂອງສະພາຫວອດ. ລາວເຂົ້າຮ່ວມການປະຊຸມຫວອດດັ່ງທີ່ລະບຸໄວ້ໃນ 29.2.
ສະໝຽນຫວອດຖືກສິດສອນໂດຍຝ່າຍອະທິການ ແລະ ໂດຍສະໝຽນສະເຕກ. ຜູ້ຊ່ວຍສະໝຽນຫວອດອາດຖືກເອີ້ນເພື່ອຊ່ວຍເຫລືອ.
33.4.2.1
ໜ້າທີ່ຮັບຜິດຊອບຂອງການຮັກສາບັນທຶກ
ສະໝຽນຫວອດ, ຫລື ຜູ້ຊ່ວຍສະໝຽນທີ່ຖືກມອບໝາຍ, ມີໜ້າທີ່ຮັບຜິດຊອບດັ່ງຕໍ່ໄປນີ້:
-
ຈົດບັນທຶກການມອບໝາຍ ແລະ ການຕັດສິນໃຈໃນການປະຊຸມຜູ້ນຳຫວອດ.
-
ຕ້ອງແນ່ໃຈວ່າບັນທຶກ ແລະ ລາຍງານຖືກຕ້ອງ ແລະ ທັນເວລາ.
ສະໝຽນຫວອດຄວນຄຸ້ນເຄີຍກັບເຄື່ອງມືການຮັກສາບັນທຶກຂອງສາດສະໜາຈັກ (ເບິ່ງ 33.0). ລາວໃຊ້ເຄື່ອງມືເຫລົ່ານີ້ເພື່ອຊ່ວຍໃຫ້ຜູ້ນຳຮູ້ເຖິງ:
-
ຄວາມຕ້ອງການຂອງສະມາຊິກ ແລະ ຂອງອົງການ.
-
ແຫລ່ງຊ່ວຍເຫລືອທີ່ມີໃຫ້ໃຊ້, ລວມທັງການເງິນ.
ສະໝຽນຫວອດຊຸກຍູ້ສະມາຊິກໃຫ້ລາຍງານຂໍ້ຜິດພາດໃດໆ ໃນຂໍ້ມູນສະມາຊິກກະພາບຂອງເຂົາເຈົ້າ.
ໜ້າທີ່ການຮັກສາບັນທຶກອື່ນໆອາດລວມທັງ:
-
ການແນ່ໃຈວ່າພິທີການຖືກບັນທຶກຢ່າງຖືກຕ້ອງ ແລະ ທັນທີ.
-
ການກະກຽມ ຟອມການສະໜັບສະໜູນເຈົ້າໜ້າທີ່ ສຳລັບກອງປະຊຸມຫວອດ.
-
ການບັນທຶກຂໍ້ມູນສຳລັບສະພາສະມາຊິກກະພາບຫວອດ.
-
ການເກັບຮັກສາບັນທຶກການເງິນ (ເບິ່ງ 34.2.2).
33.5
ລາຍງານການມີສ່ວນຮ່ວມຂອງສະມາຊິກ
ລາຍງານການມີສ່ວນຮ່ວມຂອງສະມາຊິກເພື່ອຊ່ວຍຜູ້ນຳສຸມໃສ່ຄວາມກ້າວໜ້າ ແລະ ຄວາມຕ້ອງການຂອງສະມາຊິກ.
33.5.1
ລາຍງານແບບຕ່າງໆ
33.5.1.1
ລາຍງານຈຳນວນຜູ້ເຂົ້າຮ່ວມ
ຈຳນວນຜູ້ເຂົ້າຮ່ວມກອງປະຊຸມສິນລະລຶກ ແລະ ການປະຊຸມຖານະປະໂລຫິດ ແລະ ອົງການໃນວັນອາທິດ ຖືກບັນທຶກໄວ້ທາງອີເລັກໂທຣນິກ ໂດຍໃຊ້ LCR ຫລື Member Tools.
ກອງປະຊຸມສິນລະລຶກ. ຈຳນວນຜູ້ເຂົ້າຮ່ວມກອງປະຊຸມສິນລະລຶກຖືກບັນທຶກແຕ່ລະອາທິດໂດຍສະໝຽນຫວອດ ຫລື ຜູ້ຊ່ວຍສະໝຽນຫວອດ. ການນັບຄື ຈຳນວນຜູ້ເຂົ້າຮ່ວມການປະຊຸມດ້ວຍຕົວເອງ ຫລື ໂດຍທາງການສະຕຣີມ, ລວມທັງຜູ້ຢ້ຽມຢາມ.
