34.

Veika Vakailavo kei na Dikevi ni Fika

34.0

Ai Vakamacala Taumada

Na ikatini kei na isolisoli tale eso e rawa kina vua na Lotu me tosoya na cakacaka ni veivakabulai kei na bula vakacerecerei ni Turaga (raica na 1.2). Era sa ka tabu na ilavo oqo. Era matataka na nodra solibula kei na nodra vakabauta na lewe ni Lotu (raica na Marika 12:41–44).

34.2

Veiliutaki ni Veika Vakailavo ena Tabanalevu

34.2.1

Matabisopi

Sa ikoya oqo na itavi ni bisopi me baleta na ilavo ni tabanalevu. Me lesia eso na cakacaka oqo ki vei rau na nona daunivakasala kei na vunivola.

Na bisopi:

• Ena vakavulici ira ka vakauqeti ira na lewenilotu me ra dau sauma vakadodonu na nodra ikatini ka solia vakalevu na isolisoli tale eso (raica na 34.3).

• Ena vakadeitaka ni ra sa vakayagataki vakadodonu ka volaitukutukutaki na ilavo ni tabanalevu (raica na 34.5).

• Railesuva na itukutuku vakailavo ena veivula ka vakadeitaka ni sa qaravi vakatotolo na veika a dodonu me cakacakataki.

• Raica me ra vulica na iliuliu ni mataisoqosoqo kei na vunivola na nodra itavi me baleta na ilavo tabu ni Lotu.

• Vakarautaka ka vakatulewataka na ilavovakarau vakayabaki ni tabanalevu (raica na 34.6).

• Sota vakayabaki kei ira na lewe ni tabanalevu me ra ciqoma na nodra itukutuku ni ikatini.

34.2.2

Vunivola ni Tabanalevu

Me lesia o bisopi na vunivola ni tabanalevu se dua na ivukevuke ni vunivola me na veivuke ena kena maroroi na ivolatukutuku ni veika vakailavo. Me ra na vakamuria vakadodonu o ira na vunivola na lawatu ni gauna oqo me na taqomaki vakavinaka kina na ilavo ni Lotu ka raica me dodonu vakavinaka tu na ivolatukutuku ni Lotu.

Sa koto oqori e ra na nona itavi na vunivola:

• Volaitukutukutaka ka maroroya na ilavo kece e ciqomi vata kei na dua na lewe ni matabisopi.

• Railesuva na itukutuku vakailavo ena veivula ka vakadeitaka ni sa wali vakatotolo na veika kece a dodonu me cakacakataki.

• Vukei iratou na matabisopi me ratou vakarautaka na ilavovakarau vakayabaki ni tabanalevu (raica na 34.6.1 kei na 34.6.2).

• Vakadeitaka ni ra rawa ni raica na lewenilotu na nodra itukutuku ni cau ka veivuke kevaka e gadrevi.

E dodonu me ra lewe ni Matabete i Melikiseteki na vunivola ka tiko na nona ivolatara ni valetabu.

34.3

Na Cau

34.3.1

iKatini

Na ikatini sa ikoya na kena soli na ikatini ni ilavo e rawata e dua ki na Lotu ni Kalou (raica na Vunau kei na Veiyalayalati 119:3–4; ni ka era rawata e kena ibalebale na ilavo era rawata). O ira kece na lewenilotu era rawa ilavo e dodonu me ra sauma na ikatini.

34.3.1.2

Veivakadeitaki ni iKatini

Ena dau sota vata kei ira yadua na lewenilotu o bisopi ena iotioti ni vica na vula e veiyabaki me ciqoma kina na nona itukutuku ni ikatini.

Era sa sureti kece na lewenilotu me ra sota vata kei na bisopi me:

• Vakaraitaka vei bisopi na kedra ituvaki ni saumi ikatini.

• Vakadeitaka ni sa dodonu vinaka na nodra ivolatukutuku ni cau.

Ke rawa, me ra tiko na lewe ni matavuvale kece, oka kina o ira na gone ena veivakatarogi ni soli ikatini.

