35.

Pag-atiman ug Paggamit sa mga Meetinghouse

35.1

Katuyoan

Ang Simbahan nagsangkap og mga meetinghouse aron ang tanan nga mosulod makahimo sa:

• Paghimo ug pagbag-o sa mga pakigsaad pinaagi sa sagrado nga mga ordinansa (tan-awa sa Doktrina ug mga Pakigsaad 20:75; 59:9–12).

• Pagpanagtigom (tan-awa sa 3 Nephi 18:22–23).

• Pagdungan sa pagsimba ug pag-ampo (tan-awa sa Mosiah 18:25; Moroni 6:9).

• Pagtudlo ug pagpangalagad sa usag usa (tan-awa sa Moroni 6:4–5).

• Pag-apil diha sa ubang giaprobahan nga mga paggamit sumala sa gihulagway niini nga kapitulo.

Ang meetinghouse puwede ra nga lain-lain og porma depende sa lokal nga mga sirkumstansiya ug mga panginahanglan. Kini tingali usa ka gitukod sa Simbahan o luna nga gipalit sa Simbahan, balay sa usa ka miyembro, lokal nga eskwelahan o sentro sa komunidad, giabangan nga luna, o laing giaprobahan nga opsiyon.

35.2

Mga Tahas ug mga Responsibilidad

35.2.1

Departamento sa Meetinghouse nga mga Pasilidad

Ang Departamento sa mga Pasilidad sa Meetinghouse sa punoang buhatan sa Simbahan nag-establisar og mga baroganan ug mga lagda alang sa pagsangkap ug pagmentinar sa mga dapit sa pagsimba. Kini nga departamento naglihok ubos sa direksyon sa Tigdumalang Bishopric.

Ang mga empleyado sa mga Pasilidad sa Meetinghouse ang responsable alang sa pagsangkap ug pagmentinar sa mga meetinghouse ug sa ubang mga gambalay sa Simbahan. Kini gihimo ubos sa direksyon sa Kapangulohan sa Area ug sa direktor sa area alang sa temporal nga mga kalihokan.

35.2.2

Manedyer sa mga Pasilidad sa Simbahan

Ang empleyado sa Simbahan nga manedyer sa mga pasilidad motabang sa matag stake sa pagdumala sa mga meetinghouse. Siya mao ang mopasiugda og dagkong mga pag-ayo, pagpanglimpyo, ug naandang pagmentinar sa gambalay.

Kon gikinahanglan, ang manedyer sa mga pasilidad motabang sa pagtudlo sa mga representante sa gambalay sa stake ug sa ward [stake and ward building representatives] kon unsaon sa paglimpyo sa gambalay ug sa pagpahigayon sa ubang lokal nga mga buluhaton. Siya mohatag og mga instruksiyon, mga materyal, ug mga ekipo.

Ang manedyer sa mga pasilidad makigtinabangay sa representante sa gambalay sa stake aron sa pagdumala niini nga mga serbisyo ug kinatibuk-ang pag-atiman sa mga gambalay. Siya mahimong morebyo usab sa mga galastohan sa gambalay uban sa bishopric.

35.2.3

Area Seventy

Ang gisangonan nga Area Seventy makigtambayayong sa mga presidente sa stake diha sa proseso sa kinatibuk-ang pagplano (tan-awa sa 35.3).

35.2.4

Kapangulohan sa Stake

Ang kapangulohan sa stake mogiya sa mga bishop diha sa paggamit, pag-atiman, ug seguridad sa mga meetinghouse. Sila mosangon og usa ka high councilor nga mahimong representante sa gambalay sa stake (tan-awa sa 35.2.5). Sila makigtambag uban niya aron sa pagrebyo kalabot sa mga panginahanglan ug mga proyekto.

Kon ang mga miyembro nanginahanglan og dugang nga luna alang sa pagsimba, ang kapangulohan sa stake mohatag sa impormasyon ngadto sa Area Seventy. Kini himoon pinaagi sa proseso sa kinatibuk-ang pagplano (tan-awa sa 35.3).

35.2.5

Representante sa Gambalay sa Stake [Stake Building Representative]

Ang representante sa gambalay sa stake moabag sa kapangulohan sa stake diha sa paggamit, pag-atiman, ug seguridad sa mga meetinghouse pinaagi sa:

• Pagtudlo sa mga representante sa gambalay sa ward sa ilang mga katungdanan (tan-awa sa 35.2.9).