ການປະຊຸມກຸ່ມ ແລະ ອົງການໃນວັນອາທິດ. ຈຳນວນຜູ້ເຂົ້າຮ່ວມຖືກບັນທຶກທຸກອາທິດໂດຍເລຂານຸການ ແລະ ຜູ້ໃຫ້ຄຳແນະນຳກຸ່ມ ແລະ ອົງການ. ຜູ້ນຳຊາວໜຸ່ມກໍສາມາດຊ່ວຍໃນການບັນທຶກຈຳນວນຜູ້ເຂົ້າຮ່ວມເຊັ່ນກັນ. ການນັບຄື ຈຳນວນຜູ້ເຂົ້າຮ່ວມການປະຊຸມດ້ວຍຕົວເອງ ຫລື ໂດຍທາງການສະຕຣີມ, ລວມທັງຜູ້ຢ້ຽມຢາມ. ສະມາຊິກທີ່ຮັບໃຊ້ໃນປະຖົມໄວ ຫລື ໃນຖານະຜູ້ນຳຊາວໜຸ່ມພາຍໃນຫວອດ ກໍຖືກນັບເຂົ້າເຊັ່ນດຽວກັນ.
ສະໝຽນຫວອດສາມາດບັນທຶກຈຳນວນຜູ້ເຂົ້າຮ່ວມໃຫ້ອົງການໃດກໍໄດ້.
33.5.1.2
ລາຍງານການສຳພາດຜູ້ປະຕິບັດສາດສະໜາກິດ
ເບິ່ງ 21.3.
33.5.1.3
ລາຍງານປະຈຳໄຕມາດ
ຕົວເລກທັງໝົດໃນໃບລາຍງານເປັນຕົວແທນໃຫ້ບຸກຄົນແທ້ໆຜູ້ທີ່ມີຄວາມຕ້ອງການພິເສດສະເພາະ (ເບິ່ງ ຮີລາມັນ 15:13).
ໃບ ລາຍງານປະຈຳໄຕມາດ ບັນຈຸຂໍ້ມູນທີ່ເປັນປະໂຫຍດ ທີ່ສາມາດໃຫ້ຄວາມຮູ້ແກ່ຜູ້ນຳ ຂະນະທີ່ພວກເພິ່ນສະແຫວງຫາການດົນໃຈກ່ຽວກັບຄວາມພະຍາຍາມໃນການປະຕິບັດສາດສະໜາກິດຂອງພວກເພິ່ນ.
ຜູ້ນຳສະເຕກ ແລະ ຫວອດ ເຂົ້າເບິ່ງໃບ ລາຍງານປະຈຳໄຕມາດ ເປັນປະຈຳ ເພື່ອທົບທວນຄວາມຄືບໜ້າຂອງແຕ່ລະບຸກຄົນ.
ທຸກຫວອດປະກອບ ແລະ ສົ່ງໃບ ລາຍງານປະຈຳໄຕມາດ ໄປໃຫ້ສຳນັກງານໃຫຍ່ຂອງສາດສະໜາຈັກ. ສະໝຽນທົບທວນໃບລາຍງານກັບອະທິການ ແລະ ສົ່ງມັນໄປກ່ອນວັນທີ 15 ຂອງເດືອນ ຫລັງຈາກແຕ່ລະໄຕມາດ.
33.5.2
ລາຍຊື່ໃນສະມາຊິກກະພາບ
ເຄື່ອງມືການຮັກສາບັນທຶກຊ່ວຍຜູ້ນຳເຂົ້າເຖິງລາຍຊື່ໃນສະມາຊິກກະພາບ. ລາຍຊື່ເຫລົ່ານີ້ສາມາດຊ່ວຍໃຫ້ຜູ້ນຳຮູ້ວ່າ:
-
ສະມາຊິກຄົນໃດຍັງບໍ່ໄດ້ຮັບພິທີການທີ່ເໝາະສົມສຳລັບເຂົາເຈົ້າເທື່ອ.
