33.

Dagiti Rekord ken Report

33.0

Pakauna

Kanayon a napateg ti panangidulin iti rekord iti Simbaan ti Apo. Kas pagarigan:

Nangidulin ni Adan iti “maysa a libro a pakalaglagipan” (Moises 6:5).

Insuro ni Moroni a nairekord ti nagnagan dagiti nabuniagan iti Simbaan ni Cristo tapno “malaglagip ken mataraonanda kadagiti nasayaat a balikas ti Dios” (Moroni 6:4).

Imbilin ni Joseph Smith a nasken a maawagan ti maysa a parasurat [recorder] iti tunggal ward tapno “makaaramid iti sinurat iti kinapudno iti imatang ti Apo” (Doktrina ken Katulagan 128:2).

33.1

Pakagupgopan dagiti Rekord ti Simbaan

Sagrado dagiti rekord ti Simbaan. Sensitibo ti impormasion nga adda kadagitoy ken nasken a masalakniban. Dagiti sistema ti rekord ti Simbaan ti mangipalubos iti pannakagun-od [access] iti impormasion ti kinamiembro a naibatay kadagiti calling.

Makatulong dagiti rekord kadagiti lider a:

• Mangilasin no asino ti mabalin a maaddaan iti naisangsangayan a pannakaaywan.

• Ilasin no ania dagiti ordinansa ti pannakaisalakan nga inawat wenno mabalin a kasapulan ti maysa a tao.

• Saraken dagiti miembro.

Dagiti sumaganad a kita dagiti rekord ket maidulin kadagiti yunit ti Simbaan:

• Dagiti report iti pannakiraman ti miembro (kitaen iti 33.5)

• Dagiti rekord iti kinamiembro (kitaen iti 33.6)

• Dagiti rekord iti pakasaritaan (kitaen iti 33.7)

• Dagiti rekord iti pakaseknan iti kuarta (kitaen iti kapitulo 34)

33.2

Dagiti Sapasap nga Instruksion para kadagiti Clerk

Nasken nga addaanda iti agdama a temple recommend.

Siaannad a suroten dagiti clerk dagiti agdama nga annuroten tapno masalakniban dagiti pondo ti Simbaan ken siguraduenda nga umiso dagiti rekord ti Simbaan. Dagus a pakaammuan dagiti clerk dagiti lider ti priesthood maipapan iti ania man a saan nga umiso. No tumaud dagiti rigat iti panangrisut kadagiti saan nga umiso, nasken a kontaken dagiti klerk ti Confidential Records Office iti headquarter ti Simbaan.

Telepono: 1-801-240-2053 wenno 1-800-453-3860, extension 2-2053

Toll free (GSD phone): 855-537-4357

Email: [e-mail]

Umdas koma ti kapaut ti panagserbi dagiti clerk tapno masursuroda dagiti pagrebbenganda ken mataginayon ti panagtultuloy iti trabahoda. Gapu ta saanda a miembro ti panguluen ti stake wenno bishopric, saanda a nasken a ma-release no mabukel manen ti panguluen ti stake wenno bishopric.

33.4

Dagiti Rekord ken Report iti Ward

33.4.1

Bishopric

Ti bishop ti mangimaton iti panangidulin iti rekord iti ward.

33.4.2

Clerk ti Ward

Nasken nga addaan ti tunggal ward iti qualipikado, napasnek nga agtrabaho a clerk ti ward. Ti bishopric ti mangirekomenda kenkuana ken awagan ken i-set apart ti maysa a miembro ti panguluen ti stake wenno maysa a nadutokan a nangato a konsehaI. Nasken nga addaan isuna iti Melchizedek Priesthood ken addaan iti agdama a temple recommend. Miembro isuna ti konseho iti ward. Dar-ayanna dagiti miting iti ward kas maipakita iti 29.2.

Ti clerk ti ward ket suruan ti bishopric ken dagiti clerk ti stake. Mabalin a maawagan a tumulong dagiti assistant clerk ti ward.

