Mga Baroganan ug mga Lagda alang sa Pagplano sa Meetinghouse

“Ang Simbahan mosangkap og mga meetinghouse aron ang tanan nga mosulod makahimo sa:

Paghimo ug pagbag-o sa mga pakigsaad pinaagi sa sagrado nga mga ordinansa (tan-awa sa Doktrina ug mga Pakigsaad 20:75; 59:9–12).
Pagpanagtigom (tan-awa sa 3 Nephi 18:22–23).
Pagdungan sa pagsimba ug pag-ampo (tan-awa sa Mosiah 18:25; Moroni 6:9).
Pagtudlo ug pagpangalagad sa usag usa (tan-awa sa Moroni 6:4–5).
Pag-apil sa ubang giaprobahan nga mga paggamit sumala sa gihulagway diha sa kapitulo 35 sa Kinatibuk-ang Tamdanan nga Basahon.

Ang meetinghouse mahimong lainlain og mga porma depende sa lokal nga mga kahimtang ug mga panginahanglan” (Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 35.1).

“Aron mapalig-on ang Simbahan, ang mga area mag-andam og mga master plan nga molungtad og dugay sa dili pa maghimo og mga desisyon sa pagdugang o pag-redeploy og luna sa meetinghouse” (Mga Baroganan ug mga Lagda alang sa Pagsangkap og mga Meetinghouse [2021], ChurchofJesusChrist.org). Ang mosunod nga mga baroganan ug mga lagda motabang sa mga kawani sa area samtang mosuporta sila sa mga lider sa pagkapari sa area ug sa stake sa pagtuman niini nga katuyoan.

Mga Baroganan

Pagpalig-on sa mga Yunit

Ang pagpalig-on sa Simbahan pinaagi sa pagpahiangay sa gidak-on sa yunit ug sa mga utlanan anaa ubos sa responsibilidad sa mga pangulo sa pagkapari sumala sa gimando sa Kapangulohan sa Area. Ang mga kausaban sa mga utlanan sa yunit mahimong mopalambo usab sa paggamit og maayo sa mga meetinghouse.

Paggamit og Maayo

“Sa dili pa mosangkap og dugang nga luna sa meetinghouse, ang mga lider mosiguro nga ang magamit nga mga meetinghouse nga anaa sulod sa makataronganon nga oras sa pagbiyahe gigamit og maayo sa kapasidad niini” (Mga Baroganan ug mga Lagda sa Pagsangkap og mga Meetinghouse). Ang kapasidad sa meetinghouse naglakip sa gidaghanon sa mga miyembro (kapasidad sa manambong) ug gidaghanon sa mga yunit (kapasidad sa yunit) nga masulod sa meetinghouse. Diha sa mga dapit nga nagbalhin-balhin ang mga miyembro, ang pag-redeploy (pagdispatsar o kausaban sa paggamit) sa wala magamit og maayo nga mga meetinghouse ug mga kabtangan mahimong ikonsiderar.

Tukma nga Pagtag-an

Ang pagtag-an sa pagdaghan sa mga miyembro ug sa manambong mahinungdanon kaayo aron makapalambo og epektibo ug tukma nga master plan sa meetinghouse. Ang pagkalkulo sa mga miyembro ug sa manambong kinahanglang pagahimoon sumala sa giaprohan nga pamaagi.

Maalamon nga Pagpahimutang

Ang bisan unsa nga pasilidad sa panagtigom kinahanglang ibutang diha sa labing tukma nga lokasyon aron epektibong madangpan sa labing daghan nga mga miyembro, dili igsapayan ang mga utlanan sa stake. Ang pagsabot sa dagan sa pagdaghan, pagbalhin, ug magamit nga transportasyon mahinungdanon aron magbutang og mga meetinghouse sa maalamon nga paagi.

Kabarato

“Ang area ug ang lokal nga mga lider magtinguha og tukma ra sa ekonomikanhon nga paagi, malungtaron, ug makapatunhay nga mga solusyon ngadto sa mga panginahanglan sa meetinghouse” (Mga Baroganan ug mga Lagda alang sa Pagsangkap og mga Meetinghouse).

Ang mga area kinahanglang mokonsiderar sa tanang posible nga mga opsiyon nga haom sa lokal nga mga sitwasyon. Ang tukma nga mga solusyon mahimong maglakip sa balay sa usa ka miyembro; lokal nga eskwelahan o sentro sa komunidad; giabangan nga pasilidad; gitukod sa Simbahan, gipalit, o gi-configure pag-usab nga luna; o ubang mga opsiyon.

