Ubang Impormasyon Kalabot sa mga Pasilidad sa Meetinghouse

Artwork

Ang mga meetinghouse kinahanglang mopakita og kinaiyahan sa balaang pagtahod alang ni Jesukristo ug mopamatuod sa pagtuo sa mga miyembro diha Kaniya. Ang art nga naghulagway ni Jesukristo kinahanglang ibutang diha sa mga pasilyo sa meetinghouse sa pagtabang nga mapakita kining sentro nga gituohan. Ang pasilyo nga mga dapit kinahanglang walay makabalda sama sa mga kabinet, mga bulletin board, mga lamesa, ug mga kabalyete [easels]. Ang art nga naghulagway ni Jesukristo, mga senaryo sa kasulatan, ug sa kasyasayan sa Simbahan angay alang sa mga agianan ug klasehanan.

Ang presidente sa stake o ubang gisangonan nga lokal nga mga lider mopili og artwork gikan sa catalog sa giaprobahan sa Simbahan nga artwork alang sa mga meetinghouse. Ang manedyer sa mga pasilidad mahimong mopaambit sa catalog sa artwork ngadto sa mga lider kon ang bag-ong artwork gikinahanglan. Ang artwork gikan sa laing mga kapanguhaan sa kasagaran wala itugot. Ang mga hangyo alang sa mga eksepsiyon kinahanglang himoon pinaagi sa manedyer sa mga pasilidad.

Ang artwork dili mahimong ibutang diha sa chapel o duol sa bunyaganan. Ang mga estatuwa, mga monumento, mga handomanan, mga dibuho [mural], ug mga mosaic wala itugot nga ibutang sa sulod o sa gawas sa gambalay. Kini nga palisiya mahimong dili magamit ngadto sa mga buhat kalabot sa art nga anaa nang daan sulod sa daghang katuigan.

Mga Copy Machine

Ang mga pagpamalit og copier mag-agad sa mga lagda sa buhatan sa area, nga gibase sa mga panginahanglan sa lokal nga yunit. Ang grupo sa facilities management maoy responsable sa pagpamalit sa mga copy machine alang sa mga opisina sa stake ug sa mga sentro sa mga materyales diha sa meetinghouse.

Kon ang serbisyo o mga pagpaayo gikinahanglan, ang lokal nga mga lider mokontak sa mangangayo [service provider] kon adunay kontrata sa pagserbisyo. Kon wala, ang lokal nga mga lider mokontak sa grupo sa facilities management, nga maoy moeskedyol ug mobayad sa pagpatrabaho.

Ang mga suplay sama sa mga papel ug toner paliton sa lokal nga mga yunit, gamit ang ilang lokal nga budget allowance sa yunit.

Mga Dekorasyon

Ang mga dekorasyon alang sa mga kalihokan sa holiday, mga salo-salo sa kasal, ug ubang susama nga mga okasyon mahimong temporaryong ibutang sa sulod o sa gawas sa gambalay. Ang mga dekorasyon gawas sa mga bulak dili mahimong ibutang sa sulod sa chapel atol sa sakramento. Gidili ang mga dekorasyon diha sa mga pasilyo aron magpabiling nakapokus sa balaang pagtahod alang sa Manluluwas.

Ang mga dekorasyon kinahanglang yano ug dili mahal. Kinahanglan nga dili kini kuyaw sa sunog. Ang lokal nga mga lagda ug mga ordinansa bahin sa sunog ug kahilwasan kinahanglang sundon.

Ekipo nga Pang-komunikasyon alang sa Emerhensiya

Ang mga ward ug stake dili mopalit o modawat og gidonar nga satellite nga telepono o amateur nga ekipo sa radyo nga gamiton alang sa emerhensiya o itaod diha sa meetinghouse. Ang mga lider giawhag sa pag-ila og mga tawo nga adunay kaugalingon nilang ekipo aron sa pag-abag sa piho nga mga panginahanglan sa komunikasyon sa ward ug stake.