33.4.2.1

Pagrebbengan iti Panangidulin iti Rekord

Ti clerk ti ward, wenno nadutokan nga assistant clerk, addaan kadagiti sumaganad a pagrebbengan:

• Mangidulin iti rekord dagiti naituding nga aramiden ken pangngeddeng a naramid kadagiti miting iti panangidaulo iti ward.

• Mangsigurado nga umiso ken iti husto nga oras dagiti rekord ken report.

Nasken a pamiliar ti clerk ti ward kadagiti tools iti panamagtalinaed iti rekord ti Simbaan (kitaen iti 33.0). Usarenna dagitoy a tools tapno matulongan dagiti lider a mangilasin:

• Dagiti kasapulan dagiti miembro ken organisasion.

• Ti kaadda a magun-od dagiti resources, agraman dagiti pakaseknan iti kuarta.

Allukoyen dagiti clerk ti ward dagiti miembro a mangireport iti ania man a biddut iti impormasion ti kinamiembroda.

Mabalin a karaman iti dadduma pay a pagrebbengan iti panangidulin iti rekord ti:

• Panangsigurado a siuumno ken dagus a mairekord dagiti ordinansa.

• Panangisagana iti Officers Sustained form para iti komperensia ti ward.

• Panangirekord iti impormasion para kadagiti konseho iti kinamiembro iti ward.

• Panangpatalinaed kadagiti rekord iti pakaseknan iti kuarta (kitaen iti 34.2.2).

33.5

Dagiti Report iti Pannakiraman ti Miembro

Dagiti report maipapan iti pannakiraman ti miembro a tumulong kadagiti lider a mangipamaysa iti panagdur-as ken kasapulan dagiti miembro.

33.5.1

Dagiti Kita dagiti Report

33.5.1.1

Dagiti Report iti Attendance

Ti attendance kadagiti miting ti sakramento ken miting ti priesthood ken organisasion iti Domingo ket mairekord iti elektroniko babaen ti panangusar iti LCR wenno Member Tools.

Miting iti Sakramento. Ti attendance iti miting ti sakramento iti tunggal lawas ket irekord ti clerk ti ward wenno ti assistant clerk ti ward. Ti bilang ket ti bilang dagiti dumardar-ay iti miting iti personal wenno babaen iti streaming agraman dagiti sangaili.

Dagiti Miting iti Korum ken Organisasion iti Domingo. Ti attendance ket irekord iti tunggal lawas dagiti secretary ken mamalbalkad ti korum ken organisasion. Mabalin met a tumulong dagiti lider dagiti agtutubo iti panangirekord iti attendance. Ti bilang ket ti bilang dagiti dumardar-ay iti miting iti personal wenno babaen iti streaming agraman dagiti sangaili. Maibilang pay a dumardar-ay dagiti miembro nga agserserbi iti Primary wenno kas lider dagiti agtutubo iti uneg ti ward.

Mabalin pay nga agirekord ti clerk ti ward iti attendance a maipaay iti ania man nga organisasion.

33.5.1.2

Dagiti Report iti Interbyu iti Ministering

Kitaen iti 21.3.

33.5.1.3

Report iti Tunggal Tallo a Bulan [Quarterly Report]

Tunggal numero iti report ket mangibagi iti aktual a tao nga addaan iti naidumduma a kasapulan (kitaen iti Helaman 15:13).

Naglaon ti Quarterly Report iti makatulong nga impormasion a makaipaay kadagiti lider iti pannakaammo ken pannakaawat bayat ti panagkalikagumda a manggun-od iti inspirasion maipapan kadagiti panagkagumaanda iti ministering.

Regular nga agibasar dagiti lider ti stake ken ward iti Quarterly Report tapno mangrebyu iti panagdur-as dagiti indibidual.

Kumpletuen ken isumite ti tunggal ward ti Quarterly Report kadagiti headquarter ti Simbaan. Irebyu ti clerk ti report a kaduana ti bishop ket isumitena daytoy sakbay ti maika-15 ti bulan kalpasan ti panaggibus ti tunggal kuarter.