Mga Lagda

Ang mga lider sa pagkapari kinahanglang mokonsiderar sa mosunod kon magtino kon pila ka ward ang mogamit sa meetinghouse:

Ang mga eskedyul sa Dominggo nga mga miting magsugod sa makatarunganon nga oras ug mahuman sa tunga-tunga sa kahaponon aron ang mga pamilya makahimo sa pagtuon sa ebanghelyo diha sa panimalay.
Ang mga miyembro nagpuyo sulod sa tukma nga oras sa pagbiyahe ngadto sa meetinghouse.
Ang mga pagpahiangay sa meetinghouse, kon gikinahanglan, ginagmay ra ug barato.

Gamiton sa mga area ang mga baroganan sa pagplano sa meetinghouse ug palamboon ang lima ka tuig nga mga master plan sa dili pa mohimo og mga desisyon nga magdugang o mag-redeploy og luna sa meetinghouse.

Kinatibuk-ang Pagplano diha sa Dinaghan nga Stake o Coordinating Council

Ang mga master plan mahimong himoon diha sa dinaghan nga stake o coordinating council nga lebel kon:

Adunay mga oportunidad sa pagdungan og gamit tali sa kasamtangan o sa gisugyot nga mga pasilidad tabok sa daghang stake.
Ang mga pag-usab sa mga utlanan makaapekto sa daghang stake.
Ang gikalkulo nga pagdaghan ug paggamit nagpakita nga magkinahanglan og bag-ong luna.
Ang pagbalhin-balhin sa mga miyembro makamugna og sobra nga luna nga mahimong i-redeploy.

Ang mga manedyer sa pagplano sa area makigtambayayong sa mga Area Seventy ug sa may kalabotan nga mga presidente sa stake aron sa pag-andam sa mga rekomendasyon alang sa pag-aprobar sa Kapangulohan sa Area.

Stake nga Lebel sa Pagplano

Kon magkonsiderar og panginahanglan sa pagdugang o pag-redeploy og luna sa meetinghouse nga wala malakip sa master plan sa dinaghan nga stake o sa coordinating council, ang manedyer sa pagplano sa area makigtambayayong sa tukma nga presidente sa stake aron sa pag-andam sa mga rekomendasyon alang sa pag-aprobar sa Kapangulohan sa Area.

Pag-aprobar sa Proyekto ug Pagpundo

Ang mga proyekto bahin sa bag-ong luna o pag-redeploy nga makita diha sa proseso sa pagplano mahimong isumiter isip kabahin sa tinuig nga plano o pinaagi sa proseso sa dugang nga pag-aprobar.

Mga Tahas ug mga Responsibilidad

Kapangulohan sa Area

Ang Kapangulohan sa Area mohatag og giya alang sa mga estratehiya, mga desisyon, ug gitinguha nga mga resulta sa pagplano sa meetinghouse. Ang Kapangulohan sa Area moila og piho nga mga area nga tutokan, motudlo sa mga Area Seventy bahin sa doktrina ug mga baroganan, ug moaprobar sa mga prayoridad sa kinatibuk-ang pagplano ug kataposang mga rekomendasyon.

Area Seventy ug Lokal nga mga Lider sa Pagkapari

Ang Area Seventy motudlo sa mga doktrina ug mga baroganan ngadto sa mga presidente sa stake ug sa misyon ug makigtambag usab sa mga kawani sa area. Ang Area Seventy, mga presidente sa stake, ug mga presidente sa misyon morebyo ug mohatag og feedback bahin sa mga master plan sa meetinghouse. Isumiter nila ang bisan unsa nga mga kausaban sa utlanan sa yunit ngadto sa Kapangulohan sa Area alang sa pagrebyo.

Direktor alang sa Temporal Affairs (DTA) ug mga Kawani sa Area

Ang Direktor alang sa Temporal Affairs (DTA) ug ang mga kawani sa area mohatag sa eklesiyastikal nga mga lider og tukma nga mga datos, mga report, mga pag-analisar, ug mga rekomendasyon. Pinasubay sa direksiyon sa Kapangulohan sa Area ug sa Programa sa Meetinghouse sa Area, ang manedyer sa pagplano sa area mag-andam og lima ka tuig nga mga master plan, nga maglakip sa mga aytem gikan sa coordinating council, dinaghan nga stake, ug stake nga lebel nga pagplano. Ang manedyer sa pagplano makigtambayayong sa mga lider sa pagkapari aron sa paghimo sa gipahibalo nga mga desisyon ug sa pagpinalisar [finalize] sa mga rekomendasyon.

Pahinumdom: Ang termino nga kapangulohan sa stake nagpasabot usab ngadto sa kapangulohan sa district.