• Pag-apud-apod sa mga yawe ngadto sa mga lider sa yunit.

• Pagpakigsulti sa manedyer sa mga pasilidad sa Simbahan mahitungod sa pagmentinar ug sa mga panginahanglan sa pagdumala sa mga gambalay.

35.2.6

Mga Espesyalista sa Teknolohiya sa Stake ug Ward

Ang mga espesyalista sa teknolohiya sa stake ug sa ward motabang sa pagpahimutang ug pagmentinar sa teknolohiya diha sa mga gambalay. Kon ang bag-ong ekipo kinahanglang i-install, makigsabot sila sa manedyer sa mga pasilidad. Alang sa dugang nga impormasyon mahitungod niini nga mga calling, tan-awa sa 33.10 (tan-awa usab sa mhtech.ChurchofJesusChrist.org).

35.2.7

Bishopric

Ang bishopric (o representante sa gambalay sa ward) motudlo sa mga miyembro kon unsaon sa paggamit, pag-atiman, ug pagbantay sa gambalay. Ang bishopric moapud-apod usab sa mga yawe sa gambalay ngadto sa mga lider sa ward.

Siguroon nila nga ang mga kalihokan diha sa gambalay ug sa mga nataran gipahigayon sa luwas nga paagi (tan-awa sa 20.7).

Makigsulti sila sa manedyer sa mga pasilidad sa Simbahan mahitungod sa pagmentinar ug mga panginahanglan sa pagdumala. Sila mahimo usab nga morebyo kalabot sa mga galastohan uban sa manedyer sa mga pasilidad.

35.2.8

Tinugyanan nga Bishop [Agent Bishop]

Kon adunay sobra sa usa ka ward nga mogamit sa usa ka gambalay, ang kapangulohan sa stake mopili og usa ka tinugyanan nga bishop aron makigsabot bahin sa mga buluhaton ngadto sa ubang mga bishop. Kini nga mga buluhaton naglakip sa pag-eskedyul, pagpanglimpyo, ug pagbantay sa gambalay. Ang kapangulohan sa stake matag karon ug unya mopuli-puli sa mga bishop niini nga responsibilidad kansang mga ward anha managtigom sa gambalay.

35.2.9

Representante sa Gambalay sa Ward

Ang bishopric motino kon motawag ba og usa ka representante sa gambalay sa ward. Kon sila makahukom sa paghatag niini nga calling, ang bishopric mahimong motawag og usa ka miyembro nga hamtong nga lalaki o babaye. Kon walay matawag nga representante sa gambalay sa ward, ang bishop mahimong mosangon niini nga responsibilidad ngadto sa usa sa iyang mga magtatambag, klerk sa ward o kaabag nga klerk sa ward, o executive secretary.

Ang representante sa gambalay sa ward mo-organisar sa mga miyembro ug sa mga boluntaryo sa pagpanglimpyo ug pagmentinar sa gambalay. Siya motudlo nila kon unsaon sa paghimo sa matag buluhaton gamit ang anaa nga mga suplay ug mga ekipo.

Kon gikinahanglan, makadawat siya og instruksiyon gikan sa representante sa gambalay sa stake sa pag-operate sa sound, pangpainit [heating], pangpabugnaw [air conditioning], ug ubang mga kagamitan sa gambalay.

35.2.10

Mga Miyembro

Ubos sa direksyon sa bishop, ang mga lider sa hamtong ug kabatan-onan moawhag sa mga miyembro sa pag-atiman ug pagmentinar sa gambalay. Ang bishopric ug ang representante sa gambalay sa ward mopahiangay sa buluhaton sumala sa mga kahanas ug mga abilidad niadtong mohimo sa trabaho. Ang kanunay nga pag-atiman sa mga miyembro makatabang nga ang mga kapanguhaan sa Simbahan molungtad og dugay.

35.3

Pagsangkap og mga Meetinghouse

Ang mga meetinghouse managlahi sa gidak-on ug matang base sa lokal nga mga panginahanglan ug mga kahimtang. Ang meetinghouse tingali usa ka gitukod o luna nga gipalit sa Simbahan, balay sa usa ka miyembro, lokal nga eskwelahan o sentro sa komunidad, giabangan nga luna, o laing giaprobahan nga opsiyon.