33.5.2

Dagiti Listaan ti Kinamiembro

Dagiti tools iti panagidulin iti rekord ti mangipaay kadagiti lider iti access kadagiti listaan iti kinamiembro. Makatulong dagitoy a listaan kadagiti lider a mangilasin:

• No asino kadagiti miembro ti saan pay a nakaawat kadagiti ordinansa a maikarida.

• No asino kadagiti agtutubo a lallaki ken agtutubo a babbai ti maikari nga agserbi iti mision.

• No asino kadagiti agtutubo ti awanan iti agdama a temple recommend.

• No asino kadagiti agtutubo ti nasken a mayiskediul para kadagiti pannakimiting iti maysa a miembro ti bishopric.

Nasken nga adda access dagiti lider ti korum ken organisasion kadagiti listaan dagiti agkameng iti korum ken organisasionda.

33.6

Dagiti Rekord ti Kinamiembro

Mairaman kadagiti rekord ti kinamiembro ti nagnagan dagiti miembro, impormasion ti kontak, detalye ti ordinansa, ken dadduma pay a napateg nga impormasion.

Nasken a maidulin dagiti rekord ti kinamiembro iti ward a pagnaedan ti miembro. Dagiti eksepsion, a manmano koma, ket agkasapulan iti pammalubos dagiti bishop ken stake president a nairaman. Tapno agkiddaw iti eksepsion, usaren ti stake president ti LCR a mangisumite iti kiddaw iti Opisina ti Umuna a Panguluen.

Napateg nga aramiden a dagus ti sumaganad:

• Irekord ti impormasion iti ordinansa.

• Yakar dagiti rekord dagiti miembro nga umakar a sumrek wenno rummuar iti ward.

• Mangparnuay kadagiti rekord para kadagiti baro a miembro ken baro nga annak dagiti nagannak a miembro.

• Irekord ti ipapatay ti maysa a miembro.

• Irekord ti impormasion maipapan iti panagkallaysa ken sangakabbalayan.

Siguraduen ti bishop wenno stake president nga adda ti rekord iti kinamiembro iti maitutop a ward sakbay a mainterbyu ti maysa a miembro tapno umawat iti:

• Maysa a calling iti Simbaan.

• Maysa a temple recommend.

• Melchizedek Priesthood wenno maordenan iti saad iti dayta a priesthood.

Siguraduenna pay a saan a mairaman iti rekord iti ania man kadagiti sumaganad:

• Maysa nga anotasion

• Maysa a komento maipapan iti pannakailantip wenno panagiget iti ordinansa

• Dagiti pormal a panagiget iti kinamiembro

Iti babaen ti ania man a kasasaad, saan a maited wenno maipakita dagiti rekord ti kinamiembro iti asino man malaksid iti bishop wenno clerk.

Mabalin a kitaen dagiti miembro ti impormasion ti kinamiembro para iti bagbagida ken para iti asino man nga agpannuray nga annak nga agnanaed iti pagtaengan iti Member Tools app. Mabalinda met ti agkiddaw kadagiti naimprenta a kopia ti Individual Ordinance Summaries-da manipud iti clerk. No adda masarakan a biddut, siguraduen ti maysa a clerk a maatur dagitoy kadagiti rekord iti kinamiembro.

33.6.1

Dagiti Nagan a Nausar kadagiti Rekord iti Simbaan

Ti naan-anay a legal a nagan ti maysa a tao, kas nailawlawag iti lokal a linteg wenno kaugalian, ti nasken a mausar kadagiti rekord ti kinamiembro ken kadagiti sertipiko ti ordinansa.

33.6.2

Dagiti Miembro ti Rekord

Dagiti sumaganad nga indibidual ket miembro ti rekord ken addaanda koma iti rekord iti kinamiembro:

• Dagiti nabuniagan ken nakumpirmaan

• Dagiti awan pay 9 ti tawenda a nabendisionan ngem saan a nabuniagan

• Dagiti awan sungsungbatanda gapu iti intelektual a pagkurangan, ania man ti edadda

• Dagiti saan a nabendisionan nga ubbing nga awan pay 9 ti tawenda no agpada a mayaplikar dagiti sumaganad:

  • Uray maysa laeng a nagannak wenno maysa a lolo ken lola ti miembro ti Simbaan.

