33.

iVolatukutuku kei na Ripote

33.0

Ai Vakamacala Taumada

Na maroroi itukutuku e sa dua na ka bibi ena Lotu ni Turaga. Me kena ivakaraitaki:

A maroroya o Atama “e dua na ivola ni vakananumi” (Mosese 6:5).

A vakatavulica o Moronai ni yacadra o ira era a papitaisotaki ena Lotu i Karisito era a volaitukutukutaki me rawa ni “ra na daunanumi ka vakani ena vosa vinaka ni Kalou” (Moronai 6:4).

E vakarota o Josefa Simici ni sa dodonu me kacivi e dua na vunivola ena veitabana levu kece me “vola e dua na itukutuku ni ka dina vua na Turaga” (Vunau kei na Veiyalayalati 128:2).

33.1

Raici Raraba ni iVolatukutuku ni Lotu

Era sa ka tabu na ivolatukutuku ni Lotu. Na itukutuku e tiko kina e ririkotaki ka dodonu me taqomaki vinaka. Na ivakarau ni ivolatukutuku ni Lotu e vakatarai kina na kena laurai na itukutuku ni lewenilotu ka yavutaki ena veikacivi.

Na ivolatukutuku e rawa ni vukei ira na iliuliu me ra:

• Raica se o cei e gadreva na veikauwaitaki bibi.

• Raica na cakacaka vakalotu cava ni veivakabulai sa ciqoma e dua na tamata se ena rairai gadreva.

• Kunei ira na lewenilotu.

Oqo na veimataqali ivolatukutuku era maroroi tu ena veitabanilotu ena Lotu:

• Ripote ni nodra vakaitavi na lewenilotu (raica na 33.5)

• iVolatukutuku ni lewenilotu (raica na 33.6)

• iVolatukutuku makawa (raica na 33.7)

• iVolatukutuku vakailavo (raica na wase e 34)

33.2

iVakasala Raraba vei ira na Vunivola

E dodonu me tiko e dua na nodra ivolatara ni valetabu.

Me ra na vakamuria vakadodonu o ira na vunivola na lawatu ena gauna oqo me na taqomaki vakavinaka kina na ilavo ni Lotu ka raica me dodonu vinaka na ivolatukutuku ni Lotu. Era na tukuna sara yani vakatotolo o ira na vunivola vei ira na iliuliu ni matabete na veika ke so na ka e sega ni dodonu. Kevaka e yaco na veika dredre ena kena wali na veika sega ni dodonu, sa dodonu me ra veitaratara na vunivola ki na Valenivolavola ni iTukutuku Maroroi ena valenivolavola liu ni Lotu.

Talevoni: 1-801-240-2053 se 1-800-453-3860, isema 2-2053

Sega ni saumi (talevoni GSD): 855-537-4357

Imeli: [e-mail]

Na gauna ni nodra veiqaravi na vunivola e dodonu me veirauti me ra vulica kina na nodra itavi ka tomana tiko na toso ni nodra cakacaka. E baleta ni ra sega ni lewe ni mataveiliutaki ni iteki se matabisopi, e sega kina ni gadrevi me ra vakacegui ena gauna e dau veisau kina na mataveiliutaki ni iteki kei na matabisopi.

33.4

iVolatukutuku kei na Ripote ni Tabanalevu

33.4.1

Matabisopi

Sa itavi nei bisopi me na raica raraba na kena maroroi na ivolatukutuku ni tabanalevu.

33.4.2

Vunivola ni Tabanalevu

Na veitabanalevu taucoko e dodonu me tiko e dua na kena vunivola veiganiti, dau cakacaka ka kila na ka me cakava. Ena vakatututaki mai vei iratou na matabisopi ka kacivi ka vakatikori mai vua e dua na lewe ni mataveiliutaki ni iteki se dua na lewe ni matabose e cake sa lesi. E dodonu me lewena na Matabete i Melikiseteki ka tiko na nona ivolatara ni valetabu. E lewe talega ni matabose ni tabanalevu o koya. Ena dau tiko ena veisoqoni ni tabanalevu me vaka e vakaraitaki ena 29.2.

Ena vakavulici o vunivola ni tabanalevu mai vei iratou na matabisopi kei na vunivola ni iteki. E rawa ni ra kacivi na ivukevuke ni vunivola ni tabanalevu me ra veivuke.