Ang area ug lokal nga mga lider maningkamot nga magamit sa hingpit ang anaa na nga mga meetinghouse ug magmaalamon sa pagrekomendar ug dugang nga luna. Sila mosunod sa “Mga Baroganan ug mga Lagda sa Pagsangkap og mga Meetinghouse” (Giya sa Meetinghouse nga mga Pasilidad).

Ang mga lider moandam sa mga master plan kada tuig gamit ang Mga Lagda sa Kinatibuk-ang Pagplano sa Meetinghouse aron sa pagsiguro nga ang luna sa meetinghouse paigo ra. Ang mga lider mogamit usab sa mga master plan aron sa pagsuta sa umaabot nga mga panginahanglan alang sa pagdugang o pagdispatsar sa luna nga tigomanan, nga mao ang pagbaligya o pagtugot sa ubang mga paggamit alang sa meetinghouse ug kabtangan.

Alang sa dugang nga impormasyon, tan-awa sa “Pagsangkap og mga Meetinghouse ug Ubang mga Dapit sa Pagsimba” (Giya sa Meetinghouse nga mga Pasilidad).

35.3.1

Mga Seremonya sa Pagsugod sa Konstruksiyon ug Pagpahinungod sa mga Gambalay

Mga seremonya sa pagsugod sa konstruksiyon mahimong ipahigayon sa dili pa ang konstruksiyon. Sa higayon nga makompleto na, ang bag-ong mga gambalay ug dagkong mga gidugang kinahanglan nga ipahinungod dayon kon posible. Ang giabangan nga mga luna mahimo usab nga ipahinungod.

Alang sa dugang nga impormasyon, tan-awa sa “Mga Seremonya sa Pagsugod sa Konstruksiyon” ug “Pagpahinungod sa mga Gambalay” diha sa “Pagsangkap og mga Meetinghouse ug Ubang mga Dapit sa Pagsimba” (Giya sa Meetinghouse nga mga Pasilidad).

35.4

Pagmentinar sa mga Meetinghouse

35.4.1

Pagpanglimpyo ug Pagmentinar sa mga Meetinghouse

Ang lokal nga mga lider ug mga miyembro, lakip na ang kabatan-onan, adunay responsibilidad sa pagtabang nga magpabiling limpyo ug hapsay ang gambalay. Kini makatabang sa:

• Pagpreserbar sa sagrado nga kinaiyahan sa gambalay isip usa ka dapit diin ang Espiritu maanaa.

• Pag-awhag og balaang pagtahod.

• Pagpresentar og usa ka imahe sa dignidad ug respeto.

• Paglugway sa mapuslanong paggamit sa gambalay.

Ang eskedyul sa pagpanglimpyo kinahanglang dili bug-at sa mga miyembro. Pananglitan, kon ang pagbiyahe paingon sa gambalay lisod, ang mga miyembro mahimong manglimpyo isip kabahin sa sinemana nga mga kalihokan kon anaa na sila sa gambalay.

Alang sa dugang nga impormasyon, tan-awa sa “Pagmentinar sa mga Meetinghouse” (Giya sa Meetinghouse nga mga Pasilidad).

35.4.2

Paghangyo alang sa mga Pag-ayo

Ang mga miyembro sa ward ug mga konseho sa stake mahimong mo-report alang sa mga pag-ayo sa mga gambalay. Kini pagahimoon gamit ang Facility Issue Reporting (FIR) nga tool. Ang FIR makapahimo sa mga lider sa pagsumiter, pagsubay sa kalamboan, ug paghatag og feedback bahin sa mga pag-ayo ug ubang mga hangyo. Ang mga sakop sa konseho mahimo usab nga mokontak sa manedyer sa mga pasilidad alang sa tabang.

Ang FIR anaa usab isip usa ka app diha sa Google Play ug sa Apple App Store. Mga instruksiyon alang sa paggamit sa FIR anaa sa Help Center sa ChurchofJesusChrist.org.

35.4.3

Pag-inspeksiyon sa Meetinghouse

Ang manedyer sa mga pasilidad moinspeksiyon sa matag gambalay kada tuig. Ang katuyoan mao nga aron matino ang taas og termino nga mga panginahanglan ug mga pag-ayo sa gambalay. Ang manedyer sa mga pasilidad mohisgot dayon sa mga resulta ug mga gikinahanglan nga mga aksiyon ngadto sa representante sa gambalay sa stake o sa tinugyanan nga bishop.