  • Agpada a mangted dagiti nagannak iti pammalubos a maparnuay ti rekord. (No maysa laeng a nagannak ti addaan iti legal a panangaywan iti ubing, umdasen ti pammalabos dayta a nagannak.)

Ti tao nga agtawen iti 9 wenno natataengan nga addaan iti rekord ti kinamiembro ngem saan a nabuniagan ken nakumpirmaan ket saan a miembro ti rekord. Nupay kasta, ti ward a pagnanaedan ti tao ti mangpatalinaed iti rekord iti kinamiembro agingga nga agtawen ti tao iti 18. Iti dayta a panawen, no pilien ti tao ti saan a mabuniagan, ikansela ti bishop ti rekord iti kinamiembro. Kasapulan ti pammalubos ti stake president.

Saan a makansela dagiti rekord para kadagiti saan a nabuniagan gapu iti intelektual a pagkurangan malaksid no kiddawen ti tao wenno ti legal a guardian, agraman ti maysa a nagannak.

33.6.3

Dagiti Rekord dagiti Baro a Miembro ti Ward

Ti clerk ti ward wenno assistant clerk ti ward ti mangkontak kadagiti baro a miembro ti ward apaman a sumangpet dagiti rekordda iti kinamiembro tapno mangrebyu iti Individual Ordinance Summary para iti kinaumisu.

33.6.6

Dagiti Rekord dagiti Miembro nga Agserserbi iti ruar ti Heograpiko ti Wardda

33.6.6.2

Dagiti Rekord dagiti Full-Time a Misionario

Kitaen iti 24.6.2.8.

33.6.13

Dagiti Rekord dagiti Annak dagiti Nagdiborsio a Nagannak

Mausar iti amin a rekord ti kinamiembro ti legal a nagan ti maysa a tao, kas ilawlawag ti lokal a linteg wenno kaugalian. Iraman daytoy dagiti annak dagiti nagannak a nagdiborsio.

Dagiti ubbing nga addaan iti nagdiborsio a nagannak ket masansan a dumar-ay kadagiti miting ti Simbaan iti ward ti agpada a nagannak. Idinto a maysa laeng a yunit ti mabalin a mangidulin ken mangpabaro iti opisial a rekord ti kinamiembro ti maysa nga anak, mabalin a maparnuay ti rekord ti miembro iti ruar-ti-yunit iti sabali a ward a dardar-ayanna. Daytoy ti mangipalubos a mairaman ti nagan ken impormasion iti kontak ti anak kadagiti listaan ti ward ken iti klase.

Dagiti annak nga addaan iti rekord ti miembro iti ruar-ti-yunit ket mabalin nga umawat iti calling iti dayta a yunit.

33.6.15

Yakar dagiti Panagiget kadagiti Rekord ti Kinamiembro

No umakar ti maysa a miembro idinto a naka-pending dagiti pormal a panagiget ti kinamiembro wenno sabali pay a nadagsen a pakaseknan, mabalin nga ikabil ti bishop wenno ti napusgan a clerk ti panagiget iti panagakar iti rekord ti kinamiembro. Usarenna ti LCR a mangaramid iti daytoy.

Ti rekord nga addaan iti panagiget iti panagakar ket saan a mayakar iti baro a yunit agingga a saan nga ipalubos ti lider ti priesthood a nangikabil iti panagiget a maikkat daytoy.

33.6.16

Dagiti Rekord manipud iti “Address Unknown” File

Masarakan no dadduma ti maysa a miembro kalpasan nga addan ti rekordna iti “address unknown file” kadagiti headquarter ti Simbaan. Iti daytoy a situasion, kiddawen ti clerk ti ward ti rekord nga us-usarenna ti LCR.