34.3.2

Na iSolisoli ni Lolo

Me ra vakayaloqaqataki ira na lewenilotu o ira na iliuliu ni Lotu me ra bulataka na lawa ni lolo. Oqo e oka kina na soli ni isolisoli ni lolo ena lomasoli (raica na 22.2.2).

Na idusidusi ni kena vakayagataki na isolisoli ni lolo sa vakarautaki tu ena 22.5.2

34.3.3

iLavo ni Kaulotu

Na cau ki na ilavo ni kaulotu ni tabanalevu e vakayagataki vakatabakidua me veivuke ki na ilavo lavaki vei ira na daukaulotu tudei mai na tabanalevu.

Na cau ki na iLavo Raraba ni Daukaulotu e vakayagataka na Lotu me baleta na sasaga taucoko ni kaulotu.

34.3.7

E Sega ni Rawa ni Vakalesui Tale na Cau

Ni sa soli na ikatini kei na isolisoli tale eso ki na Lotu, era sa nona na Turaga. Era sa vakatabui Vua.

Sa dodonu vei peresitedi ni iteki kei na bisopi me rau dau tukuna vei ira era cau mai ena ikatini kei na veisolisoli tale eso ni cau oqori ena sega ni rawa ni soli lesu tale.

34.4

Taqomaki ni iTukutuku ni iKatini kei na iSolisoli Tale Eso

Sa itukutuku taqomaki na ikatini kei na isolisoli tale eso e solia e dua na lewenilotu. O bisopi duadua ga kei ira sa vakadonui me ra qarava se raica na cau oqo e dodonu me ra rawa ni raica na itukutuku oqo.

34.5

Qaravi ni Lavo ni Lotu

Me rau vakadeitaka na peresitedi ni iteki kei bisopi ni sa qaravi vakavinaka na ilavo taucoko ni Lotu. Era sa vakayaloqaqataki na matabisopi kei na vunivola me ra raicalesu na vidio “Sacred Funds, Sacred Responsibilities” ke lailai me vakadua e veiyabaki.

34.5.1

iVakavuvuli ni Veitokani

Na ivakavuvuli ni veitokani e gadrevi kina e rua na tamata—e dua mai na matabisopi kei na dua na vunivola, se rua mai na matabisopi—me rau vakaitavi kina vakavinaka ena kena volaitukutukutaki ka vakayagataki na ilavo ni Lotu.

E dodonu me ra taqomaka ka kakua ni wasea na nodra vosanicuru o ira na iliuliu (raica na 33.9.1.1).

34.5.2

Ciqomi ni iKatini kei Na iSolisoli Tale Eso

Sa solia na Turaga vei ira na bisopi na veivakabauti tabu ni kena ciqomi ka vakaivolataki vakadodonu na nodra ikatini kei na isolisoli tale eso na Yalododonu (raica na Vunau kei na Veiyalayalati 42:30–33; 119). O bisopi duadua ga kei rau na nona daunivakasala ena ciqoma na ikatini kei na isolisoli tale eso. E tabu dredre sara vei ira na watidra, lewe ni matavuvale tale eso, vunivola, se so tale na lewenilotu ena tabanalevu me ra ciqoma na isolisoli oqo.

34.5.3

Wiliki kei na Volaitukutukutaki ni iKatini kei na iSolisoli Tale Eso

Me na vakadeitaki ka volai na cau ena Sigatabu era ciqomi kina. E rau na dolava vata na waqanivola yadua e dua ena matabisopi kei na dua na vunivola, se rua ena matabisopi. E rau na vakadeitaka ni sa tautauvata na ilavo e volai tu ena fomu ni iKatini kei na iSolisoli Tale Eso kei na ilavoqaqa e tiko ena waqanivola. E rau na volaitukutukutaka vakavinaka na cau yadua. Ke rau duidui na levu ni ilavo kei na kena e volai tiko, me na laurai sara vakatotolo o koya a solia mai me vakadodonutaki kina na duidui o ya.