35.4.4

Pagdaginot sa Kuryente ug Tubig

Ang Simbahan maningkamot sa pagdaginot sa tubig, kuryente, ug ubang mga kapanguhaan. Ang mga lider moawhag sa mga miyembro sa pagdaginot sa kuryente ug tubig diha sa gambalay. Pananglitan, kon ang mga miyembro mobiya sa usa ka lawak, kinahanglan nilang palongon ang mga suga, mga gripo sa tubig, pangpainit [heating] ug pangpabugnaw [air conditioning] nga mga ekipo o mga butang nga gigamit atol sa miting o kalihokan. Ang mga miyembro mo-report ngadto sa ilang mga lider kon adunay mga sitwasyon nga makatampo sa pag-usik-usik.

Ang mga miyembro mahimong mosuporta usab sa gipasiugdahan sa komunidad nga mga proyekto sa pagdaginot sa kuryente ug tubig. Kini nga mga paningkamot makapaminos sa mga bayronon sa mga gamit.

Ang mga lider ug mga miyembro mahimong mokontak sa manedyer sa mga pasilidad alang sa dugang nga impormasyon mahitungod sa paggamit ug pagdaginot sa tubig ug kuryente.

35.4.5

Kasiguroan ug Seguridad

Ang mga lider ug mga miyembro kinahanglan nga:

• Mopabiling hawan ang mga agianan, mga hagdanan, mga gawasanang pultahan, mga kwarto sa mga gamit alang sa luwas nga pagsulod ug paggawas.

• Dili mogamit o magtipig og makuyaw o mosilaob nga mga materyal diha sa mga gambalay.

• Moestablisar ug mosunod sa mga pamaagi sa pagpangandado sa gambalay.

• Mobutang sa luwas nga dapit sa gipanag-iya sa Simbahan nga mga ekipo aron dili makawat.

• Mahibalo kon unsaon sa pagpalong ang mga gamit sama sa tubig, kuryente, ug gas o gasolina.

Kon gikinahanglan, ang manedyer sa mga pasilidad makahatag og mapa nga nagpakita sa mga fire extinguisher, mga first aid kit, ug mga nahimutangan sa pagpalong sa mga gamit. Ang dugang nga impormasyon mahitungod sa kasiguroan anaa sa seksiyon sa “Mga Pamaagi sa Kasiguroan ug Pagpangandado” diha sa “Pagmentinar sa mga Meetinghouse” (Giya sa Meetinghouse nga mga Pasilidad). Tan-awa usab sa 20.7.

35.5

Mga Palisiya bahin sa Paggamit sa mga Meetinghouse sa Simbahan

Ang mga meetinghouse sa Simbahan sagrado nga mga kapanguhaan nga kinahanglan nga gamiton sa pagtabang sa mga anak sa Dios nga mas maduol ngadto ni Kristo. Ang pag-abi-abi og mga tawo nga moapil nato sa mga kalihokan diha sa mga meetinghouse ug ang paggamit sa atong mga meetinghouse sa pagpanalangin sa atong mga komunidad mao ang mga paagi nga “ipadan-ag ang [atong] kahayag atubangan sa mga tawo aron makita ang [atong] mga maayong buhat, ug daygon nila ang inyong Amahan nga atua sa langit” (Mateo 5:16).

Kini nga seksiyon naglakip sa kinatibuk-ang mga palisiya sa paggamit sa meetinghouse. Kini nga mga palisiya magamit usab sa tanang gipanag-iya sa Simbahan nga kabtangan ug mga pasilidad nga naglibot sa meetinghouse. Dugang nga impormasyon anaa sa mga tinubdan nga gilista niini nga seksiyon.

35.5.1

Sukaranang mga Baroganan ug mga Kinahanglanon alang sa Paggamit sa mga Meetinghouse sa Simbahan

Ang mga meetinghouse sa Simbahan mao ang pribado nga relihiyoso nga kabtangan nga gipahinungod alang sa pagsimba, pagkat-on sa ebanghelyo, pakigdait, ug angay nga mga kalihokan nga makatabang sa pagdala sa mga tawo ngadto ni Kristo. Ang paggamit sa mga meetinghouse sa Simbahan usa ka pribilehiyo.