33.4.2.1

iTavi Eso ni Maroroi-iVolatukutuku

Sa vakaoqo na itavi nei vunivola ni tabanalevu, se dua na ivukevuke ni vunivola sa lesi:

• Ena dau vola na itukutuku ni ilesilesi kei na lewa e vakayacori ena bose ni veiliutaki ni iliuliu ena tabanalevu.

• Vakadeitaka ni ivolatukutuku kei na ripote era sa dodonu vinaka ka volai ena gauna donu.

Me na kila vakavinaka o vunivola ni tabanalevu na iyaya ni maroroi itukutuku ni Lotu (raica na 33.0). Ena vakayagataka o koya na veiyaya ni cakacaka oqo me vukei ira na iliuliu me ra raica rawa:

• Na nodra gagadre na lewenilotu kei na mataisoqosoqo.

• Me vakarautaki tu na ivurevure, ka oka kina na veika vakailavo.

Era na veivakayaloqaqataki na vunivola ni tabanalevu vei ira na lewenilotu me ra ripotetaka eso na cala ka tiko ena nodra itukutuku ni lewenilotu.

Na itavi tale eso ni maroroi itukutuku e rawa ni oka kina na:

• Vakadeitaka ni sa volaitukutukutaki vakavinaka ena kena gauna totolo na cakacaka vakalotu.

• Vakarautaka na fomu ni nodra Tokoni na Vakailesilesi ni Lotuena koniferedi ni tabanalevu.

• Katoni ni itukutuku me baleta na matabose ni lewenilotu ni tabanalevu.

• Maroroya na ivolatukutuku vakailavo (raica na 34.2.2

33.5

Ripote ni Nodra Vakaitavi na Lewenilotu

Na ripote ni nodra vakaitavi na lewenilotu ena vukei ira na iliuliu me ra vakanamata ki na nodra toso kei na nodra gagadre na lewenilotu.

33.5.1

Veimataqali Ripote

33.5.1.1

Ripote ni iWiliwili ni Tamata era Tiko Rawa

Na iwiliwili ni tiko rawa ena soqoni ni sakaramede kei na soqoni ni matabete kei na mataisoqosoqo ena Sigatabu e volaitukutukutaki vakalivaliva ena kena vakayagataki na VLV se iYaya ni Cakacaka ni Lewenilotu.

Soqoni ni Sakaramede. Ena dau vola o vunivola ni tabanalevu se dua na nona ivukevuke na iwiliwili ni tamata e tiko rawa ena soqoni ni sakaramede e veimacawa. Na iwiliwili sa ikoya na iwiliwili ni tamata era tiko rawa ena soqoni se era sarava tiko mai ena initaneti, ka oka kina o ira na vulagi.

Soqoni ni Kuoramu kei na Mataisoqosoqo ena Sigatabu. Ena dau volai e veimacawa na iwiliwili ni tamata era tiko rawa mai vei ira na sekeriteri kei na daunivakasala ena kuoramu kei na mataisoqosoqo. E rawa talega ni ra veivuke na iliuliu ni itabagone ena volaitukutukutaki ni tiko rawa. Na iwiliwili sa ikoya na iwiliwili ni tamata era tiko ena soqoni se o ira era sarava tiko mai ena initaneti, ka oka kina o ira na vulagi. O ira na lewenilotu era veiqaravi tiko ena Lalai se iliuliu ni itabagone ena loma ni tabanalevu era okati talega me ra tiko rawa.

Sa rawa vua na vunivola ni tabanalevu me vola na iwiliwili era tiko rawa ena vukudra na mataisoqosoqo cava ga.

33.5.1.2

Ripote ni Veivakatarogi ni Veiqaravi

Raica na 21.3.

33.5.1.3

Ripote Vakavulatolu

Na iwiliwili kece ena ripote e matataka e dua na tamata ka tiko na nodra dui gagadre (raica na Ilamani 15:13).

Na Ripote Vakavulatolue lewena tu na itukutuku yaga ka rawa ni solia vei ira na veiliutaki na veivakararamataki ni ra vakasaqara na veivakauqeti me baleta na nodra sasaga ni veiqaravi.

Era na dau raica na veiliutaki ni iteki kei na tabanalevu na Ripote Vakavulatoluena veigauna lokuci eso me railesuvi kina na nodra toso na tamata yadua.

Era na vakalewena ka vakauta yani na tabanalevu yadua e dua na Ripote Vakavulatolu ki na itikotiko liu ni Lotu. Ena railesuva o vunivola na ripote vata kei bisopi ka vakauta yani ni bera na ika 15 ni vula e tarava na veivulatolu yadua.