Mga Ekipo alang sa mga Patriyarka

Sa panagsa ra nga mga sitwasyon, ang patriyarka tingali dili makagamit og computer (pananglitan, basin siya walay kaugalingon niyang computer o dili makagamit sa computer sa opisina sa klerk sa meetinghouse). Kon ingon niini, ang presidente sa stake mahimong moaprobar sa pagpalit og computer ug mohimo sa hangyo pinaagi sa pagkontak sa manedyer sa mga pasilidad. Ang mga stake mohatag og ekipo sa pagrekord sa audio alang sa mga patriyarka gamit ang mga pundo sa local unit budget allowance (LUBA).

Mga Bayranan

Ang mga miyembro dili pabayaron o padepositohon aron makagamit sa mga meetinghouse o sa mga kabtangan sa Simbahan alang sa salo-salo sa kasal, mga paghaya, mga panagpundok sa pamilya, mga reunion sa mga misyonaryo, giaprobahan nga mga recital, o susama nga mga kalihokan.

Mga Bandila

Ang nasodnong bandila mahimong ipataas diha sa kabtangan sa Simbahan kon magsunod lang sa lokal nga mga lagda. Ang bandila mahimong ibutang sa sulod sa mga gambalay sa Simbahan panahon sa espesyal nga mga okasyon. Ang patriyotismo wala magkinahanglan og padayong pagbutang sa nasodnong bandila diha sa mga dapit sa pagsimba.

Eskwelahan [Homeschool] ug Day Care

Samtang ang Simbahan nag-awhag gayod og edukasyon, ang mga meetinghouse dili gamiton isip eskwelahan o mga pasilidad sa day care o sa pagpagamit alang sa mga kalihokan sa eskwelahan.

Ang pagtuman niini nga palisiya makahatag og kasiguroan ug ang Simbahan malikay sa bayranan sa buhis.

Ekipo sa Satellite ug Video

Ang ekipo sa satellite ug video sa Simbahan gamiton lamang alang sa dili pangnegosyo, may kalabotan sa Simbahan nga mga katuyoan sumala sa pagtugot sa kapangulohan sa stake o bishopric. Ang tanang ekipo kinahanglan nga trangkahan og maayo kon wala gamita. Dili kini mahimong kuhaon gikan sa gambalay alang sa panimalay o personal nga paggamit.

Mga Paggamit sa Komon nga Kabtangan

Ang paggamit sa komon nga kabtangan sa Simbahan nagkinahanglan og pag-aprobar, lakip na ang paggamit sa kabtangan sa Simbahan, mga ganghaan, komon nga mga agianan, mga isyu sa utlanan, ug mga kasabotan sa katungod sa dalan.

Mga Karatula

Kon ang presidente sa stake adunay mga pangutana mahitungod sa mga karatula alang sa mga gambalay sa Simbahan, siya mokontak sa manedyer sa mga pasilidad.

Mga Snowblower

Ang gipanag-iya sa Simbahan nga de-motor nga ekipo nga pangkuha sa snow ibutang sa matag meetinghouse kon gikinahanglan. Ang mga miyembro sa Simbahan mahimong mogamit niini nga ekipo sa paghawan sa mga agianan sa meetinghouse. Ang mga lider mohatag lamang niini nga buluhaton ngadto sa hingkod, responsable nga mga miyembro ug tudloan sila sa paggamit uban sa tukma nga pag-amping nga malikay sa peligro.

Bakante nga Luna sa Simbahan

Ang bakanting luna sa Simbahan dili gamiton o puy-an nga walay pagtugot gikan sa Presidente sa Area. Sa pipila ka sirkumstansya, ang lokal nga mga miyembro temporaryo nga makagamit sa bakanting luna sa Simbahan alang sa pag-garden. Kontaka ang lokal nga manedyer sa mga pasilidad kon may mga pangutana o mohangyo og pagtugot.