Ang tanang paggamit sa mga meetinghouse sa Simbahan kinahanglan motuman sa mosunod nga sukaranan nga mga kinahanglanon:

• Magmakanunayon sa doktrina, mga palisiya ug mga naandan nga mga pamaagi sa Simbahan, lakip sa sagrado nga matang ug mga katuyoan sa mga meetinghouse sa Simbahan.

• Magsubay sa mga gitugotan sa balaod.

• Magmakanunayon sa pagtuman sa pagka-eksempted sa Simbahan sa balayranan sa buhis kon mahimo.

• Mohimo sa angay nga mga lakang sa paglikay, pagpakunhod, ug pagdumala sa mga risgo sa kasegurohan, lakip sa mga lagda ug mga palisiya sa Simbahan sa pagbantay sa kabataan ug kabatan-onan (tan-awa sa 12.5.1 ug 20.7.1)

• Motuman sa ubang mga kondisyon ug mga limitasyon nga gihatag sa presidente sa stake o bishop.

35.5.2

Paggamit sa Simbahan sa mga Meetinghouse

Ang mga miting, mga programa, ug mga kalihokan sa Simbahan mao ang adunay prayoridad kay sa ubang mga paggamit sa mga meetinghouse kon adunay magkadungan. Ang paggamit sa Simbahan naglakip sa:

• Mga tulumanon sa pagsimba ug ubang mga miting sa Igpapahulay.

• Mga miting sa pagpangulo.

• Mga miting ug mga kalihokan sa Relief Society.

• Mga miting ug mga kalihokan sa pagkapari.

• Mga miting ug mga kalihokan sa Primary, Aaronic nga Pagkapari, ug Young Women.

• Mga miting ug mga kalihokan sa seminary, institute, young single adult, ug single adult.

• Buhat sa family history.

• Mga miting ug mga kalihokan sa misyonaryo.

• Mga kalihokan sa emerhensiya nga pagpangandam.

Ang mga ward ug mga stake mahimo usab nga motanyag og laing mga programa sa Simbahan nga makahatag og kaayohan sa mga miyembro ug sa komunidad. Kini naglakip sa:

• Mga kurso sa Pagbarog pinaagi sa Kinaugalingong Paningkamot.

• Mga kurso aron maulian gikan sa pagkaadik.

• EnglishConnect.

• BYU–Pathway Worldwide.

Ang presidente sa stake kinahanglang mangayo og giya gikan sa buhatan sa area aron sa pagsiguro nga masunod ang lokal nga balaod.

Alang sa dugang nga impormasyon, tan-awa sa Usa ka Giya sa Lider sa Pagpakigbahin sa mga Kapanguhaan sa Simbahan [A Leader’s Guide to Sharing Church Resources].

Sa pipila ka mga dapit nga adunay daghan mga miyembro sa Simbahan, ang usa ka meetinghouse mahimong gamiton sa sobra sa usa ka stake. Sa maong mga sitwasyon, ang mga presidente sa stake magtinambagay mahitungod sa paggamit ug pag-eskedyul sa gambalay. Mahimo silang mokontak sa Area Seventy alang sa direksyon kon gikinahanglan.

Ang pagtugot gikan sa direktor sa temporal nga mga kalihokan ug sa Kapangulohan sa Area gikinahanglan sa dili pa gamiton ang usa ka meetinghouse sa paghimo og pundokanan nga dapit alang sa mga young single adult diin ang dugang nga dili sama og kalidad sa sumbanan nga ekipo o mga kapanguhaan gihangyo. Sa pagpangayo og pagtugot, ang presidente sa stake mokontak sa manedyer sa mga pasilidad.

Ang tanan nga mogamit sa meetinghouse kinahanglan nga mopakita og konsiderasyon sa uban. Ang matag paningkamot kinahanglang himoon aron mahatag ang mga panginahanglan sa uban. Ang mao nga mga paningkamot naglakip sa pag-eskedyul sa mga luna, pagkontrol sa kalangas, ug paggamit sulod sa nakaeskedyul nga oras.

Alang sa dugang nga impormasyon mahitungod sa mga kalihokan sa Simbahan, tan-awa sa kapitulo 20.

35.5.3

Paggamit sa Miyembro sa mga Meetinghouse—Personal ug Pamilya

Ang mga miyembro mahimong mohangyo nga mogamit sa meetinghouse sulod sa ilang stake alang sa personal o pamilya nga mga kalihokan. Sa pagpangayo og pagtugot, kontakon nila ang usa ka sakop sa bishopric sa ward nga magmiting niana nga meetinghouse (o usa ka tawo nga iyang gitudlo). Ang mosunod nga mga kondisyon magamit:

• Ang paggamit kinahanglan mosunod sa sukaranan nga mga baroganan ug mga kinahanglanon diha sa 35.5.1.