-
ຊາຍໜຸ່ມ ແລະ ຍິງໜຸ່ມຄົນໃດເໝາະສົມສຳລັບການຮັບໃຊ້ເຜີຍແຜ່.
-
ຊາວໜຸ່ມຄົນໃດບໍ່ມີໃບຮັບຮອງເຂົ້າພຣະວິຫານໃນປະຈຸບັນ.
-
ຊາວໜຸ່ມຄົນໃດຕ້ອງທຳການນັດເຂົ້າພົບສະມາຊິກຄົນໜຶ່ງໃນຝ່າຍອະທິການ.
ຜູ້ນຳກຸ່ມ ແລະ ອົງການຄວນສາມາດເຂົ້າເຖິງລາຍຊື່ຂອງຜູ້ທີ່ຢູ່ໃນກຸ່ມ ຫລື ໃນອົງການຂອງເຂົາເຈົ້າ.
33.6
ບັນທຶກສະມາຊິກກະພາບ
ບັນທຶກສະມາຊິກກະພາບລວມທັງລາຍຊື່ຂອງສະມາຊິກ, ຂໍ້ມູນຕິດຕໍ່, ລາຍລະອຽດກ່ຽວກັບພິທີການ, ແລະ ຂໍ້ມູນສຳຄັນອື່ນໆ.
ບັນທຶກສະມາຊິກກະພາບຄວນຖືກຮັກສາໄວ້ໃນຫວອດບ່ອນທີ່ສະມາຊິກອາໄສຢູ່. ຂໍ້ຍົກເວັ້ນ, ຊຶ່ງຄວນມີໜ້ອຍທີ່ສຸດ, ຕ້ອງໄດ້ຮັບການອະນຸຍາດຈາກອະທິການ ແລະ ປະທານສະເຕກທີ່ກ່ຽວຂ້ອງ. ເພື່ອຂໍຂໍ້ຍົກເວັ້ນ, ປະທານສະເຕກໃຊ້ LCR ເພື່ອສົ່ງຄຳຂໍຮ້ອງໄປຍັງຫ້ອງການຂອງຝ່າຍປະທານສູງສຸດ.
ສຳຄັນທີ່ຈະຕ້ອງເຮັດສິ່ງດັ່ງຕໍ່ໄປນີ້ທັນທີ:
-
ບັນທຶກຂໍ້ມູນພິທີການ.
-
ຍ້າຍບັນທຶກຂອງສະມາຊິກທີ່ຍ້າຍເຂົ້າມາ ຫລື ຍ້າຍອອກຈາກຫວອດ.
-
ສ້າງບັນທຶກສຳລັບສະມາຊິກໃໝ່ ແລະ ເດັກເກີດໃໝ່ຂອງພໍ່ແມ່ທີ່ເປັນສະມາຊິກ.
-
ບັນທຶກການຕາຍຂອງສະມາຊິກ.
-
ບັນທຶກການແຕ່ງງານ ແລະ ຂໍ້ມູນກ່ຽວກັບຄົວເຮືອນ.
ອະທິການ ຫລື ປະທານສະເຕກຕ້ອງແນ່ໃຈວ່າບັນທຶກສະມາຊິກກະພາບຢູ່ໃນຫວອດທີ່ຖືກຕ້ອງ ກ່ອນສະມາຊິກຮັບການສຳພາດເພື່ອຮັບເອົາ:
-
ການເອີ້ນໃນສາດສະໜາຈັກ.
-
ໃບຮັບຮອງເຂົ້າພຣະວິຫານ.
-
ຖານະປະໂລຫິດແຫ່ງເມນຄີເສເດັກ ຫລື ຖືກແຕ່ງຕັ້ງສູ່ຕຳແໜ່ງໃນຖານະປະໂລຫິດນັ້ນ.
ເພິ່ນຍັງຕ້ອງແນ່ໃຈວ່າບັນທຶກຈະບໍ່ລວມທັງສິ່ງໃດໆດັ່ງຕໍ່ໄປນີ້:
-
ໝາຍເຫດປະກອບ
-
ຄວາມຄິດເຫັນກ່ຽວກັບການຜະນຶກ ຫລື ການຈຳກັດພິທີການ
-
ການຈຳກັດສະມາຊິກກະພາບເປັນທາງການ
ບໍ່ວ່າຈະເປັນໃນສະຖານະການໃດກໍຕາມ ຫ້າມມອບ ຫລື ສະແດງບັນທຶກສະມາຊິກກະພາບໃຫ້ຄົນອື່ນເຫັນ ນອກຈາກອະທິການ ຫລື ສະໝຽນເທົ່ານັ້ນ.