34.5.4

Vakacurumi ni iKatini kei na iSolisoli Tale Eso

E dodonu me vakarautaki e dua na risiti ni vakacuruilavo ni sa vakadeitaki ni veidonui na levu ni ilavo e volaitukutukutaki kei na ilavoqaqa e ciqomi.

Ena vanua e tiko kina na misini ni vakacuru ilavo ka dola tu vaka 24 na auwa, me rau na vakacuruma na ilavo ki na baqe na lewe ni matabisopi kei na dua mai na Matabete i Melikiseteki ena siga vata ga a dolavi ka veidutaitaki kina na ilavo.

Na vanua e sega kina na baqe ni vakacuruilavo 24 na auwa ka dau sogo na baqe ena Sigatabu me lesia o bisopi e dua na Matabete i Melikiseteki me na vakacuruma na ilavo ena siga ni cakacaka ka tarava. E dodonu o koya me:

• Raica ni sa taqomaki vakavinaka tiko na ilavo me yacova ni sa vakacurumi.

• Taura mai e dua na risiti ni vakacuru ilavo ka tiko kina na tikinisiga kei na levu ni ilavo e vakacurumi.

34.5.5

Taqomaki ni iLavo ni Lotu

O ira na lewenilotu ka nodra ilesilesi me ra raica na ilavo ni Lotu, me ra kakua ni biuta tu vakabogi e valenilotu se biuta tu vakaveitalia ena dua na gauna, me vaka ena gauna ni soqoni kei na itaviqaravi.

34.5.7

Qaravi ni Sausaumi ni iTeki kei na Tabanalevu

Ena sega ni vakadonui se saumi e dua na vakayagataki ilavo ni iteki se tabanalevu ke sega ni vakadonuya o koya e vakatulewa tiko kina.

Me rau na vakadonuya e rua na iliuliu vakadonui na sausaumi yadua. E dua vei rau e dodonu me lewe ni mataveiliutaki ni iteki se matabisopi. E dina ga ni rawa ni vakatarai vei rau na daunivakasala me rau vakadonuya na sausaumi, e dodonu me rau railesuva na peresitedi ni iteki se bisopi na sausaumi yadua. Me ra kakua ni vakadonuya na iliuliu e dua na sausaumi e baleti ira.

E gadrevi na veivakadonui vakaivola nei peresitedi ni iteki ni bera ni qai vakayagataka o bisopi e dua na isolisoli ni lolo se vakadonuya na ota ni bisopi me baleti koya se nona matavuvale. Ena gadrevi taumada na veivakadonui vakaivola mai vua e dua ena Mataveiliutaki ni iWasewase ni bera ni vakayagataka o bisopi na isolisoli ni lolo se vakadonuya e dua na ota ni bisopi me baleti peresitedi ni iteki se nona matavuvale. Raica na 22.5.1.2 me baleta na idusidusi.

E dua na lewenilotu e kerea na sausaumi lesu ena vakarautaka e dua na ilavelave pepa se vakalivaliva ni dua na risiti se inivosi. Ena okata talega kina o koya na inaki, kena levu, kei na tikinisiga ni volivoli.

Kevaka e soli iliu na ilavo, ena vakauta na lewenilotu e dua na fomu ni kerei ni sausaumi, ka vola toka kina na kena inaki, levu ni ilavo, kei na tikinisiga. Ni sa saumi oti na ilavo, sa na qai vakarautaka na lewenilotu (1) na risiti se inivosi me baleta na ilavo e vakayagataki ka (2) vakasuka na ilavo sega ni vakayagataki. Na ilavo e vakasukai mai e dodonu me vakacurumi lesu tale.

34.5.9

Maroroi ni iVolatukutuku Vakailavo

Sa nona itavi na iteki kei na tabanalevu yadua me maroroya tiko na ivolatukutuku dodonu ni vakayagataki ilavo sa vakayacori tiko.