• Ang paggamit kinahanglan gayod nga pagadumalahon sa usa ka responsable nga hamtong nga miyembro sa ward nga magmiting diha sa meetinghouse.

• Ang paggamit kinahanglang dili madungan sa nakaeskedyul sa mga kalihokan sa Simbahan.

• Ang mga tiggamit adunay hingpit nga responsibilidad sa bisan unsa nga danyos sa mga pasilidad o bisan unsa nga kadaot o kabilinggan tungod sa maong paggamit.

• Ang mga tiggamit kinahanglan manglimpyo ug ipahiuli sa hingpit ang mga pasilidad sa kondisyon sa wala pa kini gamita.

• Ang mga tiggamit kinahanglang mosunod sa direksyon ug mga hangyo gikan sa lokal nga mga lider, lakip sa mga hangyo sa mga lider sa pag-monitor sa paggamit.

• Ang mga lider sa Simbahan mahimong mosulti sa indibidwal o grupo sa paghunong sa paggamit sa kabtangan kon wala sila magsunod sa mga lagda.

• Alang sa giaprobahan nga mga kalihokan, ang mga lider sa ward ug stake kinahanglan nga mohimo og mga paghan-ay alang sa pag-akses sa meetinghouse. Ang mga yawe sa gambalay kinahanglang ihatag lamang ngadto sa gitudlo nga mga miyembro sa ward o stake.

Tan-awa sa 38.3.4 alang sa paggamit sa mga meetinghouse alang sa mga kasal ug mga salo-salo sa kasal.

Tan-awa sa 29.5 alang sa paggamit sa mga meetinghouses alang sa mga haya ug sa ubang mga tulumanon alang sa patay.

35.5.4

Paggamit sa mga Meetinghouse sa Simbahan sa Dili Pangnegosyo nga mga Organisasyon o sa Ubang mga Grupo o mga Indibidwal

Ang pangulo sa area mahimong motugot sa dili pangnegosyo nga mga organisasyon, komunidad ug ubang mga grupo (sama sa mga team sa sport), o mga indibidwal nga wala gihulagway sa 35.5.3 nga mogamit sa mga meetinghouse sa Simbahan alang sa maayo nga mga kalihokan o serbisyo. Ang mga kondisyon nga gilista sa 35.5.3 magamit.

Sa pagpangayo og pagtugot sa pangulo sa area alang sa maong paggamit, ang presidente sa stake mokontak sa manedyer sa mga pasilidad.

Kon ang pangulo sa area motugot nga gamiton sa dili pangnegosyo nga organisasyon, ang Kasabotan nga Temporaryo nga Paggamit gikinahanglan. Kini nga kasabotan anaa sa buhatan sa area. Usa ka sertipiko sa insurance gikan sa dili pangnegosyo nga organisasyon gikinahanglan usab gawas kon ang direktor alang sa temporal nga mga kalihokan mokompirma nga ang Church Risk Management Division [Dibisyon sa Simbahan nga Nagdumala sa Risgo] mitugot sa usa ka eksepsiyon.

Ang mga grupo diha sa komunidad nga dili kwalipikado nga mga dili pangnegosyo, ingon man usab sa mga indibidwal nga wala gihulagway sa 35.5.3, kinahanglan nga makahatag sa bisan unsa nga mga kinahanglanon nga gipangayo pinaagi sa manedyer sa pasilidad.

35.5.5

Mga Emerhensiya

Ang mga meetinghouse sa Simbahan mahimo usab nga gamiton alang sa importante nga pagserbisyo sa komunidad atol sa usa ka emerhensiya. Pananglitan, ang presidente sa stake mahimong motugot nga ang mga meetinghouse sa iyang stake gamiton sa mga ahensya nga nanghatag og alibyo sa katalagman ug sa uban nga susama og mga paningkamot (tan-awa sa 35.5.4). Niini nga mga sitwasyon, siya makigtambayayong sa manedyer sa pasilidad ug manedyer sa welfare ug pagbarog pinaagi sa kinaugalingon nga paningkamot, ingon man sa usa sa ubang mga representante sa Simbahan kon kinahanglanon (tan-awa sa 22.9.1.3).