33.6.17

Panangirekord ken Panangatur iti Impormasion iti Ordinansa

Kitaen iti kapitulo 18.

33.6.19

Dagiti Awdit dagiti Rekord ti Kinamiembro

Tunggal tawen siguraduen ti clerk ti stake wenno assistant clerk ti stake a maaramid ti awdit dagiti rekord ti kinamiembro iti tunggal ward nga us-usaren ti LCR. Nasken a malpas dagiti awdit iti Hunio 30 ti tunggal tawen.

33.7

Dagiti Rekord iti Pakasaritaan

33.7.1

Dagiti Pakasaritaan ti Ward ken Stake

Imbilin ti Apo a maisurat ken maidulin ti “pakasaritaan ti amin a napateg” a banag maipapan iti Simbaanna (Doktrina ken Katulagan 69:3; kitaen met iti bersikulo 5; Alma 37:2).

Tunggal yunit iti Simbaan ket mangidokumento iti amin a napapateg a banag maipanggep iti yunit.

Ti panangidulin iti pakasaritaan ket maysa a naespirituan nga aramid a mangpapigsanto iti pammati dagiti agsurat ken mangbasa iti daytoy.

Isagana ti clerk ti stake wenno assistant clerk ti stake ti pakasaritaan ti stake. Suroten ti bishopric ti isu met la a pamay-an [approach] para iti ward. Adda a magun-od dagiti instruksion iti Dagiti Tinawen a Pakasaritaan ti Stake, District, ken Mission iti ChurchofJesusChrist.org.

33.8

Kumpidensialidad dagiti Rekord

Kumpidensial dagiti rekord ti Simbaan, adda man dagitoy iti papel wenno digital. Iraman dagitoy:

• Dagiti rekord ti kinamiembro.

• Dagiti rekord iti pakaseknan iti kuarta.

• Dagiti naisurat [notes] manipud kadagiti miting.

• Dagiti opisial a porma ken dokumento (agraman dagiti rekord dagiti konseho ti kinamiembro).

Siguraduen dagiti lider a ti impormasion a maurnong manipud kadagiti miembro ket:

• Limitado iti no ania ti idawat ti Simbaan a kasapulan.

• Mausar laeng kadagiti naanamongan a panggep ti Simbaan.

• Maited laeng kadagiti awtorisado nga agusar iti daytoy.

Nasken a maitalimeng a natalged ken masaluadan a nasayaat ti impormasion a maurnong iti elektroniko (kitaen 33.9.1).

33.9

Panangimaton kadagiti Rekord

33.9.1

Panangsaluad

Nasken a masalakniban ti amin a rekord, report, ken datos ti Simbaan iti saan nga awtorisado a pannakagun-od [access], panagbalbaliw, pannakadadael, wenno pannakaipablaak. Nasken a maidulin daytoy nga impormasion iti maysa a natalged a lugar.

Nasken a maireport a dagus dagiti napukaw wenno natakaw a device wenno storage media a kukua ti Simbaan iti incidents.ChurchofJesusChrist.org. Nasken pay a maireport ti saan nga umiso a pannakausar ti impormasion ti Simbaan.

33.9.1.1

Dagiti Username ken Password

Saan a kaano man nga ibinglay dagiti stake president, bishop, ken dadduma pay a lider ti Church username ken password-da kadagiti mamagbaga, clerk, executive secretary, wenno dadduma pay.

33.9.1.3

Data Privacy

Adu a pagilian ti nangipaulog kadagiti linteg a mangsalaknib iti datos a mang-regulate iti pannakaproseso ti personal a datos. Iraman daytoy ti impormasion kadagiti rekord iti kinamiembro ken dadduma pay a rekord ti Simbaan a mangilasin kadagiti indibidual. Dagiti lider nga addaan kadagiti saludsod maipapan iti pannakaipakat dagiti linteg a mangsalaknib iti datos iti lokal a panangtarawidwid kadagiti rekord ti Simbaan ket mabalinda a kontaken ti opisina ti data privacy ti Simbaan iti [e-mail].