33.5.2

Lisi ni Lewenilotu

Na iyaya ni cakacaka ni maroroi itukutuku ni Lotu e rawa kina vei ira na iliuliu me ra raica na lisi ni lewenilotu. Na lisi oqo e rawa ni vukei ira na iliuliu me ra raica rawa:

• Na lewenilotu era sa bera ni ciqoma na cakacaka vakalotu e sa ganiti ira.

• Na cauravou kei na goneyalewa e rawa ni ra kaulotu.

• Na itabagone e sega ni tiko na nona ivolatara ni valetabu.

• Na itabagone me na vakarautaki me sota kei na dua ena matabisopi.

E dodonu me ra yadua tiko na lisi oqo na iliuliu ni kuoramu kei na mataisoqosoqo baleti ira na lewena tiko na nodra kuoramu kei na mataisoqosoqo.

33.6

iVolatukutuku ni Lewenilotu

Na ivolatukutuku ni lewenilotu e oka kina na yacadra na lewenilotu, itukutuku ni veitaratara, ivakamacala ni cakacaka vakalotu, kei na itukutuku bibi tale eso.

Na ivolatukutuku ni lewenilotu e dodonu me na maroroi tiko ena tabanalevu e vakaitikotiko kina na lewenilotu. Kevaka me dua tale na ka e rawa ni caka, ka dau vakavudua sara, ena gadrevi kina na nodra veivakadonui na bisopi kei na peresitedi ni iteki. Me kerei e dua tale na ka me caka, ena vakayagataka na peresitedi ni iteki na VLV me vakauta na kerekere ki na Valenivolavola ni Mataveiliutaki Taumada.

Sa ka bibi sara me vakayacori vakatotolo na veika ka koto oqo:

• Vola na itukutuku ni cakacaka vakalotu.

• Tosoya na ivolatukutuku ni lewenilotu era curu mai se toki tani mai na tabanalevu.

• Tauyavutaka na ivolatukutuku me baleti ira na lewenilotu vou kei ira na gone sucu vou ni itubutubu lewenilotu.

• Vola na mate ni dua na lewenilotu.

• Volaitukutukutaka na itukutuku ni vakamau kei na matavuvale.

Me raica o bisopi se peresitedi ni iteki ni sa tiko ena tabanalevu e veiganiti e dua na ivolatukutuku ni lewenilotu ni bera ni vakatarogi e dua na lewenilotu me ciqoma:

• E dua na veikacivi ena Lotu.

• E dua na ivolatara ni valetabu.

• Na Matabete i Melikiseteki se me tabaki ki na dua na itutu ena matabete oya.

Me vakadeitaka talega ni sega ni okati ena ivolatukutuku e dua vei ira oqo:

• Dua na iVakatakilakila

• E dua na ivakamacala me baleta na vakatatabu ni veivauci se cakacaka vakalotu

• Vakatatabu vakaivolataki ni lewenilotu

Me kakua vakadua ni soli se vakaraitaki vua e dua tale na ivolatukutuku ni lewenilotu vakovo ga vei bisopi se o vunivola.

E rawa ni ra raica na lewenilotu na itukutuku ni lewenilotu me baleti ira kei ira na gone era se qarava tiko e vale ena app ni iYaya ni Lewenilotu. Sa rawa talega me ra kerea na ilavelave tabaki ni nodra iVakaleka ni Cakacaka Vakalotu ni Tamata Yadua mai vua na vunivola. Kevaka era kune kina eso na cala, me na raica o vunivola na kedra vakadodonutaki ena ivolatukutuku ni lewenilotu.

33.6.1

Na Yaca ena iVolatukutuku ni Lotu

Na yaca taucoko vakalawa ni dua na tamata, me vaka e kilai tiko vakalawa se vakavanua, me na vakayagataki ena ivolatukutuku ni lewenilotu kei na sitivikiti ni cakacaka vakalotu.

33.6.2

Lewenilotu ena iVolatukutuku

O ira oqo era lewenilotu vakaivola ka dodonu me tiko na nodra ivolatukutuku ni lewenilotu:

• O ira sa papitaiso ka vakadeitaki

• O ira e sa bera ni yabaki 9 era sa masulaki ka se bera ni papitaiso

• O ira era sega ni rawa ni vakatulewa vakataki ira ena vuku ni leqa ni nodra vakasama, se cava ga na yabaki ni nodra bula

• O ira na gone sa bera ni vakalougatataki ka sa bera ni yabaki 9 ke ruarua na veika oqo:

  • E dua mada ga vei rau na itubutubu se dua na tubunigone e lewena na Lotu.