ສະມາຊິກສາມາດເບິ່ງຂໍ້ມູນສະມາຊິກກະພາບຂອງຕົວເອງ ແລະ ຂອງລູກຄົນໃດກໍໄດ້ຂອງເຂົາເຈົ້າທີ່ອາໄສຢູ່ນຳ ທີ່ Member Tools app. ເຂົາເຈົ້າກໍສາມາດຂໍໃບສຳເນົາສະຫລຸບພິທີການຂອງເຂົາເຈົ້າໄດ້ຈາກສະໝຽນ. ຖ້າເຫັນຂໍ້ຜິດພາດໃດໆ, ສະໝຽນຕ້ອງແນ່ໃຈວ່າ ມັນຖືກແກ້ໄຂຢູ່ໃນບັນທຶກສະມາຊິກກະພາບ.
33.6.1
ຊື່ທີ່ໃຊ້ໃນບັນທຶກຂອງສາດສະໜາຈັກ
ຊື່ເຕັມຂອງບຸກຄົນຕາມກົດໝາຍ, ຕາມທີ່ກຳນົດໂດຍກົດໝາຍບ້ານເມືອງ ຫລື ຕາມຂະນົບທຳນຽມ, ຄວນຖືກໃຊ້ໃນບັນທຶກສະມາຊິກກະພາບ ແລະ ໃນໃບຢັ້ງຢືນພິທີການ.
33.6.2
ສະມາຊິກໃນບັນທຶກ
ບຸກຄົນດັ່ງຕໍ່ໄປນີ້ແມ່ນສະມາຊິກໃນບັນທຶກ ແລະ ຄວນມີບັນທຶກສະມາຊິກກະພາບ:
-
ຜູ້ທີ່ໄດ້ຮັບບັບຕິສະມາ ແລະ ການຢືນຢັນ
-
ຜູ້ທີ່ອາຍຸນ້ອຍກວ່າ 9 ປີ ທີ່ໄດ້ຮັບພອນແລ້ວ ແຕ່ຍັງບໍ່ໄດ້ຮັບບັບຕິສະມາເທື່ອ
-
ຜູ້ທີ່ບໍ່ສາມາດຮັບຜິດຊອບເພາະຄວາມພິການທາງສະຕິປັນຍາ, ບໍ່ວ່າຈະມີອາຍຸເທົ່າໃດກໍຕາມ
-
ເດັກນ້ອຍອາຍຸນ້ອຍກວ່າ 9 ປີ ທີ່ຍັງບໍ່ໄດ້ຮັບພອນເທື່ອ ເມື່ອກົງກັບສອງກໍລະນີນີ້:
-
ຢ່າງໜ້ອຍພໍ່ແມ່ຄົນໜຶ່ງ ຫລື ປູ່ຍ່າຕາຍາຍຄົນໜຶ່ງເປັນສະມາຊິກຂອງສາດສະໜາຈັກ.
-
ພໍ່ແມ່ທັງສອງຄົນອະນຸຍາດໃຫ້ສ້າງບັນທຶກ. (ຖ້າຫາກພໍ່ແມ່ພຽງຄົນດຽວມີສິດດູແລລູກຕາມກົດໝາຍ, ການອະນຸຍາດຂອງພໍ່ແມ່ຄົນນັ້ນຖືວ່າພຽງພໍແລ້ວ.)
-
ບຸກຄົນອາຍຸ 9 ປີຂຶ້ນໄປທີ່ມີບັນທຶກສະມາຊິກກະພາບ ແຕ່ຍັງບໍ່ໄດ້ຮັບບັບຕິສະມາ ແລະ ການຢືນຢັນເທື່ອ ບໍ່ໄດ້ເປັນສະມາຊິກໃນບັນທຶກ. ເຖິງຢ່າງໃດກໍຕາມ, ຫວອດທີ່ບຸກຄົນອາໄສຢູ່ຈະຮັກສາບັນທຶກສະມາຊິກກະພາບຈົນກວ່າບຸກຄົນນັ້ນມີອາຍຸໄດ້ 18 ປີ. ໃນເວລານັ້ນ, ຖ້າຫາກບຸກຄົນເລືອກບໍ່ຮັບບັບຕິສະມາ, ອະທິການຈະຍົກເລີກບັນທຶກສະມາຊິກກະພາບ. ຕ້ອງໄດ້ຮັບອະນຸຍາດຈາກປະທານສະເຕກ.