Ena itukutuku me baleta na kena vakayagataki ka maroroi na ivolatukutuku kei na ripote, e dodonu me ra rai na vunivola ki na idusidusi mai na valenivolavola liu ni Lotu se na valenivolavola ni iwasewase. Me na dau maroroi tu ga na ivolatukutuku vakailavo me tolu sara na yabaki ke lailai ka oka kina na yabaki oqo.

34.6

iLavovakarau kei na Kena Vakayagataki

Na parokaramu ni ilavo tuvanaki e vakarautaka na ilavo raraba ni Lotu me saumi kina na vei itaviqaravi kei na parokaramu ena iteki kei na tabanalevu.

Na itaviqaravi e dodonu me ra rawarawa ga ka lailai se sega sara ga ni dua na ilavo e vakayagataki kina.

34.6.1

iLavovakarau ni iTeki kei na Tabanalevu

Era na vakarautaka ka cici na iteki kei na tabanalevu kece sara ena dua na ilavovakarau. Ena vakatulewataka na peresitedi ni iteki na ilavovakarau ni iteki, ka vakatulewataka na bisopi na ilavovakarau ni tabanalevu.

Na idusidusi sa tuvai koto e ra:

• Vakadikeva na levu ni ilavo a vakayagataki ena yabaki sa oti ka me nanumi tiko na veika vakatabakidua e gadreva na sausaumi ena veiyabaki.

• Kerei ira na veisoqosoqo me ra dau cakacakataka vakamatailalai na nodra gagadre ni ilavovakarau.

• Biuta vata na ilavovakarau ena kena vakayagataki na ivakarau vakadonui ni tuvailavo.

34.6.2

iLavo Vakarau

34.6.2.1

Votai ni iLavovakarau

Sa vakarautaki vakavulatolu na ilavo ni tuvailavo ka yavutaki mai na iwiliwili nodra era tiko rawa ena iwasewase eso oqo:

• Soqoni ni sakaramede

• Cauravou

• Goneyalewa

• Gonelalai ena Lalai yabaki 7-10

• iTabagone qasecake sega ni vakawati

Sa ka bibi me ripotetaki vakadodonu na iwiliwili nodra era dau tiko rawa ka vakayacori ena kena gauna (raica na 33.5.1.1).

34.6.2.2

Vakayagataki Donu ni iLavoVakarau

Me raica o peresitedi ni iteki kei bisopi na kena vakayagataki vakayalomatua na ilavo vakarau.

E dodonu me vakayagataki ga na ilavo tuvanaki ni iteki kei na tabanalevu me saumi kina na itaviqaravi, parokaramu, ivolavakarau, kei na iyaya ni veiqaravi.

34.6.2.3

iLavovakarau e Sega ni Vakayagataki

E sega ni dodonu me vakayagataki na ilavovakarau e sega ni vakayagataki. Me na vakau lesu ki na iteki na ilavo ni tabanalevu e sega ni vakayagataki.

34.7

Dikevi Fika

34.7.1

Komiti ni Dikevi ni Fika ni iTeki

Ena lesia o peresitedi ni iteki e dua na komiti ni dikevi fika ni iteki. Ena raica na komiti oqo me na vakayagataki na ilavo ni iteki kei na tabanalevu me vaka na lawatu ni Lotu.

34.7.3

Na Dikevifika Vakailavo

O ira na daudikevi fika ni iteki era na dikeva vakarua ena veiyabaki na ivolatukutuku vakailavo ni iteki, tabanalevu, kei na valenivolavola ni FamilySearch.

Me rau na dau tu vakavoleka o koya na vakaitutu e vakatulewa tiko ena tabanilotu vata kei vunivola sa lesi me rau na saumi taro tiko ena gauna ni dikevi fika.

34.7.5

Yali, Butakoci se Vakayagataki Vakailoa ni iLavo ni Lotu

Me na tukuni sara vakatotolo vei peresitedi ni iteki se jeameni ni komiti ni dikevi fika ni iteki kevaka e:

• Yali se butakoci na ilavo ni Lotu.

• Lawakitaka se vakayagataka vakatani e dua na iliuliu na ilavo ni Lotu.