  • Rau sa vakadonuya ruarua na itubutubu me buli e dua na ivolatukutuku. (Kevaka e dua ga na itubutubu e soli vakalawa vua na gone, sa veirauti na veivakadonui nei itubutubu o ya.)

E dua na tamata sa yabaki 9 se qase cake ka tiko na nona ivolatukutuku ni lewenilotu ia e sa bera ni papitaiso ka sa vakadeitaki ni sega ni lewenilotu vakaivola. Ia, ena maroroya tikoga na tabanalevu e vakaitikotiko kina na ivolatukutuku ni lewenilotu me yacova ni sa yabaki 18. Ena gauna oya, kevaka e digitaka na tamata oya me kakua ni papitaiso, ena bokoca na bisopi na ivolatukutuku ni lewenilotu. E na gadrevi na veivakadonui nei peresitedi ni iteki.

Ena sega ni bokoci na ivolatukutuku me baleti ira era sa bera ni papitaiso ena vuku ni vakaleqai ni vakasama vakavo ga ke kerea mai na tamata o ya se dua na dauveisusu vakalawa, oka kina e dua na itubutubu.

33.6.3

iVolatukutuku ni Lewenilotu Vou ni Tabanalevu

Me na veitaratara o vunivola ni tabanalevu se o nona ivukevuke ki vei ira na lewenilotu vou e na tabanalevu ni se qai yaco ga yani na nodra ivolatukutuku ni lewenilotu me railesuvi kina na dodonu ni iVakaleka ni Cakacaka Vakalotu ni Lewenilotu yadua.

33.6.6

iVolatukutuku ni Lewenilotu Era Veiqaravi e Taudaku ni Nodra Tabanalevu Waseivakavanua

33.6.6.2

iVolatukutuku ni Daukaulotu Tudei

Raica na 24.6.2.8

33.6.13

Nodra iVolatukutuku na Gone sa Sere na Nodra iTubutubu

Na ivolatukutuku taucoko ni lewenilotu e vakayagataka na yaca vakalawa ni dua na tamata, me vaka e vakamatatataki ena lawa se itovo ni vanua. Oqo e oka kina na luvedra na itubutubu era sa sere.

O ira na gone era sa veisere na nodra itubutubu era dau lotu ena nodrau tabanalevu ruarua na itubutubu. Dina ni dua ga na tabanilotu e rawa ni maroroya ka vakadodonutaka na nona ivolatukutuku vakadonui ni lewenilotu e dua na gone, e rawa ni caka e dua na ivolatukutuku ni lewenilotu mai taudaku ni tabanilotu ena tabanalevu tale kadua e dau laki lotu kina. Oqo ena vakatara me na oka tiko kina na yaca kei na itukutuku ni veitaratara ni gone ena ivola ni tabanalevu kei na lisi ni kalasi.

E rawa ni ra ciqoma na gone vakaivolatukutuku mai na taudaku ni tabanalevu e dua na veikacivi ena tabanilotu oqori.

33.6.15

Vakatatabu ni Tokitaki ni iVolatukutuku ni Lewenilotu

Kevaka e toki e dua na lewenilotu ni se bula tiko e dua na vakatatabu vakaivolataki se dua tale na kauwai bibi ni nona itutu vakalewenilotu, sa rawa vei bisopi se dua na vunivola vakadonui me biuta e dua na vakatatabu ni kena tokitaki na nona ivolatukutuku ni lewenilotu. Ena vakayagataka na VLV me cakava kina na ka oqo.

Ena sega ni tokitaki ki na dua na tabanilotu vou e dua na ivolatukutuku ni lewenilotu sa vakatabui me tokitaki me yacova ni sa vakadonuya mai o koya na iliuliu ni matabete a vakatabuya.

33.6.16

iVolatukutuku “Sega ni Kilai na iTikotiko”

Ena so na gauna e dau qai kunei e dua na lewenilotu ni oti na kena sa biu tiko na nona ivolatukutuku ena “faile ni itikotiko tawakilai” ena itikotiko liu ni Lotu. Ena ituvaki vakaoqo, ena kerea o vunivola ni tabanalevu na ivolatukutuku ena nona vakayagataka na VLV.

33.6.17

Volai ka Vakadodonutaki na iTukutuku ni Cakacaka Vakalotu

Raica na wase e 18.