Kon ang mga meetinghouse gamiton alang sa emerhensiya nga mga katuyoan, ang mga lider sa stake giawhag sa pagpakigsabot sa mga lider sa komunidad.

35.5.6

Mga Paggamit sa Meetinghouse Nga Wala Itugot

35.5.6.1

Pangnegosyo nga Paggamit

Ang mga pasilidad sa Simbahan dili mahimong gamiton alang sa pangnegosyo nga mga katuyoan. Pananglitan, ang mga meetinghouse dili mahimong gamiton sa pagsuporta sa bisan unsa nga matang sa negosyo. Ni ang mga kapanguhaan nga anaa sa sulod sa mga meetinghouse, sama sa mga bulletin board, gamiton sa pagsuporta og negosyo (tan-awa sa 38.8.5). Ang mao nga paggamit wala mahisubay sa mga katuyoan sa mga kabtangan sa Simbahan. Mosukwahi usab kini sa lokal o sa nasyonal nga mga balaod nga nagtugot sa pagkawalay labot sa pagbayad og buhis sa kabtangan sa Simbahan (tan-awa sa 34.8.1).

Ang mosunod mao ang mga sanglitanan sa pangnegosyo nga paggamit nga dili aprobado:

• Pagpasiugda o pag-isponsor og mga negosyo o mga pamuhonan

• Pagpamalit, pagpamaligya, o pagpasiugda og mga produkto, mga serbisyo, mga pamantalaan, o hinimo nga mga butang

• Paghimo og wala itugot nga mga kalihokan aron makakolekta og pundo (tan-awa sa 20.6.5)

• Pagpasiugda o pagtugot og mga choir, mga mamumulong, mga magtutudlo, mga grupo sa edukasyon,o ubang mga tighatag kinsa modawat og bayad alang sa mga seminar, mga leksiyon (gawas sa pribado nga pagtudlo og piano o organ; tan-awa sa 19.7.2), mga klase, o ubang mga kalihokan

• Pagpa-abang og luna alang sa mga kasal o mga kalihokan kalabot sa kasal

35.5.6.2

Gamiton alang sa Pag-eskwela ug Pag-atiman sa mga Bata

Ang Simbahan nagsuporta gayod sa edukasyon ug sa mga pamilya. Pero, ang mga meetinghouse dili gamiton nga mga pasilidad alang sa pag-eskwela ug pag-atiman sa mga bata.

Ang pagtuman niini nga palisiya makahatag og kasiguroan ug ang Simbahan malikay sa bayranan sa buhis.

35.5.6.3

Politikanhong mga Katuyoan

Ang Simbahan walay gidapigan sa politika. Ang kabtangan sa Simbahan dili mahimong gamiton alang sa politikal o adbokasiya nga mga katuyoan. Gidili nga mga kalihokan naglakip sa politikanhong mga miting ug gamiton sa mga kampanya sa politika ug adbokasiya nga mga grupo. Ang mga pahibalo kalabot sa politikanhong mga katuyoan dili mahimong himoon sa kabtangan sa Simbahan, sama sa mga bulletin board.

Pero, ang paggamit sa mga kabtangan alang sa rehistrasyon sa botante o pagbotar mahimong tugotan isip usa ka eksepsiyon (tan-awa sa 38.8.30). Ang presidente sa stake mahimong mangayo sa maong eksepsiyon pinaagi sa manedyer sa pasilidad (tan-awa sa 35.5.4).

35.5.6.4

Ubang mga Paggamit

Ang mosunod nga mga paggamit sa kabtangan sa mga meetinghouse sa Simbahan sa kasagaran dili itugot:

• Paghatag og kapuy-an sa tibuok gabii (gawas sa mga emerhensiya; tan-awa sa 35.5.5)

• Kamping

• Pag-abang o pagpaabang sa mga gambalay ug mga kabtangan sa Simbahan

Kini nga mga lagda magamit sa meetinghouse mismo ingon man usab sa tanang gipanag-iya sa Simbahan nga kabtangan ug mga pasilidad nga naglibot sa meetinghouse. Kon ang presidente sa stake mobati nga gikinahanglan ang usa ka eksepsiyon, mahimo siyang mohangyo niini pinaagi sa manedyer sa mga pasilidad. Pananglitan, usa ka eksepsiyon mahimong itugot nga gamiton ang meetinghouse sa pagtabang sa mga miyembro nga nagbiyahe og layo alang sa pag-adto sa templo.

