Bishopric
Mga Baroganan ug mga Lagda alang sa Pagsangkap og mga Meetinghouse

Mga Baroganan ug mga Lagda alang sa Pagsangkap og mga Meetinghouse

“Ang Simbahan mosangkap og mga meetinghouse aron ang tanan nga mosulod makahimo sa:

Ang meetinghouse mahimong lainlain og mga porma depende sa lokal nga mga kahimtang ug mga panginahanglan” (Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 35.1). Ang mosunod nga mga baroganan ug mga lagda motabang sa mga lider sa area ug sa stake sa pagtuman niini nga katuyoan sumala sa mga panginahanglan sa mga miyembro sa ilang area.

Pahinumdom: Dinhi niini nga seksiyon, ang termino nga mga kapangulohan sa stake nagpasabot usab ngadto sa kapangulohan sa district.

Mga Baroganan

Pagkapareho ug Pagpahiangay

Ang mga miyembro sa Simbahan nagpuyo sa nagkadaiya nga politikanhon, sosyal, ug ekonomikanhong mga kahimtang. Ang mga ward ug mga branch magkalahi usab sa gidak-on ug mga kapanguhaan sa pagpangulo. Kini ug ang uban pang mga kahimtang mahimong magkinahanglan og lokal nga pagpahiangay kon mosangkap og tukma nga mga meetinghouse.

Ang tanang meetinghouse kinahanglang adunay mahinungdanong mga bahin nga mosuporta sa kasinatian sa pagsimba ug sa mga programa sa Simbahan. Naglakip kini og luna alang sa kinatibuk-ang panagtigom, pagtudlo, ug mga kalihokan. Ang ubang tukma nga mga bahin mahimong ilakip depende sa Kapangulohan sa Area. Ang mga lider sa area mogamit og maalamong paghukom kon mopahiangay sa giaprobahan nga mga meetinghouse nga gidesinyo ngadto sa lokal nga mga panginahanglan ug mga kahimtang.

Ang usa ka pasilidad sa panagtigom mahimong sa balay sa usa ka miyembro, sa usa ka lokal nga eskwelahan o sentro sa komunidad, giabangan nga luna, gitukod sa Simbahan o gipalit nga luna, o ubang mga opsiyon base sa lokal nga mga kahimtang. Ang matag usa niini mahimong ikonsiderar nga tukma, malungtaron nga mga solusyon. Ang paggamit sa teknolohiya, sama sa audiovisual nga mga ekipo, mahimong makapasayon sa ingon nga pagpahiangay.

Paghatag og Luna

Ang area ug ang lokal nga mga lider sa pagkapari maningkamot, kon posible, nga magamit og maayo ang mga meetinghouse ug magmadaginoton sa pagrekomendar og dugang nga luna. Ang luna sa meetinghouse mahimong isangkap kon ang gidaghanon sa nanambong mosobra sa kapasidad sa kasamtangan nga mga pasilidad.

Kabarato

Ang area ug ang lokal nga mga lider magtinguha og tukma ra sa ekonomikanhon nga paagi, molungtad og dugay, ug makapatunhay nga mga solusyon ngadto sa mga panginahanglan sa meetinghouse. Ang bag-ong luna kinahanglang mopresentar og usa ka imahe nga may balaang pagtahod ug kaligdong, nindot, ug nahiangay sa desinyo ug panagway sa lokal nga palibot niini. Kinahanglan nga kini maggamit usab og mga materyal, ekipo, ug mga kagamitan nga anaa ra sa lokal kon gikinahanglan. Ang proseso sa pagsangkap ug pagpadagan sa luna sa meetinghouse kinahanglan nga makatabang sa pagpalig-on sa pagbarog pinaagi sa kinaugalingong paningkamot sa Simbahan diha sa area.

Mga Lagda

Paggamit og Maayo ug Kaduol

Sa dili pa mosangkap og dugang nga luna sa meetinghouse, ang mga lider mosiguro nga ang magamit nga mga meetinghouse nga anaa sulod sa makataronganon nga oras sa pagbiyahe gigamit og maayo sa kapasidad niini. Ang mga meetinghouse kabahin sa balay tipiganan sa Ginoo ug kinahanglan nga gamiton og maayo dili igsapayan ang mga utlanan sa stake. Ang kawani sa pasilidad sa area makatabang sa mga lider sa pag-ila og magamit nga luna sa meetinghouse.

Ang matag area motino kon unsa ang gidugayon sa oras sa pagbiyahe paingon ngadto sa meetinghouse ang makataronganon alang sa mga miyembro; kasagaran dili kini mosobra sa 30 ngadto sa 45 ka minuto alang sa kadaghanan sa mga miyembro diha sa yunit. Ang mga Kapangulohan sa Area mahimong mopahiangay sa kinahanglanon nga mga oras sa pagbiyahe alang sa ilang mga area depende sa lokal nga mga kahimtang ug bayranan sa pagbiyahe.