33.6.19

Dikevi na iVolatukutuku ni Lewenilotu

Ena veiyabaki ena vakadeitaka me dau vakayacora na vunivola ni iteki se dua na nona ivukevuke na dikevi ni ivolatukutuku ni lewenilotu ena veitabanalevu yadua ni vakayagataki na VLV. Me dau vakacavari na dikevi ivola oqo ena ika 30 ni Jiune ni veiyabaki.

33.7

iVolatukutuku ni Veika e Yaco

33.7.1

iTukutuku ni Veika e Yaco ena Tabanalevu kei na iTeki

Sa vakarota na Turaga me volai ka maroroi tu na “itukutuku ni veika bibi kece sara” me baleta na Nona Lotu (Vunau kei na Veiyalayalati 69:3; raica talega na tikina e 5; Alama 37:2).

Na tabanilotu yadua ena Lotu me volaitukutukutaka na veika bibi kece sara me baleta na tabanilotu.

Na maroroi ni itukutuku ni veika e yaco e sa dua na cakacaka vakayalo ka na vakaqaqacotaka na nodra vakabauta o ira era vola kei ira era wilika.

Na matabete ena iteki kei na tabanalevu kei ira na iliuliu ni mataisoqosoqo era na vakauta na italanoa eso ena vakayagataki ni Unit History tool [iYaya ni iTukutuku Makawa ni Tabanilotu] ena ChurchofJesusChrist.org. Sa nodra itavi taumada na vunivola ni iteki kei na tabanalevu me ra tauyavutaka ka cokonaka na sasaga oqo. Na ikuri ni idusidusi e tiko ena iyaya ni Quick Start Guide [iDusudusi Totolo ni Tekivu]

33.8

Na Taqomaki ni iVolatukutuku

Era sa ka maroroi na ivolatukutuku ni Lotu, se ra tiko ena pepa se vakalivaliva. Oqo e oka kina na:

• iVolatukutuku ni lewenilotu.

• Itukutuku vakailavo.

• iVakamacala mai na veisoqoni.

• Fomu kei na ivolatukutuku vakadonui (oka kina na ivolatukutuku ni matabose ni lewenilotu).

Me ra vakadeitaka na iliuliu ni itukutuku e sokumuni mai vei ira na lewenilotu e:

• Yalani ga ena veika e gadreva na Lotu.

• Vakayagataki walega ena inaki vakadonui ni Lotu.

• Soli ga vei ira sa vakadonui me ra vakayagataka.

Na itukutuku e maroroi ena kompiuta e dodonu me taqomaki vakavinaka tu ka sega ni rawa ni dolavi vakaveitalia (raica na 33.9.1).

33.9

Qaravi ni iVolatukutuku

33.9.1

Veitaqomaki

Na ivolatukutuku taucoko ni Lotu, ripote, kei na itukutuku e dodonu me taqomaki mai na kena rawa ni raici vakatawadodonu, veisautaki, vakarusai, se vakaraitaki vakailoa. Me maroroi na itukutuku oqo ena dua na vanua taqomaki.

Na iyaya vakalivaliva ni Lotu se iyaya ni maroroi itukutuku e yali se butakoci e dodonu me ripotetaki vakatotolo ena incidents.ChurchofJesusChrist.org. Sa dodonu tale ga me ripotetaki na vakayagataki cala ni itukutuku ni Lotu.

33.9.1.1

Yaca vakayagataki kei na Vosanicuru

E sega ni dodonu vei ira na peresitedi ni iteki, bisopi, kei ira na iliuliu tale eso me ra wasea na nodra yaca vakayagataki kei na vosanicuru ni Lotu vata kei ira na daunivakasala, vunivola, sekeriteri liu, se so tale.

33.9.1.3

iTukutuku Vakaitaukei

E vuqa na veimatanitu era sa bulia eso na lawa ni taqomaki itukutuku ka na vakatulewataka na cakacakataki ni itukutuku ni tamata yadua. Oqo e oka kina na itukutuku ena ivolatukutuku ni lewenilotu kei na ivolatukutuku tale eso ni Lotu ka vakatakilai ira na tamata yadua. O ira na iliuliu e tu nodra taro me baleta na kena vakayagataki na lawa ni taqomaki itukutuku ki na vakatulewataki ni ivolatukutuku ni Lotu ena nodra veivanua e rawa me ra veitaratara ki na valenivolavola ni taqomaki itukutuku ni Lotu ena [e-mail].