35.5.7

Ubang mga Palisiya ug mga Sumbanan Nga Haom sa Tanang Paggamit

35.5.7.1

Mga Chapel

Ang mga chapel mao ang mga kwarto diin ang mga miyembro mosimba ug moambit sa sakramento. Ang mga miting ug mga kalihokan nga gihimo diha sa mga chapel kinahanglan nga nahiuyon niini nga mga katuyoan. Alang sa mga lagda mahitungod sa paghimo og mga kalihokan sa arte sa kultura, mga konsierto, ug ubang mga pasundayag diha sa mga chapel, tan-awa sa 19.3.5.

35.5.7.2

Mga Armas ug mga Hinagiban

Ang mga armas ug ubang makamatay nga mga hinagiban wala itugot diha sa kabtangan sa Simbahan. Naglakip kini sa gitago nga mga hinagiban. Walay labot niini ang kasamtangang tigpatuman sa balaod nga mga opisyal.

35.5.7.3

Mga Kusina ug Luna nga Kadalitan og Pagkaon [Serving Areas]

Ang kusina ug mga luna nga kadalitan og pagkaon mahimong gamiton aron paghatag og mga pagkaon ug mga refreshment ug sa pag-init o pagpabugnaw sa pagkaon.

Sa ubang mga lugar, ang pag-andam og pagkaon diha sa mga kusina gitugotan. Pero, sa Estados Unidos, Canada, ug sa ubang mga nasod, ang mga regulasyon sa pag-andam og pagkaon sa kasagaran nagkinahanglan og sertipikasyon, komersyal nga ekipo, o pagsusi sa gobyerno. Sa ubang mga dapit, ang pagkaon kinahanglan nga andamon sa laing lugar ug dad-on ngadto sa meetinghouse. Ang mga demonstrasyon sa pag-andam og pagkaon usa ka eksepsiyon ug gitugotan bisan kon kini nga mga regulasyon anaa. Ang mga manedyer sa mga pasilidad makahatag og giya alang sa matag dapit.

Alang sa dugang nga impormasyon, tan-awa sa safety.ChurchofJesusChrist.org.

35.5.7.4

Mga Parkinganan

Ang paggamit sa mga parkinganan sa Simbahan kinahanglang mosunod sa mga lagda niini nga kapitulo. Agi og dugang, ang mga parkinganan kinahanglang dili gamiton alang sa parkinganan sa pasahero o ubang susamang mga paggamit nga walay pagtugot gikan sa direktor alang sa temporal nga mga kalihokan. Ang mga lider mahimong mokontak sa manedyer sa mga pasilidad uban sa mga hangyo. Ang personal nga mga sakyanan ug ubang personal nga ekipo dili mahimong tipigan diha sa kabtangan sa Simbahan.

Alang sa dugang nga impormasyon mahitungod sa mga parkinganan ug magamit nga parkinganan, tan-awa sa “Mga Parkinganan sa MeetinghouseGiya sa Meetinghouse nga mga Pasilidad

35.5.7.5

Tipiganan

Ang mga ekipo alang sa pagmentinar ug ubang giaprobahan nga mga suplay mao lamang ang mahimong tipigan diha sa mga gambalay. Ang mga aytem sa welfare mahimong tipigan diha sa mga meetinghouse atol sa mga emerhensiya (tan-awa sa 35.5.5). Ang mga lider nga adunay mga pangutana mahimong mokontak sa manedyer sa mga pasilidad.

35.5.7.6

Dugang Impormasyon

Dugang nga impormasyon mahitungod sa paggamit sa kabtangan sa Simbahan anaa sa “Ubang Impormasyon Kalabot sa Meetinghouse nga mga Pasilidad” (Giya sa Meetinghouse nga mga Pasilidad). Kini nga kapanguhaan naglakip sa mga instruksiyon mahitungod sa mga artwork, mga dekorasyon, ekipo, mga bandila, mga bayranan, mga karatula, paggamit sa bakante nga kabtangan sa Simbahan, ug ubang mga hilisgotan.

Alang sa mga lagda mahitungod sa paggamit sa pangkalingawan nga kabtangan, tan-awa sa “Pangkalingawan nga mga Kampinganan” (Giya sa Meetinghouse nga mga Pasilidad).