Nanambong [Attendance]

Ang matag area motino sa gidak-on ug matang sa meetinghouse nga isangkap base sa gidaghanon sa nanambong nga mga miyembro ug anaa nga mga opsiyon sa meetinghouse. Ang area ug ang lokal nga mga lider mokonsiderar lamang sa konstruksiyon human sa pagtino nga kini mao ang tukma sa ekonomikanhon nga paagi, malungtaron, ug makapatunhay nga solusyon.

Pagkamatinud-anon sa Ikapulo

Sa dili pa motukod o mopalit og meetinghouse, ang porsiyento sa aktibo, mga hamtong nga hingpit nga nagbayad og ikapulo diha sa yunit kinahanglan 80 porsiyento o labaw pa sa kasarangan nga porsiyento sa aktibong mga hamtong nga hingpit nga nagbayad og ikapulo diha sa area (o diha sa nasod kon ang area naglakip og sobra sa usa ka nasod) atol sa miaging tuig. Ang mga Kapangulohan sa Area mahimong mogamit usab niining kinahanglanon nga pagkamatinud-anon sa ikapulo ngadto sa mga pagpangabang o ubang mga opsiyon sa meetinghouse.

Kinatibuk-ang Pagplano sa Meetinghouse

Aron mapalig-on ang Simbahan, ang mga area mag-andam og malungtaron nga mga master plan sa dili pa maghimo og mga desisyon sa pagdugang o pag-redeploy og luna sa meetinghouse. Isumiter nila kini nga mga plano sumala sa gi-establisar nga mga eskedyul. Ang importanteng mga bahin niini nga mga plano naglakip sa paggamit og maayo sa kasamtangan nga luna, gitag-an nga pagdaghan, ginamitan og estratehiya nga pagpahimutang sa mga pasilidad, mga kausaban sa mga utlanan sa yunit, ug kabarato. Ang mga panginahanglan ug mga plano sa meetinghouse gikonsiderar diha sa lebel sa area ug sa coordinating council.

Ubang mga Konsiderasyon

Mga Buhatan ug mga Miting sa Stake

Kasagaran, ang mga area maghatag og mga opisina sa stake kon ang usa ka stake giplanohan nga mugnaon ug kon dili kini mahimong ipahimutang diha sa kasamtangan nga luna. Kutob sa mahimo, ang mga komperensiya, mga kalihokan, ug mga miting sa konseho sa stake ipahigayon gamit ang kasamtangan o giabangan nga luna. Ang audiovisual nga teknolohiya mahimong gamiton alang sa mga miting sa stake sa pagsangkap og dugang nga kapasidad nga dili mahimo sa kasamtangan o giabangan nga luna.

Tinuig nga mga Plano sa mga Pasilidad sa Meetinghouse

Ang luna sa meetinghouse gipundohan pinaagi sa Tinuig nga Plano sa mga Pasilidad sa Meetinghouse. Ang mga Kapangulohan sa Area mosumiter sa ilang tinuig nga mga plano ngadto sa Budget and Appropriations Committee pinaagi sa Presiding Bishopric.

Dugang nga mga Buhatan sa Bishop ug sa Klerk

Ang mosunod nga mga lagda nagsangkap sa lokal nga mga lider og impormasyon samtang ang dugang nga mga buhatan sa bishop ug sa klerk gikonsiderar diha sa kasamtangan nga mga meetinghouse.

Mga Lagda:

  • Ang personnel sa Facilities Management makatabang sa pagpahigayon og pagtuon sa paggamit og maayo aron mas masabtan ang paggamit ug potensiyal nga kapasidad sa mga luna sa kasamtangan nga meetinghouse.

  • Sa dili pa mosangkap og dugang nga luna alang sa mga buhatan, ang mga lider mosiguro nga ang magamit nga mga lawak nga klasehanan ug ubang mga luna gikonsiderar nga himoong mga buhatan.

  • Ikonsiderar ang pagpakigbahin sa luna sa buhatan sa klerk (e.g., duha ka yunit matag buhatan).

  • Ang pagpa-soundproof (kisame, mga bungbong, ug pultahan) kinahanglang isangkap kon gikinahanglan aron mapanalipdan ang pagkakompidensiyal. Mahimo kini pinaagi sa insulation o sound masking systems.

Alang sa mga dapit sulod sa Estados Unidos ug Canada, ang mga sakop sa kawani sa Area ug mga Pasilidad sa Meetinghouse misuhid sa pipila ka sitwasyon sa buhatan ug gibanabana nga bayranan alang sa kasamtangan ug sa miagi nga sumbanan nga plano sa mga gambalay.