ບັນທຶກຈະບໍ່ຖືກຍົກເລີກສຳລັບຜູ້ທີ່ບໍ່ໄດ້ຮັບບັບຕິສະມາ ເພາະຄວາມພິການທາງສະຕິປັນຍາ ຍົກເວັ້ນແຕ່ຖືກຂໍໃຫ້ຍົກເລີກໂດຍບຸກຄົນ ຫລື ຜູ້ປົກຄອງຕາມກົດໝາຍ, ລວມທັງພໍ່ແມ່.
33.6.3
ບັນທຶກຂອງສະມາຊິກຫວອດຄົນໃໝ່
ສະໝຽນຫວອດ ຫລື ຜູ້ຊ່ວຍສະໝຽນຫວອດຕິດຕໍ່ຫາສະມາຊິກໃໝ່ຂອງຫວອດ ທັນທີຫລັງຈາກບັນທຶກສະມາຊິກກະພາບມາເຖິງເພື່ອກວດກາເບິ່ງຄວາມຖືກຕ້ອງຂອງໃບສະຫລຸບພິທີການ.
33.6.6
ບັນທຶກຂອງສະມາຊິກທີ່ຮັບໃຊ້ຢູ່ນອກພູມີພາກຫວອດຂອງເຂົາເຈົ້າ
33.6.6.2
ບັນທຶກຂອງຜູ້ສອນສາດສະໜາເຕັມເວລາ
ເບິ່ງ 24.6.2.8.
33.6.13
ບັນທຶກຂອງເດັກນ້ອຍທີ່ພໍ່ແມ່ຢ່າຮ້າງ
ບັນທຶກສະມາຊິກກະພາບທັງໝົດໃຊ້ຊື່ຕາມກົດໝາຍຂອງບຸກຄົນ, ດັ່ງທີ່ກຳນົດໂດຍກົດໝາຍບ້ານເມືອງ ຫລື ຂະນົບທຳນຽມ. ສິ່ງນີ້ລວມທັງເດັກນ້ອຍຂອງພໍ່ແມ່ທີ່ຢ່າຮ້າງ.
ເດັກນ້ອຍທີ່ພໍ່ແມ່ຢ່າຮ້າງສ່ວນຫລາຍຈະໄປຮ່ວມການປະຊຸມໂບດຂອງພໍ່ແມ່ທັງສອງ. ເຖິງແມ່ນວ່າຕ້ອງມີພຽງໜ່ວຍດຽວທີ່ເກັບກຳຂໍ້ມູນ ແລະ ອັບເດດຂໍ້ມູນຂອງເດັກນ້ອຍຢ່າງເປັນທາງການ, ແຕ່ບັນທຶກສະມາຊິກກະພາບຢູ່ນອກໜ່ວຍອາດຖືກສ້າງຂຶ້ນໃນຫວອດບ່ອນທີ່ເຂົາໄປຮ່ວມ. ບັນທຶກດັ່ງກ່າວຈະເຮັດໃຫ້ຊື່ ແລະ ຂໍ້ມູນຕິດຕໍ່ຂອງເດັກນ້ອຍລວມຢູ່ໃນລາຍຊື່ຂອງຫວອດ ແລະ ໃບລາຍຊື່ເຂົ້າຮ່ວມຫ້ອງຮຽນຕ່າງໆ.
ເດັກນ້ອຍທີ່ມີບັນທຶກຢູ່ນອກໜ່ວຍອາດໄດ້ຮັບການເອີ້ນໃນໜ່ວຍນັ້ນ.
33.6.15
ຂໍ້ຈຳກັດການຍ້າຍບັນທຶກສະມາຊິກກະພາບ
ຖ້າຫາກສະມາຊິກຍ້າຍລະຫວ່າງການຈຳກັດສະມາຊິກກະພາບຢ່າງເປັນທາງການ ຫລື ມີຂໍ້ກັງວົນຮ້າຍແຮງອື່ນໆ, ອະທິການ ຫລື ສະໝຽນທີ່ຖືກອະນຸຍາດ ອາດໝາຍຂໍ້ຈຳກັດການຍ້າຍໃສ່ໃນບັນທຶກສະມາຊິກກະພາບນັ້ນ. ເພິ່ນໃຊ້ LCR ເພື່ອເຮັດສິ່ງນີ້.
ບັນທຶກທີ່ມີຂໍ້ຈຳກັດການຍ້າຍຈະບໍ່ຖືກຍ້າຍໄປຫາໜ່ວຍໃໝ່ຈົນກວ່າຜູ້ນຳຖານະປະໂລຫິດທີ່ໝາຍຂໍ້ຈຳກັດອະນຸຍາດໃຫ້ລຶບມັນອອກ.
33.6.16
ບັນທຶກຈາກແຟມ “ບໍ່ຮູ້ຈັກທີ່ຢູ່”
ບາງຄັ້ງສະມາຊິກຖືກພົບເຫັນຫລັງຈາກບັນທຶກຂອງເຂົາເຈົ້າຢູ່ໃນ “ແຟມບໍ່ຮູ້ຈັກທີ່ຢູ່” ທີ່ ສຳນັກງານໃຫຍ່ຂອງສາດສະໜາຈັກ. ໃນສະຖານະການນີ້, ສະໝຽນຫວອດຈະຂໍເອົາບັນທຶກໂດຍໃຊ້ LCR.
33.6.17
ການບັນທຶກ ແລະ ການແກ້ໄຂຂໍ້ມູນພິທີການ
ເບິ່ງ ບົດທີ 18.
33.6.19
ການກວດສອບບັນທຶກສະມາຊິກກະພາບ
ແຕ່ລະປີສະໝຽນສະເຕກ ຫລື ຜູ້ຊ່ວຍສະໝຽນສະເຕກຕ້ອງແນ່ໃຈວ່າ ການກວດສອບບັນທຶກສະມາຊິກກະພາບ ມີການດຳເນີນການໃນແຕ່ລະຫວອດໂດຍໃຊ້ LCR. ການກວດສອບຄວນໃຫ້ສຳເລັດກ່ອນວັນທີ 30 ເດືອນມິຖຸນາຂອງແຕ່ລະປີ.
33.7
ບັນທຶກປະຫວັດສາດ
33.7.1
ປະຫວັດຫວອດ ແລະ ປະຫວັດສະເຕກ
ພຣະຜູ້ເປັນເຈົ້າໄດ້ບັນຊາວ່າ “ປະຫວັດສາດຂອງທຸກເລື່ອງທີ່ສຳຄັນ” ກ່ຽວກັບສາດສະໜາຈັກຂອງພຣະອົງຖືກຂຽນ ແລະ ຮັກສາໄວ້ (ຄຳສອນ ແລະ ພັນທະສັນຍາ 69:3; ເບິ່ງ ຂໍ້ທີ 5; ແອວມາ 37:2 ນຳອີກ).
ແຕ່ລະໜ່ວຍໃນສາດສະໜາຈັກຕ້ອງບັນທຶກທຸກເລື່ອງທີ່ສຳຄັນກ່ຽວກັບໜ່ວຍຂອງຕົນ.
ການເກັບຮັກສາປະຫວັດສາດເປັນວຽກງານທາງວິນຍານທີ່ຈະເພີ່ມຄວາມເຂັ້ມແຂງໃຫ້ແກ່ສັດທາຂອງຜູ້ທີ່ຂຽນ ແລະ ຜູ້ທີ່ອ່ານມັນ.
ສະໝຽນສະເຕກ ຫລື ຜູ້ຊ່ວຍສະໝຽນສະເຕກກະກຽມປະຫວັດຂອງສະເຕກ. ຝ່າຍອະທິການກໍເຮັດແບບດຽວກັນສຳລັບຫວອດຂອງຕົນ. ຄຳແນະນຳມີໃຫ້ຢູ່ທີ່ Stake, District, and Mission Annual Histories ໃນ ChurchofJesusChrist.org.
33.8
ການຮັກສາຄວາມລັບຂອງບັນທຶກ
ບັນທຶກຂອງສາດສະໜາຈັກແມ່ນເປັນຄວາມລັບ, ບໍ່ວ່າມັນຢູ່ໃນເຈ້ຍ ຫລື ທາງດິຈິຕັນກໍຕາມ. ບັນທຶກເຫລົ່ານີ້ລວມທັງ:
-
ບັນທຶກສະມາຊິກກະພາບ.
-
ບັນທຶກການເງິນ.
-
ບັນທຶກຈາກການປະຊຸມຕ່າງໆ.
-
ຟອມ ແລະ ເອກະສານທີ່ເປັນທາງການ (ລວມທັງບັນທຶກສະພາສະມາຊິກກະພາບ).
ຜູ້ນຳຕ້ອງແນ່ໃຈວ່າຂໍ້ມູນທີ່ຮວບຮວມຈາກສະມາຊິກ:
-
ແມ່ນຈຳກັດສະເພາະສິ່ງທີ່ສາດສະໜາຈັກຕ້ອງການ.
-
ຖືກໃຊ້ເພື່ອຈຸດປະສົງທີ່ສາດສະໜາຈັກອະນຸມັດເທົ່ານັ້ນ.
-
ຖືກມອບໃຫ້ຄົນທີ່ຖືກອະນຸຍາດໃຫ້ໃຊ້ເທົ່ານັ້ນ.
ຂໍ້ມູນທີ່ເກັບຮັກສາໄວ້ທາງອີເລັກໂທຣນິກຕ້ອງຮັກສາໄວ້ໃຫ້ປອດໄພ ແລະ ປົກປ້ອງຢ່າງເໝາະສົມ (ເບິ່ງ 33.9.1).
33.9
ການຄຸ້ມຄອງບັນທຶກ
33.9.1
ການປົກປ້ອງ
ບັນທຶກ, ລາຍງານ, ແລະ ຂໍ້ມູນທັງໝົດຂອງສາດສະໜາຈັກຄວນຖືກປົກປ້ອງບໍ່ໃຫ້ຄົນທີ່ບໍ່ໄດ້ຮັບອະນຸຍາດເຂົ້າເບິ່ງ, ປ່ຽນແປງ, ທຳລາຍ, ຫລື ເປີດເຜີຍ. ຂໍ້ມູນນີ້ຄວນຖືກຮັກສາໄວ້ໃນສະຖານທີ່ ທີ່ປອດໄພ.
ຖ້າຫາກອຸປະກອນ ຫລື ສື່ເກັບຮັກສາຂອງສາດສະໜາຈັກສູນຫາຍ ຫລື ຖືກລັກ ຄວນແຈ້ງທັນທີທີ່ incidents.ChurchofJesusChrist.org. ການໃຊ້ຂໍ້ມູນຂອງສາດສະໜາຈັກຢ່າງບໍ່ຖືກຕ້ອງ ກໍຄວນລາຍງານເຊັ່ນກັນ.
33.9.1.1
ຊື່ຜູ້ໃຊ້ ແລະ ລະຫັດຜ່ານ
ປະທານສະເຕກ, ອະທິການ, ແລະ ຜູ້ນຳຄົນອື່ນໆບໍ່ຄວນບອກຊື່ຜູ້ໃຊ້ ແລະ ລະຫັດຜ່ານກັບທີ່ປຶກສາ, ສະໝຽນ, ເລຂານຸການສູງສຸດ, ຫລື ຄົນອື່ນ.
33.9.1.3
ຄວາມເປັນສ່ວນຕົວຂອງຂໍ້ມູນ
ຫລາຍປະເທດອອກກົດໝາຍປົກປ້ອງຂໍ້ມູນທີ່ຄວບຄຸມການປະມວນຜົນຂໍ້ມູນສ່ວນຕົວ. ນີ້ລວມທັງຂໍ້ມູນໃນບັນທຶກສະມາຊິກກະພາບ ແລະ ບັນທຶກອື່ນໆຂອງສາດສະໜາຈັກທີ່ລະບຸບຸກຄົນ. ຜູ້ນຳທີ່ມີຄຳຖາມກ່ຽວກັບການນຳໃຊ້ກົດໝາຍປົກປ້ອງຂໍ້ມູນກັບການຄຸ້ມຄອງບັນທຶກຂອງສາດສະໜາຈັກໃນທ້ອງຖິ່ນ ສາມາດຕິດຕໍ່ຫາ Church data privacy office ທີ່ DataPrivacyOfficer@ChurchofJesusChrist.org.